PHANTOM-文化培育

第一次去又一城FESTIVAL GRAND CINEMA(MCL院線)，真係幾gand喎。小食部有紅白酒,以及生啤龍頭，可惜貼住售罄。

今日我哋睇既係THE  PHANTOM OF THE OPERA at the ROYAL ALBERT HALL 25週年現場版(2011年)，因為我同台灣女生都未曾完整睇過，只係從金田一及電視翻播既電影版得到零碎劇情。

原本諗住兩個大人睇，巡例問吓幸男，點知佢話ok，結果一家三口挑戰179分鐘既西洋大戲。

銀幕好細，好似去睇皮影戲咁……座位反而太多行，搞到我揀一半行距都失預算。播到一半，幸男已不時望錶，更吃不消臨尾謝幕出現影分身Phantoms(美國，加拿大，意大利，英國)同Sarah Brightman多重唱主題曲。

晚餐係又一城既AMARONIS食，咁啱都係有大型吊燈。剛畢業時，與同事去過呢間食過一兩次，當時嗌啲咩都唔係好記得。人家讀U時都有嚟過食，雖然網評話水準及服務不如當年，但人家都係想去懷緬下。

PS:係LOG-ON買咗個mouse pad，好難得搵到個啱size又夠格調既款式。

CROSSANGE追看中

今日睇到《CROSSANGE天使與龍的輪舞》第16集，雖然同係SUNRISE公司出品，但無諗過會拎CYBER FORMULA SIN出嚟惡搞。 

凰牙同v ASURADA一齊以二段升壓模式衝線，絕對無於原作出現。

好耐之前曾經想於網上睇呢齣動画，但礙於最近千值練公開VILLKISS商品計劃，所以令我重燃窺探呢齣集賣肉兼科幻既作品。

女主角Angelise輪廓分明，至少唔係大眾相到會唔記得個樣。機械設定集機車騎乘，飛行射擊及機械人作戰，全中本人既愛好。

千值練既VILLKISS，望落都幾細緻，確實有點心動。動畫故事中途有轉折位，以為龍族係入侵人類，其實係人類捉咗龍族既祖龍(以作為魔法既動力)。女主角一眾無魔法者(NOMA)所殺既龍族，會被國家秘密回收其體內既晶石，為祖龍續命。

PS:睇0黎女主角會聯同龍族去對付幕後黑手-操控時空之男。

MIJ QD OLED TV

今日放假，一片心係屋企等收新電視。一點四個字收機，傍晚有師傅嚟安裝。師傅聽到我既要求(掛架升高一啲)，用拉尺度梳化既高度，再俾建議高度。師傅話佢今日已裝好幾部呢款機，我答佢我都好似其他客咁趕最後一批日本制(往後係東南亞)既SONY OLED TV，而且換代前席平咗近四成。

嘉耀傍晚嚟襯高興兼提取SONY SOUNDBAR，順道被誠邀晚餐。

用開既A8F已服役將近6年，2023年出既A95L菜單介面非常流暢，開機何以直入NETFLIX，唔好似A8F咁lag住咁等一餐。開番最近睇既NETFLIX動畫嚟作比較，畫面亮度同顏色都有明顯提升。

遙控亦的骰咗，最正係佢有背光，一感應到被提起就會著光。雖然同係SONY機，但介面已有不少改動，畢竟由當年既ANDROID TV變成而家既GOOGLE TV嘛~

母親節

一家早起身，一齊入元朗yoho睇09:45場次<<The Fall Guy>>。笑料，動作，飛車，愛情，大家都睇得開心，幸男應該覺得好過<<狂野時速 10>>

晏晝係王子私房菜飲茶，行陣就搭輕鐵番屋企。幸男去補習，我就守候住電話，因為要收貨。

雖然估到我出去攞花，但台灣女生都係欣然接受無新意既善意。

幸男補完習直取晚餐地點會合我哋，揀區內餐廳嚟遷就幸男既時間。兩母子之前黎食過，覺得OK。

放低番皂花，一家三口自拍合照。其實我係坐係飛標區既戶外高身吧枱位，因為太爆場，所以加位以方便唔介意既客人。

點完餐，一齊碰杯，母親節快樂~又話食店生意唔好，但母親節檔期間間都話FULL BOOKING，下年都要早啲籌備。

無鱸魚但有煎盲鰽柳，現今市道下，食材都要以經濟實惠為主。

幸男既不二之選-牛扒，美國紐約客，變咗澳洲牛。

人家預早留定既威靈頓牛，稍嫌蘑菇松露味唔夠。食到中段，問侍仔有無Long Island(drink list 上無)，待仔問我要否睇吓價錢先，結果都係百零蚊，畢竟少人嗌。

番到屋企，應主角所求，搭腳架合照，向母親致敬。

城寨

原本擔心要一個人去睇《九龍城寨之圍城》，好在嘉耀話可以收工一齊睇，始終台灣女生未必有時間夾到我嘛。由2008年小說蛻變2010年港漫，再進化至2024年上映(2021開拍)電影，淨係個過程已值得入場，仲未計有份參加康城影展。

古天樂飾演既龍捲風一如預期般型爆，劉俊謙亦非常搶眼，充份表現但林峯既轉型確實令我驚喜。動作，俠義，明快既節奏，既相熟又夢幻既時代背景與物景，正恰中年男既口味。

睇戲前係和民快食個晩餐，睇完戲交收啤酒籃就騎羊歸家。

PS:茶餐廳晚餐都要近一百，特式餐廳好似俾得gur啲。

Check車&陪太子聽講座

十點半多啲去到太子車行放低愛駒作保養，行番去始創中心既星巴克坐低打躉。 環保政策之下，飲杯咖啡都變咗係盲杯。

咖啡陪韓劇，坐咗個零鐘就行去食晏。經過呢間多年既舊式時裝店，忍唔住用FLIP 5嚟影低佢，因為老店一間又一間咁消失中。

例牌係花園餐廳食，上次(12月)都係度同嘉耀一齊食。

唔算太熱，徒步行去深水埗，沿途發掘吓舊物。

以前探完阿婆阿公(番鬼同霍氏)搭60X一定會經過呢個公園，今次就行入去近望水簾。

去到黃金，見到呢一幕當場崩潰，早知唔洗叫台灣女生去日本旅行時買......

回程搭地鐵，愛駒已係側巷等接走。店員話極力子未算係跣，仲可以行多一陣，我自己亦打算年尾換，始終平日燈位開停多。記得上次行咗萬零公里就跣極力子(逆油筒停燈位)，而家已三萬公里。

享受高速巡航回程，番屋企冚好車，放低戰利品，就搭巴士去學校會合幸男。

六點開始既澳洲遊學團簡介，原本話要成個鐘，結果半個鐘就可以走人。

貪就腳去咗安定友愛商場（愛定）既香港達人食晚飯。

之前幸男好抗拒足球主題既遊學團，講到尾其實係無伴，今次學校搞既遊學團就唔怕無熟人。

PS:怕落雨所以無騎愛駒，如果唔係落雨的話，就十足小學時代回憶。

騎羊兜風

應阿基所約，夜晚趁好天，一齊出車兜風。臨時搵地點落腳，牌坊集合時set好導航目的地為"釣魚灣"。嘉頓燈位有臨時修路工程，好在左轉好近就有個廻旋處。

廿分鐘就到埗，車泊埋路邊，徒步行落去就係碼頭。碼頭當然有人係度釣魚，但"釣魚灣"係咪多魚啲就唔知。

燈光下偶爾見到魚毛群，兩條友望海飲住zero嚟交流睇牙經歷。原本諗住去青龍頭，但見網上既圖片好似無乜街燈，所以都係留番下次日頭至去探路。

PS:回程攞車前，見到既塗鴉公仔都係有牙。

間歇雨天

落咗成個幾星期雨(慶幸番工放工時間係細雨或停雨)，趁今日有短暫既半晴半陰，將屋企囤積既回收品拎去綠在屯門。

回程去相熟茶記食晏，今次帶定矽膠飲管，唔洗再用浸到爛既紙飲管。

疫情前用既環保餐具，再度出街用，呢幾年都係屋企用(外賣走餐具)。疫情期間，大家都怕攜餐具變傳播媒介......舊年年初口罩令不再，有不少人擔心無口罩下既感染及散播，而家大眾取向當COVID係流感C。

夜晚番老家黐餐，幸男補完習就自己搭車去嫲嫲屋企。

老媽除咗準備孫仔至愛既蟹，仲應幸男係whatsapp家庭群組所託-鹽焗雞粉醃既焗雞翼。

PS:回程用愛駒載幸男番屋企，幸男高咗，坐貼椅背，膝位都到我腰位。

遲來的智慧

上星期問台灣女生會否約洗牙，無諗到咁快就有期一齊去洗。十年有多無洗牙，原來左上方悄悄長出智慧牙。

"少少蛀，唔洗補，刷牙刷入啲"

"刷牙係咪好大力?法瑯質有啲薄"

PS:睇黎電動牙刷唔好校到最大輸出至得