送機+接機

一家三口打的入機場，因為今日係幸男跟學校既澳洲遊學團之出發日。

之前叫幸男去台灣搞既曼城足球遊學團，又話嘥錢又話無必要，今次學校搞就去。說穿了，咪又係無friend陪就唔去......

趁未最後召集(校方)，台灣女生操FLIP 5自拍合照。

十一日至番香港，人家問幸男要否飲杯港式檸茶，結果幸男欣然接受呢杯太興凍檸檬茶。

目送幸男入閘，我同人家行去機場酒店鄰近既The China Coast Bar + Grill坐低飲嘢打躉，因為夜啲要接德輝一家一。

呢兜nuts令我諗起以前落酒吧既美好時光……

人家話網上評價唔差兼人均消費$101-200，但願來係無餐嗌，牛扒盛惠$598。

燒春雞盛惠$298，人均消費應該係指一杯嘢飲已爾。

由於航班延誤，我哋要比預期坐多一個鐘，好在無限時交枱，二人係梳代位睇netflix(電話)打發時間(結果我飲咗三round)。

00：30發現標家庭，大喼又大袋，要分2架行李手推車。

Flip6 既自拍係無得輸既，7個人都順利入鏡。一齊去的士站，分2架車。元朗放低德輝同行李，我同人家坐原的士番屋企。

PS:辛苦人家咁夜訓，聽日要早起身番工。

YF-21

台灣女生食晏時，幫我去市中心間玩具模型倉望到仲有超合DX既YF21賣，於是依我吩咐用我電話冧巴留貨（我唔會用女人錢嚟買玩具）。

舖頭交收完就去燒肉店會合倆母子，揀咗中價放題套餐，“烚菠蘿”生啤任飲～

舊版YAMATO同新版BANDAI之間爭扎多時，睇咗好多YouTube 介紹短片，最終揀咗新設計既YF-21。拆盒只係check過齊件同試擺飛機降落架(唔記得影相)，就放番入盒，等清假得閒啲至慢慢玩。

當初糾結之處係Battroid背包，BANDAI版(右)無10年前YAMATO版(左)咁緊貼，但手腳比例同花紋細節係完勝。以前覺得YF-21唔係正統Valkyrie既變種，但大個咗反而覺得將祖拿達風格機械人融入變型戰機係幾特別，同切合第二男主角為縮細版祖拿達人既設定。

PS：回程將成盒YF-21綁掛於後座椅背扶手，令佢好似飛番屋企咁。

家品採購日

今日同台灣女生出沙田血拼，第一站先去食晏。人家話係巴士度，有個著住西班牙波衫既男人啤住佢。

跟住就去IKEA買防滑膠地墊，戶外木地板。由於太重，所以買埋架買餸車黎載貨。我同人家講"拉住佢好似老咗10年...…"

其實今日既主力係去搞全屋燈具LED化，因為主人房舊有既光管燈具燈罩扣已經斷咗，所以一次過換晒用咗12年有多既燈具。3大2小，咁又兩萬，唯有當貴買平用，唔洗成日換光管，兼間屋光猛啲。由於無現貨，約住2星期後(幸男遊學團時)貨到再約安裝。

臨尾順便去Ulferts行吓，睇睇吓就試埋，結果揀咗呢一款有電動腳墊梳化。屋企張梳化係疫情時買既陳列品，4年期間陪一家渡過唔少電視及睇波時光，皮革(尤其係角位)已經殘破，顏色亦都有啲變黃。由於係訂製家俱，可以自選皮色，但要等到12月至到港(當係一家人既聖誕禮物)。

行到好攰，搵咗間咖啡店入去歇腳。明明嗌咗件蛋糕，但等咗好耐都未見上枱，同店員反映後得知漏單兼賣晒…雖然埋單有九折(變相免加一?)作歉意，但感覺唔太好兼餐牌選揀唔多，下次都唔會再去。

搭263番到去V City，買埋火鍋配料，再的士番屋企。巴士上訂定個外賣雞煲，夜晚安在家中用餐，準備為英格蘭打氣。

壽司郎+壞蛋奬門人4

是日放假，同幸男一齊搭巴士出市中心排壽司郎。原定係兵分兩路，我去華都分店，幸男上市廣場分店，結果華都分店唔洗等位，幸男被召回會合。

我哋邊嗌邊食住等台灣女生收工過黎，因為用餐時間得90分鐘。

食完晚餐就趕去睇<壞蛋奬門人4>，有笑位亦有致敬位，但無咩新意咁囉。幸男話第3仔好睇啲，起碼minions既戲份多啲，多啲搗蛋同搞笑位。

好想換個J Cruise 3

一度懷疑SHOEI J Cruise會出第三代，今日卒之係網上搵到SHOEI既歐洲網頁有所介紹。外型上與第二代相若，賣點為更大既換氣量以及更大既大陽濾鏡。

網站以最新TMAX黎襯托J Cruise 3，其實用開既J Cruise Corso已經換過一次並已服役四年多。舊年買俾幸男同台灣女生共用既J Cruise II，只得ADAGIO拉花買得落手。

Black, Matt Black, Matt Metallic Blue, White都唔及呢個Basalt Grey合我心意。歐洲網站話"SOON"，日本網站就仲係得J Cruise 2，希望早日見到日版既拉花。

邊睇F1邊玩CYBER FORMULA

一家三口一齊睇英國站F1，忽發奇想，不如邊睇邊玩我架SUPER ASURADA AKF-11（Hi-Spec）。

買咗年幾都無正式玩過，只係拆過盒check過無爛同齊件就入番盒，今次係第一次變成AERO MODE。

BOOST ON!後轆既側擾流板總係唔太fit位，少了一份完美，因為我太喜愛CYBER FORMULA。

業餘攝影

公司三人籃球賽，對上一次去睇係拍雄仔番工既時代。今日去到，俾ANSON問我"猷兄，點解你會係度?"，好似係對我講"呢度唔係酒吧喎"。

因為知道栢然有組隊參加，細問下得知比賽日子，所以帶相機嚟為大家打氣。

熟悉既面孔，"嚟影相支持吓大家嘛~"相同既對白作自我陳述。

帶左兩支鏡，SEL100400GM只係影咗幾張(因為拉得太近,難構圖)，其餘都係用TAMRON 28-200 Di III RXD嚟影。

自己以前(F.3)有黐星級同學打3對3，明白如果有張相留念既話，確實會令容易淡忘既一場波，註下一個記號。

漸進鏡(人)，配六年前既相機，比以前影幸男細個踢波時辛苦。

24.0MP於ISO5000(1/250s)之下，室內場下既成像唔算出色，但應該係影到iPhone影唔到既畫面卦?

影影吓有個後生仔行過我面前，問"你係咪幸男爸爸?"。影張相俾幸男同台灣女生認吓，原來係幸男以前既藍天隊友諾希，佢係等陣間打排球。

原本幸男話嚟一齊睇，但佢見我要留到九點就話自己去食飯先，我叫佢食完直接番屋企就算。"一個人的志趣，是勉強不的"，期間我見幸男無睇比賽，只係望電話打機，就打發佢走。

散場係運動場外騎愛駒番屋企，希望大家喜歡見到自己熱血追夢既畫面。

PS:睇嚟SLAM DUNK同黑子籃球都未能令幸男對籃球有共鳴

10年

今日將康楠代淘既茶壺手抽，同花園舊蚊香豬仔座合體。仿木既主題，毫無違和感。原本手抽中間既幼木條，已經斷爛，每次拎起時都怕手抽唔夠力。

個蚊香座係10年前去九洲旅行，係OUTLET度買，幸男當時仲讀緊啟思。幸男已經係中二生，昔日既"幸"褔"男"孩笑少咗，唔知佢可唔可以做到俾到"幸"褔別人既"男"人呢?