騎羊購物

趁轉季時間，騎愛駒去東涌outlet睇吓有咩衫同鞋買。衫褲就無咩心水，結果係GEOX買咗呢對啱出年夏天著既粗著鞋(電單車)。夏天瀝青馬路既滾燙，絶對考驗鞋底既耐用性。

回程係市中心停低買咖啡外賣，為避塞車而行下路，意外地係富泰燈位，被呢個畫面吸引著。

Tineco->Philips

今日託台灣女生收Philips XW7110吸拖機，因為舊既Tineco S3舊電就死。原本諗住買Tineco S6，但遲遲都無行貨代理既2年保養，所以重投Philips陣營。

收工番屋企試嚟快拖客廳，無諗到雙滾刷比單滾刷既深度反而淺咗，但直立企定就無咁穩陣(試過向一邊跌)。拖完既地面都無Tineco S3咁乾爽(塊索水毛巾重咗)，但潔淨力相若。另一樣唔慣既係無自動模式，如太污糟的話，要手動轉強力模式。

新機既好處除咗清水同污水箱大咗，唔洗密住換水倒水之外，就係唔洗另買消耗性filter，兼可以水平攝梳化底。

PS: Price.com搵到間同區既店舖包送貨，唔洗另俾順豐，又比HKTVmall平兩舊。

Initial D

86(三門)對86(兩門)，拓海係信司既主場作下山對決。後追既拓海被信司讓位過頭，再被信司尾隨過彎扒頭。最後拓海以高轉數既優勢，於最終彎成功壓過信司。

由於高轉數維持得太耐，引擎不堪負荷，當場爆偈!

失控既86隨即打轉，信司為免相撞，亦扭軚作廻避。

力挽狂瀾，拓海成功修正失控，並入後波衝往終點方向。

由於前車只係打轉半圈就直線以倒車離開，信司有足夠時間打轉360度作修正車線。

拓海無論車頭定係車尾，都係早過信司過終點綫，成功完成Project D全日本山路制霸既宏願。卒之完成6季既頭文字D，畫質係愈黎愈靚，但後期啲歌就無咁搶耳。故事亦少咗搞笑橋段，偏重賽道策略。

當初本著想了解MF Ghost男主片桐夏向既師傅-藤原拓海，但一睇就欲罷不能，尤其係TRUENO(時速過百)既chime sound響起時。

PS:期待MF Ghost第二季係NETFLIX上架~

THE 仮面ライダー展

今日同康楠及占兄一齊去香港站既THE 仮面ライダー展，其實我哋唔係第一水就去，因為九月尾開鑼。我哋清一色買最平既飛，唔要特典同精品，只係各自有張拉打相框膠片(盲袋隨機)。

一大張Backdrop，入面有唔少配角拉打作填海之用。入場時職員姐姐同我地講，只可影立體展品，平面既展板及電視播放既相片及短片都唔可以影或錄。

我心目中昭和時代既代表，當然係Black!展品既衫好似係動作場口用既款式，Black既皮質被彈性絲絨所代替，反而Shadow Moon就無咁唔對電視所見既式樣。腰帶King Stone外既面蓋，Black都係缺少Shadow Moon有既紋埋。

RX系列一字形排出，太陽之子RX公仔既大髀好似太瘦，支撐唔起條褲。憤怒王子Bio Rider最正路，悲傷王子Robo Rider既腰帶同有髀外甲有點兒戲。

平成時代，古迦成功復興拉打熱潮，直至而家都仲可以一年一代新拉打(好似特攝超級戰隊)。除咗古迦，我既另一至愛一定係FAIZ，反而龍騎同亞極陀既造型及故事都留唔住我既心。

平成後期既拉打展區，有訪客帶埋拉打玩具道具嚟同心儀拉打合照。我就無咩邊個啱心水，Drive其實都唔錯，但佢斜孭條軚實在太似風紀，仲要係多變既武器之一，實在無法追睇落去.....

最後段有各DX変身ベルト陳列，望望吓有啲心動買番CSM系列既FAIZ GEAR 2.0。

私心之下，都有為古迦條腰帶影相，自己一直期待BLACK會出番條CSM。

精品區有HOT TOYS既展品，Black Sun既劇情絶對可以cut走一半。

睇中呢件針織logo既毒tee，乖乖預訂等貨。康楠同占兄就分別買咗RX同亞極陀既Car Sticker。

拉打連儂牆，感觸。

一齊去咗同商場既日本美食橫町(新food court)，趕得切壓線食午餐，啤酒就正價另上。

康楠買多咗支清酒嚟助興。

燒牛肉定食，有湯有茶碗蒸有白飯同主食。

話晒仲有支清酒未清，走去嗌串燒(明太子雞翼，芥辣牛肉及牛舌)助酒。

去廁所時經過間甜品檔，結果捉咗占兄一齊去夾買2件(有折)兼加$10多杯凍啡俾佢。Tiramisu麻麻地，下次都唔會試其他款式......

番到屋企試中碼毒tee，無諗過大到跌膊(日系oversize?)。開心有伴一齊去拉打展，等天氣再涼啲就搞吓花園燒肉團。

PS:原來兩位對拉打女優甚有心得，同埋唔記得咗入場前合照。

不同視點，不同味覺

花園擺放既手推車日曬雨淋13年，轆都甩埋，都係要換車，多謝德輝呢份入伙禮物。

由於鐵車太重不利綁於愛TMAX後座，所以徒步沿青山公路去藍地大街，並影低平時坐電單車望唔到既角度。

唔知阿強聽誦經既位仲係唔係入面呢?

係九記買咗唯一一架同SIZE既手推車，過埋對面間籃子咖啡店買杯凍Cappuccino，貪佢可以隔玻璃望到泊係門外既"新車"。

順便買條廁紙番屋企，無比較無傷害，新車推得好順兼唔嘈，無舊車就散就散既感覺。

今晚有Brenda家訪(入開屯門)，台灣女生係市中心會合佢一齊買火鍋食材。

新鮮海產，係TASTE既海鮮檔買，$688一份(龍蝦x1，松葉蟹x2，扇貝x2，鮑魚x2，活蝦x4)，真係好抵。平時頂多係急凍長腳蟹配活蝦，今

PS: 是日笑點係幸男答Brenda，"爸爸去咗買車"。

幸男生日

 

自幸男鍾意食大蟹開始，每年既生日飯都係滬江食大閘蟹餐，今日都唔例外。早出門既我，先係旺角地鐵站交收PS5版GT7，作為幸男既生日禮物(再一次係置樂買唔到GAME俾幸男)。

幸男話都唔洗年年都出嚟食，但我同人家都會堅持呢個大閘蟹生日飯，因為我哋都好想食嘛~

例牌同大閘蟹合照。

星期五晚上，食客入座率都高，主廳無咩吉枱。

14歲了，得意童真時期已過，對年青人及家長都係新階段。

番到屋企就set好個陣影相，之前買落既生日咭s都拎晒出嚟。最好笑係張跑車生日咭，播咗一次發聲就無電，只得頭一秒既撻車聲就電壓不足。

媽媽準備既禮物係特別版(Oasis)曼城波衫，不過今屆曼城都危危哋......

"要唔要借對皮手套比你增加投入度?"，幸男婉拒了。

PS:身體健康，立己立人，尋夢追夢

不愛DIY的男人

廚房抽氣扇服務十二年卒之跪低，PANA SHOP賣9舊，PRICE.COM區內店平3舊，咁當然係揀後者。食過外賣午餐，騎愛駒去工廠區交收。店舖既藍色扎繩好幫得手，加埋自備既尼龍繩，將貨綁係後座既扶手同椅背。

無技術之下，器材搭救，慳番既錢夠買隻日本制既電線剪鉗(一舊有找)。

預先影定電線顏色，務求用最唔用腦既方法去完成DIY。

原本有諗過搵師傅裝，但又想慳錢兼當移民既小考驗(大量DIY)，所以上YouTube睇片自學。

雖然簪線都要每條試第三次至成功，但總算完成一條龍既工作:採購，貨運，安裝。

台灣女生牛一

今晚同台灣女生出去上環食生日飯，由於8月至去完法國旅行，所以揀咗間意大利fusion餐廳。

其實搵咗好耐至book呢間餐廳，因為無咩中價既選擇，再好啲就係酒店。揀咗個咩都有既Tasting Menu，人家飲汽酒，我就揀白酒。

A7III下既Iberico Ham 48 Months，比Flip6來得好。

原本諗住嗌生蠔，可惜無貨，揀咗Scallops Crudo作開胃菜。

Burrata Pugliese。

Padron Pepper。

Seafood Fedio-西班牙大紅蝦，蕃茄濃汁短麵，墨魚，壽星女揀既主食。味道唔錯，但可惜得兩隻蝦......

訂枱時註明係生日飯，所以上甜品時有祝福字句。第幾次同你過生日飯都好，最緊要係你啱食就好了。

番到屋企，人家將今日係ifc間PIERRE HERME買既macaron砌個生日甜品盆，兼收過幸男送既生日禮物。一如幸男所講，媽媽會開心過爸爸。

PS:由於晚餐唔同幸男食，所以晏晝同外母一齊搵幸男食晏。另外，由於我用whatsapp嚟book晚餐張枱，搞到報到攞枱時個名唔係乜生......