2025家中擺拍

台灣女生放工買定蛋糕嚟迎接2025年，屋企個鐘係校快10分鐘既，所以可以夠時間擺拍新年合照。

新一年既願景:

-屋企人身體健康

-海外海內既朋友們都生活安康

-追回脫稿既blog

-J CRUISE出啱我心水既拉花頭盔，淨色以外既WHIZZY唔係咁得

-Switch 2既真來臨，大前題係有時間打機......

跨區外賣

雖然唔知係咪聖誕晚餐堅滿座，但要就幸男要溫書兼想宅係屋企睇電視，所以我奉命跨區外賣。人家係網上見位於荃灣既VISION 8既西餐好似唔錯，所以我就跟住導航，用半個鐘去攞外賣。

泊正係舖位隔離，行入去見都只係得一枱吉枱。被問"係咩平台0架?"，我答:"自取"。

原本人家話可以網上訂兼有司機送貨，但落單時發現無咗呢個選項，所以我帶埋個保溫袋出去，啱啱好可以塞晒3主食兼3餐湯落seat位下既收納格。

回程時見到有真.外賣車手，忍唔住要係業餘視角影低呢個有趣既畫面。

半個鐘番到屋企，人家見只得幸男個主食黑椒汁，無咗我同佢既紅酒汁。人家打去舖頭問，原來黑松露威靈頓牛係無配醬汁(但落單又有得揀)，只係俾漏咗人家果份蘋果木燒西班牙黑毛豬鞍扒既紅酒汁。由於太肚餓，當我影自己果份時，幸男已𡁻緊佢份慢煮安格斯配半隻龍蝦尾。味道唔錯，唔太重味得嚟，外皮亦酥脆。最驚喜既係配菜-Gratin Dauphinois，8月去法國旅行試到既味道。

PS:早兩日收到老豆既短訊，話電話叉電壞左，叫我帶個新既上院舍。晏晝買埋下午茶上去，原來只係電線壞，好在有聽人家講帶埋條線。精神好咗，但依舊無主動講自己，只會聽訪客既生活滙報。

季節性童真

月頭係City Super買俾自己既聖誕月曆零食，今日已經食到最後一包既，但唔記得影個紅色包裝。

上網搵番官圖，原來我果盒少咗個封面。其實當時都係得番last一盒，下一年要11月就去望吓有無得買至得。

PS:今晚要番夜......

• Classic Caramel popcorn x2
• Mint Chocolate popcorn x2
• Caramel and White chocolate popcorn x2
• Speculoos popcorn x2
• Cinnamon and Custard Roll popcorn x2
• Toffe Apple and Cinnamon popcorn x2
• Salted Caramel popcorn x2
• Orange Chocolate popcorn x2
• Bucks fizz popcorn x1
• Caramel and Belgian chocolate popcorn x2
• Double Chocolate popcorn x2
• Banofee pie popcorn x1
• Candy Cane popcorn x1
• Milk chocolate popcorn bites x1

科學品酒

今晚番老家做冬，帶埋尋日收貨既Vinxper Expert電子醒酒器試用。效果唔錯，校好咗90分鐘既設定，同我之前淨用酒杯唞氣個半鐘既狀態相若。

每次番老家食飯都係壓線到達，所以唔夠時間俾支酒唞氣，食到一半都未開盡杯中物。上網有介紹呢款第四代電子醒酒器，計一計數，用到20次都回本丫，話晒酒樓食肆都俾開瓶費嘛~

PS:有感而發，以往國際化時代既香港人概念-時間就係金錢，但係而家降級消費既大環境之下，大家係用時間去慳錢。

愛駒保養

經過舊年10度低溫出太子既經歷，今年唔再12月尾至check車。無咩塞車，準時10點半到車行交低愛駒。是日目標係基本換油，油隔同換seat位油壓臂+/-換極力子片。

照舊係始創中心Starbucks坐陣，就啱時間落去花園餐廳食晏。

食完晏就落咗始創地庫既CD Warehouse 打躉，見到有佐滕健既電影藍光碟特價。

近年黑膠碟既完美Analog曲線再次成為熱話，但無諗到GUNDAM SEED都有出埋一份。原本諗住要換極力子，但師傅話仲可以用，變相可以早啲攞車。當初新車行咗萬1公里就要換(因上轉油筒以減速停燈位)，而家已經行咗2萬2。

晏晝番到屋企就快速抹車，唔覺唔覺就天黑，夜晚一個人兜去藍地食晚飯。

星期一至五既定食之選-西京燒比目魚定食，我好怕重複餐食，所以一星期只會幫襯一次。

新界放羊

食完晏就騎羊出沙田，因為台灣女生訂既迷你麻雀已經到貨。

櫃枱交收時見木盒其中一個扣歪咗，店員話番得一盒新既......為咗趕星期日既大學書友聚會，唯有換咗陳列品個套既外盒了事。

排隊時見到呢個座枱燈幾靚，以前讀書既九大行星已變咗八大。唔熟路，回程兜多幾個燈位至上番高速公路，唯有當另類行街。

跨區高速公路過後，臨番屋企前係市中心買過咖啡外賣就屋企。約咗阿基係公司集合，一齊出車去青龍頭兜風。到埗已五點幾，可惜揾唔到望日落既位置，唯有齋係深井聚水塘影張相(鏡頭有一對男女正在攞景影相)。

由於無街燈，所以要趕天黑之前出番去大街，照舊跟住阿基車尾行，唔好嘥咗佢FORZA加裝既電話(導航)架嘛。

撞正放工時間，市中心開始塞車，我自己行下路，係紅橋至滙入番主路，但唔見得快過全程行公路既FORZA。

試過真

網上搵咗好耐至係KING'S WINE CELLAR買到CHATEAU COUTET紅酒現貨，唔洗海外訂購等兩個月。

咁著意呢支酒，因為8月去法國旅行時參觀過呢間右岸既傳統家旅酒莊。試飲時覺得唔錯，買咗一支番香港，留俾成年後既幸男試飲。

左邊果支係酒莊買既本地label，右邊係今日收既外銷label。

頂部既鍚紙包裝亦有分別(左法國，右外銷)。

經過定時間距試飲，真係好似網上介紹一樣，要個半鐘至進入最好狀態。上次試飲都唔夠正常一杯既份量“試當真”，今晚卒之可以“試過真”。

探路

放假天，食完晏就騎愛駒去鶴藪探路，因為之前有睇過電單車去露營既介紹。晏晝三點幾已見到有人紮好營，閒日咋喎~

上多一層就係另一個平地可以紮營，唔知夜晚可以望到幾多星星呢?

愛駒泊咗係單線雙程既路邊，40分鐘既車程對初心者唔算大投資，最緊要係可以黐人哋既煮食架生。

行一段直路就到咗閘位，話你知汽車唔入得，除咗政府部門。

閘位行前啲就可以沿右邊梯級上營地，就算係泊車位孭住行裝上嚟都應該可以應付得到。

PS:夜晚同外母出街食，因為外母話想食壽司～

可以伸腳既梳化

上星期收到Ulfert既電話，原定月尾至到港既梳化，提早到埗，變想提早收聖誕禮物。2.5座位，由左右單完組合，師傅要拆開臨時腳板，再作組裝。

幸男試坐新梳化嚟打GT，我問佢坐姿似唔似揸F1？雖然佢答似，但佢揸緊既係房車……

新梳化無舊果張咁淋，希望可以糾正幸男既蛋黃mode。試真啲至發現其中一邊既頭枕未能靠到最前，睇嚟聽日要打電話去搵人跟進。

PS:之前去Ulferts俾尾數時，係City Super買既啤酒中，暫時試到呢款比較出色。下次可以騎愛駒，兜出去補貨。