自閉平安夜

平安夜SOLO DINNING，沙津就係雪櫃有既食材，魚生係晏晝出車做回收之後，係市中心買既。

收拾餐具之後，一個人開NOW睇無痛俠炸SOUNDBAR。劇情簡單，純打鬥動作片，唔洗用腦。

晏晝經過玩具模型倉，見雙星MIJ剪鉗只係$198，GodHand($368)要成double咁滯。

平時少砌模型，呢盒GUNBUSTER都係大佬送俾我。咁貴既剪鉗，少用就會好嘥，所以一直猶豫。

PS:買咗十幾年既購物袋，都開始有薄位就穿。睇嚟要物色吓替代品，可以掛後座椅背實在太方便，載回收品或唔入SEAT位底既玩具都fit。

愛駒保養日

上星期約咗今日番原廠換頭尾胎，因為揭開維修簿至發現3年無換胎。好在著咗雨褸，荃灣一段小雨。

行去旺角新世紀廣場，突然灑一陣雨，要直衝一段直路。直取頂層一田裏面既MOS Burger，一心嗌藍芝士松露薯仔和牛漢堡，原來只做外賣。店員話可坐一田啲枱櫈位(兩張)嚟食，結果成功等到個搭枱位。無想像中咁Blue Cheese，重口味啲就好了。另外，唔覺食咗松露……驚喜反而係杯凍檸茶，茶底色好濃，一度誤以為係奶茶。

尋日已擬定等整車時間既活動，就係搭東鐵去大圍既圍方。對上一次嚟大圍，係4月去覆診睇膊頭。

今日既主要任務，就係去圍方既Dalloyau買25粒裝既手工朱古力。原本諗住先俾錢留貨，但卡機未能運作，所以相約一個鐘後至碌咭兼提貨。

唔想四圍蕩，揀係同層既中庭位置既cafe坐低。

ICED MOCHA配TCM Toys Channel玩具不設防95集，輕鬆打發一個鐘，去番Dalloyau俾錢交收就搭東鐵旺角。

落始創地庫既CD WAREHOUSE打躉一陣，打去車行問吓，原來另一邊正打緊俾我話可以攞車。新胎既咬地力，令我U turn信心提升。換番Liqui Moly機油，3千至4千轉既"諧震"聲不再嘈吵。

食晏時收到車行電話，話前轆啤鈴同頭尾胎咀都夠期，話晒都七年車齡嘛。連續三次非基本機油更換既保養，希望愛駒可以陪我行足12生肖。

PS:臨番老家黐餐前係藍地買盤藍妺，見有辣魚蛋賣，忍唔住買咗廿蚊番去同幸男分嚟食。

大閘蟹餐最後衝刺

今晚同老媽一齊出去大公館食預訂既大閘蟹餐。

頭盤夠晒精美，蟹粉小籠包夠晒特別，有心型膠容器方便客人唧入醋。如果閣下唔好醋味，直接將心型注射容器就可以了。

金杯芙蓉蟹肉翅，透明杯可以盡現金黃色既內涵。

主角6両重大閘蟹出場，盛載用既熱碟有助減慢蟹身失溫。

老媽不太正經既望鏡，老人家食得開心就可以了。做冬一定係屋企食，但又想老媽可以唞吓洗煮，所揀咗十二月中嚟食精緻中菜。

我哋另外加多兩隻蟹，幸男一整隻，另外一隻就由我同大佬分。影相時幸男好擔心蟹會攤凍，係咁催我哋收手。

蟹粉蜂巢去國鱈魚，我個人認為呢味最好食，可能配搭上少見。

胡椒魚湯花膠煮日本大根，當有個湯飲吓，清新吓口舌。

蟹粉蒸陳村粉，我就只係一心食蟹粉，碳水化合物我少食。

上埋個湯丸，搵職員幫我哋影合照(用大佬部iPhone)。可能真係尾水，7隻蟹得2隻比較多膏，下年早少少再一家人嚟食先。

細個睇太空館，大個睇改車展

中午同師傅係市中心食晏，一齊搭巴士入機場駁機鐵去亞博館，睇東京改裝車展暨香港國際汽車博覽。

穿過入口附近既国产车展區，開始見到汽車精品檔位。

呢架車既拉花，好似係漫畫書衝出咁~

原本諗住學拓海咁木納既樣，結果都係忍唔住笑。

呢款車我記得變形金剛4有出過場，不過係紅色。

Toyota GR Supra，靚到呢!

會場有模擬賽車玩，見無之前咁多人排隊，幫師傅排住先。桶seat配軚盤兼腳踏固然值得排隊，呢個闊彎芒亦正過三面芒既佈局。

玩具就見得多，Wheeljack既載具真品係第一次見!

臨尾係MF Ghost為AE 86同GT 86影同框照時，疑似網紅攝入鏡。經同中學書友群組驗証，原來係"最懂事女友"。

師傅講得啱，歐洲車唔算多，物以罕為貴，影!

2000年頭既SUPERCAR款式-ENZO，2018年美劇Magnum P.I. 裡既488已經咁多方角位。

行完就搭巴士落東薈城，捉緊五點前優惠，早食晚餐。師傅努力逛街執平貨，我就先搵巴士站番屯門。

PS:今日好有中學時代感，放假日一齊食嘢，一齊搭車去睇嘢......

茶記早餐@06:18

"想問有得嗌嘢食未呢?"早少少出門，去屋企附近既茶餐廳搏吓有無得食個快早餐。平日兜去季季紅買點心外賣當早餐時經過，見有著燈但無客人。

好耐無試過食茶記既早餐，以前番6天工作制時都可以落canteen或地下既一粥麵食。呢排番工太忙，安頓好頭一波工作時已近九點......所以至萌生超前部署。

一向鍾意食太陽蛋，但自從連鎖快餐怕有食客肚痛之後，就成為絶響。嗌、等、食，前後15分鐘就離座埋單，跨上愛駒就趕番早更。

PS:無人會理會閣下付出或蝕咗幾多時間，只會有人計校有幾多嘢未完成及投訴。

TENBLANK

市中心會合趕收工既台灣女生，一齊搭的士入亞洲博覽館，第一站就係去買精品。途經大型backdrop，搵到排隊區外既角位，可以即時自拍打咭。

一開場，佐藤健連唱3首GLASS HEART既歌曲，就要唞唞，進入fans亙動時間。原本以為會開始悶場，點知有SOKOさん(和泉素行)擔任翻譯兼司儀，令現場氣氛頓變輕鬆搞笑。即場學會既日腔"開唔開心?"，足已令港女fans甜在心~

無得帶相機入場，Flip7當然力有不逮，唯有影舞台上既大螢幕。另外，大會將掛滿fans心意咭(大型backdrop影相區附近擺放)既聖誕樹放係台上，俾佐藤健揀嚟讀出。

藤谷直季活現眼前，佐藤健邊彈邊唱<GLASS HEART>。唯一可惜既係劇中既志尊淳，宮崎優同町田啟太未能隨隊同場演出。話雖如此，大會有播出三人既預錄短片，向fans打招呼。

臨尾播出劇中神社繪馬一幕，但換上"神啊!謝謝你讓我遇見了歌迷"既繁體字。

兩個鐘既聚會完滿結束，為兩位女影歌迷打多張咭~女fans眾多，會場廁所全變為女廁。殘廁變咗男性專用，應該會有女fans會望到尿兜實物......

開場前我哋係展館附近搵到間精緻中菜-澐。餐牌有唔少菜式都要預訂，係海鮮系揀既呢味白雪尋龍好好味，貴啲都值得食!龍蝦肉既鮮味同蛋白好夾，上面既脆炸銀魚仔非常提味。

紅燒牛肋骨肉，無諗到咁大份，幸男應該都啱食。

人家話要原隻鮑魚撈魚。

金牌釀焗蟹蓋，對上一次係食，係疫情時去朗廷staycation。只記得唐閣既蟹肉料少啲，味道就記唔到好唔好得過今次。

見近門口位有吧枱，一心以為有得嗌cocktail，但結果係無bartender.....唯有點咗杯飯後香檳，人家就揀咗sparking tea。