重遊觀塘

舊地重遊，為咗拎客廳把BALMUDA風扇出嚟整。趁呢幾日涼番啲(早排有時廿六七度)，搭兩程巴士。

以前唔見呢間餐廳，上手係酒吧食店?見係日式嘢，一於陣間晏晝去試食。

目標商廈係鴻圖道附近，以往騎SKYWAVE SS嚟check車經過既店舖，唔少都變咗吉舖或轉手。一早約咗今日11點，順利放低風扇，意外地有一小時維修方案，"好呀，咁我去食往晏嚟等你哋電話"。

十五年既時間，係呢個門口出入。新車就每四個月左右嚟check車，舊咗就每年嚟一次原廠check兼換零件，剩底個兩次就係元朗搵至愛換偈油火咀。呢度check車唔好處係要等好耐，我好多時要係apm度打躉，兼係工廠區內行街打發時間。

Sony個維修服務中心轉咗係觀塘，所以順便帶埋REON POCKET 5出黎整(無當初咁涼兼快停機)。TSO個哥仔話，搏佢有得換個新，咁細件無得點整。

行番去日作門口睇午餐菜單，一心諗住食H-波士頓龍蝦溏心蛋野菜稻庭烏冬定食(特濃芝士龍蝦湯)，點知掃QR CODE至知"暫停"。

餐廳走日系路線，無茶記既檸茶咖啡同奶茶，唯有揀咗杯加錢既朱古力。

第二志願補上:日作厚切吉列北海道豚肉眼扒定食。

麵豉湯有兩隻蜆，豬扒肉嫰得嚟,脂香比例適中，唔會一味得肥膏，食材算交足功課。食到中間就收到電話通知，可以隨時上去攞番風扇。

$950換摩打，保用3個月，如果再壞就唯有買過部。2018年用到而家，6年幾已經係超額完成。

PS:下次就可以騎TMAX出觀塘，攞番REON POCKET 5，來回慳40分鐘。

再見螢火蟲

夜晚閂書房窗時，驚見手指公頭長度既蟲體，細心啲睇發現尾部有光，原來係螢火蟲~小心用最細吸力既吸塵機係困住佢，再係花園將佢放生。

之前係順達街屋企廁所見過一次之後，就一直無機會再咁近見到，今次仲係近到可以用電話相機影到。

PS:諗起以前追看既日劇<<螢之光>>，即使係大人，見到螢火蟲都會喚童心。

數學應用題

屋企廚房見到MONSTER既吉罐，於是去問幸男知唔知一罐含0.03%咖啡因究竟有幾多毫克。拎計數機出嚟，0.03×1000÷100×355=106.5。上網搵番資料俾佢睇，"12至18歲兒童每天的攝取量不得多過100毫克"，未飲多少少可樂或茶品就已超標。

其實今次已經係近期第二次見到MONSTER吉罐，上次係芒果狂歡。商家就係用麻煩既換算，令消費者放下戒心。

無心之抺，無心之撻

是日放假，訓晏啲，起身拖地，騎羊去食晏。兜去綠在屯門回收，再上外母屋企拎生果盒同菊花茶。番屋企晾埋衫，諗住只係幫TMAX噴吓膠邊保護劑，點知忍唔住抺埋車。

每次出車都用油缸袋，所以油缸位既外殼好花，忍唔住係士多房摷罐蠟嚟省靚佢。

台灣女生入花園見我打理愛駒，同我講幸男係球場跑步(唔係同我講出去踢波咩)，因為佢踢咗個波入露天貨倉(想射邊線既細龍門)。我同人家行去與球場相隔一個車位闊度既貨倉，係圍板罅見到個波並用XPERIA 1VI嚟zoom近影低。希望聽日個倉會開，印像中係有鐵貨出入至會有人開閘。

晚餐係大排檔外賣，開支紅酒飲，一反啤酒配打冷既常規。

跨區自取外賣

台灣女生今晚約咗朋友睇舞台劇兼外出用膳，我一心同幸男番老家黐餐，點知嫲嫲有約(番大陸)。諗住係區內搵西餐外賣，點知唔太多選擇，結果騎羊出荃灣拎自取外賣。

舊年聖誕試過呢間餐廳既外賣，感覺值得encore，但今次既水準好似無咁好?掛住食，唔記得同幸男個法式干邑龍蝦湯及龍蝦汁.龍蝦尾意大利飯影相。

晏晝去咗白羊咖啡買下午茶。

好在件蘋果芝士蛋糕夠細，如果唔係都食唔落今晚份威靈頓牛(已俾咗舊幸男)。

土炮緊急維修eHEAT

番晏前將叉滿既電池砌入eHEAT內膽，發現原來電線外層破裂，內藏既銅線暴露。

放工係更衣室為eHEAT所緊急維修，剪開2條電線既接合位，再用電線膠布(食晏時係九記買)作臨時外層絕緣外層。eHEAT細火暖住番屋企，土炮作業成功。

睇番舊Blog至知現役eHEAT內膽褸已6年，唔怪得啲電線膠層老化到脆皮剝落……上網見最新既款係2023至2024既型號(22880円)，好在紅色邊仲有大碼現貨。睇嚟都要託台灣女生幫手搞網上代購，因為下星期就去日本旅行，日本電單車用品店覆得電郵嚟我哋都要番香港……

新版既發熱位由兩邊側袋位，轉咗係兩肩位置，唔通用意係對衡領位入侵既冷風？

PS:其實上星期已發現褸邊既開關制膠位破裂，有換件新既覺悟，只係無諗到電線都夠期。

等MF GHOST第三季

MF GHOST第二季既蘆之湖GT非常精彩，雨天濕地收窄主角車GT86與對手馬力上既不足，贏得第四名兼7.5分，總排名第5持12.5分。2500萬円既奬金用嚟TURBO化改裝，今晚同幸男一齊煲埋剩餘既2集。

難得排位賽取得第三位置起步，但因為要營救掉落路軌既恋而受傷，令左手無法如常轉波。起步後只可以一波直上三波作應對，位置一直下跌。

陷入苦戰，我同幸男都為片桐夏向擔心。

無諗到片尾曲之後，有下一季既預告彩蛋，男主角竟然話“今までボクを抜いていった車たちをすべて抜き返さなきゃ”。真係好想第三季快啲出，但照第一同第二季既相隔，睇嚟都係2026年至有。

PS:我覺得死亡白色區域既火山灰路段，係向前作INITIAL D尾段箱根戰作致敬。可能高橋涼介親自落場同師兄對決既懷勉，兼睇中其路段之可塑性，繼而孕育出MF GHOST比賽既概念。

早更後的忙碌

放工番屋企泊好愛駒，就夾時間出村口搭巴士出旺角。Training時代經常係先達門口既巴士站轉車，事隔多年，而家落車要用google map至知廣場既方向。上一層扶手電梯，靠眼見既店鋪號碼盲兜去F55，順利搵到PRICE .COM傾價既舖位。

店主好奇我拎住部Flip6(顯示PRICE .COM既安心訂購)嚟買Xperia 1 VI，我答佢係幫我女人買。交收完，店主叫我放舊機的話可以嚟搵佢，我答：我都好耐無嚟買嘢，對上一次係流動電話可以換背部電池既年代。

趕巴士回程，係市中心落車，託台灣女生代網購外賣(我同幸男)。行住IDC同玩具模型倉嚟打發半個鐘至有外賣到手，行番去Vcity西鐵站交收酒品，再去搭的士番屋企同幸男食晚餐。

交收既就係呢支竹鶴21，雖然係貴啲，但比響21已平咗成千銀。Ajiko既哥仔依舊隨和，呢支已經係公司既最後一支，唔知下次會否追響21呢?

好在未開支酒試飲，外母話誤將電話設為安全模式，只可打電話，但無咗數據上網。人家想係市區食完飯就直接番屋企，叫幸男去婆婆屋企幫手，結果我出車代勞。成功解除安全模式後，幫呢架好似無咗副引擎既綿羊(電池被拉出去叉電既電羊Silence)影相，驚見抄牌！急急跳上愛駒，著車走人。

特意為台灣女生撲紅色特別版既Xperia 1 VI，因為Xperia 1 V已被跌到影相怪色，擬似相機模組零件鬆脫(搖動時有聲)。

PS：好耐無試過早更後咁奔波

賀歲盃

啟德體育園開張在即，呢個等入場既畫將會成為集體回憶。

今日約咗滔爺同阿基一齊去大球場睇賀歲盃-世界明星隊對香港明日隊，為既當然係一睹世界名宿既風彩。

山頂區既飛($380票價+$20手續費)，但位置都OK，視距好似電視機影全場既感覺，唔知關唔關早登記FWD富衞會員嚟買飛事。

幸男約同學係市中心食埋個頭輪晚餐，再搭巴士入會場會合我哋。

大衛占士、施治、加利卡希爾、維迪、盧斯奧、卡富、卡卡、傑斯、史高斯、科蘭、路爾斯加西亞、大衛施華、李華度、施斯、夏薩特、艾殊利高爾、沙格拿……

我最想睇既當然係傑斯，話晒當年鐵達時個電視廣告日日都播。

靚仔又情深既人設，"I have the strength to win but not the power to bring you back"。

香港明星隊先開紀錄，但被傑斯追平，接近半場完結前再次領先一球。下半場先由香港明星隊先入一球，神經刀門將占士被門前笠死。剩餘既時間，世界明星隊追回兩球，結果香港明星隊於亙射十二碼階段不敵世界明星隊。

後記:原本人家諗住睇波前係太平館食晚餐(瑞士汁雞翼)，點知入到去係滿座，等位要兩個鐘後。

新春套餐都無咩特別啫，只係轉咗啲好意頭既名.......

結果翻兜去食鬼金棒拉麵。

Minority Report預視AI

近日鬧得沸沸揚揚既藍鯨AI，令我諗起一齣2002年舊戲Minorioty Report。故事係未來世界用電腦大數據分析實況監控，配對先知對近未來既預視，去預報罪案，繼而由執法部門於關鍵時刻作及時阻止及逮捕。

如果個系統不受制約監管（獨立第三方eg.傳媒及大眾選票），亦無公開透明兼可信既上訴渠道，只會變成大眾既悲劇及權貴既手腕（如劇中既罪案歴史被竄改）。早年已有高牆內既市民，誤信搜索引擎推薦既醫療廣告而花巨額進行未被審批既治療。如果AI出錯或誤導，責任應該由當事人自己承擔，定係AI公司負責？

男主角John（執法行動組探員）被預視為殺人犯，而受害者最終係男主角在場下身亡。為逃避監控以查出真相，不惜係黑市換眼（預視現實中用VPN去保障網絡私隱？）。