二人大阪遊Day1

無獨有偶，今年都係二月同台灣女生一齊二人遊日。完成安檢同過關先至係七點鬆啲，搵到個位望位停機坪食早餐。 

第一次係STARBUCKS見到有菠蘿油，邪惡啲都要試吓。

連續2年既英法長途機磨鍊，日本短途機顯得輕鬆。換好車飛，搭鐵路去大阪。

三點幾就係車站出路面，跟住Google map行有少少兜錯路，要折返作修正。

酒店樓下附近有唔少食店，酒吧餐廳應有盡有。

晏晝果餐係飛機餐，完成酒店check in兼安頓行李就搵地方食下午茶。

我呢個德式芝士蛋糕超啱口味，藍莓係低層，有別一般置頂擺設。

食完下午茶，係附近既商場逛吓。呢間百貨公司內，有間獨立間出既咖啡店，好特別。

行到七點左右，就啟程去食晚餐。

樓上舖用餐，樓下有餐牌作招徠。

生啤當然唔少得，領隊揀呢度係為咗蟹宴。餐廳以間板分咗唔少房間，隔音就當然唔太理想。

日式料理既精緻，細細份，乜都有啲。

套餐既重頭戲係蟹鍋，點都比係吉之島買既急凍蟹腳鮮味得多。

行番酒店都只係廿分鐘，番上房就享用酒店lobby買既手工啤，感覺似越洋行街食飯~

土炮緊急維修eHEAT

番晏前將叉滿既電池砌入eHEAT內膽，發現原來電線外層破裂，內藏既銅線暴露。

放工係更衣室為eHEAT所緊急維修，剪開2條電線既接合位，再用電線膠布(食晏時係九記買)作臨時外層絕緣外層。eHEAT細火暖住番屋企，土炮作業成功。

睇番舊Blog至知現役eHEAT內膽褸已6年，唔怪得啲電線膠層老化到脆皮剝落……上網見最新既款係2023至2024既型號(22880円)，好在紅色邊仲有大碼現貨。睇嚟都要託台灣女生幫手搞網上代購，因為下星期就去日本旅行，日本電單車用品店覆得電郵嚟我哋都要番香港……

新版既發熱位由兩邊側袋位，轉咗係兩肩位置，唔通用意係對衡領位入侵既冷風？

PS:其實上星期已發現褸邊既開關制膠位破裂，有換件新既覺悟，只係無諗到電線都夠期。

等MF GHOST第三季

MF GHOST第二季既蘆之湖GT非常精彩，雨天濕地收窄主角車GT86與對手馬力上既不足，贏得第四名兼7.5分，總排名第5持12.5分。2500萬円既奬金用嚟TURBO化改裝，今晚同幸男一齊煲埋剩餘既2集。

難得排位賽取得第三位置起步，但因為要營救掉落路軌既恋而受傷，令左手無法如常轉波。起步後只可以一波直上三波作應對，位置一直下跌。

陷入苦戰，我同幸男都為片桐夏向擔心。

無諗到片尾曲之後，有下一季既預告彩蛋，男主角竟然話“今までボクを抜いていった車たちをすべて抜き返さなきゃ”。真係好想第三季快啲出，但照第一同第二季既相隔，睇嚟都係2026年至有。

PS:我覺得死亡白色區域既火山灰路段，係向前作INITIAL D尾段箱根戰作致敬。可能高橋涼介親自落場同師兄對決既懷勉，兼睇中其路段之可塑性，繼而孕育出MF GHOST比賽既概念。

早更後的忙碌

放工番屋企泊好愛駒，就夾時間出村口搭巴士出旺角。Training時代經常係先達門口既巴士站轉車，事隔多年，而家落車要用google map至知廣場既方向。上一層扶手電梯，靠眼見既店鋪號碼盲兜去F55，順利搵到PRICE .COM傾價既舖位。

店主好奇我拎住部Flip6(顯示PRICE .COM既安心訂購)嚟買Xperia 1 VI，我答佢係幫我女人買。交收完，店主叫我放舊機的話可以嚟搵佢，我答：我都好耐無嚟買嘢，對上一次係流動電話可以換背部電池既年代。

趕巴士回程，係市中心落車，託台灣女生代網購外賣(我同幸男)。行住IDC同玩具模型倉嚟打發半個鐘至有外賣到手，行番去Vcity西鐵站交收酒品，再去搭的士番屋企同幸男食晚餐。

交收既就係呢支竹鶴21，雖然係貴啲，但比響21已平咗成千銀。Ajiko既哥仔依舊隨和，呢支已經係公司既最後一支，唔知下次會否追響21呢?

好在未開支酒試飲，外母話誤將電話設為安全模式，只可打電話，但無咗數據上網。人家想係市區食完飯就直接番屋企，叫幸男去婆婆屋企幫手，結果我出車代勞。成功解除安全模式後，幫呢架好似無咗副引擎既綿羊(電池被拉出去叉電既電羊Silence)影相，驚見抄牌！急急跳上愛駒，著車走人。

特意為台灣女生撲紅色特別版既Xperia 1 VI，因為Xperia 1 V已被跌到影相怪色，擬似相機模組零件鬆脫(搖動時有聲)。

PS：好耐無試過早更後咁奔波

賀歲盃

啟德體育園開張在即，呢個等入場既畫將會成為集體回憶。

今日約咗滔爺同阿基一齊去大球場睇賀歲盃-世界明星隊對香港明日隊，為既當然係一睹世界名宿既風彩。

山頂區既飛($380票價+$20手續費)，但位置都OK，視距好似電視機影全場既感覺，唔知關唔關早登記FWD富衞會員嚟買飛事。

幸男約同學係市中心食埋個頭輪晚餐，再搭巴士入會場會合我哋。

大衛占士、施治、加利卡希爾、維迪、盧斯奧、卡富、卡卡、傑斯、史高斯、科蘭、路爾斯加西亞、大衛施華、李華度、施斯、夏薩特、艾殊利高爾、沙格拿……

我最想睇既當然係傑斯，話晒當年鐵達時個電視廣告日日都播。

靚仔又情深既人設，"I have the strength to win but not the power to bring you back"。

香港明星隊先開紀錄，但被傑斯追平，接近半場完結前再次領先一球。下半場先由香港明星隊先入一球，神經刀門將占士被門前笠死。剩餘既時間，世界明星隊追回兩球，結果香港明星隊於亙射十二碼階段不敵世界明星隊。

後記:原本人家諗住睇波前係太平館食晚餐(瑞士汁雞翼)，點知入到去係滿座，等位要兩個鐘後。

新春套餐都無咩特別啫，只係轉咗啲好意頭既名.......

結果翻兜去食鬼金棒拉麵。