朝早約咗阿Bill係St. Pancras站食早餐，點知酒店右轉既大正路封咗，擺晒消防車。兜內街行多咗路程，見到事故地點原來係爆水管。
邊食邊傾，當年放工係7仔撞見既雞啄唔斷氣氛重現。面對面既聚會，永遠比視像或文字來得直接。傾到侍應生過嚟問我哋要唔要嗌多杯嘢飲，如果係香港應該俾人催交枱。兩個鐘聚舊後，我哋趕火車去Chelsea，阿Bill就會合番佢屋企繼續行程。
一出車站就有告示，提防黃牛~
街道掛上車仔既會旗，係因為有主場賽事定係日日都掛呢?
經過舊年既英式餐體驗，見有韓燒餐廳咁特別，一於入去幫襯YORI。就算係香港，我哋都唔會餐餐食唐餐喇!
食飽就行5分鐘路程去到Stamford Bridge球場，望落幾新淨吓。
第一件事係衝去Chelsea FC Megastore買波衫，幸男見地下果層要排隊等燙球員號碼同名，即刻話上樓上果層望吓有仲有無現成既PALMER。
戰術成功，買到最後一件中碼，買多少少精品就排隊俾錢。我哋既波飛包2杯嘢飲，所以開波前去咗BAR NORTH搵位坐低。
一心諗住可以好似舊年係ARSENAL咁拎隻杯當手信，點知佢絶到一個LOGO都無......
擺得呢個pose，唔洗睇背脊，都知知道係20號。
其實我哋都山頂位0架，尾十二三左右。座位唔多，變相無咁多行數，加上山頂位有專屬大屏幕都ok丫。
準備開波喇，播球會歌時，我同領隊都係諗起幸男電話個鬧鐘聲。
17分鐘由Halland先開紀錄，半場休息時間前，安心落去換杯GUINESS，唔想有排等嘛。飲完再排隊，用埋剩低果兩張劵俾倆母子。
84分鐘由倒戈既Kovačić，再添一球。
臨走前，再搵位影合照，因為夾唔到時間，只可以睇一場波咋。
散場時撞正日落，好有各自歸家既感覺。呢幾年，我深感被動式移民，因為香港已愈嚟愈陌生。
為避開人群，先係附近既一間希臘餐廳搵位食晚飯(幸男上網搵既)，唔洗係車站得個迫字。
菜式水準一般，最可惜係無生啤。見鐵路同巴士差唔多時間，我哋貪有位坐，揀咗英倫巴士。
無諗過朝早既爆人管，到夜晚都未收科。原本已等咗好耐巴士，點知路線都要改道， 搞到尾段要兜遠好多，仲要唔知佢想點行.....領隊望住電話既地圖定位，見係酒店附近合埋範圍，就急急係臨時站話"落車喇"。幸男其實攰到訓著咗，好在我即刻拍醒幸男兼拉佢落車，如果唔係就漏低佢係巴士(好似我小學時落唔切60X咁)。
PS:多謝阿Bill既茶葉禮品~
