星期日=購物日

今日晏晝同台灣女生出沙田行吓,人家帶我去食日式串燒,重拾日本旅行既感覺.我試咗串鹿兒島和牛($28),真係好好食,人家試咗一口都係咁話.人家叫既燒菇($8)就一般.

係西田既超級市場見到人家食開既土多啤梨,價錢比吉之島貴少少....一心行去city super買日本珍珠蠔同拉麵,點知賣晒.......

今日戰利品唔少,人家買咗對特價平底鞋,髮蠟,我就揀咗本相簿黎入擺酒standard相,夾蟹殼既鉗.最後UNIQLO買咗條牛仔褲,同人家既背心仔,臨去俾錢時望到矢吹丈T恤,仲要係坐係繩角變成雪白既灰經典一幕,正,仲要係$99,真係想買多件黎收藏~

好耐都無同人家悠悠閒閒咁行街睇嘢買嘢,感覺唔錯~不過有啲唔慣星期日同人迫....

PS:double star既cheese cake真係麻麻地,如果星巴克唔係坐滿人,我地就唔洗碰壁....

轉會

今日同台灣女生行過市中心,諗住去睇吓有無碟租,點知幫襯開個間100feel已執笠,變成吉舖......

我地係市中心買完嘢,食埋元氣壽司當晚餐,就搭輕鐵去卓爾居既租碟舖買套票入會.以前個間無論新舊戲都係三日兩夜,而且唔洗買套票,價錢都ok(DVD$14),仲會借埋個盒俾你,最特別係佢有少量德國電影dvd.

瞳盟會既票價有$16(10張套餐)同$14(20張套餐)兩款,租一隻dvd要兩張套票,新戲仲要係兩日一夜.由於只係俾個cd套入住俾你攞走,有時睇睇吓想望吓個主角名同故事大綱都無咁方便....市中心地點真係方便好多(而家要特意去卓爾居...),本人真係令願100feel加價都好過執笠.

www.aishiteru.jp/index.html

番到屋企同人家一齊睇租番黎既"藉著寫真說愛你",人家再一次因為愛情小品電影落淚,本人就好質疑女主角既遺傳病,真係會有人係過咗青春期進入成熟期時會病發?

ps:晏晝同人家外母去飲茶時,見到點心紙好特別.係潮卥燒味類別下,竟然會有日式八爪魚仔,泰式爽鳳爪,法式燒鵝胸肉,錯晒!

偉仕牌廣告

今晚係同事既一本八卦雜誌見到呢板偉仕羊廣告,平時只會係電單車雜誌見到,所以顯得怪怪地.

學電單車之前開始有買電單車雜誌,因為要收集下資料,楝吓車種車款,比較性能.當我考到牌後,就好明確知道要出burgman150綿羊!(當然德輝既寶貴意見,亦都幫咗好大忙)

後黎轉係ibike.com同大笪地網站睇電單車嘢,一黎免費,二黎唔"雅"位.相熟品牌既官方網站,亦都係我上網流連既地方.

曾幾何時,我都係網上參加咗一個好細既電單車車會(羊之金路),最終都係無出席過啲咩活動(根本好日都無搞過一次出車),而且同班唔熟既人出車好似怪怪咁....而家呢啲車會都好似無再搞落去,消失係網上.

又記錯日子

繼上次以為仲要供多一個月車後,今日我又搞錯咗出車兩週年紀念日添....原來上個月尾個期咭數己經100%擁有愛羊(完成24期供款),今個月16號至係出羊紀念日,睇黎真係記日子好差~~

數吓手指,已經有5年騎羊經驗,雖然去過既地方唔多,但平日區內代步,番工放工,添購補給品,都算形影不離~舊年愛羊仲擔任埋結婚外影花車添.

未來展望可以好好保養愛羊,勤啲洗抺同打蠟,同台灣生去多啲地方.再一次多謝上一代愛羊burgman150陪伴我既時間,以及帶俾我既駕駛經驗!

史柏特魔怪書+DECA SPORTA+忍者龍劍伝

番完夜,訓醒就同德輝係巴倫紐米睇"史柏力魔怪書",比預期中好睇,特技都幾靚,童話及魔法元素多.粵語版既配音唔錯,尤其係一句"你釘,我都釘,大家一齊釘"(竹葉青廣告)夠晒盞鬼~

睇完戲,同德輝入元朗去子健新居參觀,我仲笑德輝打俾子健時,好似agent打俾業主,話帶個客上黎睇盤咁~~~

參觀完,一齊落去行吓合益,再食車仔麵做晚餐.番到屋企試玩新買既DECA SPORTA,感覺無瑪莉奧超音鼠咁高耐玩性,操控比較簡單同少項目,但人多一齊玩都ok.

另外尋晚開始玩既忍者龍劍伝非常出色,除咗畫面靚外,獨特既筆觸式操控,夠晒新意同爽快,再一次俾我驚喜!!以前細個玩唔掂紅白機既忍者龍劍伝game,多數係睇大佬玩,今次卒之都可以係我"親自操刀"啦!!

zingaro

今日我同台灣女生出去黃埔碼頭睇星躍馬術奇藝坊zingaro,由於八點開場,於是我地先去黃埔行吓,再搵地方食晚飯.

我地揀咗係outback食扒,因為我地之前係屋企煎過好幾次都係麻麻地,加上附近既日本餐廳又比較貴.......唔知係扒既問題,定係自己既煮法出問題,呢度既扒就算五成熟都唔會出血水,切落去都唔會見血,只見中間生生地既肉質.

見house wine買一送一,於是叫咗一個order,唔知點解佢地用個樽仔黎斟落隻杯俾你飲,有剩既就要自斟自飲~

坐得舒舒服服,食吓嘢,傾吓計,飲吓酒,悠悠閒咁坐咗個零鐘.跟住就係吉之島行陣,人家仲買咗對特價法國雞波鞋添.

場地係由一個個既帳篷組成,先係等候區排隊等入場,裡面掛滿關於馬既照片,雜技團既寫照.太遲至俾觀眾入場,搞到打晒蛇餅,我地都排好耐.小賣部選擇唔多,但都有馬既擺設作點綴.

場內不淮影相及攝錄,所以我只係趁未開場,偷雞影咗張就收手.一隻隻既白馬圍住中間既水簾企定定,開場時,佢地就一個跟一個咁係度跑圈.

雜技團員係跑動中既馬背上做出好多動作,好似西部牛仔咁,有企係馬背上,繞馬肚扒上馬背,係馬鞍邊倒立.....又有雜技員交剪腳跳上奔跑緊既馬背上;邊抓住馬鞍,邊追住隻馬跑,再跳番上馬鞍.婚紗造型,一人騎二馬(每隻腳踩住一個馬鞍),鬼馬既馬車造型,都令我地好難忘.

我地同其他觀眾一樣都拍爛手掌,全場一個鐘多啲,時間啱啱好,因為啲動作都有啲重覆.我覺得要同馬匹合作無間,比玩花式電單車難,因為馬係活生生,未必一定會聽你話,電單車就一定跟你既操控.

如果係古代,唔知我會唔會都有自己既愛駒呢?

方便又寫意

愛羊除咗載我番工放工外,仲會幫手運載補給品~咁多嘢都係愛羊一手包辦,全被seat位下既行李倉收納~

自己咁鐘意羊仔,除咗生活品味,駕駛樂趣外,貼身又實際既載運方便,應該都係一大理由~

每逢落雨或刮大風,唔方便騎羊既日子,都會覺得0個日好似爭咁啲嘢咁....

ps:係實惠買嘢時俾收錢阿姐笑"好少男仔買嘢用環保袋".........

應急工衣+レオアイオリア+1/3世界三大夜景

朝早番工,係更衣室打開locker一望,弊!無晒衫!情急之下,唯有將對皮鞋放入背囊,著住便服上樓.係被服房搵住工衣著住先,要開工嘛......好地地一對皮鞋,竟然要襯落size同顏色都唔夾既衫........自己腳長但瘦,所以褲管鬆泡泡,自己個身薄,但件衫size剛剛好,自己照鏡都覺得礙眼.......唯有趁早餐時間,落去制服房攞番啲洗乾淨既衫黎換,搵番真我.

放工騎羊去置樂食單身漢餐,再去相熟商場搵到獅子座既胸像超合金有平貨執$108,等咗個幾禮拜,卒之都無炒得咁勁去埋藥房補給消毒劑,柔順劑,洗衣粉,潔厠得,就同愛羊(貨羊)番屋企.

夜晚同台灣女生係市中心食完元氣,行過砌圖店睇番上次係橱窗見到既函館夜景,人家拎起手睇得好開心.老闆娘話呢個係世界三大夜景之一(真係唔講我都唔知),值得一買.聽聽吓,原來香港維港夜景都係世界三大夜景之一,真係咁靚咩?

雖然係花錢啲,話晒我地都去過兼親眼望過呢度既夜景,所以都買咗落黎,仲咁啱可以襯埋人家揀既深紫色框,老闆娘勁讚話襯晒夜色,又話本身深紫色既框來貨又少,真係一絕!(講到好似我地好識貨咁....)

區內消遣

番完夜,訓醒就搭小巴出新墟凱都買飛同德輝睇戲.落車時經過讀預科間學校.當年放學時,我都會行過呢條路軌去對面月台搭614番屋企.

十年間,經歷咗training,正式係社會大染缸生活,結交到好友兄弟,part time degree,學電單車,擁有自己既綿羊仔,搬過好幾次屋,家變,最近仲結埋婚.其實數落去大多數時間都係番工,放工搞少少家務同自己嘢,扣埋休息時間,咁又無咗一日,有時都好似無咗自己咁.

雖然好多人係呢個年紀都諗點去建立自己既事業,而我就較想做點有意義或自己喜歡既事先,可能我成日覺得自己枝蠟燭唔太襟燒.......

講番齣戲先,三位男丁(德輝,percy,本人)一齊睇完,都覺得一如影評所講係著重描寫人性多過驚嚇,人性先至係最恐佈.

之後銀龍食啲嘢,行咗陣市中心就走人.德輝經過阿嫂工作地方時好似好怕羞咁,可能係我同percy係度做電燈膽既關係

番到屋企都好攰,係梳化訓咗個幾鐘,輪班實在太消耗體力了...

新界牛+童言無忌

今日A/N,諗住同台灣女生騎羊去建生食晏,點知係相熟泊車位置有隻黃色既牛係度,無錯,係活生生既新界牛!!有好多途人圍觀,有一個男人用繩拉住隻牛,好似係想拉走佢咁.為免愛羊被黃牛撞毁,所以轉去市中心間甘地食晏,感覺很不濟,下次無交易...

番到屋企,熄匙落車,落埋布冚,正當踎底上碟鎖之際,隔屋既小朋友踩住有輔助轆既單車仔走到我身邊.

小朋友:"點解你戴住眼鏡黎渣電單車既?"

阿魯凡;"因為我有近視"(咁細個就歧視?)

小朋友;"哦~"

小朋友:"係佢啦"(指住阿魯凡,向身邊同行踩單車既朋友仔講,有點似點相咁)

小朋友:"咁點解你塊臉咁濶既?"

阿魯凡:".....戴咗頭盔啫..."

小朋友跟住我走到樓梯,向樓上重覆咁叫"婷婷",但咬字唔正,搞到好似上海灘許文強衝入教堂叫"程程"咁.

我叫小朋友不如上去搵人啦,點知小朋友無奈咁答"我唔識行樓梯...."望真啲,個梯級高到小朋友既膝頭哥,又真係難為咗佢既.人家係屋入邊聽住我地既對話,一邊笑.而我就諗,唔知小朋友大個咗會唔會好似發哥咁型呢?