炎夏不宜多上街

番完早更,急急腳行去紅橋搭960出上環,上車前係金銘食咗兜牛什米.好在等咗5分鐘就有車上成三十度係巴士站呆等都幾係嘢..........

因為一個小誤會,係上環地鐵站等janet半個鐘,攞番張保單同有關資料.之後去完個office搞電器保養事宜,就搭番巴士番入屯門.

落車時已經五點幾,唯有係市中心行到六點零鐘,係KFC食個高熱能餐,再搭輕鐵番屋企.

係屋企張梳化訓咗個幾鐘,騎羊去接台灣女生放工,去市中心攞裙,因為之前試咗但無新貨,要等係分店送過黎.

大熱天時都唔係咁適合太多外出活動,好易頭暈...............都係係屋企狂飲冰水好啲.............

冬季期等作品

今日上網係相熟網站見到呢1:24兼身高33cm既阿魯凡figure初型,雖然未上色,但見各部份都好細膩,實在感動~

相比之前我收購咗BRAVE超合金,呢次yamato既版本差唔多高大成倍,所以detail位都顯得較為出色同震撼!!不過唔知可以唔以打開胸部駕駛倉呢?如果多啲金屬部件就好了,yamato好多時啲產品都係俾人較膠膠地既感覺............

http://hk.youtube.com/watch?v=DSx_eeX-Z7w&feature=related

八號波

雖然打大風,但夜更都有唔少客仔幫親,好在有津貼,忙都有價值.放工時仲係八號波,無的士,唯有搭輕鐵番屋企.

係輕鐵站行番屋企,橫風橫雨,半路已經鞋,襪,腳全濕.....番到屋企開電視至知又紅雨,又雷暴,又打風,好在羊仔都安然無恙.

失眠持續,訓咗兩個鐘就醒,食過微波爐飯盒,上陣網,又再訓過.訓訓下,俾電單車碟鎖防盜聲响醒.唔通羊仔俾強風吹冧咗?好在只係布冚被風吹郁,撞到碟鎖.唯有拆咗落黎先~

訓到五點起身,發覺風扇停咗,全屋企電.fuse箱同屋外大制正常,打去電力公司問,原來係附近既變壓站出現故障,正維修緊,等多幾個字至有番電力...

ps:好耐都無試過全日都成守係屋企......

崇真聚會@福田

今日約咗崇真書友上福田揼骨兼飯局,夜晚係小肥羊開餐(揼骨場所係小肥羊附近).

對上一次番大陸都已經係約半年前,本人比較鍾意搭b3過關,唔洗轉咁多程車~

勞氣又疲累的一日

大前晚放工番到屋企,發覺所入牆電制無電,fuse box裡硬係有一個制打極都打唔起,最後至發現屋外既戶外電制入水燒咗,個膠殼好似燒熔咗既棉花糖咁.call業主搵相熟電工黎搞,暫時前線阻短路,封住個制,恢復屋內電力.

今日放工就騎羊番屋企,邊抺羊仔邊等電工黎維修電制兼拉電線.無諗過兩個電工聲都唔聲就係客廳移開我既"聖域"(超合金玩具display櫃)拆電制拉線,真係嬲到爆炸,個一刻我感到我既拳頭可以炸裂天空!!

拆開咗又話唔似係,又拆客廳另一個電制,再拆厠所既電制,都唔似係,仲問我士多房有無電制,話要清士多房啲嘢出黎.我提意照舊封死個戶外電制就算,但電工話地下無駁到水線,所以至搞到個戶外制短路燒到熔至trigger到個fuse箱,為安全一定要拉過啲線同駁番水線.....

最後電工話(斷估)應該係衣櫃後既電制,結果極唔願意情況下允許佢地搬動衣櫃,好在最後都中.真係唔明個電工,當初座樓都係佢拉電線,但竟話唔知點解無駁水線,以及唔記得兼無記錄有邊幾個電制同相關連繫.

電工搬番啲櫃就走人,而我就要搞事後既清潔工作,繼續抺羊打腊,再騎羊去外母屋企食飯.送人家番工後,再吸塵機同拖地,今日真係散晒......

太陽出來了~~

落咗兩個星期雨,晴天卒之都重臨.放工騎羊去市中心會合台灣女生,為屋企補充日用品,買埋夜晚餐餸.結果成個行李倉都滿晒,人家要揹住個袋,我要後揹一個背囊前揹一個購物袋....最辛苦都係羊仔要揹埋我地兩個同啲貨............

番到屋企,忍唔住要用相機影低窗外既天色,藍天既日子係香港係少見嘛~希望好天既日子可以抽空抺羊仔同打腊,去泳池游吓水同放吓羊.

ps:住村屋好在可以望到廣闊既天空同夜星~

預祝父親節

話說老豆打黎話老媽番大陸,無飯開,於是即興咁約老豆放工去明星酒樓食晚飯,預祝父親節~~

老豆見個仔同新抱出黎食飯,當然開心.七點幾到酒樓,枱枱都坐滿人,要等六張枱,三個人坐係出面等咗約半個鐘.點餸時,老頭子見價錢比平日貴咗啲,特意點芝士鳯尾蝦伊麵底,o鍚住我個荷包,其實老豆不嬲都鍾意食龍蝦,我話一年一次咪照點囉,我地都想食嘛.結果我地點咗,黃金海鮮卷,燒豬腩仔,海味一品煲,芝士龍蝦伊麵底~

食完飯我地同老豆係市中心睇銀包,因為之前老豆放聲氣話想換.係吉之島男仕部睇完,再上去GOLD LION檔攤,但收咗檔(九點多啲)....最後係FX搵到個啱老豆心意既銀包.

番到屋企,人家問我點解同老爺食飯後,反而有啲唔開心.我答:見到老豆成餐飯都咁開心同笑,突然諗起佢平日屈係屋企真係好少笑同開心..

ps:特意用手機相機影咗張合照,send埋入老豆部手機,set做wallpaper,希望佢鍾意啦~

1周年自助餐@panda cafe

今晚同台灣女生出咗去荃灣panda cafe食自助餐,因為今日係我地既結婚註冊一週年嘛~~呢幾日都係狂風雷暴,所以無咩心機揀地方食飯.突然想起擺酒既熊貓酒店,近近哋又唔太貴,於是冒雨搭巴士出荃灣.

 一坐低就主攻生蠔,好耐無食ma,貨源充足又新鮮!

 仲有夏威夷凍蟹,翡翠螺,青口冷盤添~

每枱都會奉上海鮮冷盤,不過長腳蟹就無夏威夷蟹咁有味,只係肉多....

其他熱食都幾好食,牛油粟米,薯條,西班牙海鮮炒飯,串燒,蒜香燒蠔......人家話仲多嘢食過日航.最後我仲食咗個dryers薄荷朱古力雪糕~~信用咭折扣後,每位$270左右,都真係抵食,如果一至四仲會平啲添!

回程時開始落大雨,未等到巴士條褲已經濕到上膝頭哥,於是唔排隊住,係商場簷下避雨,見有車至開遮衝出去.上到屯門公路見好多車都打住死火燈慢駛,好在都安全番到屋企,睇電視至知係紅雨警告.....

禮物順利送出,人家開開心心,飯局滿意,希望下一個週年唔好咁大雨就好了~

ps:.去卓爾居還碟時,係一間鞋店買到啱size既converse鞋,仲要咁啱係gitti撞到外母大人幫我拎上樓,唔洗抽住盒鞋去食飯~~~,.人家開開心心,飯局滿意,希望下一個週年唔好咁大雨就好了~

乾淨同污糟,有心同無心

今朝晾窗簾,一望就得出乾淨同污漕既分別,左邊係半年前洗過,右邊就係啱啱洗好既.睇黎呢幾日真係要努力將剩低既門窗簾.....

夜晚六點半係canteen收到老豆電話,話會上我公司A10放低個果籃俾佢工作地既立案法團人物(因為佢番屋企順路,所以特淮早放兼送貨).

向同事交待聲,就落樓下撞吓,又真係見到老豆抽住又重又大既果籃,行到柺吓柺吓咁去排隊等lift.我係中途插入隊伍,幫老豆攬住個果籃,一齊上去送貨.向有關人仕寒暄幾句後,就同老豆落canteen.老豆飲熱奶茶之餘,又夾吓我碟乾牛河黎過吓口癮,傾吓講吓咁.

今可以同老豆聚吓覺得幾開心,如果可以同老豆去戲院睇戲就更加好lu......

ps:得知父親節禮物事件後,覺得大佬健只係做門面嘢,其實老頭子想要咩都唔知.只係形式上叫條女隊份嘢就算,平日講番句公道說話或者係多點關心都無.......

住家菜

厨藝一般既我同台灣女生,平日都係煮啲低能餐,例如魚生當蒸魚,生滾湯當老火湯,簡單既炒菜,咖哩薯仔雞腿肉,咁又一餐住家飯~~

我一向都覺得,就算唔太叻煮飯,但有住家飯至似番個屋企.希望人家快啲可以好番停藥,咁就可以再邊食飯,邊飲紅酒~~~

ps:冰凍啤酒,確係夏日既消暑佳品!

當福伯遇上外星文明

今日繼續落大雨,但都同台灣女生去凱都睇福伯.身邊同事既口碑嘛嘛地,睇完都覺得ok既,外星人文明係當年既美國又真係一個熱潮,當cross over囉~

電腦特技比當年梗係好好多,靈活既動作其實都係落係第二男主角(沙拉保夫)身上,福伯都只係做啲硬橋硬馬既動作.

開場以第一集ending時出現既政府秘密倉庫做場境,仲係碰撞其間show番第一集既"約櫃"寶物,勾起觀眾既集體回憶.

本人幾鍾意電單車動作情節,以及森林懸崖追逐.整體黎講,第四集都能保持以往三集既風格.

ps:食完晏,買定飛,搭小巴去置樂相熟商場買咗隻family training.本來諗住買Wii Fit,但諗到無得雙打兼且人家無咩興趣,所以轉買呢隻.15隻迷你遊戲,招呼朋友,同人家消閒放鬆,一樂也.其實掙扎咗好耐買唔買好,但有得部Wii,無理由唔玩吓體感game嘛~~~

相對濕度100%的雨天

近五點時被雷轟醒咗,於是再訓番.起身開電視,見到相對濕度100%,出邊落住雨,結果要行出去輕鐵站搭車.

放工同德輝,子健,雞脾一齊行去西鐵站,搭車去"美食新天地"食晏,好耐都無耐過舊班子一齊食嘢.

食完晏,雞脾抽住esther部notebook上我屋企打wii孖宝賽車,house of dead3,再上吓網睇租盤價,夜晚個餐係卓爾居既KFC搞掂.

人大咗,要面對既嘢多咗又唔同咗.六年前既我地,又點會諗到今日既話題?