黃金日光浴

晏晝好趕咁約夠腳一齊去黃金海岸沙灘晒太陽,雖然人數比開初招生既預計少,但總算成團.今日係星期日兼且係暑假最後一日,所以沙灘都好多人,不過都俾我地佔領咗個有利位置.

同外母,台灣女生係稻香飲完茶,就趕去新墟買嘢準備(仲有個半鐘就係約定既三點),搞到要的士番屋企又搭的士去沙灘.

帶咗個膠桶,加水加冰黎雪住啲酒水,,大家都話正!我仲攞埋屋企支紅酒黎一齊飲,晒太陽,吹海風,食薯片,嘆紅酒,望風景, 一切都太美好了..........

本人就好鐘意同朋友仔去沙灘,一黎可以rela吓,二黎又可以聯誼.平時各有各忙,少機會坐底傾吓聚吓,黎緊放大假,睇吓搞唔搞得成係我屋企打wii兼大食會先~

楝哥五點多啲就走先,趕去尖沙咀做gym,我地就留到六點至走,不過就排咗幾耐隊至有得沖涼.之後我地去andrew介紹隔離既海景餐廳飲杯黑啤,估唔到侍仔阿叔咁有個性,能操流利"熱血"語言~

今個夏天總算去得成沙灘,上次就俾颱風鸚鵡前夕既壞天氣搞到取消.

韓劇大集錦

今晚同台灣女生係巴倫紐睇"我的機械人女友",我就為咗綾瀨遙而入場,而人家就為咗我的野蠻女友既導演入場~~

以愛情攪笑既情節,大家當然睇得投入,但故事涉及時空問題,卻有啲牽強.如果有一個未來既女仔因為一對已故情侣既故事而欣賞及愛上男仔,從而回到過去同該男仔一齊生活,又好似有啲怪怪地,因為始終段回憶唔係自己既,兼且實際只係同男主角相處一晚.某程度黎講,會唔會只係做別人既代替品呢?如果話女主角既思想俾女機械人融合咗既話,又真係有啲得人驚喔~~~~

對綾瀨遙"突出"既演出,我當然非常受落啦,而人家就好享受戲中好多經典韓劇韓片既情節.感人既生離死別情節,特技都做得唔錯,唔會好假咁~

ps:係我等台灣女生時,係老麥見到幾個十來歲既男仔,竟然有打war game既裝備,而家既小朋友真係幸福...............

九號波-鸚鵡

一朝早起身睇電視就話八點前會掛八號風球,於是同台灣女生冒住三號風球出門口番工.行出輕鐵站時見部份天氣都仲係藍色,好平靜,果然係暴風雨既前夕......

番工無幾耐就轉八號波,臨放工就上到九號波.放工人家係canteen買咗個干牛河外賣,再"那渣"麵檔買魚旦同三宝.好在咁啱係的士站大的士,雖然要加$20,但為免要係輕鐵站行十分鐘番屋企,所以都照上車

番到屋企就急急將啲水樽入水,並綁係愛羊既前後轆,以免被強風吹倒(尋晚係側架上既負重好似唔多夠應付九號波嘛).成個晏晝就係屋企睇奧運直播,機頂盒充份發揮佢既功能,多頻道睇唔通既賽事,就算睇緊既賽事突然被抽起,都可以係其他頻道追番黎.,高清頻道當然靚好多啦,不過只係有無線既高清係有live,亞視既高清只係得深夜重播.

今日久唔久就望吓小羊有無事,尤其係知道風眼係屯門附近時最擔心,真係吹到正一正嘛.......

鸚鵡風眼仍在屯門附近

(星島)8月22日 星期五 20:20

風暴鸚鵡風眼仍在屯門    附近，九號烈風或暴風增強信號現仍生效。 在下午八時，強烈熱帶風暴    鸚鵡集結在香港天文台    之西北偏西約二十公里，即屯門附近，約在北緯22.4度，東經 114.0度附近，預料向西北移動，時速約十四公里，趨向珠江口。 按照鸚鵡目前移動途徑，本地稍後轉吹偏南風，風勢將明顯增強，達烈風或暴風程度，市民必須高警惕。

夜晚個餐,動用雪櫃所有既物資,打風都有咁多嘢食都算係咁,多謝人家既辛勞~~~

食完飯,清埋嘢,就同人家係梳化睇美國夢幻隊對阿根廷既男子籃球賽,精彩緊張.舒舒服服咁一齊睇電視,好有家庭溫暖feel~~~

日本女排被out了........

今日下晝係屋企睇女排,日本對巴西,我當然係支持日本隊啦~

由於巴西太強,日本隊未能將分數拉近,直落輸三局,未能出線.日本隊中,我最有印象既球員,莫過於1號同12號~~~~~~~

夜更前既飯盒

今日台灣女生番晏,無人準備晚餐俾我,但好在尋晚人家煮飯時特意留番啲飯,菜,牛柳粒.本身番夜之前都係訓唔太好兼無咩胃口,呢個份量就啱啱好,到十二點左右就開始肚餓食宵夜~~

簡單既飯盒,總比即食叮叮飯同杯麵來得溫暖~

炎夏騎羊

呢幾日好鬼熱同曬,騎住羊仔都較辛苦.行緊時都還可以,但停燈位時真係幾滾,尤其是有架巴士係你隔離係咁"啡"啲冷氣系統副產品熱氣過黎.........以下係我撞得板多既炎夏騎羊心得.

為免被太陽曬傷,最好都係著件薄身長袖恤衫,以及避免中午至黃昏前呢段時間黎開車.

為免中暑,盡量避免長時間開車,有需要就搵中途站遮蔭兼飲水休息.

為免開車時熱到跳舞,請泊放電單車係有遮蔭既地方,如樹下,建築物既影區.

為免剎車碟打滑失靈,請不要為涼快而特意提高車速.因為天氣既關係,剎車碟既溫度會比平時高,如果快開快收的話,會影響其表現.

為免頭盔發出臭汗味,請選用可拆內綿既頭盔,兼且定時清洗.

ps:放工騎羊去市中心吉之島買餸(根據台灣女生口述既菜式),只係一包菜,牛扒,以及補給吓啲調味品.之後買埋麥當勞外賣,就騎羊番屋企,人家就可以足不出戶就有晏食,兼可以準備晚餐~

Mk-5

今日放工攰到暈,用僅餘既體力騎羊去食晏,再番屋企沖個涼再洽咗大半個鐘,就搭巴士出深水埗會合楝哥.

其實部電腦冧咗成個幾兩個禮拜,所以今日約咗楝哥幫手執parts黎砌過部,電腦由mark-4升級為mark-5.上次電腦壞咗已經知係夠期要換,只係無諗過咁快又挨唔住.

係有限既資金下,楝哥為我挑算咗1G既ram X2,all in one底板同160G硬盤,只係機箱係我自己揀既........(唔曉電腦嘢嘛)

多得楝哥幫手,如果唔係都唔點搞.搞到咁夜,仲要挨kfc晚餐,辛苦晒.雖然我唔會打電腦game,但無得上網又真係好唔方便同悶咗啲

ps:mark-4既規格已經係上一代,想加RAM都買唔番,可以話係電腦文化遺產......

儍更更的機械人

約台灣女生放工後係新墟吉野家等,食完晏就先騎羊番屋企,人家小睡完就再騎羊出巴倫紐睇wall.e~~

起初想睇英文版,但聽朋友講成齣戲既對白,最多係"wall e" "eve",人類既對話較少,咁廣東話都無所謂啦~

故事中既wall e一個人繼續留係地球清理垃圾,其他同伴都相繼倒下來,有時仲要係同伴既殘骸執"士啤"零件.直至遇到機械人eve,wall e不再孤單,仲開始談戀愛同冒險旅程添~

主題都係提醒我地要製造少啲垃圾,以及要積極面對同解決地球既問題,而唔係逃避.我除咗自備購物袋,用有能源標籤既電器,盡量少開冷氣外,都會做垃圾分類,自己既星球,自己既地方嘛.如果唔係,真係要儲錢俾下一代上太空住囉~~

PS: 膽小又勤力既wall e真係好得意~Waste Allocation Load Lifter‧Earth-class

朝早遲咗起身,成十點至到游池,結果游到十一點三至上水.跟住騎羊去置樂藥房買嘢,再騎羊去交石油氣費,再兜番去新墟巴倫紐買定五點五個字WALL.E戲飛,再係藥房執平貨.可能晏咗去游水,太曬兼渣咗成日羊仔,對手同膊頭都紅咗........

好睇唔好食

今晚台灣女生出省城上堂,放學後坐同事順風車番入屯門至食晚飯.由於我已同andrew係大排檔食咗飯,所以揀咗大家樂快餐.人家見廣告賣紐西蘭 爵士牛扒幾吸引,於是滿心歡喜叫咗份黎試.

切開塊扒,中間紅紅哋,好似好正咁,但食落就無咩味咁...........口感差差哋,唔太嫰口....個餐勝在大堆頭,有扒,有酥皮湯,有焗薯,$50有找,唔應該有咩著求,只係個廣告好成功咁令觀眾以為好好食啫.................

福田順德飯局

今日帶埋台灣女生參加崇真書友既福田飯局,主題係順德菜.

由於等候人數太多,所以我地攞咗籌之後就去咗隔離既wall market行陣.菜色無咩特別,但加底既煲仔飯就好搞鬼,真係夠晒我地八個人食丫~~~

荃灣遊

番完夜訓醒,就搭巴士出荃灣同台灣女生會合.先係愉景既euro gogo食個下午茶(三色焗薯同蜜糖雞翼都好食,但我杯capuccino就差咗啲),再四圍行商場執平貨.夏日炎炎,行商場,涼冷氣的確係唔錯既消閒節目~~

晚餐一早就諗住幫襯札幌拉麵店,其實之前都已經想試,但經電視節目包裝後,變咗要等好耐位至有得入座.我同人家都覺得無係日本札幌車仔檔既拉麵咁好食,極其量只係近乎一間當地普通拉麵店既水準,不過蝦餃子就真係幾好味既~

中間時間我地行咗去city walk,逛咗陣FrancFranc.啲家品真係好靚,試坐過啲食飯櫈同電腦櫈,真係好舒服~如果第時有幸可以有屬於自己既地方時,一定會係franc franc揀家具(當然係等特價先啦).

另外係馬莎執咗條特價呔,個款都幾靚丫,但只係賣$70咋~~臨搭巴士番屋企前,係愉景既giga sport買咗張厚身瑜珈墊(信用咭九折優惠$124),方便落雨天係屋企做簡單運動嘛~