苦盡甘來

多數RPG或ARPGgame既主角都係劍客,魔法師只會係輔助角色,但呢隻game既主人翁就正正係一個魔法師,用各種魔法黎幫助一眾戰友去打一場又一場既戰事.

玩法有啲似電腦既即時戰爭遊戲,要控制幾個小隊去應付敵人,需要合作同時間掌握,當玩家要啟動魔法時,要提起nunchuk,再以remote係畫面畫上魔法符咒.雖然有各式魔法(七十幾種,多到要用紙做筆記),但主角既防衛能力低,一俾敵人圍就好快game over,走位技巧及各小隊既配合絶對需要.

由放大假時開始玩,卒之都俾我打爆,最後大佬用咗我幾日既時間黎悟出戰術,好耐無試過係無攻略黎打機.爆機結局真係有啲簡單,無咩華麗既CG,極盡以前細個打紅白機GAME既風格,反而好有童年回憶.再一次證明任天堂既成功,創意比細緻既畫面更能留住玩家既心.

PS:係最後一章前,要玩家選擇投向"光"定係"闇"既勢力,爆機後可以玩埋另一個選擇,唔洗由頭打起,尚算體貼~

澳洲和牛西冷

 晏晝見吉之島又有得賣特價澳洲和牛西冷牛扒,於是又搞個西式晚餐.塊扒靚係唔同啲,唔會話有啲咬唔開,好似有渣既感覺.齋落幾粒鹽,煎出黎都好香~

法蘭西紅酒原價$235,特價$135,見佢有張嘢貼住,好似攞個啲咩奬定評價咁,飲落又真係唔錯,易入口~係咁多支係屋企開既紅酒之中,我會俾佢最高分,絶對物超所值,係出邊西餐廳開二百幾蚊一支既都無咁好~

變形金剛

今日同台灣女生,聯同阿潘,華B一齊係巴倫紐以優惠價$40(平咗$5)睇變形金剛.今次著重講博派同美軍合作黎打擊狂派,以及政客對博派既排斥.另一方面,麥加登既阿頭科倫計劃追殺老柯,並啟動遠古時代收藏既裝置,以奪走地球上既陽光.

唔少人都會好似華B話麻麻地,同原著太偏離,但如果100%搬上大銀幕的話,咁大家咪知道晒劇情兼無新意?如果要我打分,我會俾90分,有笑枓,有靚女,有特技,有驚喜.

睇完戲,出尖沙咀光顧華B介紹既泰一和牛火煱食飯,點知order單上無記載!問過老細,答案係市道唔好無咩人叫,所以無再賣和牛,唯有理解為<和"牛"火煱>黎安慰自己,美國安格斯肥牛都好呀,不過比稻香賣貴咗少少.

開完餐去咗棉登徑既chilax飲嘢,環境唔錯,隔離枱兩男四女,我哋就清一色五條仔,好似有啲齋.鐵膽人數由六變五,好多時都總係想講"六位丫,唔該"

ps:近三點搭的士一齊番入屯門,禮,華B,PERCY,我,最後阿潘係元朗落車.臨訓時忍唔住喊咗出黎,今晚理應係六位gentlemen........

上堂,行街,睇舞台劇

係灣仔上完堂,同德輝食完午飯,我同人家就去行sogo.一朝早起身直踩shopping(其實只係買咗特價浴巾),攰到要去搵地方坐地抖吓,人家睇女人潮流雜誌,我就刨game next~

趕番上環睇五點鐘既舞台劇,其實係琪芝尋晚食海鮮時得知我同人家放大假係屋企發mould,於是打電話俾我,問我有多飛會唔會去睇.成個劇都係王菲啲歌,加上達明既笑位,我同人家都唔覺悶,多謝琪芝既邀請~

之後我同人家搭地鐵去旺角,係一間即叫即做既點心鋪開餐,較特別既係呢個鮑魚燒賣.

ps:我同人家都係唔太適合成日出街既生活,係屋企hea配短線團就最啱我地~~

$230海鮮餐

 今日同台灣女生騎羊入流浮山會合同事們一齊食海鮮,係屋企出發,經夏村行都只需20分鐘車程.今日星期五,都唔少人入黎食飯,碼頭不時都見到有遊客係度影相同望海~

 黃昏海景,望鹹蛋黃,咁好天,點解朝早要雷暴警告呢?如果唔係,我同人家就去完大清水玩,再騎羊番入黎食海鮮餐啦~

 今次係我第一次跟同事們入黎開餐,之前幾次都係要番工,今次都係幫襯番上幾次個間"海景".

唔計甩底個五個,我地十四個人,每人夾$230就可以享用今晚既海鮮宴,好味又好抵!

令人失望既作品

雖然畫功唔錯,但故事結構鬆散,唔明點解咁簡單既劇本要"dump"到十二集,本人建議由十二集濃縮至六集.

再講機械設定,可變式電單車機械人下半部ok,以單輪代替腳掌,但上身以一塊fairing黎連接手臂同車身,實在有點難以接受.......而且電單車模式時機械臂就咁掛係兩邊(同企立時一樣),會唔會有啲礙眼兼無誠意?雙手摺合,安放係腳踏位水平都可以丫,點解會搞成咁??

ps:女主角因芭蕾舞運動受傷而以rideback代替雙腳,同漫畫Over Rev中女主角因田徑比賽而受傷,繼而意外地迷上MR2,實在相似得有點過份........

LINEGARRELS

 近年日本動畫都比較少以機械人為主題,呢套linebarrels實在係為機械人大軍注入新元素.

JUDA機關從平衡世界得到機神(巨大生化機械),與異世界入侵先頭部隊"加藤機關"展開連場激戰.故事有支線,唔睇到後期都唔知道"加藤機關"原來都係忠既,不過稍嫌主角機除咗轉色變mode黎展現短效機能催谷外,就無咩gimmick,絶招亦只得巨型鐳射劍.

換個角度黎睇,機神既團隊合作性,策略,人物關係,都分佈得唔錯既(gundam都唔係由頭打到尾啦).另外,女角們既設定亦係賣點之一~

PS:希望往後既機械人大戰會收納呢個系列,唔洗成日都剿番啲陳年兼唔起眼既機械人.

結婚2週年

其實想係大假裡面既今日去大清水,但成個禮拜都天氣唔好,兼且無迎急準備,所以今日揀咗係屋企睇電視,打機,晚餐叫外賣,開埋之前買落既紅酒黎慶祝.

大假前無咩假放,日日番工都忙,所以連禮物都無準備,希望台灣女生唔好見慣...

結婚兩年,開始有啲老夫老妻既感覺(太早?),自己重磅咗,人家都仲係咁奀,搞到我好以餓親家妻....人家由唔太會煮飯,變咗御厨,番工帶既早餐同晚飯都由人家主理.雖然我答同事"都係低能餐黎啫",但其實心裡已好滿足,屋企有個女人係唔同啲既.

PS:本人身兼清潔衞生,家庭娛樂,二輪交通部長

旺角行

 今日晏晝同台灣女生係睇戲前到朗豪坊既SKY BAR飲嘢,見有相熟Hoegaarden當然黎番杯啦~由於之前飲咗杯cappuccino,怕飲唔晒,於是叫半pint即係250cc,但姐仔話俾多唔夠$10就有1pint,結果都係叫1pint.(人家就叫咗杯perfect ten)

 主菜係一人半打生蠔拼盆,我同人家跟住侍應介紹既次序黎食,味道由淡至濃都覺得最後既法國生蠔最好食.之後又聽侍仔講試食一款生蜆,肉身就幾鮮味,但條裙邊就麻麻地.

埋單後去旺角百老滙252生還者,感覺無海猿咁好睇,而且last唔知點解男主角一個人揹住條O2兼一個受傷既救援隊同僚時,旁邊既救援員竟然無上前幫手,只係做佈景板.........

PS:之前收到代購王既e-mail,話我order既MACROSS F超合金重裝甲有貨,但當我地行上信和時,哥仔話要去espirt隔離既唐樓攞貨.....上到去點知件貨唔係我訂既嘢,竟然係幪面超人S.H.figure數盒!(大盒外寫上既姓氏同手提又係我既喎),當我表明我訂既係超時空要塞而唔係"拉打"時,後方有位姐仔(我應得係當初幫我開單0個位)話我件VF-25F重裝甲要七月至到,應該係搞錯咗......信心動搖...................

人生第一次打爆麻雀game

 咁大個仔都未試過打爆一隻麻雀game,真係好感動~~~由第十級升至第一級,晉身四聖獸稱號之一既白虎(台灣女生係玄武-龜身但條尾係一條蛇,好怪),再由白虎一段升到十段,榮升白虎master,連勝三個東風戰,最後化身為黃龍,爆機!

 雖然係爆機,貴為黃龍,都要由Lv1開始儲珠仔黎升級至可以儲肥條龍~睇黎又係另一個令玩家沉淪既借口,而且要儲好幾粒同一系聖獸稱號既珠仔至對換一粒黃龍珠仔......

如果玩家係日本,又有WIFI上網將啲分打上紀錄榜,每三個月公布一次全日本排名,第一位叫Wii黃龍王,第二至五名就叫Wii黃龍四天王,第六至二十名就叫Wii黃龍master,第廿一至一百名就叫Wii黃龍ranker,真係多借口俾人日打夜打...........

外母大人之御用冷氣機

 外母大人部4分3匹冷氣機已服務六年,外母比我更怕熱,夏天冷氣加風扇都唔太夠涼,所以我同台灣女生上星期幫外母大人選購咗呢部日立小涼伴1匹機~

騎羊去外母樓下既惠康買嘢(屋企油都無滴),人家四點左右上樓陪外母睇住師傅上門安裝同試機,而我載好啲貨就騎羊番屋企~

見天色唔太好,搭輕鐵番外母家坐陣,再一齊行去外母最鐘意既"裕滿人家"食飯.話晒係祝賀新機入伙,當然唔少得$168芝士龍蝦伊麵啦,希望外母大人可以安在家中避暑~~

老爺飯局+驅貓結界

 夜晚同台灣女生一齊出市中心同老豆食飯,當預祝父親節,因為唔知到時佢老人家可唔可以擺脫"監察網"出黎.

好耐都無食過片皮鴨,難得老豆幫手一齊食嘛~成枱都係餸,大家都食得好飽.最終個片皮鴨有剩,要打包走.希望老豆身體健康,多啲笑容.

PS:為咗驅趕夜晚係愛羊借宿既流浪貓,特意買咗啲障礙物黎佈防.每次掀開布冚,見到腳踏位,中軸外殼同布冚有貓毛,貓腳印,皮脂分泌污積,都覺得好討厭同麻煩.

之前傑傑話可以係寵物屋買啲驅趕貓狗既氣味劑黎噴吓個布冚,但當我問寵物屋時,阿姐話用啲有刺針既膠地顫會較好.呢幾日黎,都唔見有不速之客係愛羊投宿,睇黎真係有效,不過就多重功夫........

黑鬼油

每逄夏天,同事們都會叫我"黑鬼油",因為我既皮膚較易曬黑,而我又勤去泳池游水.另外平時番工同區內代步都係騎羊,所以雙手係最黝黑既地方.

黎緊大假好想約啲朋友仔一齊去海灘曬太陽,飲飲食食兼傾吓計,聯誼吓.台灣女生都係一齊放假,希望可以同人家騎羊兜吓風,或者去多趟清水灣玩~~