令我迷上RIDER既男人

近日係相熟玩具網站見到倉田てつを既近照,就係呢位演員令我迷上電單車同幪面超人.

係1987年,佢所扮演既幪面超人black(以及1988年既RX)主人公-南光太郎,以瀟灑靚仔外型迷倒少女們.融合昆蟲與科幻既造型,兄弟宿命對決劇情,專用電單車既支援,豐富既歌曲(直至現在都無一齣rider既歌夠佢多),都係令我著迷既原因.

                

                       

現年41歲既倉田てつを,雖然無當年咁俊朗,但絶對無話走晒樣.從呢幾張snap shot,都可感受到佢瀟灑既個性,以及一幕幕劇中係cafe bar枱上既影子.

以示我既熱情,特意展出我初中時代買既complete song collection CD~~

ps:官方網站http://www2.odn.ne.jp/tetsuo-kurata/index.html

double rainbow

今朝番完夜班,係停車場會合愛羊時,見到雙彩虹,於是係背囊攞手提電話影低佢.效果一般,上方較幼既彩虹只能依稀見到,唔知大家又有無係雨季見過彩虹呢?

ps:微雨,濕地反射著太陽既金光,以時速七十公里黎溶入空氣,感覺蠻特別~

九號風球後

臨放工轉三號波,落輕鐵行番屋企時,見四周都係颱風後既痕跡,水馬被吹倒,飛出好幾個身位.

地上大量被吹斷既樹枝樹葉,行過都聞到青綠既氣味.

本來為工程車遮蔭既樹木,但而家就壓住佢~其實每次打風都好怕愛羊受損或被吹倒,所以每當將掛八號風球,我,就會為愛羊前後轆上小型水馬.

之前試過打風時,晚上總係訓唔著,久唔久出去客廳望吓羊仔同出面既風雨.今次番夜班都好,因為忙住做嘢,唔洗成晚係屋企心掛掛,幸好番到屋企見愛羊安好.

我見到rainbow(非0靚模)丫~

見今朝唔好天,所以唔騎羊,自己行出輕鐵站,但咁啱俾我見到好靚既彩虹~如果騎羊的話就只可以睇,而唔可以影低佢,真係有緣,令我諗起"魔神英雄傳"創界山既七色彩虹~~

kcal

抹完車,打完腊,同台灣女生騎羊去深井kcal食晚飯.人家叫咗個法式燒豬脾仔,外脆內嫰~

而我就點咗M5澳洲和牛肉眼,五成熟,正~不過一人一個餐真係會大份得滯,因為有大碗餐湯同沙律,如果個法式燒豬脾仔係單叫的話,咁就啱啱好~

下路無咩車都幾好行,臨兜入屯門公路前既一段高架路,好似係海中上面行咁,吹住海風黎行,爽~

三號風球後的晴天

尋日仲係三號波,今日就鬼咁好天,加上星期日,沙灘上聚集咗好多泳客. 

三十度高溫,凍飲當然係唔少得啦,有個大冰桶坐住0架,再有把遮擋住太陽~ 

尋日因天氣問題成唔到團,變咗今日係臨時重組,但沙灘蓆,凍飲,酒水,如常供應.雖然係得我,andrew同楝哥,但邊晒太陽,邊飲邊食,傾計兼望風景,真係幾爽~~

ps:六點左右離開,太多人同時間散場,等的士都有難度,好在同朋友晒完太陽既駒哥渣車經過見到我地,好好心咁停車兜埋我地,真係唔話得.

元氣八五折

 今晚同台灣女生去咗市中心元氣開餐,見有"盛夏之鮮"(時令壽司),於是叫咗其中三款.

 湯霜鱈場蟹,一大啖蟹肉,如果平時食既蟹柳都係咁就好lu.

極上藍鰭吞拿魚腩(拖羅),人家試過後話條肥膏邊有啲硬,但味道好好~

唔想食咁肥既我揀咗藍鰭吞拿魚腩,好易入口,軟綿綿,真係一分錢一分貨,絶對唔會好似普通吞拿魚咁有腥味~

結果人家就叫多咗三件藍鰭吞拿魚腩,計埋之前叫既燉蛋,軟殼蟹手卷,三文魚子同海膽壽司,我地所有既食品都係落order,一件都無係廻轉帶上攞過~

搵笨電影

一心諗住綾瀨遙會有"特別"演出,點知係搵笨...原來主打係一齣少年勵志電影.雖然係咁,但係電影世界呈現出1978年既風貌,汽車,服飾,以及建築物都係舊時代既產品,真的不禁稱讚日本既古物保育,始終地方大係唔同啲.香港地少,有時係迫住拆舊物黎翻新,,不過有紀念價值既景地,政府真係要做多點功夫.

ps:今朝打Wii Sport Resort玩三人籃球時,咁啱同外母兼台灣女生一隊~~

高效能sleeping day

 咁好天,訓醒就騎羊去泳池游水,可能係番完夜既關系,尾段體力不繼,好暈,手軟腳軟.

係市中心放低羊仔,入咗間茶餐廳食下午茶,個豬扒包賣相麻麻,啲生菜有啲似椰菜,個包根本係熱狗包黎,唯一慶幸既係杯凍奶無出事.

食飽就去搭巴士出旺角購物,戰利品之一就係Wii Motion Plus($170),間咗一輪價至有呢個價,話晒要買兩隻嘛.點解要兩隻?因為要同台灣女生一齊玩Wii Sport Resort,好耐都無一齊雙打了,只係爭機玩麻雀同魔法game.今次有十二種game玩,你睇人家踩單車踩得幾忙~今次有得玩跳傘影相,我咁啱可以捉住Wii版台灣女生影合照.

另外,我仲買咗隻MJ既DVD,當初仲諗住香港有演出的話,當幫佢籌醫藥費都好,點知無機會了,唯有買隻DVD當盡點心意之餘,又可以留住傳奇既舞影.