掁興新村盆菜宴

今晚大姐請食盆菜,地點依舊係掁興新村,一眾舊朋友兼同事又可以聚首一堂~今次仲有舞獅節目助興,淩空舞獅,無吊”威也”,認真搏命,難怪全場拍爛手掌~

雖然個盆係區內既到會盆菜店,但味道都唔錯喎~早黎既大vicky,己飲咗四罐啤酒,完場時佢前後飲咗九罐,坐係隔離既我至飲得三罐幾.我地個枱坐到最後至走,麥生仲拎咗支馬爹利過黎,話人地飲剩叫我地幫手清埋佢,結果我地每人都有飲少少.

大合照當然係唔少得,可惜儍瓜機未能自行修正黃光…虎年第一次既聚餐,希望大家身體健康,多啲聚會!

PS:明明叫?阿姐影半身合照,唔知點解佢都係要企後?影(麥生行開?,未能入鏡)

容忍有限度!

近十一點左右,聽到屋外有小朋友踩單車聲,點知無幾耐就聽到電單車碟鎖響聲.開窗望出去己經無人,而死氣喉位置既布冚上有明顯既單車轆印!之後再聽到兩個隔離屋企小妹妹繼續係我電單車附近踩單車.我實在按捺不住,叫佢地唔好係度踩,而佢地就話會係我電單車後既空地踩,對唔住都無句.......

今次已經唔係已知既第一次,上一次啲小朋友係唔聽你講,繼續踩黎踩去.咁啱隔屋既親戚行過,我同佢講述事故,啲小朋友至聽該位長輩講,係第二度踩,但都係無講對唔住!!
我只係一個租客,我需要一個安靜既居住環境,,你既熱鬧已經令我構成騷擾,而家仲要係危及我既財物,好過份!唔通公德心同為人設想既品德,係香港已經唔再流通?

Buddy

今日睇J2重播既<機動警察2>OP歌時,見到主角泉 野明幫愛機"阿魯凡"打腊,突然諗起自己鍾意幫愛羊清洗打腊,可能都係細個時受呢齣動畫既影響-要好好對待自己信任既機體搭檔~

雖然每次抺車打腊都幾攰同花時間(三個鐘),但每次見愛羊乾乾淨淨,都感到值得~唔經唔覺,仲有一個月就係愛羊入手四周年了.希望愛羊健健康康,繼續合作無間~

買燒賣

夜晚係屋企做完清潔家務,一個騎羊去卓爾居食麥當勞.等收工既台灣女生話想食燒賣,於是同愛羊去兆康既鴻褔堂代買.前個排好鬼凍無mug點開車,尋日起天氣回暖,卒之都可以活動吓~

人家偏愛鴻褔堂既燒賣,七蚊有六粒,有時仲會食埋茶葉蛋添.人家仲試過係福鴻褔堂買套劵,貪佢計落會平啲喎~

PS:晏晝同契細佬食完晏,自己行埋置樂,就係華都買?IMATION既500GB2.5 hard
disk($699),因為之前楝哥幫我砌個隻80GB己經就爆.金,銀,黑,白,紅,藍,紫,綠,灰色,我揀咗紫色,夠搶眼~

年廿九,荃灣豬骨煲

今晚同台灣女生,外母大人一齊去荃灣豬骨煲開餐,起初外母大人面容好似疑惑.

上次同andrew黎食過,真係幾好食,所以特意帶人家同外母黎試吓.今日都座滿客,我地要由上層調番去下層枱,因為要讓張細枱出黎二合為一張大枱俾其他人.

見到外母成碟都係骨頭,就知道佢有幾滿意啦~番完早更既我有啲攰,所以都唔係食得好多,連支啤酒都飲唔晒.之後我地行去對面馬路球場既年宵市場行,好多都係賣花,乾貨精品就無mug..

SLAM DUNK

呢排亞視高清台番播男兒當入樽,係我中學年代好hit既動漫.當年係租漫畫舖裡,有好多入樽既精品賣,最代表既莫過於1:1既球員海報,以及Q版角色鎖匙扣.

事隔13年,而家同台灣女生睇番,覺得啲"dump波鐘"文戲好廢,例如"無論邊隊贏,都會有一個失敗者","落後既湘北隊好不利,因為緊張會令體力消耗得快".........以前唔會錯過既對白,而家就變咗笑料~

初中我跟同學仔打籃球,雖然唔叻(跳力不足,走籃唔順,左手唔得,插花無術,三分無力...),好多時都係配合主力球員(鄒遠威,文慶宏,岑崇軒),但都好鍾意參予,有時執吓死雞射入(因為太渣,無人看管).主場係兆安苑既石屎場(多數打半場,因為場旺,但唔夠多架),偶爾放學後著住皮鞋打,星期六就約定打上晝.打完波一班同學朋友一齊去七仔,OK買汽水好開心(飲咁啲,再添飲).中四升唔番原校梁球琚,老媽就唔俾我打波,就係咁一直都無再買籃球鞋...

當年我鐘意湘北高中既三井 壽,而人家原來鍾意陵南高中既仙道 彰(我覺得係貪靚仔囉).

豐田之道

近日豐田頻頻上電視,係網上搵到有關"豐田之道"既文章~

http://hk.myblog.yahoo.com/jw!bvc9AWaWAgSJaawWXY7SCLSZjNo-/article?mid=38

CITYWALKER 鳴門-鍾意腥既朋友,一定要試丫~

Sleeping day,訓醒同台灣女生出市中心食元氣,跟住出荃灣行吓.夜晚係荃新天地既鳴門食,皆因見佢門口話有信用卡半價餐.

松葉蟹肉蟹籽沙律,只係普通蟹籽青瓜絲沙律上加多少少蟹肉....壽司小盛(見圖),舊飯一夾就散,啲魚生係"林林地"兼帶腥味......

刺身方面,都係腥,蝦就唔腥但無味,所謂既鮑魚,似螺片多(仲腥).......

海老天婦羅,味道一般(開始唔想再影落去)

海鹽燒竹簽魚,底個邊"濕嗲嗲",個面就似燒過既,味道都係......腥.........(食咗一半都無就停手)

蒜片牛舌(絲)炒野菜,賣相較油,加埋之前既腥味,更無胃口......(成碟剩番晒)

最後極上牛肉湯烏冬,雖然只係得一塊肥牛既湯烏冬,味道已經係最正常既一道.

PS:服務生好似新黎游兼游魂,倒瀉鼓油,免費餐飲變咗自費飲品......好耐都無試過食飯食到咁谷氣,兼蝕水...

台灣女生今日卒之都買到啱心水既電風筒,有多個梳頭,豐盈曲髮造型無問題~