Strong Sunshine

呢排咁好天,尋晚執定行裝,今日番完早更,騎羊去泳池游水.無諗過用手機相機都可以影到太陽,仲要有啲一粒粒既光影~

舊年都可以一星期去兩至三次游水,希望今年都可以保持住,少運動嘛,而且想黝黑啲.另外今年都想搞多啲沙灘聚會,一班好友開心吓~

細畫面睇英德大戰

今晚同台灣女生一齊坐係電腦枱前一齊睇英格蘭對德國,人家抱住持有土炮製英格蘭旗既鬆弛熊黎為愛隊打氣.

上半場德國先入兩球,英格蘭追一球.下半場55分鐘,林柏特射入一球過底線,但球證竟然話唔過線,唔計入球.....結果德國再入多兩球,4:1完場.

本人覺得如果當初係2:2的話,土氣應該可以提升,未必係德國一面倒咁贏.其實德甲用咗addias新波半年,比其他用nike波既國家真係著數啲....

直踩17個鐘

朝早八點起身,食埋乾糧早餐就同台灣女生搭巴士出QE上物理治療堂.今日好大雨,係屯門公路有交通意外,有一架私家車係快線四輪朝天.落雨天,渣車真係要份外小心.

十二點上完堂,行咗上護協買啲嘢,再去paris cafe食晏,經過近永安既麥當勞時,記起細個每次去敦煌飲茶經過既時候,都好想入去食嘢唔去酒樓飲茶,細路仔都係鍾意香口嘢嘛~食完晏,再行番去永安,買咗對clarks既active air皮鞋,雖然無著開個對咁好款兼抵,但無奈款式唔多,著開個對鞋底又開始爛,唯有就範.....

夜晚六點同人家係朗豪坊pepper lunch食過晚飯,就搭車番屋企,再趕下一場.九點半一眾男子組係百佳購入花生,薯片,以及冰凍啤酒後,就上gordon屋企睇世界盃-南韓對烏拉圭.開波7min南韓先落後一球,下半場67min追回一球,但係79min再被超前.Leo因為牙患而滴酒不沾,五位social drinker清咗打半細支裝啤酒(跟據培爺既時間表,每人要35min清一支),多謝Gordon既款待,一班人睇波,感覺係唔同啲~

PS:今日大出血,係永安買埋電動牙刷,因為舊既刷頭爛咗,再配要$168一個,新型號既刷頭只係七十蚊左右一個.咁啱優惠期跟機一大一細刷頭外,再多送一大一細刷頭,於是買咗($11xx,有啲肉赤)~

另外聖衣神話出咗星矢動畫版既舊聖衣,格完價後,以$328購入港版(日版啲手工都好似唔係靚好多),希望快啲出紫龍啦~

星期五

番完夜更,見天陰就落雨咁,向同事請辭後,係七仔買埋兩個叉燒餐包($9.9兩個)做早餐,就急急騎羊番屋企.番到屋企泊好位,心血來潮同愛羊影張相,全車包圍影得多,於是揀close up前軨.我落埋布冚,啱啱好開始落雨~

夜晚見望到星星同月光,於是騎羊去碼頭食歡送leo同杰仔既火煱餐,泊車時仲撞見係一位騎羊既tuns.開咗三圍黎食,大家都好忙咁.十一點多啲散,騎羊十五分鍾唔夠就番到屋企,仲趕得切睇到十幾分鐘葡萄牙對巴西,零比零,完場都係零比零.台灣女生話之前都係悶波,我出咗街食飯都無咩損失~

ps:晏晝搭小巴出市中心搵番完早更既人家食晏,係馬會落車時,撞到何福堂預科班主任鄭輝強老師."鄭sir",佢好坦白咁問我咩名,我答佢好多年前既畢業生xxx,佢立即答到我當年同bio miss wong好熟,畢業頭幾年都有同miss聯絡.無諗過十年多既事佢都記得,閒聊幾句後,佢又見到另一個熟人,於是我先告辭.

日本制-BOBSON

今晚同台灣女生行開ice fire見到呢條日本制既bobson短褲,對眼立即發光.sale哥哥話得32褲頭,我以為唔啱著,但試著後又覺得ok,只係鬆少少.sale哥哥話呢個價錢兼日本制,真係好吸引,人家都讚好睇~

八年前係ice fire都買咗條bobson日本制牛仔褲,不過係藍色長牛仔褲.記得都好以係$4xx,無諗過八年後$400只可以買到條短褲(經濟課題?)..........條牛仔褲已經著到洗到薄晒,褲腳同膝位都爛,而家都有keep係度,偶爾著吓,唔敢多著.

一路都想買多條日本制bobson,但咁多年黎見既都係"中国制",所以連平日左諗右諗既我,今次都即買(espirit一條短褲都賣二百幾啦)~

結婚註冊三週年

睇完通宵波,攰攰地,又想慳慳哋,所以夜晚係市中心既惠比壽食晚飯,$98個特價海膽,味道無元氣既咁出,但點都好過和亭.

忍口多時既台灣女生,點咗呢個熟既壽司,食完之後好滿足,餓咗壽司太耐.....

呢度既燒鯖魚,幾時都係咁好食,仲有叫咗啲串燒雞翼,黑豚肉,雞軟骨,不過唔記得影.

燒生蠔上面既係薯蓉,而且內裡既蠔肉全熟,所以我覺得麻麻哋,半生熟就最好了~

人家係元氣成日叫枝豆食,向女店員order,點知係一大碗,啱晒人家.最後同人家分埋碗雜錦天婦羅烏冬,飽晒.

由關島註冊結緍起三年了,雖然仍未夠錢置業,無咩點去旅行,無別人咁多家人既經濟兼心靈支持,人家毫無抱怨."只要你係我身邊就好了",呢句說話每次都令我覺得溫暖.

通宵睇世界盃

番完早更,同台灣女生係兆康食啲嘢,就番屋企,沖涼訓覺.因為今晚要一齊去黃金海岸既星群地中海餐廳邊食邊睇世界盃.八點半左右到埗坐定定,散叫嘢食黎當晚餐,其實都無咩點埋直播中既下半場南韓對希臘.食飽就等睇是日重頭戲-阿根廷對尼日利亞~

Andrew講得出做得到"我睇,但我唔飲",睇波餐飲係叫milk shake~~~~~

場內有唔少西人,阿根廷對尼日利亞個場開始多人,當叫hoegarrden時,侍仔話賣晒.....唯有叫tetley's.阿根廷不負所望,一比零小勝,andrew話美斯個樣好似學生哥放學去踢波咁(其他隊友又真係有啲似悍匪壞人).

區生區太,andrew同偉哥睇完阿根廷嗰場就走先,只有楝哥留守等睇埋02:30個場英格蘭對美國,oscar就十二點多啲黎到會合我地.

英格蘭嗰最多人睇,場內坐滿同企滿人.開波前,場內既西人一齊同畫面中既英格蘭隊員一齊唱國歌,身為fan既人家唔識唱.上一屆世界盃都有同人家去睇英格蘭,一樣係輸波,不過上次係十六強出局.仲記得係李白吧睇,emma幫我哋hold位.我仲睇埋兩點幾個場法國對巴西,結果搭的士送人家番屋企,自己再搭的士番屋企沖涼梳洗就出門番早更(A/N).

今晚出黎睇通宵波,主要原因係13/6係我同人家係關島註冊既紀念日,咁又三年了.只係搞咗個睇波團,無咩禮物,希望人家唔好介意.黎緊既擺酒紀念日,將會熱鬧啲~

ps:原本話每人消費一百蚊任睇,但原來係一百蚊一場.理論後職員認聽電話個位講錯,所以照每人至少一百蚊,下不為例,埋單每人$250,計埋環境都ok既.

家常小菜

今日番完早更,同台灣女生出市中心意粉屋食晏,再去百佳同吉之島買餸,今個星期己係第三晚係屋企食晚飯.

事源於上星期六係百佳見到有$30條游水魚賣,見夠晒兩條友食,於是買番黎蒸.後黎發覺,蒸魚加個菜,再+/-多一味餸,其實都可以方便同快捷咁搞一個住家飯餐.

今晚人家既+/-餸係蒸蛋,裡面有蟹柳同急凍既鮮拆蟹肉,幾盞鬼~辛苦人家要煮飯,所以我都以洗大餅黎作回贈.

係屋企舒舒服服咁食飯,洗完碗,沖埋涼,一齊係梳化睇尋晚既"F檔案".

小心駛得萬年船

今日行市中心,見到貨車與電單車碰撞,見電單車司機好似好"勞嘈"咁,睇黎似係俾人隊車尾死氣喉.

自己都係鐵騎士,但本人一向唔主張攝車,因為有咩事都係自己蝕底,安全要緊嘛.有時見尾隨車太貼自己,都會轉線黎避一避,等佢過咗先.

我變咗謝拉畢拿既擁躉?

今日同台灣女生去新墟巴倫紐睇"前妻逮捕令",四十蚊一張飛,志在輕鬆吓.男主角是一個專門為賺取賞金而工作的獎金獵人，一天他竟受任把棄保潛逃的前妻捉拿到差館報到,典型既鬥氣冤家喜劇.

諗番起,原來自租碟睇戰狼300,往後都有睇謝拉畢拿係香港上既戲.雄渾既肌肉造型,史詩式既故事,令我好難忘.

之後佢演出既作品都係愛情小品,記得都好似係入戲院睇,男主角癌症去逝,以十二封情書黎陪伴同勉勵妻子渡過喪偶既第一年.

第一齣睇佢既歡氣冤家喜劇,租碟睇,無諗過大隻佬會轉型做笑匠,釋演男主關係節目主持兼戀愛軍師~