又有人黎探你啦,幸男~

Sleeping day,訓醒出去晒相同寄信去仁愛堂(拖咗陪月好耐個封),買啲嘢就騎羊番屋企,因為適巍同阿嫂今日黎家訪.其實我都未去佢哋屋企睇梓滈,反而佢哋黎咗睇幸男,真係有啲唔好意思.....好在我都有珍珠奶茶同蛋撻黎招待佢哋啫~

同佢哋吐咗好多苦水,又聽咗唔少過來人既心聲.見到適巍同以前好唔同,會為小朋友唱歌同搞笑,好有愛心咁.以前一齊飲飲食食,番大陸揼骨,邊有想到大家會做老豆呢?

希望適巍早日康復,等小朋友大個啲,我哋再一齊去酒吧~

ps:阿嫂話我好似做咗家嫂既角色~~~~~~~~~~~~~

卓敏,歌仔家訪

晏晝外母大人幫幸男沖涼換衫,當我同台灣女生A完係市中心買埋嘢番到屋企時見到少主著到成個日式公仔咁(OR冠軍拳王)..................

由於太肚餓,無影到火煱既配料,食飽飽至有閒情幫大家影吓相.卓敏同歌仔上次見幸男都係滿月個段時間,而家已經係兩個幾月,重量有13磅有多lu.

卓敏真係好鍾意小朋友,睇佢個笑樣就知.幸男都唔算"扭計",起碼我哋係客廳打邊爐時,少主都乖乖係房度訓覺.

1st一家三口平安夜

平安夜,無出街行,只係屋企同台灣女生及幸男一齊過.平安夜出街食飯度度都貴,今年有幸男加入,更加會留守家中,等出年少主足一歲至帶佢出去影相啦~

晚飯都係好隨意,冰箱既豬扒,雪櫃裡既蛋同菜,米缸既"嘜"半米,經人家既主理,變成溫暖既住家飯.細個鍾意出街食,大個咗就鐘意係屋企食,結咗婚就更加,因為人家好知我想食啲咩~

家中飲啤酒就最抵,反正我都有隻330cc既家用版Hoegaaden杯丫,只係無生啤咁甜啫~

聖誕節無咩錢送嘢俾愛妻(養多個小朋友,一闊三大),之前為幫幸男影相而買既NEX-3已經當係大家既聖誕禮物,不過我都有買一盒兩包既"露之水滴"士多啤梨(人家至愛).

PS乾銀包,小禮物,望見諒............

閃電十一人

今日番晏見電播"閃電十一人",都有同德輝一齊睇咗陣.,感覺上好似係"足球小將"同"少林足球"既混合版.

番屋企上網由頭睇起,角色造型獨特,隊友們各有必殺技,風格既熱血又搞笑.主角係負責守籠,有時會谷埋上前場踼,對足球既熱誠,足以為隊友鼓舞同創造奇蹟.

好耐都無咁有心去追動畫了,久違了既熱情,番來了,正好為因湊仔而困身既我帶點娛樂同放鬆~

幸男,屯宿之男

幸男己經兩個半月大,唔經唔覺已經算係過咗夜奶既階段.由以前細B,到而家係實淨重B.台灣女生好有耐性,而我就顯得係一個無咩愛心同耐性既爸爸,唯有得閒就幫佢兩母子影吓相(其實部相機都未太摸熟...........)

屋企洗費多咗,二人時間少咗,大家既活動能力低咗,所有嘢都要先搞掂少主幸男先.平時騎羊係區內隨心四處去兼且怕嘈既我,實在需要啲時間去調整自己.希望幸男笑多啲,喊少啲,健健康康,快高長大.

夜晚係屋企食過飯後,同屯宿兄弟係老地方飲嘢,照舊笑吓"呻"吓,咁又十二年了.大家傾到成點,仲以為只係十二點左右.聚會指定啤酒tetleys'因為有酸味,所以轉咗做Hoegaarden

ps:"阿強,我哋大家都好好,其中三個都有自己家庭同小朋友.等幸男大嗰啲,我會同佢講我哋屯宿既趣事"

放假日,家訪日

今日放假,老豆中午左右黎咗屋企探孫仔幸男,呢張相老豆個表情有啲似Stone Sir(黃日華).以前老豆都唔會上黎我屋企,話怕俾老媽知.只係有一次睇急症時要等血報告至知要唔要上病房,老豆唔想係觀察房呆等,先至肯上我屋企坐住黎等.老豆多咗上黎,我都開心,起碼可以多啲時間見吓佢,兼且見到佢望住幸男開心既樣~

晏晝德輝同Ivan渣車黎探幸男,比起上一次見面(初生),幸男都大隻咗好多.德輝話佢"實淨",Ivan就話個樣無之前咁多嘢諗.咁啱電視播"閃電十一人",結果三個大人同一個小朋友一齊睇卡通(其實係幸男偷睇).

一男十女

今晚台灣女生去飲,咁啱BoBo蘭蘭同嘉欣話黎探幸男,知道我無飯開就話煮埋飯一齊食,見Janice同康琦都番早,於是叫埋佢哋一齊上黎,阿姐哋聽到後,話又想黎探bb,結果由三個訪客變咗十個,晚飯亦由小菜變咗打邊爐~

後生女們一圍埋就雞啄唔斷,好似宿舍柴娃娃咁.多得佢哋唔嫌棄我呢個中男,幫我諗埋晚飯.

阿姐們都算關照我,唔洗我點幫手,我只係放工去咗買啤酒汽水.食品處理完全唔洗我粗心,可以安心睇住幸男~

趕番夜更既阿貞同剛番完夜更既愛姐都有黎趁熱鬧,又食又探家B.

麗姐同群姐坐定定咁等影相,最衰自己番完早更攰(一支細啤酒都飲唔晒),唔係就可以同大家影多啲相兼大合照(同女仕們合飲照)

台灣女生大學書友聖誕聚會

今晚同台灣女生帶埋幸男出沙田去Rita屋企參加大學書友聖誕大食會,其中有三個小家庭出席~少主影相時較"忟憎",唔太寛容,隔離既彤彤同晴晴都唔太望鏡頭....

幸男件鹿紋外套吸引住大家,其實少主成晚都算乖,係尾段至有啲唔太合作.

幸男當然有同屋主影番張合照啦,話晒第一次搭巴士出到咁遠去家訪嘛~

晴晴半推半就咁0錫幸男,不過之後就唔覺意"鐘"咗心口一吓,我哋笑話幸男應該好似被掌摑個位警員咁既反應至入戲~

九度以下,撲奶粉錢

十點多啲收到奶粉代理送貨電話,話尋日落既order今日中午會送貨.由於成18罐,要三千幾蚊,屋企又點會有咁多cash丫,唯有冒住寒風,騎羊出去商場提款機湊奶粉錢...

屯門會低一兩度,騎羊撞風又低幾度,其實會唔會凍過雪櫃(4度)?

ps:今日摷開禦寒衫,見搵唔到件fleece衫至記起因為大殘舊(4or5年),上年著完就扔咗去回收,一路都唔記得要趁特價再買.....

帶子雄郎之勇闖母嬰健康院

今日台灣女生番晏,放假既我一個人用孭帶同幸男去母嬰健康院打針.訓住覺既幸男,完全唔察覺到即將要接受針葯之苦.

登記完,等叫名入房磅重,一個人幫佢除衫換片上磅(6kg),再著番衫.再等叫名入房見姑娘,好在人家同我預習過,所有問題都識答.姑娘話初生時體重線係25,一個月係50,而家兩個月係75,下次再升到90就要見醫生,有點擔心.最後叫名打針,幸男喊到七彩,要用奶咀至好啲啲.......

夜晚幸男發燒,餵食panadol,個樣有啲呆滯,希望快啲退燒啦,其實今個晏晝番到屋企佢都係好"忟憎",好似唔舒服咁.

飲茶

今日同台灣女生,帶埋幸男搭小巴出市中心同外母大人飲茶.幸男好似好舒服咁"I"係人家懷抱.幸男應該鍾意出街同坐車,反而係屋企較多"扭計"......

去到酒樓,外母全程隔住張枱黎望幸男.一食完嘢走去抱住個外孫,人家亦不時用手提電話相機黎幫佢影相(灌湯餃都放低先).

帶子雄郎

今晚台灣女生第一日番工(晏晝),我早更過後騎羊去市中心買啲嘢就番屋企接外母更,交收case.嘉欣同bobo四點左右上黎探幸男,佢哋輪住黎餵少主食奶,幸男不負"奶筲箕"之名,以2分鐘完成5oz奶~

夜晚用孭帶同幸男坐小巴出市中心同褔娃及姐姐們一齊食飯(小草屋),多得bobo護送我上車同行去食店.幸男今晚有啲扭計,但總算係無咩大喊.

食完飯見時間啱,搭輕鐵去公司站會合埋人家一齊番屋企~其實沿途孭住幸男時,唔少途人都以奇怪既眼光黎望我,可能呢個年頭少人用孭帶(多數用bb車),更何況係男仕...............

懶鬼名錶

見幸男仲有兩日就足兩個月,於是提早將之前買落既鬆馳熊手帶玩具(对象2個月以上)帶上手上.可以咬得,又有小膠球發聲,呢張相好似係賣名錶廣告咁.

少主都係忍唔住要咬吓佢,同吮吓佢,個樣仲幾肉緊吓,睇黎佢對揮動時既聲響無咩興趣~

帶NEX-3第三代目出荃灣

今日病住出荃灣,同台灣女生係荃灣GV睇"猛火爆",無預期中咁好睇,廣告上既動作片段已經係全部既一半........人家話啲笑位OK,但我就麻麻(重要$60一張飛).

較特別既係戲院買既熱食,係即叫即做,職員會mark低座位,等熄燈開場一陣至摸黑送上.人家讚呢個夏威夷味pizza cone好味,多得人家部手機有補光燈,如果唔係都睇唔到自己食緊mug.

我叫既熱狗就普通啦,無咩驚喜,因為都只係腸,包,茄汁,芥辣,無其他料,勝在夠熱~

睇完戲就係商場幫人家影相試機,燈光火猛,效果唔錯~

夜景都無咩問題,因為附近都有商鋪燈光,都無咩問題,只係我渣機唔正.....但係聖誕樹下幫人家影相就有flash直射既問題,咁啱隔離有個哥仔用大機,flash配反光板黎幫條女影(相形見絀,先天不足,於是放棄)........

隔商店廚窗同人家影相,儍瓜機應該做唔到呢個效果卦.....

夜晚係市中心買元氣外賣番屋企同外母大人一齊食,三代目NEX-3順利過渡"頭七"(七日內有壞包換),所以影番張大合照留念-相機連filter,相機帶,相機袋~

PS:人家笑我呢排睇親啲戲都係老人家戲,破煞天刧,轟天猛將