幸男幫手驗樓

今日同台灣女生帶埋幸男去Jacky新居幫眼驗樓,幸男好似好滿意咁,全程無"扭計",中途仲訓著埋添~

客廳景觀都算開揚,無樓擋住,唔知方向係望日出定日落呢??

機底夠高,卓敏加埋人家至掂到樓頂,私樓黎講都算少有~

主人房可以望到豫豐花園內園,用望遠鏡或者相機set支長鏡,應該可以望到泳池既熱鬧添,正!

驗樓完畢,大家係會所前影張大合照,有相為証,幸男訓到頭仔都側埋.希望蛟龍早日搞好裝修,邀請我哋上去坐吓,等人家可以帶幸男去打牌.

始終都係揀咗你,N8

用開既N86MP舊電開始快乾塘,加上有時會收唔到信號,見部機都有一年,於是決定換機.番完晏放工急急腳騎羊去市中心中原問舊手機既TRADE IN價.見有$1600,而且又有橙色既N8現貨,於是立即刷咭,攞走呢部我人生中第十二部手機~

之前都諗咗好耐出咩機好,雖個心想出NOKIA既N8貪佢有蔡司鏡頭兼1200萬像數,但網上啲評價唔太好,又話hang機又話慢,又話wifi長著,又話快無電,又話係SYMBIAN^3作業系統既孤兒仔........所以都有考慮出唔出行ANDROID既手機.

基於我又唔會轉上網既電話PLAN,平時都係用個電話黎影相打blog用,N8由$39XX下調至$3650(因為E7新出),所以揀咗N8.

用落都唔係咁差,WIFI可以熄咗佢,SYMBIAN^ 3已經比之前既系統進步同快.以我用黎齋打電話,影吓相,頂多係CANTEEN用WIFI上廿分鐘網,都可以挨到兩日至叉電(夜晚訓覺個陣我係會飛線兼熄機).可能i phone同其他android手機好勁好快,但N8已經夠我呢類高科技白痴用.

ps:手機PROFILE更新

1st  Ericsson PF768 > 黃色    sunday
2nd  Bosch 909 Dual    >  灰色   people
3rd  Siemens A40     > 藍色    orange
4th  Ericsson T29 > 銀灰色外殼,紫色panel one 2 free
5th  Ericsson T39 > 灰藍色   one 2 free
6th  Sonyericsson T300    > 紅色 (紅豆)    smartone
7th  Sonyericcson T630    > 黑色    smartone
8th  Nokia 6260    > 銀色    smartone
9th  Nokia 6270    > 黑色 (深啡色,鋁金屬外殼)  smartone
10th Nokia 6500 Side   >銀色(鋁金屬外殼) smartone
11th Nokia N86 MP >白色     smartone
12th Nokia N8     >橙色(金屬外殼)   smartone

"大字型"幸男

幸男扭完計之後係梳化度"大字型"咁訓著咗~

Lucy家

今日番完早更先番屋企沖涼,再跟德輝車尾入去Lucy屋企參加大食會,一眾早到既同事先影張合照~

Lucy愛女睛睛對我部綿羊好有興趣,係Janice既幫助下,嘗試雙手握住把手,十足女騎士~

Lucy家姐整咗好多嘢食俾我哋食,款式多又好食~

睛睛四圍走,咩都笑一餐,唔怪得Lucy見到佢咁開心啦.

夜晚既燒烤餐由Lucy老公主理,架生咁齊,睇黎平時佢哋都有搞開同類型活動~

入夜後同事們陸陸續續黎到,由於屋內太多種燈光,所以白平衡難set好,照片既色調都有啲前後唔一致(睇黎技巧有待改善...............

最高峰時期,人多到要分開係兩個廳,仲要係企位添~大約八點三個字就騎羊同卓敏一齊番工事開工.

住家辣酒煮花螺

今日係百佳見到有花螺賣,雖然唔好超大隻,但好耐無食過,於是買咗一斤.平時台灣女生都係白灼,再醮辣豉油食,但今日人家話試吓買李錦記既麻辣火煱醬黎煮辣酒煮花螺.

雖然係以紹興酒酒代替玫瑰露,但辣度十足,好在有啤酒候命降溫,人家就以忌廉解辣,屋企又多道住家菜了~

幸男乖啲啦,氹吓爸爸同爺爺啦~

唔夠訓,脾氣差,朝早對幸男扭計唔願訓感到好忟,話佢一大餐之餘再打手背仔,繼而放係床鋪由佢喊.台灣女生番晏晝班,下午就得我同幸男單對單,好在佢都有訓吓晏覺,應該係朝早喊過黎,消耗咁啲體力....

半個鐘左右又醒咗,唯有擺個陣黎分散佢注意,等佢唔好喊.

七點鐘食完奶,幫幸男換衫,執埋個輕便裝尿片袋,一個人推BB車出去搭輕鐵,託賴佢係上咗車無耐就訓著咗.

係市心美心等老豆一齊食飯,老豆見幸男訓個樣咁儍,當然心都甜埋啦.

點知幸男醒咗,見隔離有個人係度食緊嘢(唔認得爺爺),好驚咁喊,唯有我抱住一陣先.之後交俾老豆抱,幸男個樣都好似面有難色,想喊想喊咁,唯有叫老豆抱佢出去門口空地望吓街,唔好騷擾其他人.

老豆行番入黎時話幸男無再喊,只係望街同有時回頭望吓佢.見幸男認唔到爺爺,自己又覺得因為屋企問題,令老豆少見個孫之餘仲要偷偷摸摸,有點不是味兒.....

PS:同老豆一齊等輕鐵時,老豆見有老媽同大佬既MISS CALL.老豆先上車兼回覆大佬,大佬好似代老媽出口質問老豆去咗邊咁(老豆打電話俾我報料),真係覺得大佬好PK,係屋企白食白住,屋租,水,電,石油氣都無俾番兩老,只係久唔久俾個少少錢,恃住老媽唔出聲就咋咋帝,以幫手對付老豆當回人情俾老媽.

心酸既我,係輕鐵裡同幸男講"幸男,爺爺又俾大伯同嫲嫲蝦啦......."

又一日SLEEPING DAY

由於尋晚落雨無騎羊番夜,朝早搭輕鐵番屋企,行入村時見一群流浪狗行過,如果係台灣女生就有排佢驚...

訓醒騎羊去置樂玉林苑食晏,再去藥房補給,見以前住置樂時成日經過既七仔仲係度兼且仲係用緊舊式既推拉門,感慨良多,影張相留念...

四點半番到屋企接外母湊幸男,其間幸男曾試過狂喊扭計,我由佢係房床仔一個人冷靜一個鐘(家法嚴明!),喊到收聲訓醒至抱番佢出廳坐.可能喊得太攰,餵完奶同佢玩陣,係HIGH CHAIR坐坐吓佢又訓著,總算偷到啲時間吸塵拖...

當台灣女生放工番黎,幸男又好以當無事發生過咁,一臉無辜.......................

PS:幸男係房喊到攰收聲訓,入房見佢公仔亂晒,幸男用被蓋住個頭,掀開見佢邊訓邊偷喊一兩聲(鳴咽),搞到好似係我做錯事蝦佢咁.................

懶FRIEND

幸男對新加入既鬆弛熊(懶熊)毛公仔非常有好感,見到佢就抓住佢黎玩.我同人台灣女生向幸男訛稱熊仔係佢哥哥,好可惜幸男同佢玩個陣都會HIGH啲口水同抓甩啲毛,又或者推熊仔落地.....

自助餐"慶生"

今日Sleeping,夜晚同台灣女生搭輕鐵轉西鐵去尖東-海景嘉褔酒店食自助餐.

我同人家既主力當然係食生蠔啦,卓敏話之前食過係有四款生蠔食,但今次就只得一個,有啲可惜......

其實今晚係同卓敏做生日,小歌仔當然有份,唔記得支酒係卓敏用coupon定大會送俾壽星女....................

熟食都有唔少款式,但無諗過人家會去攞碗魚旦河番黎食.............................

臨尾搵人同我哋影張合照,因為番完夜更,所以唔係太有狀態食嘢(平時都已經唔太多),但最緊要係壽星女開心,祝佢心想事成,身體健康~

外賣羊

番完晏,騎羊到市中心滿記買榴槤班戟俾人台灣女生,見相熟泊位被阻,唯有剷上行人路暫泊.難得咁狂妄,影番張相留念~

點知買完甜品外賣去攞車時,發現有交通警鐵馬掃場,急急腳開車走人,好在無事..............

黑天鵝

今日同台灣女生一齊去巴倫紐睇BLACK SWAN,撇開多提名外,其實我都有留意女主角Natalie Portman.

故事話芭蕾舞蹈員女主角因為要演出名劇天鵝湖 裡白天及黑天鵝兩角色,壓力太大而精神崩潰既經歷.係大膽既化粧同電腦特技下,令觀眾好容易投入到女主角精神既驚嚇感覺.

第一次睇女主角既戲,就係"這個殺手不太冷",當時佢只係一個童星,但已覺得佢好靚有天份同有氣質,話晒都係一齣大人戲,並非笑片.

之後再睇既戲,就係星戰前傳中擔當公主(黑武士之戀人)角色,真係愈大愈靚~~

講開又講,其實我都幾鍾意黑武士既角色,因為佢為咗愛人而不惜反離經背道,繼而入魔,至情至性.

大家可能會問,點解我同人家可以咁free去睇戲,其實我哋先帶幸男去良景見爺爺.

再上外母屋企將幸男暫托俾外母照顧,跟住就由大興行去新墟巴倫紐買飛睇戲~

PS:人家話我都係較鍾意睇動作科幻片,叫我搵日約德輝睇"關鍵第4號"...