買唔到靚飛....

台灣女生一向喜歡YUI,今次香港有CONCERT,只演一場,今日開始賣飛.自己唔生性,SLEEPING DAY抖唔夠,今日朝無力起身出去買飛.通利十點開,我十二點唔夠騎羊出到市中心,只係買到中價但後排既位.....

本來想氹吓人家開心,點知搞成咁...有諗過買貴飛,但同個台成90度咁滯,又係無謂,買最平就係尾排轉彎位,雞肋也...............

買完飛,番晏前去咗紅橋食晏,點知個咖喱薯仔炆雞翼飯,啲餸少得可憐,唔知點解會有雞頸,雞腳,其他既骨連肉都應該砌唔番一隻雞翼出黎,加埋凍飲,咁又$28............今日真係諸事不順...................

新居聚舊

今日一家三口一齊去慧賢既新居聚會,由於只係相隔一個半輕鐵站,所以我哋行過去.

無諗過係洪水橋站行入去都要十分鐘有多,途中經過一間好似好西化既小學,環境唔錯,仲話有個天文觀測站添,唔知幸男入去讀書好唔好呢?

幸男今次已經係第三個禮拜更上一層樓家訪,之前去過YOHO同愛琴.

唔知係咪大VICKY剛陽味太重,幸男一有眼神接觸就係咁喊,反而大姐抱就只係扭一陣,跟住欣然接受~

滔嫂同滔爺都有同幸男合照,不過幸男需要奶咀黎穩定情緒.

晚飯係送上門既盆菜,由主人家們帶頭起筷,邊飲邊食邊傾,正式開始~

地方夠晒闊落,見大家可以坐到咁開就知啦,為咗方便睇住幸男,我同人家坐咗係梳化位,我哋都話主人家都幾落本黎搞屋內裝修~

氹極都氹唔到慧賢抱幸男,唯有坐係隔離影啦.

幸男今日既衣著,有啲似司徒法正,如果有個羅更就無得頂~

法文老師JACKY當然有抱吓幸男,大力都趁埋一齊玩.

餵完奶,我同人家以南瓜餅粒黎氹幸男黎俾大家抱黎影相.

大家都話幸男大隻夠實淨,應該幾好湊,但其實幸男响屋企係一個喊反應堆.......

星期四都可以係家庭日

天氣咁好,以前就會同台灣女生騎羊係區內走動,或遊車河,再唔係就搭車出市區行.

而家有咗幸男就變咗係搭小巴出市中心,移動力低咗,但人家好似仲開心咗.

是日係外母大人湊孫既DAY OFF,但都約老人家係市中心飲茶見吓個孫仔.

外母真係好鍚幸男,飲茶個陣都要用孭帶黎抱住佢,點心好唔好食已經係其次.

夜晚用新買既電飯煲黎煮飯,卒之都可以唔用又"雅訂"又舊既飯煲,煮出黎既飯又真係唔會有飯焦軟,正~

幸男卒之都有專用既風扇,平時用客廳個把,但而家外母有時係度過夜,所以唔夠風扇用.人家貪佢夠薄身,唔阻地方,三個風扇可以獨立開關.

我同人家對兩件新電器都好滿意,飲完茶,行陣市中心BB車加兩件電器黎搭的士番屋企,超值~

眼神制敵

以前食飯二人世界,邊食邊傾邊睇電視,而家多咗幸男呢位家庭成員,好多時都要邊食邊"目及"實住幸男有無搞搞震,例如食手,抓眼,咬嘢,踢枱.......

PS:睇電視既時間少咗,好多錄落既節目都係未睇,個160GB既HARD DISK都就滿咗大半

放假打育成GAME

台灣女生番晏,得我同幸男留守家中.餵過四點鐘奶,擾攘一後,幸男至訓著.六點左右,趁幸男未醒,摸黑係電腦枱食叮番熱既隔夜飯菜當係晚飯.

幸男一醒,就開燈等佢望嘢,黐身既幸男當然要我陪住佢,唯有抱住黎係電腦睇閃電十一人.

七點半就開始用蒸煮攪拌機黎為幸男準備南瓜蓉(撈埋熟蛋黃碎),配埋奶溝米糊而成既糊仔,就係幸男既晚餐.雖然都唔係全部食晒,但比當初既食量有進步.

食飽飽,幸男又要扭抱,點知抱抱吓就嘔咗啲糊仔係我個身度.....好在件衫係舊底衫.

認識自己

之前台灣女生揀咗啲相黎晒俾外母,外母當然開心.見有咁多張幸男既相,於是人家逐頁揭逐張相介紹俾幸男聽.

幸男對住自己啲相,好似好迷惘咁,手多多既幸男,有時會用手抓本相簿,為咗保護本相簿,唯有拎遠啲本相簿黎俾幸男望.

今晚試食埋之前係吉之島買既法式三文魚芝士卷,無想像中咁好食,特價都要60幾蚊,奉勸大家千忻唔好破費買黎試...................

叉電日

預約外母上門湊幸男,台灣女生帶我出去抖吓氣,因為大家除咗番工,又要湊幸男,消耗不少體力同精神....

第一站係出去太子,享用全身磨砂+香薰按摩,對上個次都係5年前旅行.雖然價錢係貴啲,但都真係滑咗同舒服,出門口時行步路都輕快啲,之前積落既肌肉酸痛一掃而空~順路行去嘉利,可惜用開個款手套無size,唯有等秋季再去睇過.

跟住搭地鐵去尖沙咀,係港威酒店食自助餐,當然都係由人家訂位安排啦~

當然要以冷盆作為自助餐既開始啦,其實仲有一碟剌身,不過可供選擇既種類唔多...

我同人家食自助餐,目的都係想食生蠔,唔知點解,自助餐既生蠔,總係唔及自己散買外賣番屋企食既法國蠔.

熟食都幾好食,但牛柳就較差,最好食係個辣酒煮螺,平時出街食都係花螺仔,今次係翡翠螺,大隻得黎又有肉地,正~

大會雪糕係MOVENPICK,第一ROUND係雙球,第二ROUND就食單球筒~

食完嘢,經海運去海邊行吓,人家話要自拍,但我影得塊面好闊,於是人家提議學GLORIA咁拎側啲個頭黎影,結果影出黎係大家鬥側咁,好搞笑!

手機相機都影到咁既夜景都算係咁,但唔知點解部N8芒出黑色好似好多粒粒雜訊咁,但用電腦芒睇番啲相又無問題,唔知係咁N8個mon本身出黑色有問題,所以之後既E7以clear black作賣點.

海猿3D

之前兩集海猿都有租碟番黎同台灣女生一齊睇,今次3D當然入戲院睇.番完早更,放工換衫,就行去新墟既巴倫紐買14:40飛.台灣女生將幸男放係外母屋企,係戲院會合我.

適逄星期二,原本$60張飛,特價$50,平咗既錢都夠買兩個立體眼鏡入場(8蚊1副).比起前兩集,文戲少咗啲,令劇情緊湊啲,加上3D效果,令人無咁易訓著.雖然估到男主角最終係攬住樽氧氣等隊友救援,但總算HAPPY ENDING.

唔知係咪男女主角太恩愛,定係擔心靚仔男主角殉職,女主角要守寡湊BB,人家睇到眼濕濕......

主題曲都係第二集既PRECIOUS好聽啲.http://www.youtube.com/watch?v=3ycLV6ngvxg

PS:海猿 3 trailer http://www.youtube.com/watch?v=ngPe1oKgS0E&NR=1

崇真書友晚飯

正當準備騎羊出吉之島買西餐材枓時,收到教練既電話,話佢同OSCAR係迪欣湖踩完單車,約今晚食飯,於是換番衫留係屋企抖多陣,等台灣女生同幸男係元朗番黎,一齊出去市人心食飯(煮少餐)

教練嫂都有黎,不過幸男都係怕生面口,唔太熱情款待大家.........

Oscar要出動i phone至可以令幸男易啲抱上手,唔會扭黎扭去.

喊到出聲就由我同人家接手番,其實幸男對我都唔係時時都咁寛容.

不過楝哥就慘啲,抱咗無耐,幸男就扁咀同眼濕濕,其實我覺得楝哥對小朋友比我更有耐性呢~

人大咗,每次都好珍惜舊同學出黎食飯,或者上我屋企既聚會.晚飯後,大家一齊係老麥買雪糕,經屯門公園一齊行去西鐵站至分道揚鏕.希望幸男第時讀升中學,可以係崇真讀書,相信幸男一定會覺得怪怪的,點解會同爸爸媽媽,兼世叔伯讀同一間中學呢?

Rider Kick!(日語拼音:拉打戟KU)

今日幫幸男著上Brenda同Rita之前送既幪面超人衫,而家都夠大隻著得起件衫.平時都同幸男一齊睇幪面超人月騎,但叫幸男擺個rider kick時唔太合作,唯有自己落手腳幫忙擺pose.

無幾耐幸男無端端自己起腳,好在未收相機,影得切呢個動作.事後我同台灣女生認為,幸男見到鬆弛熊公仔係隔離想起腳踼佢.

3個月大個陣,幸男都幾鍾意隻熊仔,後黎就係咁虐打佢,有相為證,好似打摔角咁.

幸男1/2歲@兒童節

台灣女生今日特意為幸男襯好套衫,當然係有特備節目啦~

起初幸男見到個蛋糕(人家放工係市中心東海堂買,我負責騎羊去接人家番黎),個樣比較好奇同嘗試伸手去抓蛋糕,當我地拉開啲個蛋糕,幸男就鄒起眉頭............

人家係市中心搵極都無半歲爉燭,唯有係屋企用張紙做手腳.

人家諗住同幸男一齊吹爉燭,但最終都係靠人家吹熄.

吹完爉燭,當然係切蛋糕啦,但唔知點解落刀位要揀係個度...............幸男太細個,最多只可以食外母餵既糊仔,之後人家,外母同我食過蛋糕就帶埋幸男一齊搭的士出去裕滿人家食晚飯.