結集~屯宿之男!

今日番完晏晝更,騎羊送台灣女生番屋企,再搭小巴出新新墟大排檔食嘢,同15樓既屯宿之男聚吓,其實仲有無上鏡既阿禮同我~

呢排阿潘出PRCC,再度同我一齊聚首於屯門區,所以約咗P完之後黎聚舊.雖然係CANTEEN食咗個飯,(因為一心諗住黎飲嘢,食完至係whatsapps得知係大排檔......),但見人齊,都特別食得開懷,對上個一之聚都好似係三四月拜阿強個陣.

每次既聚會,大家都係亳無忌諱咁講出自己既事,交心朋友,就是這樣子.

PS:PERCY話佢請咗工人之後,可以時間睇兩齣戲,但我仍然想親力親為,始終自己父母都係咁湊大我.

幸福豬

晚同台灣女生係尖沙咀新港中心搵地方食嘢,原本諗住食一風堂既拉麵,但太多人排隊,結果去咗豚兵衞食幸褔豬套餐.

起初只係想搵個唔太洗等位既地方食,細細間,無諗過原來雜誌有介紹,賣相同味道都唔錯添~

話係日本制既芝士球,我就覺得一般,如果平少少就合理啲~

 

我就叫咗個是日推介既魚生飯餐,真係好新鮮好好味,海膽大大舊,唔會係好幾件細既砌埋一齊,正~希望下次可以試到一風堂既拉麵啦.

PS:當叫幸褔豬餐時,我就諗起屋企個幸男豬....

食飯前我都用咗積分兼生日優惠(減一千蚊),補咗一千有找黎買咗個新銀包,原來六年前台灣女生送既AGNIS B銀包除咗外面殘,原來裡面既間格布早已爆線口,只係平時啲銀紙遮住唔覺....

新裝雅仕堡

今晚台灣女生番夜,外母於家中看管幸男,我騎羊同人家去置樂娘惹食飯.見之前圍晒板既雅仕堡開番,好在唔係執笠.望落去好似開放式,有飛鏢玩,原有既點唱機好似無咗(少少失望),水吧位置就無變.高身BAR枱櫈同常規餐枱櫈各佔一半.

希望搵日可以同屯宿之男一齊係老地方飲番杯~Gentlemen, all the best!

JACKY+琪芝=好日子

今日係JACKY同琪芝既大日子,新郎哥同好娘係親戚好友既掌聲同祝福下,步向池邊既禮台.

第一次參加酒會式婚宴,感覺唔錯,主人家唔洗四處奔波,精神都好啲~好在天公造美,之前幾日仲係落雨.

男子組同事們當然有到場,現任與前度同事都齊來祝賀,著住西裝既我,曾經俾同事以為係部長.................

幸男都有出席,但一去到觀禮時段,幸男就開始扭計同喊,結果未完成誓詞同掀頭紗,人家巳抱走幸男入室內,避免喊聲影響儀式,只係通過廣播,聽到一對新人既愛語.之後既同事大合照,我都無上台影,因為想留係人家身邊睇住扭計既幸男.結果要喊到攰兼俾媽媽氹住至訓著,我哋至可以去攞茶點食,同偷時間上台同JACKY及琪芝影相.

祝一對新人,百年好合,永結同心~

PS:多謝子健早少少黎我屋企一齊CALL的士去酒店,如果唔係都無咁順利換好衫同執好幸男既行裝.

錦上路"勁嘆"燒烤

今晚同崇真書友去咗錦上路試重慶燒烤,溫生話而家啲3/4機仔,當係儍瓜機就好了,雖然功能多咗,但可以好儍...(睇黎佢對單鏡大機有絶對既肯定)

重慶燒好似係以前街邊車仔檔串燒咁,長方形炭爐上面架住鐵絲網,食物放係上面烤熟就行.

曾經因為個火轉弱而向話事人要求加炭,但阿姐話唔需要加炭,亦未試過要加,因為可以燒四五個鐘咁耐.之不過我哋真係一隻雞脾燒成三個字都無反應嘛.阿姐話唔信的話,可以試吓放隻手上網面試吓.就算係熱,但又真係熱唔到烤熟隻脾嘛.........
結果係OSCAR用筷子刮走網面既炭屎,個火至有起色.加上開頭攞位時,哥仔話無位,但我哋明明係留咗位,向話事人質問時,阿姐話"大把位,邊個話無".其實客人問加炭,都只會係個火唔夠大,諗唔明點解個阿姐唔會考慮呢點,同提出解決方法,只係一味話一定夠熱,未曾要加炭,服務熱誠欠奉!

撇開以上既不快,其實大家都食得舒服既,唔洗拎住支叉,定是反吓啲嘢食就可以,大家多咗時間傾計.

台灣女生要番工,未能同兩位阿嫂一齊聚吓.順帶一提,飲品只係包一款,之後就要自己掏腰包.其實呢排搞搬屋都好攰,我只係等溫生同楝哥發放熟食,當出黎抖吓氣,因為跟住就係執番正新居,同清埋舊居交吉.....

臨別在即

聽日就搬屋,但啲嘢好似執極都執唔完...紙箱擠滿客廳同走廊,心急行兩步又要急停,再要左攝右攝.我同台灣女生講,好似英超訓練營,練步法咁........

隨意影番幾張相,記錄吓住咗四年多既租屋陳設(因為帶唔走嘛),當然有電單車份啦~

睡房牆壁以愛情電影MINI POSTER做主題,話晒當時係新婚嘛.

鞋盒一走廊都係,其實已經幫台灣女生扔咗一部份太舊同唔著既鞋.呢個星期都忙住新屋裝修,收家俬電器,舊屋忙PACK箱.執嘢執到十二點正,台灣女生生日,雖然有安排送額外禮物同閃燈生日蛋糕型生日咭(可以吹熄)驚喜,但都無暇影相同短片留念.............就連幸男一歲生日都無時間搞生日會,仲要同人家等IKEA砌好晒啲家具,八點至出去市中心帝廷同外母,幸男食飯,自己都又病又攰,勁頭痛.希望幸男同幸男媽媽唔好見怪啦,新居舒舒服服作補償啦~

PS:又係時間繼續執嘢入箱了

台灣女生牛一

 

今日係台灣女生牛一,暫時放低PACK箱既苦難,夜晚同人家出去夜上海食大閘蟹餐.雖然唔係第一次食,無咩驚喜,但都叫做開心食豪少少.

 

菜色同幾年前食既都係咁上下,無咩大改動,價錢都係$888,水準依舊高~

唔知係咪自己錯覺,個翅好似少咗啲翅.......

主菜大閘蟹,多油又多膏多肉,如果個餐係包兩隻就好了,最多扣番兩個小菜丫~~~

份量夠每人一個飯碗仔既龍井炒蝦仁. 今晚至發覺用影人既白平衡設定黎影死物會有唔同色既問題,原本影人係紅潤,但影碟餸就青BB.

其實每款菜份量都啱啱好,唔會話一味就食滯你,食唔到下一道~

大閘蟹主題最後一擊-蟹粉小籠飽!

食埋個甜品就埋單走人,因為要趕番入屯門上外母屋企睇幸男,呢幾日要搞執屋,所以將幸男放咗係外母屋企暫住~

聽日就係幸男一歲生日,所以揀咗排係中間既幸男媽媽生日黎食蛋糕,一家三口連續三日黎生日,真係好特別.預祝幸男,身體健康,快高長大,少啲扭計.


PS:本年度台灣女生之生日禮物套餐,望笑納~

32歳誕生日

今日係自己既生日,但都無出去行街同食餐好,因為係村口食完晏晝飯,就去新屋做花園清洗,兼清吓門外既泥頭垃圾,好攰......

夜晚個餐都係叫板長外賣,不過無所謂,一向我都係留番台灣女生生日至出去食好啲,反正都係爭個一日之嘛.

食完個外賣,又繼續努力執嘢入箱,好在之前聖衣神話啲盒無扔,可以入番盒,一盒一盒咁入箱.計埋其他珍藏,兩個紙箱都唔夠添..............