後繼機體

每當手提電話保養就到期,我就會諗定後繼機體(我部N8已入廠整過次,最後一次係農曆新年前,底板換埋,但都係熄機會偶爾RESET晒日子同時間....),因為一下子壞係上黎,都可以好快咁買機,唔洗到時至左諗右諗,目標為本嘛.最初只係知SONY會出XPERIA S,但成四千尾,真係有啲貴.今日上網至將會有XPERIA P,金屬外殼,4吋MON,相機鏡頭就得800萬像數,而家我部NOKIA N8係1200萬像數,好似有少少退步,但其他硬件都係比N8好(雙核芯,屏幕像數效高),希望唔會貴過四千啦....

一心諗住離開NOKIA,但見佢有部808PURE VIEW影相好似好掂咁,又係蔡司認証鏡頭,耳機音質話有杜比技術,不過仲係行單核芯,兼且屏幕像數同年半前既N8一樣(360X640),仲要係大咗半吋,咁係咪即係畫質會仲差咗?期待呢兩款機早日推出市面,可以睇價錢做人,實際試吓兼睇吓用家心得,不過SYMBIAN BELLE作業系統己經輸咗一大截.....

愛不釋手

台灣女生一真都想買個背囊俾幸男,今日卒之買咗價錢同款式都唔錯既背囊.唔知幸男係咪成日見我同人家孭袋,所以自已都好想擁有一個.招牌都未拆,幸男就係咁攬住唔放.

去到邊,孭到邊,望落真係似去番學咁,希望幸男唔會孭住黎訓覺啦...........................

REAL STEEL

幸男繼續留宿於外母家,今日去良景還碟時,再租呢齣<<鐵甲鋼拳>>.之前戲院上個陣已經想睇,不過時間約兄弟入戲院,家務又積埋積埋.男主角係前職業拳手,隨時代進步,拳擊演化為機械拳手落場,光輝不再既男主角亦轉型為教練,幕後指揮及監控兼照顧機械選手,參加地下拳賽為生.

離婚多年既男主角得知妻兒離世,係喪禮重遇多年無見既11歲兒子,兼且要係亡妻家姐放完假之前,暫時照顧兒子.兩父子關係陌生,但因機械拳擊令大家打破隔閡,一齊翻新舊機械拳手ATOM,由地下拳賽打出名堂,升格至職業機械拳賽,目標係打倒世界冠軍ZEUS.劇情都幾好,熱血,緊湊,有搞笑位,藍光碟畫面清晰.幸男唔係屋企,可以開大聲啲部SOUND BAR,享受音頝~

唔知第時幸男會唔會同我有同一興趣呢?超合金?幪面超人?高達?電單車?

PS:我覺得第二部機械人NOISY BOY幾型,最鐘意佢身上(前臂同大髀)既閃燈顯示"拷問","贖罪","男子","大赦","聖所","苦痛"等浮誇搞笑詞語.

馬拉松式睇電視

因為台灣女生同我都相繼病倒,辛苦到大家都有攞病假,所以特意叫外母帶幸男番大興暫托,等兩位病君可以抖多啲.二人世界,屋企變番電影放送會,一日之內睇兩齣電影,第一齣係笑料百出既<<情迷午夜巴黎>>.男主角係美籍電視監製,但迷戀法國文化,結婚前席,同未婚妻及未來外父外母同遊巴黎.男主角每逄午夜十二點於某一個街角會坐古代汽車回到過去,與一眾文人雅士為伴作樂,如畢加索,海明威.....結果男主角從第二女主角(古時)明白,人總係嚮往過去既黃金時代(我都有少少),其實係逃避及不滿現實既表現,以及實際及夢想既距離與取捨.

睇完第一齣戲,人家叮波仔飯一齊食,我食海南雞飯,人家食肉醬意粉,邊食邊睇之前錄落既摩登家庭,真係無放過一刻睇電視既機會.

食完飯,由輕鬆小品轉為動作片,班底係<<這個殺手不太冷>>,哥倫比亞籍女主角十多歲時目睹雙親被黑幫老大滅殺,自此跟隨居於美國既叔叔生活.係黑幫家族環樈下,女主角放棄正常生活,主動要求叔叔訓練為職業殺手,為將來報復鋪路.動作場面爽快,唯一要彈既係女角長相唔搶眼.

今日同人家一齊睇電視既時間總和,可能係平時一個星期有多...雖然大家都係病緊,但可以靜靜哋咁一齊邊笑邊睇電視,都覺得好開心,重拾二人時光~

德國餐廳

今晚唔煮飯,同台灣女生帶埋幸男去洪水橋間德國餐廳食飯,人家見到有個二人餐五百蚊左右($498未計加一同飲品),於是ORDER咗.其實今次係幸男第二次黎呢間餐廳.

幸男試過忌廉湯就不停用手同呀呀聲示意要再飲,青口就當然無俾幸男食啦.

上次散叫,今次嗌餐,頭盤都有腸仔片食(仲有火腿同沙律菜),雖然無自己叫既咁正,但都OK.

主菜我哋揀咗個龍脷柳,但唔太多肉之餘,兼有骨,真係唔知食緊啲咩,鬼叫我哋唔食羊扒,無得揀.見唔啱食,大家都棄餬,連相都唔影張,專心食豬手.雖然係SET,但份量都唔係細,結果我同人家都食唔晒,要外賣包走,我哋仲要係無咩點食個龍脷柳喎,如果叫咗羊扒食,可能仲會食剩更多.

甜品係蘋果批,兩個人分,份量啱啱好,味道都唔錯添,食吓食吓至懷疑係咪真係$498,定係每人$498,好在埋單係498一個餐,計埋嘢飲同加一都係六百多啲.以前兩口子就會騎羊同人家入深井食KCAL,而家湊住幸男都可以近近吔搭兩個輕鐵站出去食西餐仲想點丫.

PS:幸男都幾鍾意呢度,每次黎都唔算扭計~~

抺車

今日放假,外母上門湊孫,又無落雨,所以可以同愛羊清洗兼打腊.尋日換完偈油,順便可以清埋啲污積,係自己地方抺車點都係舒服啲,唔怕阻到人哋出入,出去村口食啲嘢再番轉頭上腊都仲得.

暫時都係一個月至徹底清洗一次車同打腊,平時都只係掃吓塵同用噴水壼沖吓尾擔,前後軨同剎車碟.家務真係做極都唔完,又要湊幸男,一個月打一次腊都唔算太過份既...

換偈油

身為"原裝之郎"既我,平時都係出觀塘原廠CHECK車換偈油,但由於車程遠兼貴,所以只係一年兩次,分別係四月同十月左右(唔會係太凍同大風既季節).近年想換油密啲,對年事已高既愛羊好少少,所以係德輝既介紹下,去咗至愛換額外既一次,貪佢夠方便就腳,冬天大風都只係一段元朗公路就到.師傅即時當住你面黎換油同FILTER,唔洗放低等佢轉頭整,童叟無欺~

今日有多個年紀較大既熟客同師傅閒聊,上次換油時師傅問我部車放出啲偈油點解係綠色咁怪,今次就話我個啲綠色偈油係貴價貨,話我富貴.其實原廠CHECK車換油既選擇較多,價錢都豐儉由人,但我唔明點解今次至知綠色個隻係貴啲既貨色??唔通最近進修黎?

計劃為二月係元朗換油,六月同十月就出番觀塘原廠換油兼CHECK車換PARTS,希望愛羊可以保養得好啲健健康康.唔經唔覺,愛羊已陪我近六年啦~