番工+睇戲+取貨+慶生

 今日番完早更,係新墟凱都同老豆及台灣女生一齊睇終極封鎖線,音效比巴倫紐好好多~故事一開始就講男主角雷爾(阿諾舒華)係小鎮既警長,意外地發現鎮內有外人活動,同時收到政府通告有毒犯逃獄,並向墨西哥邊界方向潛逃.老經驗既雷爾調查後,發現該毒犯正向小鎮進發,一隊重裝同黨正搭建臨時架空橋作逃往墨西哥之用.

政府支援未到,面對困境,警長動用警局內既兩名同事,兼一位前軍人,前往鎮內既槍痴武器博物館借用裝備,為保衞小鎮兼阻止逃犯而戰.飛車,槍戰,動作,絶無冷場,阿諾一把年紀都算係交足功課.老豆睇得開心,我俾85分,適逄星期二$30一張飛,超值!.人家見開場時既DIE HARD撰日開戰預告片,就話黎緊睇DIE HARD要預埋佢.戲院海報既字眼都好搞笑"無人敢係佢面前企硬",可惜無同老豆影番張合照.

睇完戲,我就搭西鐵出尖沙咀攞番部吸塵機,番屋企放低部機,就出去同教練及楝哥一齊食大排檔.咁啱今日係教練生日,兼且我哋食得晏,教練至可以一齊食.祝生日快樂,身體健康~

住家電影節

一向都喜歡安在家中睇電影,尤其係一啲戲趕唔切係戲院睇,或者係好少戲院上既影片(非主流熱門),今次租既片種就係後者.

<黑幫風雲>-法國電影,一向都係少數外語片之一.黑幫片係中西文化中都係"義"字行頭.真人真事改編,年過五十既黑道人物,已轉型合法生意,但為救當年黨內既好友,甘願再陷入混沌既黑幫世界,與各位前黨友一齊策動劫獄.其間犠牲了不少手兄,但換黎係一個隱瞞多年既秘密-原來當年轉做污點證人既二五仔就係是次要救既舊黨友.雖然例牌恩怨情仇作結尾,但加上年少輕狂時既片段穿插,節奏明快.主角既"義無反顧",令我更認同男人要有"義"才算係真男人.

<女神的報酬>-日本偵探電影,外國取影,卡士強勁,本人只為織田裕二至租黎睇.典型日本懸疑故事,開頭較沉悶,但中段起開始緊湊,結局更係意料之外.原來起初女主角之女兒係美術館被擄,已經係序幕.因為要籍著警方既追查,接觸保安公司,繼而破壞主機系統,好讓日本領事館之保安癱瘓,令犯人可以恊持日本外相,並於傳媒前揭露該政客之黑材料,為去世之妻子及同事朋友昭雪.

<羅馬浴場>-日本漫畫改編既電影,係J2睇動畫版時已好好笑,古羅馬浴場建築師意外地去到現代,面對澡堂,厠具及溫泉等一切充滿好奇,並將其設計元素帶返古代.電影版巧妙地將數個男主角獨立既經歷,聯繫上女主角上,增加故事性.雖然部份笑料已知,但最後既岩盤浴健康醫療中心,確實係始料不及.另外字幕方面比較粗鄙,明明日文對白係"糟糕",字幕係"仆X",但反而更搞笑.

大假LAST DAY

大假最後一日,晏晝同台灣女生帶幸男出沙田行吓,RITA都有黎趁熱鬧,仲一齊食埋晚飯.兩星期大假,話咁快就過咗,無咩特別既節目,每一天都係"湊仔先決",其次至係家務(有時要等幸男訓著至開機洗衫,點幾兩點至訓),做兄弟個日都係多得人家既幫助同配合至可以出勤.

今日係沙田買咗個相架(但無手拎,要下次至取貨),人家買咗少少嘢,幸男有條新頸巾,我就買咗SET酒樽連6隻杯(意大利製造,特價四百幾蚊).以後啲芝華仕就可以載晒入去,唔怕個木塞斷開,搞到好狼狽.番到屋企幫個酒樽盒影相時,"苦中作樂"既感覺湧上心頭.....

兄弟日

朝早七點半就係輕鐵站等車,因為今日係崇真書友之一OSCAR既大喜日子,趕住去建生會合一眾兄弟.

首先係早餐時間,新郎哥著住件褸都隱藏唔到佢既帥氣,兄弟們就溫吓是日流程,溫生一部TABLET係手,負責兄弟指揮及監督.

經教練走兩轉上女家,花球及兄弟襟花到手,姊妹們忙於化粧.程序開始比時間表落後,玩兄弟既時間相應要縮短,對兄弟們大軍黎講係一個好消息.

OSCAR既孖生細佬THOMAS擔任伴郎,條呔同一眾兄弟既湖水藍唔同,金色非常搶眼.啱啱識佢地兩兄弟時真係分唔分,尤其係街撞見....

對上次同馬SIR一齊做兄弟已經好幾年前師傅結婚個日,仲記得中間空檔時間,我地係酒店COFFE SHOP一齊飲咖啡同訓貓仔覺叉電.....

一如所料,遊戲環節縮減至兩個,跟住係新郎既愛的宣言,阿嫂正式出黎一齊斟茶俾長輩們~

跟住就番男家,我都係第一次上OSCAR屋企,感覺都開揚兼企理.首先係拜神儀式,跟住一對新人再斟茶俾長輩們.

晏晝係卓爾居既麗都總廚食飯後,跟旅遊巴出去紅棉路.台灣女生餵過幸男食晏後,就同教練嫂一齊坐的士出紅棉路,佢哋竟然比我哋更快會合新郎新娘.

幸男收過OSCAR媽媽既利是,就俾利是封上既公仔吸引住.

幸男見到結婚毛公仔係鬆熊,係咁攬到實,仲不時0鍚佢哋,連影相都唔願放低對公仔. 

除咗一眾姊妹,兄弟及一對新人都俾花仔花女氹得笑逐顏開~

DAVID雖然未能抽空擔當兄弟,但都一家三口黎觀禮,真係夠晒誠意~

好在無貪方便而唔帶相機,如果唔係就幫唔到大家同新郎哥影合照.平時少外影,只係屋內幫幸男影生活照,今次當累積經驗都唔錯.

臨入禮堂行禮,幸男都無扭眼訓.心情大好,四萬咁口.起初都怕佢會妨礙註冊儀式,好似上次JACKY結婚咁......

禮堂內擠滿親友,坐都坐唔晒,為既都係見證呢一幕簡單而又莊嚴既儀式,以及內裡包含著既動人誓言. 

新郎同新娘係親友既掌聲及祝福下,甜蜜地步出婚姻註冊處,攝影師亦忙於用相機快門黎回應大家既熱情. 

一對新人繼續同親友影合照,但當然唔少得花仔花女黎襯熱鬧啦.合照期間,幸男仲突然攬住花女,將歡樂及純真帶俾大家.

完成合照,幸男就下午茶時間,食茶點落場休息,有啲似大人擺包煙出黎放鬆一吓咁.

晚宴係尖沙咀星光行既翠苑舉行,無諗過係可以望到碼頭同維港景色.幸男隔住玻璃窗望鐘樓同小輪碼頭,最吸引既當然係巴士站內既巴士. 

五點左右應該係幸男既小睡時間,但幸男堅持唔訓,結果跟我哋同DAVID一家及教練嫂去咗食小小嘢.食個陣己經係攰樣,食完個樣仲攰...

番上酒樓同花女媽媽一齊"度"司儀稿,幸男開始因眼訓而發脾氣,又話要去廁所又話要番屋企,結果近八點至係人家懷中訓著.原定花仔花女帶頭進場,幸男訓咗半個鐘唔夠,情緖都係不穩,所以攝影師建議取消(因大人要拖住的話,會遮住新人).結果係OSCAR同CYNTHIA進場上台後,花仔花女至跟住行上台,總算係有行過.

第一次個司儀,有啲緊張,好在酒樓年青部長都好幫得手,不時"提水"俾我哋.中途播既花絮片段,有接新娘及婚姻註冊處,幸男都有上鏡,重現攬住花女既一幕.最後幸男將功補過,一齊列隊送客,全程揮手同講"拜拜",賓客走晒至番去搵媽媽.由於翌日至運走物資,所以兄弟們唔洗留得太夜,我一家三口同教練兩口子CALL的士番屋企.

祝 OSCAR同阿嫂百年好合,永結同心.我俾幸男做花仔既評分為75分,人家就辛苦在要氹幸男.多謝教練嫂幫我照顧住人家同幸男,因我不時離枱出去幫手.雖然攰啲,但絶對係開心同難忘既一日~

一腳踼

星期一開始放大假,無特別節目,因為外母事件要全職湊幸男.朝早八點起身開早奶俾幸男食,食完就一齊訓到十點半起身,幫幸男擦牙洗面,翻熱台灣女生煮定既午餐俾幸男享用,目標係十一點半開始餵食,十二點三要開始換校服,務求一點三左右要番到學校. 

咁自己食咩呢?唯有餵幸男食飯時,自己食早餐食剩既麵包加罐可樂頂肚.一心諗住搭的士番學,因為要攞埋個吸塵機去整,點知幸男食食吓話要痾屎,搞到吞後晒啲時間,搭的士都係啱啱好........ 

番到學校,放低書包,去一次厠所,就放低幸男,自己就抽住個吸塵機行去搭一個站輕鐵,係屯門西鐵站去尖東既星光行飛利蒲陳列室交低部機維修前轆....趕餐慒至可以係隔離既老麥食個晏,再搭番西鐵入屯門. 

約咗老豆係卓爾居等,一齊行去學校等接幸男放學.雖然排唔到好頭,但總算中游,兼且等幸男習慣吓等待都係一件好事,唔係吓吓都係第一個有家長接走. 

幸男見到爺爺當然開心,伍老師仲讚老豆個樣後生,唔似係幸男爺爺.照舊係學校隔離既公園仔坐低俾幸男享用小食同飲品,但今次由爺爺操刀. 

行番落蔡意橋站,一齊搭輕鐵,番到屋企就沖涼兼氹幸男小睡.由於台灣女生番早番夜,已經熟睡緊,所以等幸男訓著後,我就騎羊出市中心買元氣外賣番黎同人家食.好在番到屋企時幸男同人家都未訓醒,膽搏膽戰術成功!人家出門番夜後,我又同幸男one on one,餵埋支消夜奶,氹得幸男訓黎自己都攰到訓著(因幸男通常係床上典一個鐘至入睡...),醒番個陣已經係兩點......

老人家話"仆心仆命",咁我呢個後生又好自在?唔開心在自己同人家付出不少,亦為"老人家"作適當既參予及休息安排,但換黎既只係難聽既說話......

綜合火車路軌之上山過橋下海

台灣女生係吉之島玩具店部買咗火車接駁部件,卒之都可以將新買既THOMAS碼頭套裝同之前既吊橋及山頂套裝結合,成為綜合上山過橋下海路軌~因為新路軌只可單一方向行,但與舊既吊橋衝科玻係單一方向成相反所以要特別既接合部件,兩邊凹,同兩邊凸.

由師傅既第一套THOMAS火車BASIC SET開始,自己買咗兩盒路軌SET B作擴建,後來發覺齋駁長條路都係有啲悶.係TOMY TAKARA官網見到有各款主題SET賣,於是開始四出搜購.先係PRCC放學經過既灣仔舊玩具店買吊橋SET,再係元朗買山頂SET以及最新既碼頭SET.完成品內容豐富,多景點,身為大人既我見到都覺得靚~

由火車係碼頭起計:上船,出海,上岸,過橋,穿山窿,上小山丘,繞山邊,行吊橋,衝科玻*REPEAT~

味的回憶

今曰自己番完夜,但台灣女生番晏,幸男扭住要人陪,於是一齊出門,人家番工,我就帶幸男搭小巴去置樂老媽間舖坐吓.放低幸男俾老媽看管後,走去買粉仔番去舖頭食,見門外有幫襯多年既雞蛋仔檔係度,非常感動~

小五搬到置樂時就見呢檔雞蛋仔擺街,跟老豆行過見到就要老豆買.升咗中學有零用錢就係利寶長頸鹿樓下既梗舖幫襯佢,食住黎行玩具店,的確係嘗心樂事.中五搬去村屋後,放學都會特意過置樂行吓,但出黎正式番工後無幾耐就唔見到呢個大叔既檔影.即使收工騎羊去置樂食晏時,都唔見有擺檔,以為收山添.

買咗一份俾幸男食,幸男都話好食,我同幸男講"爸爸細個時都有食呢一種味道既雞蛋仔".雞蛋仔已經少地方賣,就算市中心個間北角雞蛋仔都係做咗兩三年就執咗.雖然人吔話北角雞蛋仔好食,但我始終喜愛呢位大叔既雞蛋仔,因為由細食到大,有情義結(正如玉林苑既奶茶一樣)~能夠同幸男一齊分享遺忘了十載既味道,心裡有說不出既微妙~

蛇羮當宵夜

 番完晏晝更,有啲肚餓,騎羊去置樂幫襯蛇王輝.天氣凍,好多人堂食同外賣蛇羮,雖然新舖賣埋甜品,但咁耐以黎都無見過有人叫黎食.....

每年冬天既目標都係食十碗蛇羮,舊年因動過小手術要戒口,今年差唔多夠數.剛入秋第一次去新舖幫襯時,覺得好似稀咗啲,同埋啲肉"韌"到難咬,有啲失望,但之後去多幾次,質數有改善,所以至繼續有幫襯(以前同屯宿之男一齊黎,而家多數一條冷).食完係附近既小食店買咗外賣炸蕃薯及三宝俾台灣女生,自己加串炸大腸,就騎羊番屋企等人家.

幸男日誌

 一訓醒晏覺,幸男出客廳見到地面有我捐出黎既幪面超人電單車玩具排成一行,即使個頭訓到亂晒都唔理,一於攞黎玩咗先~

臨食夜奶前,幸男同台灣女生一齊食士多啤梨.幸男最鍾意食既生果應該都係士多啤梨,每次一見到就會走埋黎話"好香哦~好香哦".

元旦

 今日我放假,台灣女生要番晏,所以無咩特別節目俾幸男,只係朝早砌好個新買既THOMAS火車路軌俾幸男享用.

賣點係火車上咗船會帶動船底既車輪係透明藍色海水路軌行.當行到去岸時,火車就會離開船身,而船隻會被連接住碼頭既機關回彈至原位.

人家出門番工,我就帶幸男出村內既公園仔玩咗半個鐘.雖然幸男有扭計要繼續玩,但說教後都肯番屋企.

幸男沖完涼就訓晏覺,我就動手做家務-吸塵,洗衫同晾衫,等幸男起身就奉上士多啤梨兼茶點.

晚飯時間就翻熱人家煮定既飯餸,再用BB車帶幸男番老家黐餐,等人家放工後於公司外既輕鐵站會合前往外母家.人家入屋交收後,一齊搭的士番屋企.辛苦了幸男要兩邊走,犠牲了人家同幸男相處既時間.....