今曰自己番完夜,但台灣女生番晏,幸男扭住要人陪,於是一齊出門,人家番工,我就帶幸男搭小巴去置樂老媽間舖坐吓.放低幸男俾老媽看管後,走去買粉仔番去舖頭食,見門外有幫襯多年既雞蛋仔檔係度,非常感動~
小五搬到置樂時就見呢檔雞蛋仔擺街,跟老豆行過見到就要老豆買.升咗中學有零用錢就係利寶長頸鹿樓下既梗舖幫襯佢,食住黎行玩具店,的確係嘗心樂事.中五搬去村屋後,放學都會特意過置樂行吓,但出黎正式番工後無幾耐就唔見到呢個大叔既檔影.即使收工騎羊去置樂食晏時,都唔見有擺檔,以為收山添.
買咗一份俾幸男食,幸男都話好食,我同幸男講"爸爸細個時都有食呢一種味道既雞蛋仔".雞蛋仔已經少地方賣,就算市中心個間北角雞蛋仔都係做咗兩三年就執咗.雖然人吔話北角雞蛋仔好食,但我始終喜愛呢位大叔既雞蛋仔,因為由細食到大,有情義結(正如玉林苑既奶茶一樣)~能夠同幸男一齊分享遺忘了十載既味道,心裡有說不出既微妙~
