Sheep Rider Blog: 4月 2013

2013年4月26日星期五

SUPPLEMENT

最近膝蓋痛多咗,見萬寧特賣,於是買咗兩盒七海健絡強新.$4.15一粒,一日食二至三粒,以食兩粒黎計,一日要$8.3黎營運.剛結緍時都食過一陣子七海健絡,當時只有普通裝,黃色透明膠囊魚油丸一粒,而家食既強新話加埋葡萄糖胺,有助軟骨修復,七日滿意保證,又睇吓點....

以前跑步跑傷咗,兼且份工成日要企同行,無得坐,而家仲要抱住幸男,所以想食番啲補品.

2013年4月25日星期四

同台灣女生騎羊去接幸男放學前,兜咗去置樂買雞蛋仔俾幸男.見到相熟既模型屋BANNER外掛,突然有啲感觸.第一次去長頸鹿係小學,因為要買聖誕節禮物番學校交換禮物.記得買既係有摩打推動既疆屍模型玩具,只要係額頭上壓上黃色既符咒,疆屍就會停止向前推進.自此之後,我就不時扭老豆去買玩具,不過只係生日月份只可以買.即使只係一加幾十蚊既SD高達,都夠我開心兼作為收藏.升中學後,自己每星期都有廿蚊零用錢,放學後不時偷時間上去利寶商場睇玩具,當然主力係長頸鹿.

BANNER下既依舊係新意文具,放學後黎揀心儀文具,實在係當時一大娛樂.買過咖菲貓筆盒,筆袋,及其他產品,當然仲有正經既文具啦.無特意入去望吓,因為我諗當年看店既伯伯應該都唔會再係度,最多係老咗既阿女係度看舖.

雖然自己讀唔叻,但初中至中四係置樂住既經歷,確實令我記憶猶新,津津樂道.

2013年4月21日星期日

SHARP 930W小評

尋日去置樂飲茶前,係市中心新世界傳動網出咗部SHARP 930W俾老豆,因為佢部N8真係太慢兼常當機.其實老豆NOKIA 5350已經用咗三年,部N8都係我換SONY XPERIA P時俾佢試用吓SMARTPHONE.特意揀5吋芒既ANDROID機俾老豆,又唔想太貴,咁啱就有SHARP 930W.舊年年尾上市賣$3898,等到而家減到$2898,非常抵玩,跟機有原廠保護貼及書面機底殼,副廠緊急叉電套裝.

5吋全高清芒色水當然靚,但800萬像數影出黎既相就有少少偏色,當景物大部份係紅色時就會變咗偏色.

當紅色不佔太多取景時,鐵櫃又變番原本既鮮紅色.影像取向偏鮮艷,係足夠既光線下表現唔差.

當係暗黑環境下以閃光燈輔助影相時,右方會出現光球,重覆試過都係出現相同問題,似係機底殼環繞相機既銀邊反光反至.

平常影吓住家飯,絶對伙問题,但可惜無微距模式,唔可以太近影特寫.......

戶外影相當然效果更佳,試用咗一日,感覺唔錯,唯一係上網比我部XPERIA P慢啲,唔知係咪同網上評價-全高清芒拖慢部機.如果我而家至出機,一定會揀SHARP呢部機多過SONY XPERIA P.黎緊下一部手機,我會考慮SHARP下半年既新機(如果有的話), 影相最好要有千三萬像數就最好了~希望SHARP會積極係香港發展ANDROID手機事業,俾用家多一個選擇,AQUOS PHONE既屏幕,真係比SONY既BRAVIA ENGINE芒靚!

2013年4月20日星期六

親子旅行

朝早起身竟然好天無落兩,於是急急腳咁執嘢同幸男番幼稚園參加親子旅行.搭的士去到學校,點完名就上旅遊巴,上午班同學兼同EMILY之子ANSON都有去,坐我哋一家後面,當年大家都無諗過會一齊帶自己既小朋友參加學校旅行丫....

地點為錦田鄉村俱樂部,無預期中咁啱小朋友玩,無咩規劃咁....

有賣乾貨既攤位,有收錢既美勞攤位,感覺好似自己細個時去既橋咀島咁.

$130一位,一家三口就$390,包旅遊車接送,小食自助餐(午餐),同一套遊戲劵.其實有遊戲劵都要補少少錢,例如玩電動三輪車就要補十蚊,玩15分鐘左右.

幸男都有落場玩電動三輪車,平時係球場玩開爺爺送既四個轆,三個轆都係第一次.場內既電動車都幾殘吓,有啲無電,有啲仲要係個SEAT位爛爛地,結果有位小朋友轉彎時因離心力而下半身先被抛離車身中線,繼而失平衡至連人帶車訓落地(因雙手握住把手).職員都未有上前幫手,唯有父母扶起小朋友.....地方唔夠大,不時會發身碰碰車景象.

動物路軌車,睇到都覺得無咩特別,慢速,兼且係兼望景,真係玩商場既電動搖搖車都好過佢.

動物方面,兩隻羊困係圍欄內,兔仔就個別困係籠內,要餵飼的話就要俾錢買麵包同菜條,總之樣樣都係錢....

離遠見到有個充氣兒童城堡,但未開始運作,望落好似日曬雨淋到有啲殘.行多一陣都係大空地,有人租單車踩咁.猛太陽加上剛停雨既濕度,確實係有啲辛苦,見幸男唔夠訓之餘,又有啲唔舒服,於是同老師講聲早走.

CALL的士番西鐵站,去到屯門站再行去置樂飲茶.涼完冷氣兼坐咗陣西鐵既幸男至狀態好啲.

本來諗住去市中心美心飲茶,但怕要等位耐,所以至去天悅.臨走時仲見到坐隔離枱既李彥卓,幸男打完招呼再鍚埋叔叔至走人.

PS:我哋係屯門西鐵站落車時幫幸男換套便服衫,但貪方便,係月台無咩人既一角換.其實有一段時間幸男係露咗條學習褲出黎,仲要俾清潔職員見到.好在時間啱啱好,換好晒至有車埋站,月台才再次擠滿乘客...

2013年4月16日星期二

DC轉MILC

同大多數父親一樣,我都係因為屋企有小朋友成員而增加對相機既接觸.由DC轉用人生第一部可換鏡頭相機SONY NEX-3已近兩年,感覺係操控方面比較多選擇,例如焦點,光圈及鏡頭,但換來既係作正確選擇既困難.DC機只可揀全自動或場景模式,當初買MILC都係為咗試吓自己是否啱去學用DSLR機,可以自主咁留住自己想要既影像或當時經眼球傳給大腦既感知.影景物還好,起碼可以不停咁試到啱為止,但影人像(尤其係小朋友)就真係好難,因為表情及動作都係一瞬即逝....

雖然已由變焦KIT鏡轉為定焦人像鏡及變焦天涯鏡,但入門MILC兼SONY初代NEX系機種,自動白平衡既失誤,自動對焦既落差,都令我未能好好享受攝影既樂趣.係數碼世界下,大家都話用RAW格式黎影相,之後再慢慢執,包無走雞,可以幫補相機設定上既不足.未知是否食古不化,總覺得依靠後期加工至可以得出一張合心意既相的話,咁我全AUTO或P mode影完就行了,豈不是同用DC一樣??

近呢兩年啱心意既相總算比DC時代多,所以都想升級買部中階既MILC,反正已儲咗兩支鏡.其實之前都想出NEX-7,但見太貴,所以無買住,用手頭上既錢買支質數好啲既鏡黎磨練吓手藝兼試驗下自己對攝影既熱誠.傳聞SONY會出NEX-7N機體,觸控屏幕,2400萬像數，380萬點EVF及內置Wi-Fi,確實令我心動~

2013年4月11日星期四

路軌玩具新版圖

尋日買咗新路軌配件,於是動手優化幸男既火車版圖,令次既新元素係外圍環狀線.新路線可以俾THOMAS拖動十個車卡,因為太多彎位會令車龍反車.舊有既特式主題路線就繼續保持風格,只係將拱橋轉為新引入既行車交滙點.另一個小型路線就加入拱橋,架空彎位,以及新引入既車站.

特式主題路綫可以容納兩架火車頭,小型路綫就只可容納一架,而大型環狀綫除咗可以容納有十個車卡既火車外,應該仲可以加多一架火車.唯一擔心既係追撞問題,但相信適當分配車卡數量會係一個方案.幸男當然開心,不時行出行入去火車路軌範圍.由於版圖大咗,幸男行過時都要貼住梳化或電視櫃同玻璃櫃黎行.

我同幸男講,如果佢乖的話,5月份就為幸男添置多一架火車頭玩具.幸男近日開始唔願食飯及扭計喊多咗,希望佢能夠為目標而努力做個乖既小朋友啦~

2013年4月10日星期三

帶子雄郎

本來幸男食完晏晝飯就由人家送番學,但幸男又流鼻水又有幾聲咳,於是台灣女生為幸男請病假一天.人家出門番工後,我就捉幸男入房一齊訓,病人應該多點休息嘛.訓醒就換衫帶住幸去市中心渣打排隊,好在幸男忍到搞完銀行事務至去厠所....因為咩都無帶出街,所以先係山崎買咗個蛋糕黎俾幸男做下午茶(因東海堂無得賣草苺卷),再去uni qlo對開既商場櫈位座低開餐.

食完個蛋至醒起無帶飲品,於是行去百佳買果汁,俾完錢執背囊時聽到有人叫我,原來係ronnie~一齊行過log on門口時撞見Natalie,之後就分道揚鑣.行番相熟商場櫈位,可惜已滿座,唯有上多層去UA對開既商場櫈位坐.

其實我都係百佳買果汁俾幸男時,有去買珍珠奶茶飲,因為上次同人家一齊幫襯過都唔錯,唔會太過甜口.自從FULLY執咗之後,我同人家都好耐無買台式飲品,因為市中心既貢茶唔係太過啱口味.

兩父子一齊行吉之島玩具部,見有火車路軌套裝賣,除咗有路軌配件外,仲有三個景品:隧道,車站同行車交滙處,兼且話可以砌出六款路軌模式,於是買咗俾幸男.晚飯就番老家黐餐,兩老見到個孫仔,當然開心.一日假期咁就無咗,好似無咩嘢做過咁,除咗訓晏少少至外.

2013年4月9日星期二

G. I. JOE

上一集義勇群英係我同台灣女生一齊入戲院睇,今集就加埋老豆入場.今次係3D,原來老豆係第一次睇立體電影,好在都無話頭暈唔舒服.劇情都係承接上一集結尾,毒蛇黨成員滲入政府高層,假總統籍截取巴基斯坦之核武行動,嫁禍G.I.JOE.成隊人死晒,剩番三丁友潛回美國會合SNAKE EYE,以揭穿真相及洗脫污名.

故事係單薄啲,但$50張飛,仲想點丫?SNAKE EYE對STORM SHADOW一戰可觀性最高,反而主角THE ROCK臨尾對付蛍火蟲一幕,有點被比下去.另外,今集既女角都有啲失望,上一集既男爵夫人及紅帽子都似樣啲.

睇完戲,一齊去咗卓爾居搵厠所,順道係實惠睇抽濕機,見"美的"價錢OK,但手工較差,兼且設計古怪,出風位無遮無掩,仲要係試兩試就唔識著,於是一片心去接幸男放學.當見到爺爺拎住張接放學證企係課室門外,幸男無即時行出黎,要見到媽媽係隔離至離開座,可能無諗到爺爺會黎,唔知點反應.

2013年4月2日星期二

工作心情

每次番工受委屈時,都會想起呢首歌

ENGLISHMAN IN NEW YORK by STING

I don't drink coffee I take tea my dear
I like my toast done on the side
And you can hear it in my accent when I talk
I'm an Englishman in New York

See me walking down Fifth Avenue
A walking cane here at my side
I take it everywhere I walk
I'm an Englishman in New York

I'm an alien, I'm a legal alien
I'm an Englishman in New York
I'm an alien, I'm a legal alien
I'm an Englishman in New York

If "manners maketh man" as someone said
Then he's the hero of the day
It takes a man to suffer ignorance and smile
Be yourself no matter what they say

I'm an alien, I'm a legal alien
I'm an Englishman in New York
I'm an alien, I'm a legal alien
I'm an Englishman in New York

Modesty, propriety can lead to notoriety
You could end up as the only one
Gentleness, sobriety are rare in this society
At night a candle's brighter than the sun

Takes more than combat gear to make a man
Takes more than license for a gun
Confront your enemies, avoid them when you can
A gentleman will walk but never run

If "manners maketh man" as someone said
Then he's the hero of the day
It takes a man to suffer ignorance and smile
Be yourself no matter what they say

I'm an alien, I'm a legal alien
I'm an Englishman in New York
I'm an alien, I'm a legal alien
I'm an Englishman in New York

http://www.youtube.com/watch?v=d27gTrPPAyk

2013年4月1日星期一

THOMAS live on stage

一家三口係屋企食過晏,就搭的士出市中心,上259D出德福,因為我哋既目的地係九展既STAR HALL睇THOMAS舞台戲.台灣女生特意帶架細小既THOMAS玩具俾幸男拎住,好讓小朋友更加投入是日既節目.

唔熟路,怕遲入場,所以無等大排長龍既免費巴士,坐的士去九展.3樓既STAR都唔算難搵,但無諗過2樓有好多電子產品店,仲有課室添,應該平時各有電話及相機既教學課室就係呢度搞.

時間鬆動,可以行去睇紀念品,睇中咗支旗仔,一支$65,兩支$100,共兩款選擇.咁啱有一位家長主動問我地係咪買一支旗,結果一齊團購,每人$50就可以買支旗氹小朋友.等入場時人家見有得租借小朋友坐墊,但要俾$300現金作按金,好在我有帶多少少錢係身.租借完,順便叫職員姐姐幫我哋一家影張相,因為SECURITY哥話佢唔幫得我地渣機.