唔熟路,怕遲入場,所以無等大排長龍既免費巴士,坐的士去九展.3樓既STAR都唔算難搵,但無諗過2樓有好多電子產品店,仲有課室添,應該平時各有電話及相機既教學課室就係呢度搞.
時間鬆動,可以行去睇紀念品,睇中咗支旗仔,一支$65,兩支$100,共兩款選擇.咁啱有一位家長主動問我地係咪買一支旗,結果一齊團購,每人$50就可以買支旗氹小朋友.等入場時人家見有得租借小朋友坐墊,但要俾$300現金作按金,好在我有帶多少少錢係身.租借完,順便叫職員姐姐幫我哋一家影張相,因為SECURITY哥話佢唔幫得我地渣機.
見未開場,同幸男影相留念.難得幸男鍾意THOMAS,又可以睇真人舞台劇,開心程度應該同大人去聽偶像演唱會一樣吧.
第七行真係好近個台,人家都因可以氹幸男開心而歡喜.台上既背景布幕都幾靚,之前都有擔心過會唔會係之前THOMAS電視裡講過既故事變成真人版就算,但睇落又唔似.
THOMAS出場啦,真係坐到個人入去架喎,肥控制員雖然無設定咁肥,但服飾同双下巴都交足功課.最搞鬼既係由佢帶頭唱THOMAS既主題歌,仲要有埋動作黎配合"DOWN THE HILL AND ROUND THE BEND".
新買既天涯鏡表現都唔錯,可以ZOOM埋去睇各演員既動作表情,當然要配第七行座位既地埋位置,兼且舞台足夠既燈光.如果坐後啲或情景暗啲,都唔會有咁既效果.
最開心既當然係幸男,你睇佢望得幾入神就知啦.睇到呢張相,為人家長既我都會覺得,買飛買鏡頭兼請假一切都係值得...孩子既童真,確實會洗滌大人既心.
中場休息,人家駛我出去小食部買嘢醫肚,雖然要排隊,但都算快買到.$20一份燒賣,$20一份醬汁腸仔,唔算太搶錢既,始終大既唔食,細既都要食嘛.見唔少家長買爆谷俾小朋友食,我就只係分咗啲腸仔俾幸男食,人家主力食燒賣.
其實場景唔多,碼頭,車站,森林及最後發現收藏寶藏既地點,但各場景都配合歌舞或與台下搞氣氛既元素,所以唔會太過單調,兼且時間唔夠個半鐘嘛.
完場謝幕時有彩帶發放,為台下小朋友帶來不少歡喜.制作唔錯,無後悔買貴飛,我會俾85分,氣氛真係唔錯~
希望幸男大個睇番呢篇日記,會勾起回憶,知道自己既童真,感受到父母對你既關愛.
PS:人家話幸男一度見唔到再有火車係台上,就問"係咪走得?"
