DELAY咗5年既飛機

今日心血來潮係櫃裡攞番一盒回力玩具飛機出黎,簡單既組合就砌好兼貼好貼紙俾幸男玩.我有同幸男講呢盒玩具係5年前爸爸同媽媽係北海道機場買黎留念,當時係我哋既結婚旅行.

咁又結咗婚6年,幸男已經3歲.一家三口去過沖繩旅行.雖然搭既唔係ANA,只係香港航空,總有機會我地會一齊搭ANA往日本旅行.

輕鬆搬家=毫無進度

搞咗成個月,進度竟然係0.0%,小數點後都係0,真係想講"九両菜"!十二月就正式關閉,都唔知趕唔趕得切,仲要係無話預計幾多日會完成搬遷,飲茶都知道要等幾多張籌丫......

YAHOO BLOG個系統一向差差地,臨尾摺檔仲衰,好似求其做啲嘢交行貨咁,咁無心搞,不如一早就咪搞啦.最離譜係,你搵極都搵唔到有得查詢,反影及投訴既LINK,只係得常見Q&A,慌死會俾人怒插咁!

華服日,送番學

今日係幼稚園既華服日,明明N班時新年已經係華服日,無端端秋夏又要著.早幾日台灣女生已經係華都商場買咗套短袖華服,咁又一舊水,最開心既一定係童裝店.....臨出門口時,幫幸男影番幾張相黎留念,兼且交功課俾人家.



幸男依舊企唔定,不時邊走位邊話"企呢度丫".....送上午班番學的確係比之前下午班攰,小朋友又未訓夠,大人就更加要再早起身.以前送完番學,急急腳番工,都叫順路.而家就要自己番屋企,小睡番兩個鐘至再出門口食晏兼番工,多咗一程車,大熱天時兼唔夠訓,係月台等輕鐵確係苦差.....

富臨

晏晝係屋企做清潔,臨近完工時楝哥打電話黎約晚飯,結果約咗去新墟富臨食.對上一次黎同楝哥食都係臨時即興咁約,都係有叫芝士焗龍蝦,抵食嘛~由於我哋坐低已近九點,好在阿姐立即幫我哋入單,因為特價龍蝦供應至九點.

麻甩佬傾嘢,啤酒同燒乳鴿又點少得.

上次都有叫蟶子皇,見味道唔錯,所以今次都有點.話就話大都唔食得多,但結果都係食得晒.昔日書友,而家已經係相識廿多年既好友.課本考究,已演變為生活難題.慶幸大家都繼續住係區內,無為因工作而搬區.即使係即興約食飯,大家都可以輕鬆赴會.

忍者小靈精

最近J2重播忍者小靈精,當年我細個時都好鐘意係電視收睇.本來諗住錄黎自己懷愐吓,點知幸男睇過都話啱睇,仲要睇到笑出口.

唔睇番都唔記得清啲名,好似我最鐘意既"俏皮貓"同喊到爆玻璃既"小玲瓏". 望番呢一個情景,好似時光倒流見到自己細個時睇電視既樣子.

做中秋

平時屋企做中秋食飯,都會順便加埋我既農曆生日,因為日子相若.呢兩年既中秋飯,就加埋台灣女生同幸男.

老媽依舊叫埋朋友黎襯高興食飯,飯後有一個生日蛋糕,當然係幸男最愛既士多啤梨忌廉蛋糕.伯伯送咗份禮物俾幸男,由於未到西曆生日,所以未拆花紙.幸男都有耐性,無話一定要即拆禮物.身為父母,我同人家都仲未諗到生日送咩俾自己個仔添..........

破財擋災

尋間臨訓前,係床尾校手機鬧鐘,點知"煽"手跌手機,屏幕角位先落地,結果爆芒.....

咁大個仔第一次跌手機跌到咁傷,番早更時都係用住舊機XPERIA P(跌到崩角兼甩色都無事).打去保養代埋問,換芒要$1800,咁不如買過部無咁嬲($25XX),差七舊水兼仲要拎出去等幾日.....

用咗兩個月就報銷,心情既內疚又唔開心,破財嘛,大意嘛.應該都會買番呢款機,因介面真係好過SONY,而且芒靚又夠大,性價比高.

給幸男之中秋禮物



今日番完晏騎羊去市中心,為咗去吉之島玩具部買份中秋禮物俾幸男.其實之前係玩具部都睇中呢件玩具,於是尋晚同幸男係電腦上網係YOU TUBE睇日本既介紹廣告短片.睇完成個系列之後,幸男話鍾意裝甲車多過直昇機.

問過櫃檯職員哥哥至知唔包駕駛人公仔,於是買咗同系列中3架車仔連隊員,好讓幸男可以用機關彈出小隊之車輛.其中一個隊員騎乘電單車,相信幸男會較有親切感.

幸男喜歡新玩具,點都好過買燈籠,得個"擺"字丫~燈籠要係沙灘BBQ時,拎住黎四圍行當探險至好玩.

PS:諗起細個住油麻地時,係暗黑既樓梯中,被老豆抱住,自己手持住一個綠色透明塑膠既坦克車電燈胆燈籠.

新斗記



今日上完PRCC,約埋福娃一齊係太子番入屯門,因為約咗同LEO及群姐食晚飯,兼且見吓世侄幸男.

幸男睇餐牌時,望見燒豬張相就話"食呢個",唔知係咪記住深井KCAL食過法式燒乳豬呢?

叫咗個六人海鮮餐,除咗有招牌燒乳豬外,呢個炒蟶子都好好食,大隻又多肉.

薑葱焗蠔,好味,有啲邊位少少焦香,可惜份量較少,一人一隻.

其實仲有味蝦,好脆口,但味道鹹咗少少,連我大感冒鼻塞都食到重味.可能無影相,反而影咗呢個平平無奇既雞.......

蒸魚就啱晒幸男口味,話晒係六人餐,條魚都唔覺特別大.

福娃離隊已幾年,由於要常OT,工作及作息時間都係市區,大家都少見面.細個時每當許願時,總係想要呢樣要果樣,偏向物質主義.人大咗,反而係希望自己及關心既親友,身體健康,生活愉快!

PS:上晝送幸男番學,番屋企訓一個鐘唔夠貓仔覺,又出去兆康食晏,搭西鐵轉地鐵,係旺角上巴士去HAHO上3個鐘堂.好人好者都覺得攰,更何況係仲未病完呢?

創業難,守業更難

打咗9年既BLOG,竟然話關閉......雖然打BLOG既人少咗,但一直想留住成長心情及思路既我,不嫌上載相片及思考既時間.

起初時個個都興打BLOG,後來大家都嫌花時間,兼且FACEBOOK既出現令大家傾向直接分享手機相片及簡單回應.其實自YAHOO BLOG轉為BETA版時,系統上已無以往咁隱定,不時會出現不能上載相片及文章.

黎緊要搵個新既BLOG SITE,兼且等YAHOO BLOG指定既輕鬆搬家之安排(台灣XUITE).希望唔會遺失9年來既心機,XUITE可以直接滙出至我心儀既BLOG SITE.