Back to school- Way back into love

今日晏晝同台灣女生及幸男去V CITY食晏後,人家番晏,我同幸男去新墟相熟花店攞花,因為今日係豹哥既結婚註冊既好日子.

Gordon同阿嫂帶埋Ariel黎,當然要幫兩位小朋友影番張合照,話晒第時都叫做世交丫.

同事們話我同幸男係父子裝,其實只係咁啱大家都係白恤衫配煲呔啫.

律師見證及新人誓詞後,一對新人係氣球佈置既專區(攝影團隊set定晒燈光傘),與親友們合照留念.

幸男中段時間因眼訓而無心機,好在無耐就回復番.經過前兩次用閃燈既場合,今次己較快調整至心水既色調,而且得出用flash配Auto ISO之組合,最能保留環境之色溫氣氛.

我不時以Wifi傳相至手機,再轉寄網上同事群組,令未能出席之同事可以即時分享歡欣時刻.

參加過不少結婚觀禮,今次特別感觸,因為一對新人確實如誓詞般,不論環景順逆,都亙相扶持著.學校俾我既感覺,係年青人追夢既起點,亦係家長們寄望子女可以獨立成才既場所.今日禮堂變成一對新人追尋幸福既起點,家長們見證子女成家立室既場合.

雖然無參予最後於操場放氣球兼大合照(因幸男太攰同眼訓),但係會場附近見到天上既氣球,"明天會更好"很切合眼前既景致.

PS:祝一對新人幸褔快樂,大家都寄望於十月晚宴,再為你們送上真摰祝福!

弁魔士

追咗幾集J2播既辯魔師,題材集魔法及查案於一身.女主角與時間競賽,為被判死刑既母親查出翻案既證據.

科技先進既現世界裡,加上復古味重之魔法,雖然唔係新點子(魔法陣都市已有論似既世界觀),但畫功同配樂都唔錯.其間不乏性感女角既設定,動作情節,以及懸疑解迷路線.

常見既魔法往往不外乎風,火,雷,土,水之屬性攻擊,但弁魔師裡多了"金屬機械",為魔法加上一點時代感.

觀塘

今日騎羊出觀塘鈴木,天氣時晴時雨,係屯門公路有細雨,但黃大仙就大雨到上身長袖恤衫全濕....十一點左右放低愛羊,借車行廁所換件"士啤"短袖T恤,行去APM既百老滙PLACE睇定飛等過日晨.市區睇戲都幾貴,星期二優惠日都要$60張飛.

行咗陣APM,走番過天橋去花園餐廳食晏,點知舊址已張貼重建告示.唯有望吓對面既商場有無咩啱食,原來搬咗去對面商場.味道同價錢相若,只係裝飾多一點時尚感.老職員態度依舊親切,仲追出門口提我留低咗個遮套.

雖然食飯時已收到鈴木打黎話可以攞車,但買咗飛無理由唔睇,於是答三點左右至攞車.呢齣係Paul Walker最後一齣動作片,狂野極速7就未完成就意外生亡.

故事講男主角係臥底警員,為咗剷除殺害當差父親既犯罪份子兼危及城市之核彈,潛入九反之地Brick Mansions.其間與法籍臥底一齊搗破龍潭,繼而發現幕後真相-市長為一己私利,嫁禍俾黑幫,以名正言順派軍殲滅Brick Mansions.

動作飛車故然好睇,節奏明快,唔會有悶場.最後完場時,畫面有"To Paul Walker"既字句,內心湧出傷感及致敬之意.

PS:回程時好天無雨,師傅只係換咗機油同油隔,尾brake皮仲未需要換.

聚舊

今晚騎羊去元朗名門讌客食飯,因為前輩想同一眾老將聚舊.

係以前既時代,我同表叔一齊堅守細佬線,適巍同麗儀就係格主.

多謝師兄既邀請,難得大家可以結集,當然要影番張大合照.曾經每日見面既隊友,退休既退休,轉部門既轉部門,升遷既升遷....不變既係大家當年合作既心情及惺惺相惜.

自己暫離成長工作坊,外出遊歷了半年.所見所聞,印證了一直堅持既想法,鞏固了己往既作風.願大家工作順利,生活如意.

大假親子照

星期一開始放大假,今日騎羊去相熟輕鐵站,等台灣女生帶幸男番學.日光用舊天涯鏡遠攝,雖然係crop模式下得番千四萬像數,但質數唔太差,一片心旅行用佢黎日頭影戶外照,打消加接環用A mount既full frame天涯鏡.

理應一齊出門搭輕鐵送幸男番學,但為咗回程可以快啲,所以我先騎羊出門.有父母一齊送番學,幸男固然開心.其他家長可能見我好似怪怪地,明明唔係第一日番學,點解呢個爸爸會帶相機黎影相呢?

夜晚帶幸男上番爺爺嫲嫲屋企黐餐,食完飯同幸男行番屋企.見球場無人踢波,所以係士多房抬出三輪車俾幸男活動下.換番支大光圈定焦鏡黎幫幸男影相.係眾多走焦失敗作中,得呢張較合心意.踩到人家放工經過球場時至一齊番入屋.

PS:人家話幸男同球場內踩輔助轆單車既小朋友見到球場上既曱甴,由原本駐足觀察,變成慌忙四散(幸男用腳撐住地面走)

執平貨

今日係荃灣經過GAME舖時,見到有忍者龍劍傳賣,全新都只係$199,仲平過之前係置樂見到既2手貨$250!點解賣咁平?因為2012年12月出既GAME,已過氣兼PS 3及X BOX 360都有出過,所以清舊貨,円價要7344.

細個時有玩過忍者龍劍傳,但玩唔掂,多數都係睇大佬玩多.真正自己打爆機既係NDS板,之後3DS出既SHIROBU我都有玩,但真係好難打,可想而知我對忍者GAME既情義結.

Mario Kart 8

今日放工騎羊去市中心KK買多個remote制,咁就可以湊夠兩個軚盤玩瑪利奧賽車8,因為Game Pad太大兼重,無圓形軚盤咁易控制轉向幅度.

今集既主打係反重力賽道,賽車可以貼牆及行天花板行駛.當行到有反重力路段時,輪胎會外反,啟動反重力模式,令路面多及背景多變化,多點新鮮感(畢竟都已經係第8集嘛).

道具方面,有個"8"既綜合道具,好似好勁,但要兼顧路面,又要係適當道具轉到面前使用都幾考功夫.相比Wii既Mario Kart,新加咗,火焰花,食人花,回力刀花,及擴音speaker(卒之都可以破藍龜殼).

全新賽道加上優化既舊賽道,湊夠8個杯賽,32條賽道.要玩晒50cc,100cc及150cc,兼全取賽車parts,相信要一段時間及毅力.

PS:打機時配埋SOUND BAR既音效,令人更投入賽事!

Family Day

今日一家三口一齊出尖沙咀,目的係睇太空館全天域電影<<蝶影謎踨>>(尋日行過市中心大會堂買飛)

由於未夠鐘入場,所以去咗海傍吹吓風,兼同幸男影吓維港照.為小朋友影相,真係要影好多張先至有收穫,始終唔會企定定嘛(呢張相影到幸男好似係海風中好多嘢諗咁).

幸男今次無好似睇水母咁訓著,仲話好好睇添.之後去咗隔離既餐廳食下午茶,幸男同人家分西多士,我就淨飲凍Cappuccino.

咁啱得咁橋,撞見阿潘帶住世侄女心蕎出街,原來係去聽葉氏音樂會.隔住玻璃窗,見到阿潘另一個朋友一家三口街經過,當然有出去打招呼兼影相啦.

行去商場時經過雪糕車,於是以雪糕電單車及雪糕車為背景,影張母子合照.

夜晚番老家黐餐,食後一齊食蛋糕,為阿嫂慶祝生日,幸男當然又搶住吹洋燭.

第二次用閃燈,效果都唔太差,至少大家個樣都清晰丫,色澤都無話過白.

Good Morning PaPa........

放假唔洗番學,但幸男九點唔夠就醒咗....幸男唔願食奶,唯有出廳為幸男準備果醬包.楝住腳,打住喊路黎食早餐,感覺好麻甩.

餐飲係凍蘋果汁,可惜斟得唔夠滿,影唔到呢杯青森蘋果汁既色澤.幸男唔太鍾意啡色既硬皮,我要搣咁一邊,幸男至可以向白色區域推進.

今日至得閒幫幸男既新玩具貼上貼紙,同埋影相留念.起點位置加埋個發射器就可以兩架或單一彈出.

搖身一變,閃電王麥坤巨大版.唔知點解只係後轆會跟住向前推動而轉動,前轆就因掂唔到地面而唔郁,可能係底部中間既細轆與外邊四條大轆唔協調(QC唔夠好?).