元朗至愛換機油

今日騎羊去元朗搵相熟師傅為愛羊換偈油及油隔,當然事前有用whatsapp同老闆約定時間啦.

老闆俾我既印象係求變既人,以轉租細舖,再轉租倉位,以及流動工作坊,以應付租金上漲.健談既老闆,手藝爽快,我只消坐一會,老闆就已完成放偈油兼換偈油及油隔.

羨慕老闆可以為自己既興趣或專長去努力,俾到客人或消費者想要既幫助.雖然營運都要睇數字及計劃,但我認為同消費者直接既交流,明白客人所需亦係老闆成功之道!

雅仕堡-Royal Castle

今晚騎羊同台女生一齊去買樂食晚飯,經過雅仕堡,原來今日係22週年.

小六搬去置樂住至到中四升中五既暑假,樓下就係雅仕堡,久不久就有人係門口扔爆酒樽.讀完中學入宿,就變成同宿友聚腳既地方之一.以前只有中間一度厚又重既門,兩邊石牆各有一個細玻璃窗.2011十月就變成時尚開放式,可惜一直都未能同屯宿之男再係度聚吓.

PS:年長了,成熟了,同輩們既升遷或轉職,都突顯了我既停滯.兒時阿公既說話"凡事豈能盡如人意,但求無愧於心",以及"難得糊塗",造就了今天的我"率性而行".

火車博物館 & 穎晴百日宴

今日台灣女生提議帶幸男去大埔火車博物館,話晒免費入場,我當然無異議.

遊客可以入去古舊既車卡試坐,當然係無冷氣兼風扇,只係開咗門窗作通風.

呢個係頭等車卡,由於車卡內太暗,兼唔想開閃燈影響其他人,於是係車卡外為人家及幸男影相.

雖然無日本旅行個啲火車咁靚,但幸男都好開心.  

車廂內有人好似去公園坐咁,帶埋本書黎睇,亦有一家大細,主力軍當然係愛影相既情侶們.

博物館內無小食部,可能附近已有商戶,大家都可以買埋糧水至上黎.我地只係帶咗幸男個份,唯有陣間搭車時至買嘢飲.雖然環境好靚,但館內有告示不可作畢業相或婚紗相攝影.

幸男至愛踼石仔兼行路軌,點知行行下,幸男大叫"甩咗鞋呀,爸爸~"

臨時係車站門口影相留念,但幸男周身郁,張張都矇,結果好幾張手動對焦至捕到有張似樣啲.

跟住我地搭巴士出番尖沙咀,出席穎晴既百日宴.

幸男話要同BB影相,平時唔會定定地望鏡頭既幸男,今次好合作,仲要面帶"好冧"既表情,我不禁同幸男講"BB唔係你0架".

現場有氣球佈置,又有蛋糕,氣氛十足,全賴一眾愛鍚BB一家人既親友.雖然話幫手影相,但遲到咗少少,兼純綷業餘性質,望主人家見諒.

PS:多謝主人家之邀請,祝穎晴身體健康,快高長大.

包場半個鐘

 原本諗住騎羊去大興,接幸男去西北泳池游水,點知一落車就落大雨...... 

 一心諗住係過雲雨,點知五點多啲去到泳池,廣播話雷暴警號,仲話會至到六點半,各泳客都先後離場.唔想令幸男失望,安慰幸男等到五點九,到時無提早取消雷暴至走人.

五點八個字時,天色已轉晴,但仲未有廣播,所以同幸男講飲埋冰袋內既蘋果汁就走了.點知我罐可樂飲到尾段時,泳池廣播話,由於上空係天晴,所以可以俾泳客入場至六點半.我同幸男好趕咁入場,更衣室無人至可以影到幸男既泳裝.

落水計玩咗半個鐘,可惜室內池兒童滑梯因救生員罷工而無開放.場內只有一對年長男女係大池,一個中年爸爸帶一仔一女,各自都可以享受到私人空間.幸男今年少去泳池,所以只係BB池習玩.今日都算錯有錯著,可以輕輕鬆鬆咁陪幸男.

破鏡重圓-維修天涯鏡

今日收工就騎羊出市中心會合陳大姑拉,再轉巴士出旺角.約埋方大姑拉係朗豪坊Mr.Steak食個下午茶,大家有傾有講,就係無影合照.

食完傾完己近五點,Sony show room唔多人,好快就有得埋櫃枱攞番支天涯鏡.維修單上既項目,同師傅電話報價一樣,switch board同cable,齋零件都$8xx,再加$300手工,肉赤.....最衰full frame天涯鏡未出,如果唔係我俾咗$150檢查費就唔鬼整.

問過職員,維修後一個月內都可以join番個保養,一於用到九月尾至續保.之後各自歸家,我突然諗起去星際睇吓相機背囊,於是拉陳大姑拉陪吓我行,當傾多陣.想買既款式無現貨陳列,行均都無個啱心水,唔通真係要出九龍灣既manfrotto?

親子日

今日台灣女生番晏,屋企食過晏後,人家出門我就同幸男出球場玩遙控瑪利奧賽車.雖然太陽猛烈,我同幸男坐係遮蔭處,都唔會太辛苦.幸男慣咗打Wii U既Mario Kart 8,以為轉動遙控制就可以令車轉左轉右.玩具盒寫住六歲以上,就快四歲既幸男只識俾油向前,未能掌握收油及回油.

玩到無電就番屋企小休,我就係花園同洗衣機努力洗晾.大約四點,幸男就提我要放茶點.幸男好鍾意呢款自己揀既日本手信,人家試過都話好食,無他既,有cream同埋係士多啤利味嘛.

五點左右,我哋就出發去市中心,睇加場既音樂劇-三隻小豬.

幸男無俾音響嚇倒,但反而係因小豬被大狼活捉既劇情而喊出眼淚.老牌童話加入新元素,例如大狼有個有密碼鎖既捕獵器,小豬同大狼會落去觀眾席追逐,增加亙動.最好笑係大狼話在場有小朋友呃佢小豬既逃走方向,話要食埋個小朋友.

最係解鎖既密碼係FAMILY,意思係Father And Mother I Love You,台上既演員帶領大家一齊同家長講,我最怕呢d親情泛濫既情景.....幸男無話悶,但話下次就唔好再睇(睇黎我揀錯咗節目添).

八月節

屋企每逢中秋八月節,老媽都順便同我做埋生日飯,而家就多埋台灣女生及幸男.生日蛋糕當然係為幸男而準備,大人只係配角,伯娘為幸男揀選既蛋糕,上面既麥坤同哨牙嘜真係玩得既玩具車(幸男當然開心).

好在有備而來,相機加閃燈,大家可以有張大合照.

好難得影到老媽笑住黎影相,仲要係各位都望正鏡頭.自帶幸男番屋企後,以往既不愉快事都已凋淡,所有既話題都係圍繞住幸男.小朋友係家既延續,亦都係家既凝聚.

人生第一張點數咭

之前上任天堂官網見Mario Kart 8有得預訂新賽道,角色及車款,兩期分別係今年十一月同來年五月,每期八條賽道(2個盃賽)及三個角色,及四台新車.

經過一番掙扎,今日去咗市中心KK打價(3000円咭要$300),同薇紅打過招呼後,行番去置樂買($280). 

番到屋企叫台灣女生讀出下方之號碼以加點數於任天堂之account,點知未讀完已填滿空間.原來自己太天真,齋聽姐姐仔話入最下方之數字,無括走尾二個行銀色bar(正真之密碼).卅幾歲至買第一張點數咭,仲要唔識入,學生哥十幾歲已經買慣買熟...

PS:尋晚睇完跌打,今朝拆藥洗腳番工,都勉強行到樓梯上落,平路就無咩問題(原先係著鞋印落去個下已好痛,平路都要趷住行).原本老媽話叫朋友幫我朝早去排隊攞籌,點知結果係佢自己去置樂排隊.放工騎羊去置樂,雖然早到15分鐘,但醫師(吳寶穗之弟子)已準備打電話俾我.被問到有無開電單車,我答"有,就住渣囉".醫師話休息吓就可以唔洗再覆診,應該係dub停車時左腳落地撐住個下傷及筋肌.