DEJA VU

每次行經呢個渠位都會邊笑邊諗起年頭幸男大喊既情景"嗚嗚...我好唔開心呀.....嗚嗚...."

事源係幸男手拎住LEGO飛機,行去嫲嫲屋企開飯.幸男邊行邊把玩飛機,機翼突然意外脫落並掉入渠位.遲出門既我,行到近天橋底時已聽見幸男既喊聲,起初仲以為係仆親.

當我行到兩母子身邊時至知所為何事,台灣女生以為部件已墮入深淵.我用手機LED燈照入渠口,幸好渠道唔深(只作疏道雨水,非污水).渠道橫向兼舖滿乾身樹葉,機翼只係架係邊傍較高既位置.台灣女生手持光源,我用雙手攝入渠罅.幸男目睹打撈作業成功,人家抺乾淨後,玩具飛機得以重完,happy ending.

幸男既嚎啕大哭只係心痛玩具,而唔係純扭計同牛精,我亦被幸男之童真所打動(可能令我諗起細個係荔園見到紅色機械人手錶,老媽轉極幸運輪都唔中果份禮物時,我扭計喊既住事).

PS:最壞打算係搵嘢撬起渠蓋

夜間羊像照

適逢今日帶咗相機番公司為同事影相,夜晚收工去停車場時,不禁係背囊拎出相機黎影張夜景羊像照.

低光,手持,黃光,試咗好耐至影張近乎當時既色調.本人喜歡以JPEG格式拍照,每次都現場睇番相片既色調(白平調),唔啱心水就再set兼補影(除非趕時間或景像已過),因為我覺得番屋企再執都唔會比校到與當時實況既分別.

PS:朝早十點半係兆康西鐵站等買家,雖然比約定時間遲少少,但總算交收順利,買家仲話支鏡keep得新淨.由放上網至交收只係3日,好開心唔洗dum好耐至搵到有心人.

致敬

今晚特意為人生第一支Full Frame鏡頭作最後抺塵,及影相留念(無受"賣仔勿摸頭,摸頭眼淚流"既俗語所影響).

一向有留盒既習慣,兼且sony固保續至2018年,所以是次網上放賣鏡頭好快就有回覆.尋日傍晚係相機網上平台發表,當晚已與有心既買家聯絡上,並約星期六交收.

呢一年零三個月辛苦你了,希望下一個主人可以帶你多啲外影,最好當然係影模特兒啦.希望明早交收順利,畢竟係我人生第一次網上放售兼親自交收.

PS:多謝馬sir,邦少及Leo既技術支援

機動性回歸-SEL FE 35 F1.4 ZA

苦等多時,卒之都等到呢支SEL FE 35 F1.4 ZA .新鏡比2013年聖誕時份出A7時搭配既FE 55 1.8大成個碼,無咗輕巧既感覺(filter 由49升至72,都係配番b+w).

鏡身有個光圈環,可直接調校光圈值.其實A7系列既機身都有輪軸可以調控光圈值,唔明有咩實際用途.

望過書明書,click制校off時方便拍短片時減少轉光圈環時既聲音...

A7配35 F1.4鏡(最近對焦距離0.3),影低餐枱碟餸無難度,呢張係F2既試圖.以前用NEX-3 APSC無反機配24 F1.8(即實際36 F1.8)鏡時,習慣了其機動性同近攝力(最近對焦距離0.16).由於轉A7時full frame E mount 35mm鏡只係得F 2.8,所以我只好揀試用大光圈既FE 55 F1.8ZA,結果都唔係好啱室內飯局多既影相需要.

可能今日太奔波,所以無咩精神,番到屋企要係梳化上訓咗陣至起身食魚生飯盒作晚餐.

PS:雖然放假,但都幾攰吓.騎羊送台灣女生去接幸男放學,自己單騎去市中心泊好羊仔,行去築地拉麵攞定位等人家同幸男一齊食晏.人家番晏,我就帶幸男上大興,再去巴士站等66x出旺角...

為人父母既心情,大概明白了

今晚一眾同事前往豹媽之靈堂,向伯友送別之餘,亦想向豹哥送上無言既慰問及支持.

"養兒一百歲,長憂九十九",為人父母,總會想為兒女打點生活難題.細個時唔太明白,父母即使唔太多愛心,但為兒女安頓<衣,食,住,行>,常規學業及守護健康,已付出了不少.

PS:天下父母最大既心願,想必是:"兒女們,身心安康,生活愉快!"

萬能鑑定士Q之蒙羅麗莎之瞳(日語電影巡禮3/3)

雜誌記者(小笠原悠斗)意外地遇上萬能鑑定士Q(凜田莉子),並目睹其驚人洞悉能力及知識,智破一個以食物展覽為掩飾既藝術品盗竊案.苦無工作題材既悠斗,靈光一閃,決定以萬能鑑定士Q為文章主角.

 莉子被羅浮宮亞洲代理人推薦為名畫《蒙羅麗莎》臨時研究員,前往法國巴黎羅浮宮舉行的資格考試,悠斗自資跟隨莉子作貼身專訪.

成功考取資格既莉子與另一位日籍合格者流泉寺美沙,被自稱鑑定權威專家所賞識,並應邀請參加一個特訓,為即將舉行既《蒙羅麗莎》日本公開展覽作最佳鑑定準備.

特訓過後,莉子經常頭痛及出現《蒙羅麗莎》畫像眼睛內既LV字樣(跟傳聞中《蒙羅麗莎》畫像之詛咒一樣),連易如反掌既鑑別工作都不能應付...滿腹疑慮既悠斗,四出查探下,意外地發現,所謂既特訓,根本係擾亂思維兼錯誤校準既把戲.

特訓中,所有《蒙羅麗莎》畫像都係偽品,美沙作為同謀,每次先作一半篩選時,都將視為真品既《蒙羅麗莎》(眼睛有LV字樣),留給莉子.莉子作下一輪篩選,一直反覆運作,直至莉子作最後既2選1,才公佈成績.如果莉子剔除"真品",到最後揭曉時,專家會話係失敗,並會反轉所有畫背,顯示有獨特文字既畫背才是"真品".經過反覆既條件學習,莉子將假視為真,失去原有既鑑定力並因為LV字樣而產生混亂...(LV字樣傳聞係主謀以偽造的舊報紙報道作導引,另外再以舊報紙報道《蒙羅麗莎》真跡畫架背的文字作陷阱)

當悠斗告知莉子真相後,莉子恍然大悟,並且從特訓時既記憶推考出背後既陰謀-美沙聯同所謂既鑑定專家合謀換走日本公展既《蒙羅麗莎》真跡.

雖然故事中段特訓劇情轉慢兼平板,但後來悠斗既破解,以及莉子帶領既真跡大追查(智破計中計),節奏變得明快及多變.連續3日既日語電影,我覺得"萬能鑑定士Q之蒙羅麗莎之瞳"最好睇

!綾瀨遙係女主角當然加分,女神演出過既電影,我唔係入戲院睇就係租碟番黎睇~

浪客劍心-京都大火篇(日語電影巡禮2/3)

今集無第一集咁悶(要飛黎睇),因為唔太需要去陳述角色們既過去,反而集中係密謀推翻新政府既前維新志士志志雄真實與旗下十本刀劍客.

緋村劍心從新政府得知,志志雄真實與其黨羽正集結於京都,於是隻身上路對付新任拔刀齋.劍心追蹤至志志雄真實既藏身地,但與其手下「天劍」宗次郎對付時,因逆刃刀斷裂而敗陣...女主角神谷薫與明神彌彦前住京都支援劍心,好友相樂左之助及前新撰組第三隊組長(現為新政府警察)齋藤一亦聯同劍心一齊阻止志志雄真實既騷亂.

節奏未見緊湊但尚可接受(始終太多角色),配樂一般.男主角佐藤健故然靚仔,江口洋介亦散發著成熟男仕既味道.全套戲裡,劍心求劍一段令我印像深刻.

劍心一心請求鑄劍大師新井赤空為他鑄造另一把逆刃刀,可惜大師已仙遊,其兒子没有繼承鑄劍術,只鑄鐵維生.同時,「刀狩」張(十本刀劍客之一)前往大師故居,以嬰孩(大師之孫兒)來要脅大師之兒子交出傳說中大師最後一劍.劍心以斷劍奮力應付,一心營救嬰孩.大師兒子被劍心所感動,認定其俠義之心,於是從神社取出一直供奉神明既逆刃刀真打(原來劍心一真用既係逆刃刀之原型-隱打),交託給劍心.

回憶中陳述過,新井赤空將逆刃刀交給準備浪跡天涯既劍心,告別時大師叮囑劍心,他日斷刀時再拜訪他,因為大師好想知道劍心是否能履行及堅持"不殺一人"既誓言.如果大師尚在人間的話,想必為劍心既不屈所感動,獻上逆刃刀真打...

PS:結局以志志雄真實與十本刀乘坐戰艦離開,劍心為救神谷薫而墮海沖至岸邊,正真既結局留待第三集電影揭曉.

Berliner

市中心Berliner今晚full booking,我要早少少去排隊等位.因為無得攞籌,所以我被逼企咗半個幾鐘至有枱.

幸好台灣女生係大興接過幸男就搭的士黎市中心會合,因為職員問我人齊未(入座後起計個半鐘交枱),我聲稱太太同小朋友係市中心商場行緊過黎,先至可以順利入座.

餐廳裝潢唔錯,我哋點咗個炸芝士沙律,同牛肉意粉,兩樣都好食,我當然有飲德國啤酒啦.

相比洪水橋既德國餐廳King Ludwing Beerhall,市中心呢間Berliner既豬手無咁鹹但又夠味.

天涯鏡係室內細餐枱上好難發揮(除咗可以zoom去水吧),最近對焦距離要0.5m真係影唔到枱頭碟餸....頂多係影對面座位既幸男同人家.

其實我都好飽,但人家同幸男話要食甜品,於是我幫手分蘋果批黎食.前菜,主菜,餐飲,最後甜品,一家三口捧住個肚走人.埋單時填妥表格,一片心等收會員卡,下次享用九折.

東京暴族(日語電影巡禮1/3)

係良景節拍一次過租咗3隻二輪影碟(3日後還),見今晚台灣女生番夜班,首先睇咗呢套集色情與暴力元素既CULT片.

未來既東京由數個"暴族"所支配,池袋WU-RONZ,新宿HANDS,武藏野SARU....(我當然最鍾意歌舞町既GIRA GIRA GIRLS).池袋WU-RONZ慾吞併武藏野SARU之地盆,並四出打壓各"暴族"."暴族"們團結一致直搗池袋WU-RONZ之基地,作背水一戰.

男角當然以金毛大隻仔鈴木亮平最為搶眼,最愛既女角就係開場無耐既女警佐々木心音!戲內對白多用RAP型式黎表達,角色們不時BATTLE,我不時搜畫黎跳過,只係專心睇重要劇情同元素.

全片幅天涯鏡-SEL FE24-240 F3.5-6.3 OSS

今日晏晝出去深水埗,為既就係呢支Full Frame天涯鏡.

前年聖誕節買既A7配55F1.8定焦鏡,天涯鏡就用番NEX-3時代既SEL 18-200 F3.5-6.3 OSS.由於當時無推出全片幅天涯鏡,所以只可接受像數得番一半既舊鏡,儲住錢黎等今日.

新FF鏡比舊APSC鏡長少少,直徑亦由67增至72.換裝後機連鏡都係黑色,啱啱好可以收納係MANFROTO相機保護袋(好彩,唔洗煩買個啱SIZE).

室內無閃燈既支援下,FF鏡比APSC鏡表現更好,遠攝(1米左右)影像較光.

FF天涯鏡最近對焦距離為0.5,以往舊APSC鏡18-200(最近對焦距為0.3)可以坐係櫈上面影碟餸,而家就要企起身兼後一步zoom埋去得(好似無咁方便).

釋放出全片幅既潛力,室內人像試相,感覺都唔錯.質素比APSC天涯鏡好,只係近距離拍攝無咁方便,希望黎緊將會推出既FF 蔡司35 F1.4(最近對焦距為0.3)可以填補室內飯局及近攝既空缺.