邁向中年的心聲

"我的心仍可承受衝擊，我的精神仍可接受磨鍊，但我的身體卻知道，現在是時候說再見了。"高比的話句,確實說出了我的心聲,觸動了我的心弦(況且我的心亦開始跟不上節奏了)......

蛇王輝

天氣轉凍,又係進補既時候,首選當然係蛇羮.騎羊去置樂蛇王輝,店內有不少食客,偶爾有人外賣.

大蛇羮一碗,今年已經要$60.店舖剛由新墟搬去置樂時,水準下降了,基於情義結兼便利度,都繼續幫襯.今年好似比舊年好,無咁稀.

每年既目標都係食十碗,夜班遇著同好之同事,都會特意騎羊買外賣當宵夜食品.

PS:懷念以前屯宿之男一齊係新墟食蛇羮傾心底話既時光.

師弟

朝早七點幾收工,屋企臨訓覺收到台灣女生短訊,幸男於第一階段小學收生程序獲得派位,總算褔有悠歸.

晏晝特意騎羊去到小學門口,以前細個就係間屋企對面既小學番學,邊有諗過31年後自己個小朋友會上同一間小學呢.幸男,我將會係你既學長師兄喔~

擺酒8週年

結婚擺酒八週年,無咩特別節目慶祝,只係同台灣女生去利苑食飯.

頭盤係足料既蟹皇燴翅,唔係齋靠量多,而係個湯底好夠味同稠.

之前既結緍週年都會黎呢間分店食飯,每次都食得開心滿意.雖然餐牌既選擇唔多,但質素一定有保證.

中式燒鴨配西式沙律菜,呢個fusion又出幾夾,諗真係都只係片皮鴨既組合啫(無咗塊薄皮).

呢杯五色果汁好清新,唔知係邊5種生果呢?

葱油脆皮開邊龍蝦,睇落好似唔多夠飽,開始考慮要否叫多一味餸.

搵職員為我倆合照,已經比預期中好,至少人唔會太細粒.

食埋碟菜,都好似差少少至飽满,叫唔叫多個餸好呢?

結果每人一客甜品-楊枝甘露,甜度適中,芒果同柚肉一點酸味都無.

無咩特別節目或驚喜,只係食飯前去咗太子花墟既嘉利買咗個SHOEI頭盔俾人家(等咗成大半年都無新拉花).之後經過一間馳名臭豆腐既熟食店,無諗過可以同人家一齊係街邊食配以甜醬辣醬既臭豆腐.

依舊奉上接新娘花球,例牌動作已變成8年歷史的傳統.

回程搭既63X好快,我地落車個陣已追到之前個班車,番到屋企飲住紅酒黎睇電視.

原諒我給你既不多,我只是一個很平凡,多嚕蘇兼無方向既男人.

美津濃10公里賽

 仲早過番早更起身(05:45),為咗趕搭06:15果架巴士.係轉車站等埋偉同楝哥,一齊上263,再係沙田轉車站上40X,卒之到達沙田運動場.

起跑時間為08:00,趁有時間一齊影相留念.運動場,加上會考班同學,感覺好似係中學時代既陸運會.現今既中學生當然可以輕鬆以手機拍照留念,但當年我地尚係菲林機時代,拍照不大方便及成本高.

好耐無參加大型跑步事項,對上一次係前年公司既新春長跑.53分鐘完成10公里,於所屬之年紀組別跑第135名,約前個三分之一跑手.幸好七八月最熱時份有跑5公里,即使近一兩個月至試過6公里兩三次,今天都可以唧多4公里出黎.

跑完步,大伙兒行去除近屋村既茶餐廳食早餐,十公里所消耗既卡路里應該足夠償還呢份早餐.

運動天份不高,球類及競技類都係好差,唯有基本體能鍛鍊之長跑係較有信心既項目.除咗強化心肺功能及體重管理之外,集中呼吸之間的節奏,出一身汗來舒發生活上既壓力~

早:幼稚園旅行@大棠生態園 ; 晚:蒸氣火鍋@天聚源

 朝早好趕咁搭的士番幼稚園,報到點名後上旅遊巴去元朗大棠生態園.第一個項目就係行去馬房附近既空地,跟住體育老師一齊玩活動.

 親子亙動遊戲,手持相機既我,大條道理冷眼旁觀.之後係小朋友輪流玩既充氣遊戲,cool down動作後就自由活動.

 起初幸男都可以自己行繩網陣,但當去到由獨立懸吊木板組合既天橋,幸男就好驚同喊.我係幸男後方,指示幸男先用右手捉緊下一塊木板之吊索,再以右腳踏上木板,然後伸前左手捉緊吊索,最後將左腳收回,咁就成功去下一塊板位置.不斷重覆鼓勵下,幸男邊喊邊驚地,成功橫越天橋(但做成後方大擠塞).

 其實無咩靚景好影,見有拉車,於是一齊坐上去影張合照交差.幫我地影相既家長都係用SONY,無望錯的話係A6000.人家話我幫該家長影家庭合照時好認真(佢幫我地時都係),我答大家都用SONY機,MENU SETTING相熟,更大壓力唔好影得唔好.

 行咗落去魚瑭荷花池,唔知係肚餓定攰,幸男開始無咩心機影相.

 我地係池上既涼亭食晏,幸男同人家食飯團,我就食以保溫瓶熱水沖制既日本版日清芝士咖杯麵.食晏其間,開始落大雨,大量家長帶住兒女入涼亭避雨.

停雨後,我地行多一陣,告知老師自行離團,等咗好耐都call唔到的士,於是行咗20分鐘至到小巴站.元朗千色小巴站落車,再轉的士番屋企,因為落巴士時太大雨.

 晚餐時間,我地去咗藍地食蒸氣火鍋,七點時段滿座,故要預約八點後入座.

 內飾與前身既稚名町一樣,我估只係想轉型做蒸氣火鍋至會轉埋個店舖名.枱下有個大蒸餾水樽,供蒸氣火鍋用.

 怕幸男唔係樣樣海鮮啱食,故叫咗份豚肉陶板燒,質素麻麻.

 二人餐有半隻雞,而且海鮮份量唔多,於是我地散叫.雖然未到九點,但落柯打時職員報既價都係比餐牌上既平少少.隔離枱見我地個陣咁豐富,問職員我地叫咗咩餐.

 細枝裝啤酒都要六十幾蚊支,所以叫咗杯fuerstenberg生啤,價錢一樣但性價比高嘛.

 餐枱附近有食材烹煮時間表,枱上有一個電子跳字計時器,方便提醒食客打開蓋夾取食物.

 人家都話陶板燒一般,只係豬頸肉較為好食.論盡既人家落油時唔覺意打瀉油,要搵店員換過一塊新陶板.

壓軸既蟹無預期中咁鮮味,睇黎用黎送鍋底既粥會更啱.

行番屋企後,幸男就攰到係梳化上面捽手兼洽眼訓.今日成日都係一家三口一齊,大假生日旅行後就好似無試過lu.....

007-SPECTRE

今日同老豆食住下午茶黎等台灣女生放工,一齊去凱都睇鐵金剛之鬼影帝國.上集女上司M已死,但她以秘密方式叮囑愛將007要調查一位名為馬可·斯奇拉之男子.

從馬可·斯奇拉之章魚戒指及其遺孀得知,馬可·斯奇拉是神秘組織SPECTRE既一名成員.007憑住戒指前往SPECTRE既會議,發現SPECTRE之領袖為007養父之子(亦即係007既非血緣兄長).

負責聯同九個大國創建名為「九眼」(Nine Eyes)的聯合情報部門負責人C,原來係SPECTRE領袖之門生,計劃以「九眼」掌握全球情報以暗中支援SPECTRE之不法活動.

女主角Léa Seydoux(法籍模特兒)飾演SPECTRE前成員之女兒瑪德琳·絲雲醫生,帶領007去父親之渡假酒店並意外發現秘密辦公室,引領007去SPECTRE之總部.

今集既邦女郎與過往不同,不但集智慧及槍械實戰與一身,並與007發展為長久交往既對象,至少唔係"熱情"完就無啦啦就死咗.
結尾係軍情六處的舊總部倫敦地區打大佬,渡河及LONDON EYE都好有代表性.

整體黎講,今集比上一集SKY FALL好,節奏明快兼無咁灰沉。科技道具洽到好處,只有特務機關戰車及計時炸彈OMEGA手錶,其餘都係靠膽色及經驗智慧搭夠.

PS:細個跟老豆一齊係電視睇鐵金剛電影,記得有一次係入戲院.硬朗及坦率既性格唔知係咪因007所影響,我只想007電影系列延續落去,成為跨代既連繫.

吹海風

以前初戀時,常到區內沙灘行吓,黃金海岸,青山灣或者係湖蝶灣.除咗浪漫,我覺得海邊係放鬆及思考既好地方.

騎羊去蝴蝶灣,與後生一輩交流下,想了解新一代既想法之餘,亦想分享下人生碰壁經驗.畢業後,幸得前輩們既錯愛,綜合嚴厲與輕鬆之模式,他們都是無保留及機心下導引我走向獨立.

卅幾歲人了,工作及生活上既難題確係令我躊躇,別人既路未必啱自己行.要了解自己既內心,原來不是一件理所當然既事.唯有從身邊朋友或性情近既前輩之經歷及後輩既睇法,去搵一個啱自己節奏既跑法.

PS:今日番完晏,去咗鄧肇堅跑5.2km,半個鐘有找.下星期日跑10km應該挨得到~

德國啤酒節@馬可孛羅酒店

Re定更期,今晚可以同一眾工作兄弟出黎鬆一鬆.

$150入場卷包一杯啤酒,食品就要係場內以八達通交易,平均一款百幾蚊,可惜款式唔夠多(豬手,羊肉,肉腸,三文魚).七點前以買啤酒,買一送一,全場八達通交易,大會設有八達通增值亭.

帳篷內有live band,啤酒攤位,露天座位可以一覽維港夜景,情侶拍拖都可以黎趁吓高興.

現役及前度工友一齊聚舊,邊飲邊食邊傾.

我地呢枱清一式男生,但我地搵唔到一枱係清一式女生.........

Live band以音樂將氣氛提升,賓客們一齊組成火車隊形巡遊.

賓客們一齊於帳篷內跟著live band的節拍,扭動身體及和唱.

近十一點,大家盡興而歸.大家一齊行去搭西鐵,前後腳落車.意猶未盡,番到屋企仲想飲多罐啤酒,但沖完涼就覺得脫力(話晒都番完個早更),唯有乖乖就寢.......