行年宵

上年幸男病咗，行唔到年宵，初四至有精神去林村行大運補數。今日係幸男第一天既新年假，我哋一家三口去屯門既年宵行大運。

我地俾近入口既花檔所吸引，幸男個樣有點苦惱……

雖然知道啲菊花唔係天然色，但見咁搶眼兼30蚊一朵，於是買咗半打($168)，今次係我地第一次係年宵買花。

本人覺得呢款海豚頂球造型既風車都幾得意，但幸男試玩過就放低，一心要買氣球。

原本串冰糖士多啤梨($30)係買俾幸男，但幸男嫌太硬，結果要人家代食。

幸男揀咗個Thomas汽球，附近一位女檔主見我為兩母子影相，主動走過來幫我地影合照。睇番張相至知汽球群作背景，感覺唔錯～今日人流唔太多，各人都有足夠空間影相及閒逛，啱哂怕逼既我。

行去市中心買多少少嘢，搭的士番老家食團年飯。我同人家都為幸男既考試作準備及支援，所以尚未準備好過新年之節目及大掃除……

星空JET LAG

今晚趁台灣女生番夜更，幸男於婆婆家留宿，於是執好個相機背囊,騎羊上大棠.對上一次騎羊黎,已經係十年前既事.於燒烤場路邊泊好愛羊,孭住背囊兼拎住腳架,搵到個有利位置(有得坐住黎set相機)

24-24 F3.3-6,3天涯鏡,無快門線,只可用設定最長既曝光時間30秒配10秒延遲自拍.因要用細光圈,故EVF一片漆黑,無法手動對焦.曾計劃以無限遠黎試第一張,之後每張校近一少格,但試到十多張時發現都係無法中焦.突然諗起先以最大光圈F3.5黎搵最光既一粒星黎手動對焦,再將對焦校遠一小格,並將光圈收細,才用番30秒曝光配10秒延遲自拍.試咗幾張黎夾ISO,卒之影到一張唔專業既星空相,星量比肉眼所見多一點.

燒烤場有唔少人帶同充電式LED燈黎燒烤,夠光又方便.我係BBQ肉食香味下繼續試影,難得少點光害嘛~一個人影相確係一種放鬆及靜思既活動,全神投入時,自己既思緒及步伐會不自覺地放慢.

逗留兩個幾鐘至收機,臨走前為愛羊影番張相留念,十年了,有勞你為我帶來方便及不少回憶.

點解今晚會咁突然上大棠?因為同台灣女生係藍地既THRE3 CONCEPT食晚飯時,聽到店內播放著許志安既<非安全地帶>,被歌詞"過得太清醒,而磨蝕了反應"所牽動.一於兜上大棠,親眼望天色可否影星空,反正騎羊都係半個鐘唔洗就到,唔好天咪當兜風兼探路,下次可以順利一點到達.

呢款雞翼拼盆都唔錯,玫瑰味有點似香水煮既雞翼.

海膽黑松露忌廉長通粉,係就係貴啲($108),但又真係幾好味,話晒係每日限量供應.

BRUNO壽喜燒

今晚台灣女生準備好材料,炮製住家日式料理-壽喜燒.先將部份牛肉煎熟,其他材料就砌好係鍋盆內,等待入替.

幸男食住白飯同三文魚子黎等牛肉收成.....

落埋個壽喜燒汁,滾熟咗就可以起筷.本人覺得壽喜燒同打邊爐無咩分別,只係先將牛肉煎熟,再同其他配料一齊滾熟.人家就覺得BRUNO電烤爐非常特別,加上其他配具可以煮出多款食品(如煎牛扒及燒章魚丸),但本人就覺得平日連煮飯都無時間同體力既人家為何咁雀躍?

由於個爐面約A4紙大細,所以只可二人前火鍋,三人共餐已是極限,除純煮佐酒小食.....

e-HEAT手套:戴完戴唔番轉頭

放工騎羊去相熟油站入油，見只係停一陣車，於是無熄e-heat手套，放係seat位下方之收納格。油站阿叔見到都忍唔住問“真係著燈㗎？”原來第一眼以為只係螢光，細看下就感到新奇。

入冬已兩個多月,當氣溫約十五六度左右, 我就會戴呢對e-HEAT手套,細火力(綠色)都可以雙手暖笠笠.十二三度就要用到中火力(黃色),可惜今個冬天無舊年咁凍(十度或以下),故不能試大火力(紅色)既極限.電池位置係手套袖位內方,重量及大小均沒有對操控構成影響.

相比之下,以往最高規格既SPIDI皮制厚手套(LOFT)顯得笨重之餘,又無咁夠保暖.用得唔好嘥,呢對手套留俾坐後座既台灣女生用.

PS:多謝台灣女生舊年去日本旅行時,為我搵到一間賣e HEAT手套既電單車專門店.

重操手制之NINJA GAIDEN 3:Razor Edge

為咗準備3月份推出既NINTENDO SWITCH,係時候清吓未打爆既GAME-忍者龍劍伝3.幸男要應付考試,客廳既電視被封印,我就順理成章咁入書房帶住headphone黎打機(犠牲咗5.1聲效0架).

畫面唔錯,難度依舊高,忍者主題情義結下,相信我會完成呢隻game.暫時未有發現可以重玩同一個stage黎儲exp既方法,睇黎真係要諗過度過至好揀啱技能開發.仲記得NDS年代玩忍者龍劍伝,下方touch screen之保護貼被我刮到穿咗.

瘋狂咁被扣血至game over,真係不是味兒,但我都會堅持normal mode,向hero mode說不!

大假-毒(獨)佬的一天

雖然係放大假,但遷就幸男既番學時間表,我同人家都無咩特別節目.今日可以抺羊,都係多得外母上門幫手帶幸男去足球班.天氣熱,特意飲住罐ALL FREE啤酒黎抺車.

新車蠟無之前果款難捽走,但就好多粉抺飛散,始終都係第一代既metallic/pearl white軟蠟好用(滑手得黎又易捽走).抺車時發現,愛羊外殼多了花痕,畢竟已十年車齡,希望keep住定期維修,可以再走多5年或更遠.

完工已經係七點左右,騎羊去置樂買個魚生飯外賣番屋企食,無諗過會有85折.

趁台灣女生同幸男未番屋企,開封之前買落既機動警察THE NEXT GENERATION電影版首都決戰.故事與動畫劇場版第二集有關,發動政變失敗既柘植雖然仍被監禁,但其意志被新一代反政府組織所繼承.是次規模較細,只涉及一加戰鬥直升機,但其光學隱形機能,令首都陷入驚恐.

新碟機Fidelio 9000表現出色,之前以Batman v Superman作比較,畫質明顯比舊型號(與藍光碟機一體化)之soundbar優勝,尤其係暗位既細節呈現.

Fidelio Skyquake Soundbar既天空聲道,啱晒呢套對付武裝直昇機既電影.第一次係豐澤門市試DEMO碟747飛機起飛時,已被上空之聲效所感動,真係好似細過係深水埗行街時,頭頂有飛機掠過既經歷.收貨後,試睇美劇Elementary(以機頂盒錄明珠台),警署office背景電話響聲比舊soundbar更突出於後置聲道,整體聲效更加分明及清晰.

其實之前有考慮過E6,貪佢可以將後置聲度之喇叭隨意安放係兩邊耳位,享受"真"後置左右聲效.Fidelio Skyquake Soundbar既出現,令5.1.2比"真"5.1"更加吸引,而且諗到後置聲度喇叭之電池折舊,結果係門市試過後就決定Fidelio Skyquake Soundbar!

PS:Fidelio 9000配Fidelio Skyquake Soundbar已三星期了,非常滿意呢個組合,聲畫都有所提升~好期待節拍有多點啱睇既電影藍光碟出租,讓我可以盡情享受小型電影院.

微積分式家長生活

四揀一既情況下,幸男都無樣啱食,於是今日奉命騎羊上外母家領取御膳,並趕係十二點前送到學校.落車時,見到學校既午餐供應商亦都準備落貨.

話就話放大假,其實每日都係洗衫晾衫,去市中心買補給品.没有正式出過去行街,只係尋日出過去同Eric食過兄弟姊妹飯及飯前同Leo行咗一個鐘玩具店.其他時間都係留守區內,今日台灣女接幸男放學前同我食元氣,Starbucks飲埋杯咖啡就分道揚鑣.我就自己一個人係市中心睇西裝,結果係G2000買咗套黑西裝$1199.

正值幸男考試,是日晚飯都係由我騎羊去藍地領取Three Concept既芝牛堡,豬肋骨半份,芝士圈及腸仔拿破崙意粉.

幸男好滿意自己揀既意粉,展現出久違了的"笑一個",我就覺得肉醬會好啲.父母團團轉,都係想幸男可以快點完成功課及溫習,多一點休息時間,並有多一點親子教養.相反,家長只能將斷續時間(接送小朋友之空檔,或小朋友上學時間),盡量填入自己想做或需要完成既事宜,不管你有無心情,動力及體力,否則要整體就只係湊仔跟功課溫習既主題,沒有一點自身既存在感.

幸男"捕"住電視,等睇介紹美籍兒科醫生既10秒止喊抱法,覺得好神奇.我哋問幸男點解咁想睇,幸男答:"咁我第時都會有BB嘛".我同人家再問點解會有,幸男人細鬼大答道"老婆生囉".

PS:晏晝上外母家領取御膳時,順道將之前放低既舊sound bar組裝,因為第一次自己送貨時帶漏遙控及hdmi線,之後又發現漏power cable,故今日至齊料.

家務,外賣,攝星

平日無咩時間打掃,大假又要俾台灣女生安靜環境為幸男準備考試,結果要今日人家帶幸男上婆婆家黐餐時,我至偷到時間大掃除.唔想騎羊出去買外賣咁嘥時間,於是叫煲仔飯外賣.單車送到閣下門口交收,真係好正.外觀唔差,至少睇落衛生企理.

打開煲蓋,香味隨熱氣四散,賣相一啲都差.味道都比預期中好,煲底有飯焦,雞肉嫩口,下次都會再幫襯.打個電話就有專人上門回收煲仔,兼退回按金.

十二點才完成餘下之一半工序,兩母子已於房間安睡.行出去扔垃圾時,見硬地球場已關燈兼無人,於是番屋企拎相機同腳架試影星空.雖然村屋既燈光無私樓既強盛,但遠方既天橋街燈及高樓燈光足以構成光害.唯有向頭頂既區域試攝,成功避過光霧,不過撈得既星量亦不太多.呢張相係將最多星粒既部分crop出黎,兼再以手機app將黑底轉為藍調(方便睇少量既星粒,唔係會以為一個全黑方格).

PS:圖下方三粒星係獵戶座既腰帶,唔洗去上高地及偏僻地方,都可以影到幾粒星,已算性價比高.