晚飯@和生飯店

宿舍時代，不時同兄弟們一齊去和生食飯。情義結兼地理優點之下，偶爾番夜班前會同台灣女生黎食晚飯兼買埋外賣宵夜。適逢今晩係人家告别夜更生涯，當然要食好啲(好味兼夠鑊氣)。
黃金鮮魷，我同人家常叫既小菜，香口又飽肚。

見今晚咁有紀念性，就破例主動同人家自拍下啦～

香蒜豆苗，平日番工時間少食菜。

話明要食好啲，特意叫咗個沙嗲蟹煲。人家親自去揀蟹,真係生勾勾咁秤0架.

以收納格既長毛巾抺去細雨過後既愛羊之座位及風擋,就送人家番工司.我當然替我眼中既溫室小花開心,不再需要捱更抵夜.作息定時,有多一點時間陪幸男~

投身兄弟團

五點半就起身,梳洗完就搭輕鐵轉西鐵(中途會合Leo)去尖沙咀麥當勞(舊HMV)會合兄弟團早餐.佈置完花車兼影兄弟花絮照,一鼓作氣上去酒店房接新娘.

時間所限,穿上肚兜加t back costume前,兄弟們要先食隨機被加料既綿花糖,第一下感覺似烈酒般既味道,但隨之而來既係麻加苦(原來係寶寶手指水)....兄弟們飲完紙包飲品,兼玩埋邊做掌上壓邊食尿片上的花生醬撈朱古力豆都未能解毒,要順手食埋新郎哥專用既鮮檸檬至可以回復正常味覺.相比之下,兄弟抽籤兼被新郎哥隔著新娘頭像照片鍚身體各部位,顯得輕鬆得多~

排除萬難,讀過愛的宣言,新朗哥順利贏得美人歸,當然成為眾人相機之焦點.

吉時過門之後,兄弟姊妹於男家屋企不足五十步之外既酒家用膳.大家為是日西曆生日之兄弟阿昌準備了生日蛋糕,令原本已好豐富兼熱鬧之午餐,添上多一份溫情.

上酒樓前,大家坐旅遊van去到觀塘海濱公園影戶外照.雖然我每年都騎羊去觀塘工廠區整車,但都無黎過呢度.

除咗黎休憩既人士,在場仲有不少新人及其兄弟姊妹團黎外影,話晒今日係好日子嘛~

一對新人繼續前往下一個外影景點,兄弟姊妹們就先去酒樓佈置,準備晚宴流程及接待賓客.

七點左右,台灣女生帶埋幸男黎到酒樓,幸男今日都係打煲呔.為配合人數,我未能與人家及幸男坐同一枱,但我不時走過去監督幸男之操行.為免幸男眼訓倒下,人家與同枱之賓客一齊離座,先行回家.

主人家送客後,我與一眾兄弟姊妹們忙於收拾物資,再以酒樓借出之手推車,運到樓下之go go van,再跟車去新居.與新界西小隊一齊搭的士,落車時已一點鐘.雖然直踩近二十個鐘,但有幸可以參予好兄弟之婚事大日子.

祝Eric同Winnie,甜甜蜜蜜,美滿幸福!

擬.鉄板燒

今晚台灣女生用BRUNO電烤爐黎模擬鉄板燒晚餐,噱頭就夠晒嘞,但我就好擔心油煙升上天花板....有相為証,真係會"咋"一聲出煙(尤其係多水份之食材或加入醬汁).

個人覺得火力一定唔及明火(唔會熱到辣口),但以輕型食材作主題的話,BRUNO電爐都可以係一個家居選擇.幸男有三文魚子送白飯,小量鐵板燒肉食已滿足,因為幸男食了好多芽菜同香菇.

振興新村盆菜

又一年了,一家三口齊出席振興新村盆菜.未知是否因為今日係星期日,好似比舊年早開始舞獅.

幸男依舊喜歡睇舞獅,Ben拖住幸男去搵有利位置睇表演,我就專心用相機影相.

今年既盆菜供應商係輝記,份量及味道都好過之前既萬里緣.

上年抽中一箱公仔麵,今年就抽中電磁爐,多謝大家將呢份禮品讓給我們一家.隔離枱既姨姨話"電磁爐都好丫,我抽中個煲",可能佢屋企太多煮食用具.Ben叔叔以半捉弄既型式黎同幸男玩,令幸男不時咔咔笑.

大家邊食邊傾,都無為意大姐出咗去參加既啤酒競飲比賽,未能為大姐拍照留念.唯有係我地張枱補影,賀大姐輕取冠軍.

新一年,祝願大家身體健康,心想事成!

PS:再一次多謝大姐同麥生既款待~

父子重遊屯門市鎮公園

今次再同幸男黎屯門公園(上一次係2015年4月),因為學校有一份遊公園既專題功課,家長同小朋友要拍攝有關公園既照片.

先去爬蟲館,見到呢隻流鼻水既大龜(夜晚上網google至係叫盾臂龜),忍唔住要用手提電話之相機黎影低佢,幸男都話"係喎!".

行完爬蟲館影動物,拍攝目標尚有兩種植物.我見到有花有埋個牌,就叫幸男一齊度位兼拍下呢幅相。番到屋企至俾台灣女生話我亂黎，"蘭嶼羅漢松點會係花?"，應該係牌後既粗身灌木...

公園設施方面,我地揀咗羽毛球場,中國象棋石枱,以及休憩座椅.

另一個拍攝主題係喜歡的活動,叫幸男扮準備起跑,動作生硬得黎又似耍太極。

影完相，係輕鐵站將幸男交託俾外母，自己就係吉之島超市買個沙律菜同特價鰻魚，番屋企煲個飯就湊成一人前晚飯(都叫做有魚有菜有煙肉碎).

台灣女生放工回家後,可以享受二人電視時間.平時幸男在家中,人家往往會陪幸男入睡,至天光才被鬧鐘聲喚醒.剩下的我,靜靜地於花園或室內晾衫,再與保溫啤酒杯一齊思考日記.

第十七代手機-BlackBerry DTEK 60

Nokia旗艦Android智能電話未出,我部Alcatel Idol 3就跪低咗...急急上網爬文,諗住買部Asus ZenFone 3 Max頂住先($17XX),點知係中原見到一部熟口熟面既機款,結果就買咗呢部BlackBerry DTEK60($4488).

原定既後繼機體係 Alcatel Idol 4S,包埋VR goggles ，但香港代理遲遲都無引入(怕中高階機價位難與Samsung及LG爭？)，反而入門機就跟得住海外。

大陸內銷當然用番TCL(Alcatel之母公司)既命義發行，與BlackBerry 一樣，删去了VR goggles。BlackBerry DTEK 60沒有了Alcatel Idol 4S之boom key弊端,只係將其作為實體捷徑鈕(我set做鬧鐘),但招牌上下倒轉皆可接接來電之功能則被沒收.幸好wave音效功能保持,我可以繼續享受比一般入門手機出色既音效處理.4Gb RAM, 2k屏幕,21mp相機,比舊Idol 3進步不少.除咗系統運行反應爽快,即使同一個網絡,上網速度都明顯快過用咗年半多既Alcatel Idol 3.

號稱"The World’s Most Secure Android Smartphones",安全設定比過往用開既機種多,但好apps多都唔知有咩用例如BBM,HUB,DTEK...強制性設定鎖機陣圖,我唔記得咗個陣,十次失誤後,機體進行清除裝置(自我毁滅).見白白睇住Android虫仔下既taskbar向右增長,可惜係清除所有已輸入既設定同apps(當時已過咗十二點)........

PS:上星期起,用開既Alcatel Idol 3偶爾會收唔到訊號,要重新boot機至可以搜尋網絡.今日Idol3卒之完全失去連接功能,換埋SIM卡都唔得,結果要用番前前3G機體Alcatel Idol X當通話電話(好煩好唔方便).與台灣女生於太興食過晚飯後,人家自行搭輕鐵番工,我就騎羊去市中心買後繼手機.

手機Profile更新:
1st   Ericsson PF768                >黃色 sunday
2nd  Boch 909 Dual                 >灰色 people
3rd  Siemens A40                     >藍色 orange
4th   Ericsson T29                    >銀灰色外殼,紫色panel one 2 free
5th   Ericsson T39                    >灰藍色 one 2 free
6th   Sonyericsson T300          >紅色(紅豆) smartone 
7th   Sonyericsson T630          >黑色 smartone
8th   Nokia 6260                       >銀色 smartone
9th   Nokia 6270                       >黑色(深啡色,鋁金屬外殼) smartone
10th Nokia 6500 Slide             >銀色(鋁金屬外殼) smartone
11th Nokia N86 MP                 >白色 smartone
12th Nokia N8                          >橙色(鋁金屬外殼) smartone
13th Sony Xperia P                  >紅色 nwmobile
14th Sharp SH930                   >白色 nwmobile
15th Alcatel One Touch Idol X >黃色 nwmobile
16th Alcatel One Touch Idol 3 >灰色 Sun Mobile
17th BlackBerry DTEK 60       >鈦灰色(玻璃背面) Sun Mobile

言葉之庭

趁幸男今晩不在家，鼓起勇氣同台灣女生一齊睇之前買落既<言葉之庭>DVD(因為前作<雲之彼端，約定的地方>及<追逐繁星的孩子>有點令人失望)。

每逢下雨天,15歲男主角中學生(秋月孝雄)就會翹課前往日式庭園公園(新宿御苑),埋首於鞋品設計.有一天,孝雄於公園前往相熟涼亭時,遇見一位27歲輕熟女子獨個兒邊飲啤酒邊食朱古力.該名女子以"隱約雷鳴,陰霾天空,但盼風雨來,能留你在此",回應孝雄"我們曾見過面嗎"之提問.

自此兩人每逢下雨天就會於涼亭相聚,一時各自專注鞋品設計及文字閱讀,一時閒話聊天,一時共享午餐便當...女主角將一本有關手造鞋之書籍,送給孝雄作為午餐便當之回禮.

孝雄意外地於校內遇見女主角,原來她是學校其中一位古文老師(雪野百香里),因校內既流言(與男學生有不倫之戀)而受不住壓力而辭任.同學之間打聽下,原來只是該男生一廂情願,但其女朋友就造謠作報復.

面對孝雄既直言"對重要的事隻字不提,裝出若無其事的表情",雪野老師最後鼓起勇氣,抱著孝雄嚎啕大哭,坦率地說出自己抑壓已舊既內心脆弱,並感謝孝雄.因為孝雄對夢想之追尋,鼓動了將要崩潰的她.

都市現實生活中,各人都有自己既煩惱,成長階段,初出茅廬,生活開支,人生定位,感情離別.....故事裡小伙子從剛投身社會既女主角身上窺探成年人既視野及心景,撫平自己對將來既不安及滿足好奇心.反之,女主角從男主角身上,重拾年青既衝勁及率性.

半工讀時,有一位女前輩與我一見如故(還記得有一次陪她飲悶酒).數個月後,她就以電郵通知我婚事,並附上婚紗照,之後就無再見過面或得知近況.正如孝雄既想法,"她"安好就好了.對某些觀眾來說,故事或許有點兒平敍,但對於有相關人生閱歷既觀眾,內心絶對會泛起漣漪(這正是我喜<秒速五厘米>之原因).

除了細膩既畫功,詩意既元素令故事生色不少.新 海誠似乎對舊歌有情義結,繼<秒速五厘米>既One more time,One more chance,今次選用由秦基博番唱大江千里既Rain,作為<言葉之庭>既結尾歌.

PS:男主角最後從古文<萬葉集>得知下聯:"隱約雷鳴,陰霾天空,即使天無雨,我亦留此地".