Trainspotting2-中年迷失

尋晚同馬sir一齊係圓方既The Grand睇22:05果場Trainspotting 2,好難得大家卒之都夾到時間係落畫前一齊入場睇.事隔廿年,我都唔記得第一集係馬sir買咗個VCD睇完借俾我,我仲以為係一齊入戲院睇.

當年第一集係講班有吸毒習慣既廿歲出頭既年青之生活態度,其中夾集著色情,暴力,黑色幽默元素.獨特既手法,令觀眾對癮君子既內心世界及迷幻空間有多一點了解,反思絶對既否定.

因為母親過身,當年既私吞運毒贓款既Mark(Renton)由阿姆斯特丹重番英國愛丁堡,並重遇當年既損友Daniel(Spud)同Simon(Sick Boy).逃獄既Francis(Begbie),意外得知Mark歸來,一向有暴力傾向既Francis誓要與Mark算舊帳.

Mark起初救回以膠袋自殺既Daniel,並鼓勵佢戒毒.繼續有吸毒習慣既Simon一心拉攏Mark一齊諗辦法搵快錢去開色情場所.結果Daniel成功戒毒,而Mark反而被Simon所感染及生活壓力而重投毒海.

廿來歲吸毒,可能係追尋迷幻感,以及迴避現實社會生活及責任批判.四十歲人仍舊吸毒,應該係逃避一籌莫展既人生.荒誕,色情,暴力,幽默色彩依舊,但著重了朋輩兄弟情.電裡有不少舊情節以唔同既方式穿插或重新演繹,令人感到連貫及延續,至少唔係令大家覺得T2係為拍而拍.

PS:開場前同馬sir係戲院隔離既Chips Republic一齊食快餐,好有中學時代既感覺(雖然個快餐貴咗好多).快將40既我好感觸,除咗好似同故事既主角們一齊長大外,中年就好似係人生中期進度回顧.

Power Rangers

今日晏晝同賢仔及康楠一齊係凱都睇Power Rangers戰龍覺醒,好在尋日早更放工去買定飛,入座率都有一半有多.日本經典特攝片改編成電影,戰衣造型算係不過不失,唯頭盔既口唇位有點怪怪的(可能要向經典致敬卦).

熟識日系五色戰隊特攝片既朋友都會發現,明明係城市應付奸角嘍囉,無端端會變身後,一個筋斗就轉咗係石礦場打同亂咁炸.今次就直接將石礦場融入故事,一班反叛青年闖入小鎮內之石礦場禁區時(黃戰士玩瑜伽,粉紅戰士玩跳水,黑戰士玩野外求生,男主角紅戰士就被藍戰士拉去玩炸葯爆破),意外發現前外星文明於恐龍時代遺下既五塊光石(coin).

故事中間文戲較多,都係主角們各自既青春問題,以及意外地發現石礦場懸隙下既水底太空船基地,並進行訓練以應對將大舉入侵既敵人.後段嘰嘰們除咗於市內作惡,更企圖攻入基地.

恐龍戰隊出動時,有經典"Go Go Power Rangers"副歌襯托,fans們一定會好感動.五機獸既外觀設定唔錯，風格偏向索斯機械獸。

五機獸不敵女魔頭召喚之巨大黃金魔像,於墜落地幔時合體成西洋版大獸神.色系及外觀上既配搭,感覺有啲似變形金剛既柯柏文,除咗背部粉紅色既摺翼,其他部份睇唔出各機獸之特色造型及顏色.

紛紅戰士既演員有點面善,上網search維基,原來之前睇明珠台既Terra Nova見過呢位Naomi Scott.

細個時既娛樂大部份係電視卡通,逢週未播既五色戰隊更係例牌小菜,因為播完一個系列,下星期就會播另一個主題既五色戰隊(五星戰隊,雷霆煞星,恐龍戰隊,特搜戰隊....).$60一張戲飛,勾起童年回憶兼情意結,望能永記童心.

發呆是一種放鬆

現今電視台大多24小時播放，深夜時份則以重播舊劇集或日間第一次出街之節目。今日番睇機頂盒深夜時份錄落既電視節目，重見以前常於電視出現之畫面兼持續既"Do~"聲，諗起慢活的節奏。

資訊爆炸時代下，網絡遊戲，社交帳號，在線視訊…原意係令大家可以打發失眠或閒餘時間及添加生活趣味，但結果係習慣了無間斷式即時更新及玩樂新意，偏離了正常作息及沉靜耐性。

PS ：不用在意聲畫變化，只需讓頭腦放空～

相熟油站

適逢今日係特選星期六，憑油咭可以每公升平$2蚊。雖然缸油仲有四分一，都照黎老家附近既加德士油站添平油。

之前既手機夜拍表現粗糙，每次等入油時都未能獲取淸晰影像，現役既BlackBerry DTEK 60(擬Alcatel Idol 4s)就非常之稱職了。

住家男的例假

是日放假，訓晏少少，動手家居打掃。騎羊去燊光食完晏，再番屋企做埋下半部份家務。傍晚時份出去足球場跑步，望番跑步錶紀錄，原來已三個多月無跑了( 都仲跑到5Km)。

晚餐由台灣女生主理，菜由外母洗定，雞翼由外母醃定，為人家省去不少功夫。

食完飯，人家洗碗碟,我就同幸男玩UNO.一輪+4攻守之後,幸男被罰取16隻牌.幸男無因為被罰而喊,繼續玩埋手頭上既牌,情緒管理有進步.

雖然無咩特別節目,簡單兼慢版的一天,已令我稱心滿意.

2003復刻版 Optimus Prime對2016 第三廠Devastator

是日家居清潔後,卒之提起勁,拆開華B割愛饋贈之復刻版Optimus Prime,再同我架第三廠出品既Devastator擺埋一齊合照.度咗好耐位,先至影到呢張咁有動感既情景照(可惜背景唔係街道).

設計上相隔30年,精密度,比例及活動性都有莫大差距.好想maketoys快啲番出Striker Manus(第三廠之Optimus Prime),重現充滿時代感之對決!

全家都近視了

幸男常抄錯黑板上功課册之英文科項目,故手冊上被老師寫上"幸男可能有近視,請帶幸男檢查視力".前幾日,眼鏡88職員以自動驗眼機作初步評估,話有220度近視.由於小朋友係8歲以下,不可以像大人一般進行手動度數校準,要約期(最快都要四月尾)兼俾$4xx去沙田既驗眼中心做一次詳細評估.David談及既理工大學驗眼都要約幾個月,而且都係要俾幾舊水.

番到屋企至醒起,點解唔去問埋高登(現稱"亮視點")呢?前日台灣女生放工去市中心既亮視點問,職員答道可以為幸男作手動度數校準,因為6歲半都識睇晒26個英文字母.幸男又唔係胡亂搗蛋既小朋友,信心十足之下,今日帶幸男去驗眼,結果係150度(一如我估計,無理由過二百度既).童裝款式唔多,揀咗個顏色平實一點既鏡框,因為職員提醒我地某啲小學係比較嚴謹.另外膠框連身既鼻托較貼面,故乖乖咁加多$200轉金屬鼻托支架.

原定去金舌食晚餐,但太多人等位,於是去咗outback.我一心入去店內會合台灣女生及幸男,點知職員叫停我"先生!先生!".原來兩母子坐咗係店外既商場位,因為人家記得我嫌店內人聲較嘈同燈光昏暗.

幸男話試度數時,覺得景物清楚咗同光咗,本人就蠻心痛,因為帶眼鏡真係唔方便(運動及出入冷氣場所.....),兼且嘥咗一對大眼睛.我同人家一向都無俾小朋友玩平板電腦遊行或以手機短片作娛樂,唯一既解釋係幸男不時會好近咁玩玩具,以及升小學後,功課及閱讀時間多咗(動輒都個幾鐘).

番P帶飯

尋晚原本外母上門煮俾個女同個孫食,但我補鐘係和生買外賣(泰式辣鳳爪+燒豬頸肉)加料番屋企搭食,結果御膳有剩,成為我今晚既飯盒.同事們驚訝我帶住個飯盒番工,畢竟我一向都係兩手fing fing咁落canteen嘛.

打開叮熱既飯盒時,煮雞用既紹興酒香冒出,搞到我有啲尷尬,怕其他枱既同事,循酒香望過黎~加埋屋企存貨既金觀音,今日既駛用只係燊光既$40午餐.