觀課日

小學既我點會諗到有一日我會泊架綿羊係學校附近,兼且以家長身份出席阿仔既觀課日呢?

由於家長眾多,課堂移師往禮堂,是日觀課之學科為中文.

座位陳列以原本課室作依歸,幸男所屬既小組係三人組.我同人家發現幸男坐唔定(一時坐櫈面最前端,一時坐最後方),伸手入襪子內"R"痕,周身抓....

教學模式同我以前好唔同,以往老師會抽問同學,以評估同學們既理解程度;而家係各同學都要擧手並以手指數量來回答老師既提問,老師可以掌握全班同學之學習進度.抽問環節時,各同學主動擧手搶答,為小組加分(黑板有紀錄).小組裡要亙相扶持,同學成功搵到答案時,組員會話"叻叻,你至叻~",相反的話,組員會以"努力呀,努力呀~"

每組要派一位組員出去老師位,向同學們及家長們讀出"我最愛的花"主題工作紙內容,幸男係被推出去果位...之後老師示意各同學要要係限時向一位在場既嘉賓(不可向自己既家長),讀出自己既工作紙內容.同學們一窩蜂走向校長面前排隊,令鄺Sir同各家長都笑出來,校長真係無咩架子兼受同學愛戴~由於限時,排在後方既同學走向陌生既賓客讀出內容,排中前段既幸男就僅僅趕得切向校長讀出工作紙內容(感覺有啲似我打機時同大佬搏能源(HP)既戰術).

觀課後,騎羊同人家去市中心Outback食晏,因為人家只係請咗上半日假.

我同人家都係點咗呢款西冷牛扒配香草油醋,飯底濕濕地,味道唔錯~午餐既份量啱啱好,至少唔會好似晚餐咁逼你揀2個配菜(雞味飯同雜菜最唔好食),重點係唔夠多選擇嘛.

重操故業-功課班老師

是日例假,訓晏少少,騎羊去燊光食晏.番屋企晾吓衫,咁就夠鐘出門口接放學.幸男一心以為係婆婆接,所以視線只係微微向上作搜索,望唔到我個樣....

輕鐵站隔離買完底雞蛋仔,就有車埋站,所以落車至安心享用下午茶~

係OK便利店買過相熟紙包裝咖啡,就開始督促幸男做功課.是日功課唔多,對完功課就溫習默書.整體進度還可,只係字體不太工整,唔夠專心.

執好書包,出發番屋企,幸男個造型同叮噹裡既大雄有點相似....

台灣女生放工直接買餸番屋企煮，一家三口安在家中用餐。我負責洗碗，人家就安頓幸男。平淡慢版的一天，啱晒飲紅酒既心情。

PS: 係安定撞見碧欣，怕羞既幸男只係細細聲同姐姐打招呼。

住家深夜食堂

今日番晏唔駛最後至有得走,於是約定泰GG同Katy一齊放工去鄧肇堅跑步.耐無跑，十二個圈就收步。跑完去更衣室沖埋涼都十點半,騎羊回家時順道去入油,但油站一個人都無,感覺有點詭異(好似walking dead裡既無人城),好在係油站商店搵到職員.

慣咗半空肚跑步，晚餐時間係七仔買咗盒朱古力奶上canteen飲。番到屋企，台灣女生為我煮咗個出前一丁同翻熱外母炸既新鮮非急凍雞脾(兩母子黐餐有多既)。人家已同小學時間表既幸男接軌，輪班的我有點獨活既感覺，唯有寄情隻雞髀連繫著我哋…

玩具傳奇

復活節假期,唔想同人迫,但又想幸男有節目,於是半推半就下去咗尖沙咀歷史博物館主題展覽-玩具傳奇.雖然要排長龍,但未至於要成個鐘至可以入場,幸男係巴士度訓著咗,落車時都係一臉倦容.

入到會場,幸男先去玩hotwheel既陳列玩具.

訪客們都掛住影相留念,我地就揀咗呢個金魚檔場景.

幸男係巨大lego板上砌出"男"字.

眾多懷舊玩具中,我特意同幸男介紹呢款,因為以前老豆每逢假期時會砌好路軌俾我同大佬玩.車身底部有金屬片接觸路軌上的金屬帶,玩家靠電線接駁住既手制控制車速(按到底就最快,放鬆就減速,無刹車功能),入彎速度太快就會飛出街.

幸男應該最開心見到呢款舊式經典UNO,唔睇都唔記得原來仲有個係派牌機既玩法(UNO ATTACK).

森林家族，幸男每次行過大眾書局同玩具反斗城都會望下(我細個時都鍾意動物公仔)。

玩具車絶對係男童既首選玩意,醒目既幸男知道爸爸想透過玻璃陳例櫃黎影相,反而媽媽懵然不知.

最後行既都係近代啲既超合金玩具及活動人偶,例如聖鬪士星矢,變形金剛及G.I.JOE......出番戶外,就係同Thomas火車頭合照時間,無諗過拍拖既女仕都會同小火車影相打咭.

雖然話不可攀爬,但當借位咁坐下影相,都未至於會整污糟或損毁.

行番去金馬倫道既世界之山哥食名古屋菜,雖然已經係近七點,但霓虹天色仍在.每次放假都好掙扎閒留區內或家中,定係跨區既主題節目.心軟既父母記得唔好帶部正式既相機出門,因為集得既生活照,會變成下次掙扎既誘因~

PS:幸男話Thomas,James同Percy好似(因為曳)被肥控制員困係籠仔度~

區內補給,跨區補購,家居清潔

訓晏少少，午餐係藍地相熟茶餐廳享用後，騎番上愛羊去市中心補給生活用品。係優品360見到呢款Kronebourg1664特別版,紙盒包裝上標示住獎項,唔知有幾好飲呢?

試過新買既插制(電鬚刨圓頭兩腳)，原來係電動牙刷既充電座壞咗。打電話去客户熱線，得知旺角雅蘭中心尚有少量存貨，於是查看手提電話巴士APPS,較啱時間出門搭巴士。

店內擺滿小型家居電器作陳列，主要業務只係為顧客補購配件。明明係電話預留咗個叉電座，點知去到又話無預留紀錄，好在仲有存貨,盛惠二百大元,只包頭七日有壞換。

由於嘥咗時間出旺角，番到屋企翻叮外母既咖喱牛腩兼白飯，就趕住搞清潔(吸塵，拖地，洗厠，抹門)。

台灣女生同幸男去完黎太屋企聯誼,番到屋企時我至啱啱好搞好工程.其實對上一支電動牙刷(後方白色)都係叉座壞先,當時見電動牙刷柄背面物料剝落,先至順便買過支新.舊果支配上開叉舊刷頭,抺電單車時用作清理坑紋凹位之污垢.

PS:晏晝係市中心大眾書局見到呢本特價書,覺得可以鼓勵幸男面對日後既人生難題,兼品德培育,其中既一頁說:

生命的價值不是由我們為自己做了什麽而決定.
生命的價值取決於我們為別人做了什麽.

品味鮮小廚雞煲放題

今晚去溫生介紹既雞煲放題，飲品全包，啤酒就有青島。舖位正係以前澳門豬骨煲，拍拖時代同台灣女生幫襯過。

水煮雞鍋底，係就係夠晒辣，不過加水後就好快散去香味，只剩下辣勁。客人要自己入店內取配料,不過供應唔係太穩定,有時要等一陣至準備好.好耐都無一班男人出黎食飯,原本以為七點左右食,後來至知溫生要八點半至入到黎元朗.邊食邊傾,十一點至散人.

PS:見一人前拉麵仲未閂,咁啱有一個人係門外等,好切合店名~

幸男六歲半生日

每年兒童節，我地都會當埋係幸男既半歲生日，準備一個蛋糕俾幸男吹蠟燭。

今日要番晏，放工沖個涼就急急腳set 腳架影相兼食蛋糕，因為幸男聽日要早起身番學。

幼稚園時期，可以為幸男作多點節目準備，小學生既時間表令大人小朋友都少了一份閒情。

PS: 仲未為幸男揀選合適禮物

星期六的無題

今日番晏,電單車位比平日緊絀,我要泊到最入兼近儲物貨櫃之位置(數落總共有9部車).

行過康楠部車，見到地面既手套好面善，咪就係大家夾份送俾康楠果對？Whatsapp問過康楠，原來係尋日淋雨濕晒，晾咗係兩邊把手位吹乾，咁啱跌咗隻落地。反正帶咗盒拉打人偶俾康楠，於是連埋手套放入無上鎖既尾箱。

晚飯都係食下午茶既公司三文治配薯條，放工騎羊入元朗買蠔餅外賣，無諗過咁多人排隊(平日少係星期六日幫襯)。

調製梅酒梳打俾台灣女生，自己就用保溫杯斟冰凍啤酒，兩公婆一齊邊飲邊食蠔餅，幸男就係房間等媽媽哄睡。