懶得有理

夜班過後，番屋企第一件事就係將尋晚既餐具放入洗碗碟機。 今次係第一次將煮麵既細煲放入機洗，擺咗好耐位至放得晒啲入機.正常模式清洗比自己手洗既效果好，還原了一點金屬面的光滑～

即食麵配CP雲吞,絶對係懶人之選!如果出年裝修完,裝部大既洗碗碟機,就可以一次過將杯,餐具及鑊煲放入機洗就好了~

SUPER ASURADA

今日係相熟玩具網站得知MEGAHOUSE將會推出1/18完全變形之SUPER ASURADA, 有別於之前需要換車頭部件既1/24 variable action系列,駕駛倉可以打開!

早前既SUPER ASURADA作品未能完全呈現Circuit,Aero,Rally全3種模式,Rally mode需要另買獨立一款玩具.

雖然係未上色之模版,但已令我充滿期盼~只望手工會有所進步,前作上色及接位都較多瑕疵及鬆脫.

Aero mode車頭擾流完美展示,未見車身之氣扇部份拉出作配合,前作都有,無理由新作無卦?

見到呢個gadget真係好感動~~

Circuit mode既車頭擾流組板有啲厚,希望實物會有所改善.....

PS:如果會出埋後繼既AKF-11同AKF0/G就好了.

早更,剪髮,獨食,接妻

朝早得14.9度,當然要出動電熱電單車手套.最低熱力都足以令我暖洋洋咁騎羊番工.

放工騎羊趕去新墟剪頭髮,近四點至食晏,貪新鮮去咗v city既小王牛肉麵.服務麻麻,飲品選擇唔多,落單混亂....雖然味道正常,但份量及回味度不及市中心既茶木.

係良景間日本城買到個載(烤肉專用)食油既壼,用黎入洗碗碟機既清潔粉.以為放油掃既位置可以收納清潔粉既10g勺,可惜放唔入,唯有橫放係蓋內.....

急急食完個無火鰻魚飯(微波爐翻熱吉之島超市買既浦燒鰻魚,配電飯煲煮既白飯),騎羊入流浮山接食完A2聚餐既台灣女生.

JUSTICE LEAGUE

今晚同台灣女生約老豆及大佬一齊食晚飯,再去睇21:55場既正義聯盟.番輪班既我同老豆,好難得可以就到番正常時間既人家同大佬.

海報已透露會有超人既戲份,超人復活,確實係全場既重點.超人,蝙蝠俠及神奇女俠已有獨立電影去塑造立體形象及內心性格,但水行俠,鋼骨及閃電俠就只係臨時拉夫般被召入隊中.

大奸角Steppenwolf(荒狼)既計劃,係集齊地球上之三個古代方塊(母盒分別由阿馬遜族,阿特蘭提斯族及人類保管),並組合成能量之源,以令地球變成魔軍既星球環境(移民統治計劃??).Steppenwolf無咩特殊能力,只見力大無窮,以大斧作戰.臨尾既對決亦比較兒戲,超人出現幫手,再由神奇女俠埋尾.

電影既動作特技係唔差,但兩小時既時間有點趕急.大量既預告片,令大部份既主要場景都被嚴重地劇透,令觀眾失去了驚喜.電影音樂既平庸,亦削弱了投入度.

動作方面亦因預告片之"過度宣傳",令觀眾好似一早已睇過所有視覺點子,入場只係排番順各動作劇情之先後次序罷了....

只有超人之情節係做足保密,翻生既超人要時間去理順思緒,如果蝙蝠俠唔係準備好Lois去平服超人,正義聯盟未出動就被全滅~

PS:Christopher Nolan監製既MAN OF STEEL以及BATMAN V SUPERMAN確實能牽動觀眾既心,亦係JUSTICE LEAGUE所欠缺之元素.

星期六唔想等位既代價

星期六晚,唔想同人迫,又遲出門,食咩好呢?諗起何福堂附近既大排擋，於是騎羊出發。可惜新金榮檔外已企滿等位既人，反而至尊小炒皇咁啱有人埋單離座。

油鹽水花甲,變咗係胡椒湯底,夠新意,但肉質有點韌(煮得過耐)....

椒鹽蟶子,等得耐都算,炸粉唔掂兼肉質乾韌,好以食魷魚乾咁.原來最早上枱既口水雞已經係最正常既一味,下次點都唔會再幫襯!!埋單後同人家行去泊羊位置,撞見康楠係附近同朋友等食另一間既大排檔,原來行人路上既學神電單車就係佢其中一個朋友~

番到屋企,上sony官網搞咗一輪至成功開到account買星軌app,為十二月中既雙子座流星雨作準備.希望天公造美,話晒都係我第一次去睇流星雨~

遲來的大閘蟹餐@十週年

難得大閘蟹正式回歸,台灣女生已book定枱,係今晚擺酒週年去食番餐.往年既今日,我同人家都會外出用餐,不過今年就由二人變三人,因為幸男明日要早起身番學校既課外活動.

雖然已經係季尾,但點都要補食番生日大閘蟹既傳統.

蟹粉小籠包,饀料依舊交足功課,蟹粉由中間駁口位滲出.

幸男鍾意食小籠包,當然有吼住人家果隻小籠包.

試過一口之後就話唔太啱食,結果都係乖乖地等無蟹粉既小籠包.

國產大閘蟹上枱,我哋張枱對住個雪櫃,大閘蟹餐既最平$320,其次有$480........

人家趁侍應未拆蟹前,同大閘蟹合照~

其實除咗大閘蟹餐,我哋仲叫咗個琵琶豆腐,只係掛住食,唔記得影相.

食完飯,又攰又肚痛(老毛病發作?),但途經MIRA既聖誕裝飾,都有留步為幸男影相.

雖然係星期五,但商場內影相既人唔太多,幸男好容易就搵到空閒既影相點.

呢張相好似係人家抱起幸男,其實只係媽媽踎低咗,幸男企住黎挨向媽媽兼搭住膊頭.

原本想幸男扮不經意側望向一邊,結果都係90度擰頭,得呢張較為可取.....

好耐都無見過呢款玩意,電視台即綜藝節目常有呢個環節，當金屬棒接觸到支架就噴煙並宣告失敗。參賽者要順利將金屬棒遊走過九曲十三彎既迷宮路線，帶到終點。人家玩得緊張，排隊既小朋友亦全神貫注。

無時間準備禮物，只係早更後去相熟花店收取花球，並安放於客廳之花樽。有諗過食完飯係附近商場睇吓人家有無嘢啱，但自己個肚唔爭氣，番到屋企都無力為太座影相…

驚喜欠奉,每天都係忙番工,家務鎖事及照顧幸男.....或許這正是老夫老妻既模式,切合十週年既前設.

人生第一條電單車牛仔褲

著咗EDWIN X 56 DESIGN既電單車牛仔褲一星期,感覺真係唔錯,膝蓋,大髀,及跨下完全無半點崩緊不適.兩層布料既設計,增強擋風能力,即使係15度既天氣,上公路都唔覺冷鋒來襲.

八月日本旅行時,台灣女生特意為我搵定間大型電單車用品店去行吓.寫明"日本制",人一世物一世,結果買咗條$12,000円既電單車牛仔褲(其他歐洲牌子仲貴).人家叫我買多條,但我都只係買一條橄欖綠色(一黎太破費,二黎得紅色).

呢條褲既腳位比普通牛仔褲長同窄,車手唔會因曲腳而感到吊腳及容易入風.不得不佩服設計者之匠心,一分錢一分貨,亦係有買貴無買錯~

PS:咁啱電話收係電單車褸內,係燈位可以影到呢個景,中學時期最開心都係崇真既日子.

電車男

今日番晏,但幸男放假,唯有午飯前送幸男上婆婆家託管.幸男已經可以自已買飛搭輕鐵,我只需要呈上散銀包俾佢.

暑假東京旅行時買既新幹線手錶已打多兩個錶帶窿,幸男可以穩帶心愛手錶(第一隻行針錶).

幸男不時望住月台顯示版,與自己之手錶對時.看著秒針之運轉,迎接列車既到來,十足鐵道員~

PS:咁啱今日幸男著住新幹線T恤

港式家庭

今晚台灣女生下廚,左邊蒸,右邊炒.放工仲要買餸,接仔兼煮飯,母親既偉大得到彰顯~

左邊既一叠煲,內藏蒸斑,花甲同水蛋,四餸晚餐開動~人家係街市買花甲時,見有海斑就諗起鍾意食魚既幸男,,$260毫不猶豫就買埋.咁好餸,當然要開番支紅酒黎飲~

除咗煲具,是晚既餐具交俾洗碗碟機.原本係輕鬆既晚上,因為幸男既試卷而變得失色.學校派回既試卷,顯出幸男故有既大意及神經刀特質.明明已嘮叨過做功課時既錯犯,但依舊重錯同一內容及格式之題目.

雖然未至於怪獸家長級別,但我同人家既方針係盡量發揮自己既能力,唔好嘥咗個人長處.我哋著緊既,係幸男學會解決問題既方法."如果爸爸媽媽可以有體力同健康去照顧你一世,又有咩所謂呢?"