boxing day

幸男九點就起身,出發去會合同學坐摩天輪之前,幸男當然要拆聖誕樹下既禮物啦.幸男謀住我買既忍者一番刀好幾日,今日卒之可以把玩實物.

幸男好認真咁睇說明書,呢一刻好以武俠小說裡,主角修練秘笈咁(獨孤求敗)~

忍者一番刀上既按鈕配合手裡劍既轉動,可以啓動多種聲效(希望幸男係我未訓醒時唔好玩),唔止發光咁簡單.幸男睇黎好鐘意呢份禮物,玩到臨出門至放低.

聖誕樹都係近聖誕節才由台灣女生組裝,禮物仲有媽媽送既新幹線箱,伯娘送既故事書,以及伯伯送既寶馬回力車組裝玩具.

平安夜住家餐

上年係十二月就為愛羊掛上聖誕裝飾,今年就近聖誕節既一星期至掛上.每年都希望小朋友係街上見到時會開心笑往黎指向愛羊,但印象中未曾發生過......

難得唔太忙亂,是日可以補鐘早收工番屋企食飯.諗住唔夠夠餸,一心買自己份外賣,但台灣女生話夠食0架啦,可直接回家.點解二人前既份量可以變成三人前?答案係提早出動原定聽晚用既牛扒!

原定兩仔乸只係食炒菜,瑞士雞翼,同燉蛋.臨時加單項目有,多一個燉蛋,香菇煮急凍蠔,以及兩塊牛扒.今年既聖誕節無咩準備,希望下年既節日可以有多一點計劃~

餐前,用膳,飯後,都要啤一啤

今晚約咗四人前火鍋,見未人齊,我同Brian及溫生先去火鍋店附近既Brother 5 Bar and Restaurant飲住等.呢個店員推介既意大利生啤口味似加仕伯,餐牌上已有聖誕節大餐,不過我哋當然係齋飲.

馬sir趕唔切會合大隊,於是我哋轉陣去咗正記食打冷嘢.

好耐都無食過滷水鵝片,正~以前可以係大坑渠附近既啤酒小食店買杯生啤黎食住飲,但原來已經執晒笠,唯有去對面既士多買藍妹....

食完飯，再去建業街既Das Bier再飲多少少。九點半後$198有6支特色啤酒，加$30有薯角或芝士粒。

戶外位坐咗三位銀髮族,我諗如果第時我哋去到咁既年紀,都仲可以約出黎飲酒閒聊,就真係有褔.星期六晚,但進店飲酒既人唔多.臨收舖前一個鐘(打烊時間為十二點),店內只剩吓我哋呢枱,好耐都無試過一晚係三個地方飲酒咁盡興.

LAST JEDI

 

今日同老豆係市中心UA睇星球大戰之最後絶地武士,一如朋輩所講,好睇過上集好多,劇情無以往既平敍,多了一點曲拆及驚喜.

亮點一:女主角Rey於Ahch-To星球跟隨Luke Skywalker修練內心與原力連接.Rey與Kylo Ren意外地被原力橋樑接通,並開始對話.Rey得知當年Skywalker辜負外甥兼徒弟之信任,曾一刻猶豫要否大義滅親(Kylo Ren於光明與黑暗之間徘徊,但Skywalder深恐自己步Obiwan後塵,培育出背經離道既徒弟),結果令Kylo Ren走向黑暗之不歸路.Rey相信可以遊說Kylo Ren棄暗投明,於是離開Ahch-To星球.

亮點二:Rey上到Kylo Ren之太空船艦,卻被禁固及利誘加入黑暗勢力.原以為Kylo Ren被Rey之信任,改邪歸正並殺死First Order最高指揮Snoke,但Kylo Ren只是一心登上First Order軍團之最高王位(原力遙距撻著激光劍兼拖斬,有點兒戲).

亮點三:最牽動人心既角色,莫過於Skywalker.心灰既Skywalker被Yoda大師之英靈所點化,毅然動身去Crait星球,拯救胞妹Liea及反抗軍.無懼重型炮火直擊,煙幕飄散後,瀟灑地撥走衣領上既灰塵,再與Kylo Ren對劍.正當觀眾未諗得切X Wing點解可以咁快飛去Crait星球之際,結局已揭曉Skywalker以原力作遙距分身作戰(效果尤如高達F91既質量殘像分身之加強版),成功為Liea等人拖延時間逃脫.

太空戰艦對決場面依舊壯觀,反而Fin為大隊尋找解碼大師既支線有點無謂,或者導演志在讓Fin既經歷,去燃點平民既希望,激勵大家加入反抗軍,為後作鋪路.

感動於新作可以秉承前作風格及世界觀之餘,亦帶出嶄新元素及成功讓角色們新舊交接~

長沙WELLCOME BEACH

早更過後,趕番屋企換個背囊,上的士接埋嘉耀去市中心轉搭巴士入東涌.等埋阿Jim一齊係taste買晚飯火煱材料,就一袋二袋咁搭的士入長沙(到埗時已五點幾).按金$1000,入場費$100,收過鎖匙就可以去今晚投宿既8號露營車.

營地對住沙灘,打開圍欄就可以落去吹海風.沙灘上有牛屎,望見遠處有牛影,行近啲睇至發現係人群......天色昏暗,厚雲,今晚睇雙子座流星雨既目標應該都會落空。

小食部車卡,雖然掛住個"OPEN"牌,但入面並無職員,可能只係做早餐生意.

士多就有飲品,零食及BBQ食品作出售.藍妹$15罐,唔算太搶錢,但可以再雪凍啲~

露營車卡靠邊位停泊，中央有個小草地，遊客可以踢迷你足球。另外，近沙灘位置有沙灘椅供遊客夏天吹海風曬太陽。

車內環境一眼望晒,最入係二人睡床梳化卡位其實係二人床,將方形餐枱降下至坐位水平,再將兩個靠背墊放上枱面,就變成二人床.

門口位直入就係廁所,轉個彎就係煮食區(廚盆,電磁爐,小型雪櫃),電視同音響都係掛係牆上.

大會可以代訂BBQ 食品，但唔知碳火點計兼怕燒烤包材料一般，所以我哋自己買火鍋料。烚煮咗就拎到枱上一齊食,食晒就再放生嘢落去,由電磁爐煮熟.

填飽肚,睇埋壹號皇庭,成點鐘出去望下雲層可有消散,可惜都係失望,唯有校鬧鐘四點半起身再睇吓有無轉機.

食晚餐時已經用智能電話上網cap咗呢幅圖,因為難得成團既戶外觀星泡湯了大半......

欠缺動力

放假天,無咩動力,食過早餐就訓第二輪.晏晝係市中心行咗陣,番屋企晾衫.晚飯都只係白飯配微波爐翻熱既鰻魚,簡單既一人前佬飯.

PS:騎羊入元朗接公司聖誕聯歡既台灣女生,記錯咗地方,結果用多咗個幾字至到埗

諗住快食,結果慢食

今晚要接仔，晚餐近近哋係Nam Tei Grill食。雖然成日都係隔離既燊光食晏，但就真係未入過呢間食。 

等好耐至有嘢上枱,肚餓加昏黃燈光,確實令人有嗜睡既症狀.

廚師推介既芝士蟹肉蘑菇，味道一般，無乜驚喜。

疑似自家製既麵包，每位跟一個餐湯～

見菜單上有日劇小學生女廚神既油封鴨腿,於是就點咗呢個人生第一次食既菜式.皮面有點脆,肉質嫩口,但醬汁就唔太特出兼有少少浸淋咗原本香脆既皮質,究竟La reine既味道應該係點0架呢?

美國特級腹脅扒,牛味唔太濃郁,肉質與肉眼相若.埋單五百幾,感覺好似食outback好啲.雖然選擇係多過outback,但未能從中獲得驚喜.騎羊上外母家,好讓人家接幸男番屋企.

PS:晏晝係良景補給日用品,經過商務書局時被封面上"為別人而活?為別人而忙?你過的,究竟是誰的人生"觸發內心既共鳴.......

為愛羊撲布冚

用緊既布冚已開始有破窿,唔經唔覺已用咗3年.打去原廠訂貨,但職員話已無再為客人代訂車冚,即使新車都唔會有車冚送.從職員口中得知,當初車店都係向車迷城訂購.打電話去車迷城,職員話應該有貨,叫我帶埋愛駒黎試size.

唔出市區既我,特意上網搵路線圖,台灣女生亦將連結send去我部電話.

同上次跟康楠出土瓜灣一樣,miss咗個路口就差啲上橋去九龍城,好在係上橋前回頭是岸.雖然有環景相片作參考,但該處維修兼水馬陣非常亂目.....

成功係車迷城買咗個啱身既布冚(SL320),職員話如要訂做就有排等,因為老師傅生蛇,要休息一段時間(有點感慨手藝失傳兼無後生入行).見就近阿林電單車,於是騎羊跟住地圖指示去睇TAICHI電單車褸.望到有RACER款,可惜顏色配搭唔夠出,好似黑色為主,其他顏色作點綴(紅,藍,灰),兼且排氣位唔多(只得背部),睇黎網上見到既STRIKER系列會比較好.

PS:回程時望過Google Map幾眼就出發,當追新蒲崗牌落黃大仙時就充滿信心,因為龍翔道係平時出觀塘既相熟路綫.被逼騎羊出陌生地方,重拾當年騎羊歷煉既心.