MEGALO BOX

晚夜一個人係梳化位邊食住外母既飯盒，一邊追Netflix播既MEGALO BOX。

男主角Joe性情以矢吹丈作藍本，原為賺錢而放水既地下機甲拳手，重拾志氣向正式拳賽MEGALORIA出發，誓要擊倒冠軍王者勇利。

拳擊加上機甲未來元素，蠻有新意，加上係<鐵拳浪子>既紀念作品，當然睇得投入。未到正式比賽，主角錢七機甲已報廢，結果以Gearless Joe諢號出賽。純靠洞悉對方既動作及把握機甲既遲緩時差去打反擊，反而覺得浪費了機甲既點子。

PS: 愛駒既收納倉加上自己既背再心口掛住幸男既頭盔，成功將物資由外母家回收。仲有幾集就追完全套13集，對住完美融合機甲既勇利，真係唔知點收科…

遲來了的秋意

3年前北海道旅行發現呢款秋季版啤酒幾啱口味,番到香港見7-11有得買,就掃晒該店(藍地)十數罐既存貨,再四出搜羅~

每年秋冬時份都盼望購入呢款秋日限定版SUNTORY啤酒,今晚就用專用啤酒杯黎重拾一家三口生日旅行既味道。

TMAX 1st check

高德語音導航下，向萬里達車行進發，去到呢個燈位就知道一定無行錯路。

方大姑拉臨時要做褓母，自己一個人去附近搵地方食晏，再行落太子始創及旺角星際睇吓USB藍芽transmitter 及線材轉換頭。

正考慮去唔去行玩具舖之際，收到車行之來電，於是行番去太子…原本諗住係車行買埋ABUS碟鎖，但陳列型號太隻，唯有聽店員建議，去代理睇多啲款式。

交收錢銀同單據,係車行側既小巷攞車。唔知點解車頭有啲水積,唔知係咪抺過污糟痕。有別鈴木科研,萬里達唔會見到維修部,感覺好似無咁街舖車房。

今日安裝埋攞新車當日訂購既hand brake bar,線條比原廠既圓潤設計更有時代感。細看車身，唔見多咗花痕，整體服務比鈴木科研細心。

PS:大CC,機油都要用多支,咁又多舊水。機油隔要$120,貴過SKYWAVE既$58成倍，唔知一年後手工會收幾錢……

Tmax伴我行

朝早收工番風兼微雨，TMAX既電動風擋兼電熱把手頓成恩物，令外保暖衣物不足既我不致著涼。

與TMAX夥拍了差不多兩個月,慢慢適應車重及座高。肌肉筋腱酸痛多咗，正正反映體能既時限，也許真的拍完呢一代運動向重型綿羊就係引退之期。

PS: 除咗區内代步，希望可以與愛駒去多點地方～

崇真聚餐@101手工涮涮鍋

約咗成個月，卒之都可以一齊食台式涮涮牛。雖然牛肉係固定份量,但其他配料同飲品都係放題式,最正係酒精飲品都係嘛~

邊食邊飲,咩都講一餐:當下既難題,大家清心直說自己既想法;舊時番學既鎖事,靠各人既記憶來重組；興趣玩物，結集精明之選。難得大家都係區內住,兼且貝爾特既出現,平時唔齊腳都可以放工後小飲小聚。

PS:晏晝同台灣女生出去尖沙咀攞已維修好既空氣清新機(壞底板),以及為幸男上眼科配藥水。人家動身去旺角同朋友食飯前,一齊係agnes b DELICES食下午茶。

幸好店內唔太多人,自己打住ROCKMAN 11黎等夠鐘搭地鐵去銅鑼灣會合書友,都唔會太內疚。

學藝不精

上網爬文,以心中既預算搵出AUDIO TECHNICA既ATH-DSR7BT,係price.com搵到太子始創既MoBo Plus 有現貨。

AUDIO TECHNICA ATH-DSR7BT耳綿最長間距為60mm ,可以容納耳殼,耳罩舒適度上大勝35mm既BEATS SOLO 2 WIRELESS。

原本以為ATH-DSR7BT可以插3.5頭,點知係無既。己俾錢既我有衝動想補錢轉買有3.5插頭既藍芽耳機,但聽完職員既闡述就打消念頭。職員哥哥話"Pure Digital Drive"既賣點就係將藍芽接收到既digital數據,直接推動單元發聲,減去演算為analog信號既失真。一般藍芽耳機因為要兼顧3.5頭既analog信號,故單完設定上要以analog作母語,並依靠digital to analog converter作翻譯。

舊耳機既用途係藍芽駁手機聽歌,兼以3.5頭駁手提式switch打機。為免騷擾睡夢中既母子,最近才以A8F電視之藍芽駁耳機打switch既wolfenstein 2,但ATH-DSR7BT既表現反而差過BEATS SOLO 2 WIRELESS。聲音好薄咗好多,即使槍擊音效亦然，内心一沉(唔通嘥錢買錯耳機？)。睇番ATH-DSR7BT既顯示燈,原來電視機既藍芽係最低階既SBC,故相比手機既AAC藍芽遜色。當前既難題,要搵USB C to USB既轉換線頭,黎試usb cable(跟耳機包裝)駁手提SWITCH,以及有ATPX制式既USB藍芽transmitter去試駁SWITCH既TV DOCK。

PS:黎緊換手機都要搵部有aptx或aptx hd藍芽制式,先至可以將ATH-DSR7BT發揮到極緻~~

十公里變過百公里

今個星期,台灣女生放大假,第一日就話要為幸男準備愛心午餐飯盒。

除咗飯糰,仲有個炒菜~見人家煮得起勁,但又見已過十一點半,真係趕得切搭輕鐵去送餐??

結果係我騎跑羊送人家去學校呈上愛心飯盒,兩口子再係HK dinner食晏。因為等位兼嘢食遲上,人家又趕唔切搭巴士出九龍灣,於是我就以藍芽耳機配高德地圖,用咗38分鐘車程送人家出去九龍灣享用生日月份之免費gel甲。

放低人家後,係附近搵到個排骨位,於是泊車兼落布冚,再影番張街景方便自己搵番愛駒(始終唔熟路嘛)。

自己一個人行德福廣場打發時間,無諗過路痴既我會騎羊出到黎行街......

最近物色緊藍芽耳機,所以去咗好幾間大型電器店兼hmv,去睇吓有無得試聽，可惜唔見有心儀既Audio Technica DSR7BT。

反正係九龍灣，跟住語音導航去PAM 睇吓電單車嘢。

一心享用前網頁介紹既咖啡，點知職員話已停…唔知係太晏定係全店停做餐飲。

人家忽發奇想，提議去埋啟得郵輪碼頭睇吓。人流稀疏既大樓，景觀向地盆，食店得2間加1酒樓，唔怪得話無人去兼配套不足……

不甘食頽飯，騎TMAX 入大埔食鐵板燒。兜錯路落九龍城再上公路經大老山隧道($15),落車仲行咗一個圈至搵到,竟然被包場！！

唯有係附近搵咗間西餐廳落腳,咁啱撞見煜琳同"朋友"約會,為免打擾,我只係靜靜哋行過入座。

人家仲未病好,但都話要食牛扒薯條,我就揀咗虎蝦意大利飯。好耐無試過同人家游河了,以前會入鹿頸食下午茶,或去清水灣曬太陽。

PS:回程前覺得有點涼,於是著埋係德福買既新T恤打底

放學後的8歲生日

幸男正式成為電單車後座乘客，放學就坐住TMAX去置樂，先買MARIO PARTY作生日禮物，再行下長頸鹿睇車仔。

一番到屋企，幸男就走入房，拎出媽媽揀選既生日禮物，因為今日係拆禮物之正日。

幸男憑直覺組裝失敗後，唯有跟住說明書黎砌,並向父親大人救助。之前去打保齡球時,有得入錢玩足球遊戲枱,幸男每次都會話想玩。雖然呢個迷你版只得2枝桿黎操控6個球員(2後衞+龍門,3前鋒),但幸男已非常滿意~

原本睇中一款玩具送俾幸男,但香港未有得買住,唯有買隻MARIO PARTY當一家三口一齊玩既親子遊戲。

由於聽日要番學,所以只係近近哋係市中心食拉麵,頂多爸爸媽媽個份紫菜都俾埋壽星仔享用~

貓咪戰隊生日咭係之前買定，只係要準備足球主題蛋糕。 食完蛋糕,只能同幸男玩一陣MARIO PARTY,因為明日係番學日。幸男既願望係入足球校隊，希望幸男願望成真，身體健康～

PS: 執嘢搵到人家買俾自己既迴旋木馬生日咭，於是提筆寫填空。

生日不似如期,病要抖,咳到飛

呢張相睇落好似好溫情幸福咁，其實台灣女生病住黎過生日……

先上外母屋企攞幸男既飯盒，再兜去學校送外賣。

壽星女咳到無停，係新興買咗個魚蛋河加腩汁俾人家，自己就例牌牛雜米。

近黃昏時間,我哋至去搭巴士出去食晚飯。等車時至發現,車站已安裝即時資訊屏幕~

舊年因為二噁英風波,無得食大閘蟹，今年可以平平安安食大閘蟹宴。

由夜上海，轉去香港老飯店，再移師至滬江，每年生日都會食大閘蟹。

每次都怕唔夠飽，但食到蟹粉粢飯，就覺得剛剛好～

病咗個幾禮拜，人家憔悴了…

行去尖東帝苑,人家落訂時趕唔切尋日攞蛋糕,所以順延至今日,當倆公婆一齊食。難得二人時光，可惜因感冒而未能安排得更好。

裝修後既陳設,空間感增加了,但掛鐘側未能入鏡作背景。希望台灣女生早日康復，搵日騎羊兜風兼晚飯～