環保啜

上網訂購既環保可重用矽膠飲管卒之都送到上門(原定尋日下午送貨),$88有10吋及8吋長度各一枝,包裝內附清潔刷。

上網睇介紹時,見可以入洗碗碟機就雙目發光,但無留意到飲管係楕圓型,而非傳統圓型..........走塑時代下,食肆開始唔主動供應飲管。如無飲管日的話,就真問職員都無得攞,要隔冰飲凍飲.......

可以捲曲入收藏盒,帶出街就比金屬既硬直飲管方便~

燊光強制凍飲跟飲管,所以等到晚餐係公司canteen至用環保產品。矽膠飲管無咁挺身,扁管阻力大一點,需要大點吸力至啜到飲品,但無阻我為地球先生既一份關心~

PS:上網無留意一個包裝有長短管各一,結果買咗4份,變咗有8條矽膠飲管...........

書友啤酒聚會

借教練生日為名,約會考書友出黎飲酒聚吓,意外地係何福堂大排檔搵到間新舖開張。

門面企理，全場任坐，貪新鮮兼方便就入坐。

十五六歲，擔心升學及就業，點會想像到步入40，大家背負更多既生活決擇。

内飾簡約，但不失溫暖氣氛,只係貨箱有點違和。

生啤選擇唔多,Hoegaarden同Suntory,其他係枝裝或罐裝。熱脆炸洋葱圈,配啤酒一絶,如果有cocktail menu就更好了。計埋後join既馬sir,三位同學一齊聚吓,2 round過後就曲終人散。

藍天五人足球賽

平時幸男逢星期六上足球班,但今個星期額外要踢多一堂,因為是日為五人足球比賽。比賽以分組形式進行,賽前有老師(領隊)為隊員擬定策略。

現場睇比賽,往往被節奏所吸引住,但拍攝紀錄下,原來幸男既動作都幾惹笑(碌保鹷球?)。

瑪利奧式跳躍?幸男經常唔望個波踼去邊,雖然對方估你唔到,但實際又係咪胡亂踼出,最後被敵方截取…

天涯鏡拉到盡，成像麻麻，但買支G Master 70~200再配增距鏡，貴得黎又論盡，雞肋也。

幸男未到高年級，所以只係與藍天同門作聯賽計分。

滿意既構圖唔多,始終好難預測小朋友既走動,尤其係睇得太多"閃電十一人"既幸男。

“守和就可以攞冠軍…咦，唔係喎，呢場一定贏至得喎”，小隊不負領隊既寄望，成功以入球奪得3分，開心得一齊擁抱勝利。

雖然唔係咩大賽,但第一面冠軍獎牌應該係最開心回憶。

望子成龍,人家戥幸男開心攞奬,要求合照作紀念~

自己幫大家影大合照,為既係可以擁有一張私人原檔。初中時期，雖然鍾意打藍球，但老媽令願我多花時間於溫習(我讀書唔叻嘛)，故無咩特别時間練波，更無緣上興趣班。抓拍運動照，不但為幸男作紀錄，更填補自己既缺失。

PS:黃sir專照顧細仔，幸男入足球班既第一個年頭,都係由黃sir主教。

裝修大計完成度100%

番完夜班,訓咗3個鐘左右就起身,因為鋁窗師傅黎換窗鎖配件。

師傅既到訪,打亂我騎羊去燊光食晏既計劃,唯有屋企煮麵食。其實原定暑假裝修時搞埋個鋁窗鎖,但由於訂制配件需時,結果搬番入黎邊住邊等,夾得日子黎就變咗2019年1月。師傅肯逐個撬開鎖死既窗已好好,因為出面既師傅要成組窗連大框架換晒至肯接。

黃昏時間,師傅就完工走人,我就繼續清潔工作,再騎羊去海港會合台灣女生同幸男食晚飯,呢個sleeping day堅攰.....

與羊同行

是日放假,盡父親責任接放學,當然係拍住愛駒TMAX出動。

出門先去置樂,為幸男準備自己兒時既雞蛋仔味道,再兜去學校附近等放學。

怕幸男餓親,寄望小食可以為幸男注入活力,見幸男食得開心,爸爸就心安。遞上鮮黃色頭盔過幸男,安頓好書包及食物袋於愛駒座位下及龍骨行李代袋內,抱起幸男坐上後座。跨上司機位,撻車扭油,送幸男上功課班。

夜晚同舊D10同事食飯，都係騎愛駒入元朗。上次check車之後,暫時再無空轉死火既問題。雙臂,胸前及雙腿開始回應車重,但座位之濶大,依然係停車落腳時既考驗。

neo sports cafe CB300R

今日行過OK便利店, 見到電單車雜誌有HONDA NEO SPORTS CAFE CB300R 既廣告。咦?300cc都有倒立前叉兼單筒尾避震喎~

上網睇吓價錢,$47800真係幾吸引新牌仔(韓系DAELIM街車250都要4萬),話晒有LED頭燈兼LCD儀表板。

刨埋個規格表,估唔到車身仲輕過我上一代愛羊SKYWAVE 250SS(169kg),而且尾避震仲有預載可調,只係座高唔夠親民。

PS:P更補鐘,騎羊去赤橋拉麵開餐,已再無新開時既人龍,輕鬆入座~

野武士のグルメ

前排同台灣女生係NETFLIX睇野<武士美食家>,講男主角剛好退休,自由自在地摸索公司餐廳以外既午餐,並加插幻想小説中既野武士如何應對。

身處油麻地,我都好似男主角咁,四處摸索午餐。見翠華都要成$60,當然行多幾個街口,望吓有無咩特色嘢食。經過逸東酒店,發現地庫變咗FOOD HALL,應該都係food court啫。行咗個轉,都係呢間鐵板牛扒店最吸引我,因為上次去名古屋常滑既商場,無緣食呢類即柯打即切即煮既鐵板餐(幸男話要食拉麵)。

揀好扒類及重量,就可以揀配汁,再按自己需要去加飯,湯,沙律及飲品。

望住電子通知牌，等咗15分鐘有多,由無乜人等到開始無乜枱(lunch hour),一行出去攞嘢食就俾人搶咗張枱…捧住個餐行過十幾張枱,至搵到張得2張櫈既4人枱,成功著陸。味道唔錯,西冷100g跟set 都係$165,性價比高過pepper lunch 。食飽諗住坐定定補打旅行blog,但車行已通知TMAX已完成調校及换偈油。

攞車前去埋對面既永安,買咗個快乾吸布,貪佢細過舊果塊，就番縮減咗既電單車收納空間。

PS:放低TMAX就搭巴士去QE，去望下阿婆。從詢問處得知病房，行入病房，未問姑娘已聽到阿婆把聲。老人家原來已無乜牙剩，的確比阿公離開時再蒼老一點。買過日用品再上去，向老媽滙報完就走了。

正選抱病,副選入替

是日放假, 騎羊去接幸男放學,每次抱起幸男上車都有點吃力,唔知幾時至可以自己擒上去呢?

台灣女生腸胃炎,於房間休息。我同幸男食THREE CONCEPT外賣作晚餐,幸男依舊揀咗香腸拿破崙長通粉,我就揀咗芝牛漢堡。幸男得出我既飲品,係雪人"HIGHBALL"既頸飾。

每次幸男睇完<新幹線戰士>,就攞晒啲玩具出黎玩。今次幸男仲將機械人排成一線,其實幸男仲未將所有列車變型作大合照。

見幸男玩得咁開心,我都開封尋日至到手既龍王丸。幸男見龍王丸雙眼及額頭可以發光,不禁稱讚。本人就覺得非常完美呈動畫比例,胸甲及其他部份既細節修飾,為龍王丸增添多一點時代機械感~

不過幸男就話套OVA版鋼衣唔靚,其實我覺得一般,唔著會瀟灑啲,著就豪華啲。