毒佬中青聚會

夜晚係市中心火水爐同嘉耀及康楠食完雞煲火鍋,搭的士番屋企,等埋幸男番黎,就一齊出球場玩nerf gun。

追逐及儍笑過後,大家一齊影合照。手動模式下試出最唔傷眼既設定,都叫認得個樣丫～

其實今日約咗阿JIM同康楠上我屋企睇拉打藍光碟,主角係以BUILD系列作領銜。小主角久永信吾(7歲),熱切期待電視播放平成第一個RIDER(古迦)之前就俾怪人活捉,但之後就親眼見到平成時代20位RIDER先後出戰。故事劇情當然係牽強,心儀既Faiz曝光唔多，但總叫做一次睇晒20個拉打～

PS: 康楠覺得5.1音效令拉打電影生色不少,但康楠同Jim 都話想睇波希米亞多d …

和你跑5622KM

今日帶愛駒出原廠享用最後一次免手工兼check車,咁啱見到有新TMAX運到,勾起舊年買新車既喜悦～

放低車匙,行去始創中心逛下,見舖頭未開齊,於是去食午餐先。

 $72既鐵板扒餐,連餐湯餐包兼凍飲,份量十足,扒質當然唔及雙倍價錢既Confusion Steak。

行番去始創中心,睇完電子嘢就上頂層試過FREEMAX代理既韓國品牌既人體工學電腦椅,再係大眾書局殺時間一點左右就收到原廠電話。

機油2.9L,油隔,加埋冚,盛惠$990。問過職員,往後既CHECK車手工約二百頭,消耗品就不再九折。愛駒依舊安放係則巷,後面仲有一排車,唔知係街坊定係等交車呢?

番到屋企,開咗Switch既日版Photo Hunt俾外母大同幸男一齊玩。幸男一啲都無讓婆婆,仲偷聽我俾婆婆既提示,以捷足先登(典型無氣量既小朋友).......有勞外母大人上門幫手看管幸男,讓我可以有半日自由時間~

換上舊年買既SPARE布冚,嘩~原來已晒到甩晒色都唔覺。5千多既駕駛(公)里數,雖然適應216kg車重,但絶對比SKYWAVE 250SS更消耗車主之體力。如果有幸可以有第四代坐駕,應該揀番架400cc黎應合衰退既體能。原廠電腦升級已解決怠速死火問題,期望秋涼天搵日約康楠以S MODE入機場兜番轉~

終極抗暑kid biker

天氣太熱,怕後座乘客不敵猛暑,之前已為幸男之頭盔換上墨色風鏡,以及防曬手袖。

今次加埋冰巾,由於怕掛頸危險,於是為幸男綁上冰腰封。幸男第一時間話好凍,但落車時就就啱啱好,唔覺得熱~

PS:睇黎平時我騎TMAX都可以試下冰巾降溫噃~

執輸行頭,慘食晚餐

上網見今日銅鑼灣有HMV既清盤貨,約康楠一齊出去執平貨(18：15於巴士轉車站集合)。點知七點半左右到達,見場外已打蛇餅。職員話已經截龍,現只係排聽日既籌......

撲個空,諗住搵地方食晚飯,經過間"Triple Steak",大家貪方便,於是入去買飛,等冧吧。聽職員姐姐介紹"三拍子"牛肩扒,攞餐時諗起Lady GaGa既牛肉衫......

基本上係將塊生牛肉放係熱石上,往後所在責任就交俾客人…

調味亦都係一樣由客人自由選擇,我懷疑塊扒連鹽都無落過粒,莫講話香料…...白飯及沙律都要由客人自行領取,真係得個樓面教人如何入錢買飛。

PS:臨搭巴士解散前,康楠帶隊去Paisano's Pizzeria飲杯Hoegaarden一洗頹氣~

父子日：上下半場换邊

朝早同老豆睇09:00早場狂野時速:雙雄聯盟,食完晏就番屋企,再同幸男搭巴士出旺角睇相機背囊。原本睇中Thule DSLR Roll top Backpack,但實物太重，結果要即場揀副選。

DC WAVE職員哥仔耐心介紹,試過PEAK DESIGN又真係側取時要向自己方向翻出側翼(要用一隻手按定)。休閑外觀與快速側開口兩大前提下,唯有Lowepro FreeLine BP350可以符合,乖乖課金,並委任幸男擔當書童(慳番個膠袋錢兼環保嘛)。

為惠勞書童,行去朗豪坊既TOKYO MILK FACTORY食下午茶。我志在杯凍啡同件芝士蛋糕,記得有次去ACTION ROBO買第三廠既DEVASTATOR都係幸男陪我出黎(食晚飯)。

幸男幫我食晒啲士多啤利,自己再食一整份炸雞薯條(我只係食咗一兩舊雞球),兩個人就食咗百幾蚊.......

回程係旺角街市巴士站上車,上咗公路無耐,幸男就訓著咗。今日真係好熱,行出巴士站都要一人一冰巾掛頸,辛苦幸男陪爸爸行悶街

跨區毒行俠

同上次一樣,cut唔切最左線,要係德福平台u turn番出黎。雖然目的地就係呢度,但礙於泊車問題,都係泊係一天橋之隔既工廠區,再行番過黎。

順手做埋會員,用咗其中一張免費戲飛,剩低既可以用黎睇其他動漫電影,反正Psycho-Pass SS系列有3集。

今次既劇場版發生係上一次電影版之後,男主角狡嚙慎也並無戲份,故事主線係女主角常守朱被安排去調查位置僻遠既罪犯治療更生社區。橋段唔太出人意表,有點似SEASON 1某一集既劇情,唯有期望case 2有狡嚙慎也既戲份~

散場時邊行邊聽到3個女生一齊討論劇情,無諗過會常守朱會有女fans。行番過工廠區攞車,騎愛駒回程,享受TMAX長途既舒適。

番屋企前,先係市中心停車,去買定今晚果餐。經過吉之島玩具部,見到大量新幹線戰士最極奸角既玩具,計落都係旅行時買既平啲~

一人前晚饍,試飲攞車前係OK買既SESSION IPA,味道唔錯,可以再買。

PS:其實食飯前做咗大手打掃工程,食完飯就做埋剩低既手尾,新引入既Philips SpeedProMax Aqua的確比PowerPro Aqua吸力強大兼電力持久~

LOCK-ON STRIKER DX

今日扚起心肝,將旅行買既LOCK-ON STRIKER DX開箱。組裝時發現左右前鋒竟然係重覆咗………

根據包裝盒及説明書,左右前鋒係相反方向,以方便於邊線射向中間龍門。

無辦法之下,唯有將錯體右前鋒180°倒轉,以方便後腳射門(更貼上19號碼)…幸男揀黃色既世界隊,球員編號都係心儀既球星。

5.5個球員應戰,龍門開球,後衛帶控球,傳俾前鋒推至角位傳中,中鋒轉身並背衝向前試圖倒掛不果(睇黎要多啲練習)。硬草地上有坑位固定足球,増加射門命率。球員除左抽射,亦可向前篤入龍門,絕不死版。守門員可以自由調校面向及左至右柱間之企位,網背機關郁動提示入球觸網。到又叫又笑,結果8：9落敗…

相比傳統足球機,LOG ON STRIKER DX增加不少逼真及多變既組合,唔再係彈波子機咁亂轉及單純反射神經左右晃動。

PS: 係玩具商網站留言提及錯版問題,寄望可以郵寄番隻正體前鋒,但全英文内容兼海外支援應該勝算不大…

親子東京遊Day 13

朝早起身望見藍天白雲下既Sky Tree,收拾心情準備番香港。

幸男起身梳洗完,就享用尋晚買既士多啤梨蛋糕作早餐。

Set咗好耐腳架同閃燈,先至可以影到呢張床頭Sky Tree照~

 

拉住行李落大堂check out兼暫存行李,向咖啡廳進發,以最晏食既早餐當做午餐!

面對士多啤梨蛋糕,幸男當然係大小通吃~

領隊尋日已睇中呢款新鮮芒果肉及果汁配日光山泉水制之刨冰,卒之得償所望。

我呢個牛角包餐都好豐富,每個有不同饀料~飽到食唔晒,要領隊幫口~

馬路上見到2010款YAMAHA MAXAM 250,已算係較新淨既綿羊。好多都係以街車,FAIRING車為主,其他都係作業用既三輪車。

十一點鐘,烈日當空...............

"我們這一家"裡花師奶既買餸單車,原來可以進化到有前後小朋友座位!

今日既景點係大橫川親水公園,與酒店只係10分鐘既路程。

公園內花種唔算太多,但總叫做綠油油一片。

水道竟然有水鴨~

園內有個滑梯高位,可以同Sky Tree近照。可惜太陽位置導至背光,光位合適的話將會係一個唔錯既打咭位(or人面方仰望太陽扮陶醉)~

除咗前後小朋友座位,原來小拖卡車可以成為單車既延伸(擴充載貨量)!!

打咭位既滑梯係滾軸式,幸男以隔褲屁股同鞋底作接觸面滑下,呢幕有點似滑浪~

開始見到與水有關既康樂設施。

親水公園當然有水俾小朋友玩喇,泳裝小朋友帶埋水泡水槍黎玩水~

園圃內有個大型突鏡,放便遊人可以自拍與Sky Tree合照。

由於無該鏡下方表面有不少污積,令自拍清晰度不足....

愈行愈近Sky Tree,樓梯上面有另一個2層樓高既滑梯。

由於太高,領隊不敢上去玩,所以得幸男一人應戰。

呢個滑梯都係滾軸式,頭段需要玩家行前一段平路,跟住就順住斜度滑落。

幸男玩咗好幾次,領隊委託幸男拎住XPERIA ZX3黎攝錄第一身視點~

 

我就匿係陰位為幸男拍照,仲不時去附近既水龍頭為冰巾補水。

其實滑梯係船型建築物既外部延伸。如果我係當地人,應該都喜歡呢個公園,夜晚黎跑吓步都唔錯~

時間差唔多,一齊行番去酒店攞行李,兼等預訂咗既機場巴士班次前往機場。

安頓好行李,過晒安檢,臨上機前係小食店邊飲手工啤邊打發時間。

領隊同幸男話肚餓,所以叫咗嘢食,找就黐咗啲炸薯條同洋蔥圈黎食。

航班起飛時間為東京18:10,番到香港應該係22:00左右~

幸男受教訓,因太心急睇電視,胡亂按鍵令屏幕鎖上,要勞煩空姐幫忙.......

PS:行程最難忘既係熱海溫泉旅館房間睇花火會,伊豆下田既黑根岩風呂以及海中水族館,一家三口去秋葉原買新幹線戰士玩具。希望兩母子能原諒我既心不在焉,因為我真的好擔心老豆既身子,好怕失去童心的依靠......