搭十分鐘鐵路,係車站月台上食過乾糧當早餐,搭多一個鐘多車程,到達青梅駅。月台下既隊道掛滿舊電影既廣告版,為呢個以昭和時代為主題既旅遊點作序幕~
出咗車站就開始行上斜路,睇黎鉄道公園同永山公園係同一個方向啵~
烈日之下行斜路,沿途都係民居同小商店。經過一個球場,再行一段山路,卒之都到達目的地~
一入館內就係紀念品售賣部,行樓梯上一層就係一個大型火車模型場境,牆上掛滿各特急火車既章號~
場境唔係齋睇,客人可以300円啓動其中一架火車模型,加速,減速以及停車埋站,仲要有輕快音樂伴隨(好似遊樂場坐車咁)。
客人可以係螢幕揀選邊架火車作玩,幸男當然揀Dr Yellow同E5(入咗兩次錢)。咁大個場景,又可以穿山窿,當然可以滿足一眾火車迷!
牆上除咗掛滿各特急火車既章號,仲有各款火車既模型陳列櫃。
情景模型做工精細,唔知當初花幾多時間至砌好呢？
再上一層,竟然有懷舊TAITO街機電車でGO!幸男化身為総武線運転士,路線為新宿站至秋葉原!
幸男未能完成路線,唯有寄望爸爸表演另一個失敗,從幸男既笑容就可以睇穿~
行出戶出,例牌有舊式蒸汽火車供遊客參觀,唔知係咪有人會掃塵既呢?
實在太熱了,大家都係攬住條冰巾,大家擘大對眼黎影相都有困難。
零號新幹線,夠晒呼應昭和時代呢個主題~
唔知E5既色調靈感,係咪黎自零號既內飾呢?
時移世易,但椅上既提示貼紙仲可以清楚望見內容。除咗摺枱,其實車上好多部件都係金屬材質,例如行李架及扶手位。
趁無其他遊客,一家三口輕鬆影下合照~
不慎被領隊偷影我既大叔造型........
即使車箱内無冷氣,但無阻鐵路迷既興緻。
咁細規模既鐵道公園,入場費都只係100円,點樣可以營運呢?答案係懷舊鐵道街機,真實火車模型操控之外既親子碰碰車~
校啱時間,趕番入去館內,因為定時會有鐵道模型大巡遊。大型場景內,所有火車會先後啟動~
隱藏彩蛋為Thomas火車,令我諗起千頭駅既1:1Thomas蒸汽火車(播番主題就更好了)~
睇完火車模型巡遊,買埋紀念品,行番落去商店區搵地方食嘢。
過咗兩點鐘,好多食店已翻上休息牌,街道上亦無乜當地人。離遠見到呢間較大型既食店,點知係全日休息…
區内亦有不少吉店,相信以前較多既人流已遷出其他城市。
萬念俱灰下,係車站附近搵到Mos burger, 結果食是次旅行第二餐連鎖快餐。相比老麥,MOS burger 個包有誠意好多，除咗熱,仲有砌到靚一靚至交俾客人(人家揀咗rice burger)。
幸男食漢堡包兒童餐,漢堡扒上有茄汁畫上既"哈哈笑"。
幸男唔再好似幼稚園時代,食外賣番黎既MOS Burger薯條,誤咬手指~
入去洗手間,無諗過會咁有家居感~係香港既快餐店,好難搵到個企理既洗手間......
搭番火車番東京駅轉車,幸男忍唔住要做新幹線車長~
番上酒店房放低行裝,天色已黑,今晚係旅程最後一個晚上~
所以今晚食豪啲,係酒店餐廳舒舒服服咁用餐~實情係舊年係呢間酒店食過晚餐,一試難望,畢竟係望住Sky Tree夜景黎食嘛~
我同人家為幸男點咗個兒童餐,但點錯咗日式!!好在我用nokia 9上番自己個blog睇番,至知應該點フレンチ兒童餐(好在搵得切侍應生改餐)。
我同人家各自叫一個餐,方便交換黎試最多既口味~
我叫咗係"廚師精選",主打既和牛真係無得彈。
領隊用智能電話為我影相,原意係以Sky Tree為背景,但像數有限。
甜品拼盤,啱晒心多既領隊。
兒童餐既甜品係雲尼拿雪榚,不過幸男要等我影埋相至有得食~
自沖繩旅行起,每次都會係酒店食一餐晚飯,但至今都係東武既晚餐令我哋回味到要去多一次。
侍應生幫我哋一家人影相,今次可以輕鬆將Sky Tree收入背景~臨走時,主廚咁啱係門口送客,我同領隊講"唔通因為我點咗個廚師精選?"。我以BB級日語同主廚講"ステーキわ素晴らしい",藉以表達對晚餐既滿意~
PS:安頓好幸男及行李,領隊至好好享受東京駅"果實園"買番黎既鮮果蛋糕~
