病情中期回顧

至今老豆完成四次治療,醫生提出做多次PET SCAN作中期評估,但由於老豆生蛇要留院隔離兼食藥,所以順延至今日。同一間中心,相熟既面孔同程序,但今次午餐就行咗去逸東既FOOD HALL食鐵板餐~
預唔夠時間,食完晏急急腳行去檢驗中心,中途係7-11買蛋糕同飲品俾老豆。由於咁啱就快有巴士(KMB APP顯示),於是兩父子趕住去巴士站追車,成功係車站等巴士埋站。

彌敦道充滿著示威抗爭既足跡,社會垢病係誠信問題之伸延,對上一次有問責官員請辭已係2003年既事。梁錦松涉嫌於提高汽車首次登記稅前購車,只是可以輕鬆負擔既錢銀利益,但往後好多官員既失職或更大利益嫌疑,卻厚著面皮兼以有權用到盡來應對。重視性價比之時代下,官員既然捨棄了政治禮儀及道德,又如何可以斥責示威者既"粗暴"?子日:其身正,不令而行;其身不正,雖令不從。

PS:由於老豆身上尚有微量輻射,故今晚無帶幸男番老家黐餐,晚飯由台灣女生主理。滿心期待既有機啤酒,味道不太令我驚喜.....

半天兄弟團

無帶相機係身,只能用NOKIA 9 PUREVIEW黎為一對新人影相兼呈上工作坊既whatsapp群組,因為我係今日既兄弟團之一員~

其實今日只係半日兄弟,因為婚宴係午餐時段,理應體力足夠勝任。

時間緊迫,遊戲時段只有一會項目(隔襪行腳底按摩墊,再向外母大人講祝賀說話),好快就輪到新郎哥既愛的宣言。

收拾物資,趕落接待處招待賓客,台灣女生見不善文書既我手忙腳亂,叫幸男問我應該坐邊張枱。"小朋友唔好問咁多嘢得唔得？而家好忙呀,轉頭答你",繼續忙著剔名及存放人情..........

午宴過程順利,人家同幸男與同事們一齊趕搭西鐵,而我就留守幫忙收拾物資及跟GO GO VAN送物資番主人家屋企。完成任務後,經過海逸酒店大堂,原來滿載青春回憶既李白吧已經變咗星巴克!酒店範圍內,未見店鋪受社會氣氛所影響。由於無位,唯有坐係酒店大堂玻璃幕牆邊既候車長椅,邊飲邊作稍息......

乘坐電召既的士回家,除咗體力不繼之外,仲因為喼內有一對新人饋贈既紅酒(啱晒今晚番老家黐餐)~

PS:對上一次做兄弟已係2年前,往後我應該退役於兄弟團人選。於好友既重要日子,可以出一份力兼襯高興,永遠都係一種褔份~

市區宿營

早更過後,番屋企梳洗換衫,拉住幸男既專用細喼等巴士去轉車站,駁260X出尖沙咀。

落車行去唯港薈,其間被路旁操國語既男子問係咪搵酒店房？

係大堂等福娃落黎接上"車立",因為要有住客咭至可以去各樓層。

幫手摺吓新娘房既裝飾,福娃帶我落去好時中心既好時沙嗲食晚飯。原本想自拍下,但怕令其他食客懷疑…

一行入好時中心,時光頓時回溯到80年代(後昭和時代),舊港產片不時會係尖東取景.....商場內仲有投幣式公眾電話,而且上面仲有一個透明屋頂為客阻隔嘈音。舊式升降梯外既裝飾燈泡依舊亮著暖光,禁不住要以NOKIA 9作紀念照,但唔記得番轉頭補影電話亭。

房間望向庭園,其實呢間酒店既前身係日航酒店~

房間夠晒大,福娃都話比佢預期中大,每人夾$500。如果揀行多個街口既百家樂酒店,應該可以再平啲,但福娃怕我嫌細得滯。

番上酒店前係7-11買定糧水,因為今晚VIU TV有波睇~

PS:搵唔到開瓶器,唯有用冰夾黎撬開支裝啤酒(第二ROUND)既樽蓋。始終怕聽日交通不便,所以特意早一晚出黎市區,變相造就咗今晚同福娃一齊食飯兼睇波~~

集齊夢之碎片

今日卒之都儲齊環保餐具,除咗為環保出一分力,仲可以平$1。

每逢星期六日番早,同事們都會揀落公司地下個層既快餐店食早餐,不過該店太細,只能提供既棄餐具。之前我有帶可摺叠式餐盒連餐叉匙,兼環保矽膠飲管,但始終都要用即棄杯,於是上網做功課兼格價。

STOJO杯價值$158,每星期用2次(出街買咖啡或特飲都可以),每次平$1,大約要年半就可以回本.......

PS:每次週末番工買早餐前,都要急急打開餐具上托盤,才可以嗌想食乜........

收貨日

之前攞開貨既HKTV MALL置樂門市結業,所以今次轉去景峰站附近既分店取貨。原來對正輕鐵站,都幾易搵到喎~

今次訂購無酒精啤酒,係原箱24罐ASAHI DRY ZERO,因為試均市面既樣本,最接近原味啤酒既就係ASAHI DRY ZERO ,連SUNTORY既ALL FREE亦變得遜色。

熟識附近路段(畢業時租過偉景),好容易就搵到泊車位置,仲唔洗行咁遠至上到車。

另一樣既訂貨,就係stojo既摺疊式咖啡杯~格晒價,先係HKTV MALL落單。Biggie 16oz(470ml),應該夠平時出街買台式奶茶及公司地下既餐飲,但美式連鎖咖啡店既最大SIZE就未必載得晒。

PS:朝早仲收埋網上訂購既紅酒,填補凋零既紅酒櫃。

社會運動下的社區

晏晝一家三口搭巴士出市中心名點屋飲茶,雖然講到市況好差,但都有唔少食客等待籌號。

自星期五公布午夜生效既反蒙面法,各區出現大大小小既社會運動。不少商店都暫停營業,尤其係中資公司。

台灣女生話要為幸男買過對新波鞋,因為市中心睇唔啱款,所以行經市廣場去安定。見圖書館安然無恙,亦證明實了自己既想法。

之前網上傳屯門市中心既圖書館被激進份子縱火,但點睇都係無可能影到呢個view( 因附近無大厦),除非係航拍機。細心望下,點解會有4層？屯門圖書館得地下借還大堂,上一層係兒童圖書館,再上就成人圖書館,地庫既媒體資源又唔影响外觀。網上消息或正規新聞,都會夾雜著偏頗或揑造,真係要細心求證。

大會堂不作開放,未知鋅版係保護玻璃,定係遮蓋被破壞既玻璃幕門。於動蕩時局,記者冒險站在前線,讓大眾可以目睹社會實況,自行判斷及思量生活應對,是值得嘉許的。媒體既編緝有機會造就扭曲或斷章取義,所以睇實時報導就比較客觀(有聲有畫)。雖然實時拍攝報導都可以選擇鏡頭方向,但至少唔會cut頭cut尾。

生活節奏急促既市民,又有幾多位會集實時報導兼事後評述而作全面既結論呢？以地平説作例,支持者不認同世界係球體既表面,但當面對科學提問時,往往卻以“不能解釋”作結。“大膽假設,細心求證”,科學精神亦可應用於生活中。

同康楠嘉耀係凱都戲院睇Cult片<爆血新婚夜>, 劇情尚可,至少有心機過scary movie。由於無輕鐵服務,小巴坐地起價(8蚊變15蚊),唯有等巴士。巴士迫滿乘客,我只能企係樓梯口附近。

PS:人家晏晝已買定餸,夜晚安在家中用餐。

緣慳一面(FORMULA E)

原本諗住出年可以同幸男一齊撲飛入場睇香港站既FORMULA E(CYBER FORMULA ZERO香港站既情義結?),但未知是否因(4/10公佈)反蒙面法激起更猛烈既社會運動,今日新聞公佈明年三月既FORMULA E香港站將會摩洛哥Marrakech舉行。

雖然係可惜兼失望,但基於安全問題,都無辦法。正面角度咁諗,最近既FORMULA E戰車既款式及規格都無咩大改動,冀望下屆復辨香港站會有更強既陣容,更完好既配套,以及更高端既規格~

幸男九歲生日

五年前有雨傘運動,今年幸男既生日遇著反送中運動,交通不便之下,晚餐只係屋企享用媽媽既咖哩主菜料埋。 

晚飯之後,餐枱變成新幹線戰士展覽區,生日咭都係新幹線主題(廣播主聲效生日歌)。擺呢個陣都用咗唔少時間,尤其係控球既列車戰隊戰士。

蛋糕與新幹線無關,只係人家放咗個新幹線蠟燭,但又幾夾個"夏日甜心蛋榚"~晏晝騎愛駒出市中心攞蛋糕好"論盡",因為方形盒不能安放係座位下之收納倉,結果要搣爛個盒以減少多餘空間,好在個蛋糕都無被壓爛~

九歲生日(半成年),小學階段亦去到中期,戥幸男開心可以搵到樣運動去熱愛,只係擔心其近視度數有增無減。希望幸福男孩繼續享受開心童年,成年後為身邊既人帶來幸福。

PS:中午時段,幸男已享用媽媽的愛心午餐盒,跑腿當然係爸爸同TMAX! 爸爸永遠係幸男既"做FI打"~

台灣女生牛一

生日月份雖然係放大假,但老豆生蛇入院,無應暇為台灣女準備生日飯及禮物(其實呢幾年都只係出去滬江食大閘蟹餐作罷)。今晚呢餐Intercontinental Hotel The Steak House都係人家自己安排的,確實有點唔好意思。前菜揀咗龍蝦湯,罐頭湯味道無得比～餐飲就一人一杯香檳作慶,唔醒起影低個wine list作食水評估。

每年生日既心願都係安在家中食飯,將外出飯錢推到翌日生日既台灣女生身上。今年人家生日卻為我訂枱享用乾式熟成牛扒,但因要配合我要去醫院送餐,結果fine dinning順延至今晚~是晚既DRY AGED BEEF係來自西班牙,雖然係無咁多肉汁,但肉味又真係夠晒濃郁~

現場環燈光柔和,如果唔係侍應生用家庭專用相機A7Mk3代影,絶對無法繪留當時既氣氛~

Side dish揀咗龍蝦通心粉,但無諗過掘到底會有龍蝦肉粒~~

台灣女生揀咗黑松露薯蓉,因為耿耿於懷上次係Lamtei Grill食扒無薯蓉伴配。

原本人家訂尋晚枱時,安排定有名字既生日牌,但順延預約就唔好意思再要求換名。

芒果荔枝疏乎尼充當2人前生日蛋糕,許願相又點少得？

PS:雖然未能坐番早一晚訂座既窗邊位,但總叫做望到維港夜景丫~

放假都要早起身

朝早起身搭車去湖山遊樂場,帶幸男去踢比賽。熱身時段,A7 Mk3可以輕鬆為幸男影相。

藍天只出低小組,四隊打循環賽,其實點都有4分3機會攞奬。

24-240天涯鏡,日光下拉盡都有油畫化情況。人造草地經常被足球擊起沙塵,但點都好過硬地~

不少家長帶擔住遮黎睇兒女踢波,其實會遮擋其他家長既視線,無諗過人家最後都堅持唔住.........

幸男有個壞習慣性,就係跑步時過份傾前,相信係參照卡通片角色既動作,妄信可以跑快啲................

四勝一負一和.......結果藍天係低小組取得亞軍奬~

各球員可領受一面奬牌,但奬盃就只可以借黎影相作留念。

臨走前,幸男去番自己所屬小學,一齊影高小組亞軍大合照,小學領隊林Sir同幸男講"下次搵你幫手踢"。其實熱身時段,林Sir見到幸男有點驚訝(明明無揀你出賽0架?)。午餐就係附近既新屯門市中心商場既百份百餐廳食,質素好似無大興果間咁好。

PS:由於社運行動,市中心成為衝突點,商場都拉閘。晚餐唯有行去藍地食,不過等咗一段時間至有位入座,又再等咗更耐至上菜.........