最低溫騎駕紀錄

成晚電話響過不停,為突發事故作了解及協調,臨放工再輸入一堆數字及電郵報告。montbell長袖天蠶衣打底加厚線衫,電單車褸配上e HEAT保暖內褸(最大熱力輸出),食住風咁行去橋底車場。夜班後體力不繼,故warm up愛駒時順便啟動seat warmer至最大輸出。Grip warmer就無開,因為e HEAT手套。雖然唔係熱到出汗,但總叫唔係凍到縮埋兼入心入肺。

得6.9度,撞埋對風都唔知跌到有無4度?寒冬下,街上少見街車師兄,多數都係綿羊(外賣當道亦係原因之一),畢竟有前包圍兼風擋,車手唔洗硬食咁大風。

購物兼外賣byTMAX

騎愛駒入元朗買紅酒開瓶,經過一間以前幫襯過既酒吧餐廳(現已轉手)。見外賣餐牌性價比高,於是買晒一家三口既午餐外賣~

同一款式買兩個,因為一個俾碧權今日用,一個遲啲送俾海健。

疫情下,相熟車行既服務時間都縮短咗,黎緊二月續保險都要留意下。

兩母子仲係球場,我番到屋企先行食飯。賣相唔錯,鰻魚份量上已超值,仲未計有洋蔥湯配香脆蒜包片及餐飲~由於趕時間,唔得閒為兩母子既飯盒影相,但二人都讚好味道兼值得再幫襯。

食完晏就忙裝身,因為要去黃金海岸為碧權同嵐妹打氣~

雖然未能出席原定既大排筵席,但我哋一家三口都想向一對新人致上真摰祝褔。祝 新婚快樂,幸福美滿~

平安夜

平安晚要番晏,工作依舊忙過不停,番到屋企沖埋涼都過晒11點。幫忙看管幸男即外母,食過三婆女孫晚飯,已回家休息。

兩母子係梳化睇日劇,台灣女生為大家翻焗蘋果批作宵夜。臨訓前呢一刻最接近平安夜既温暖團聚,2020年俾我既感覺係生存感多過生活感。

Eater, are you ready?

疫情下,公司餐廳兼工作坊載客量大減,以保持社交距離。部門建議:工作坊用膳員工,可於15分鐘左右完成用餐,兼讓出用膳房間俾下一位同事。剩餘既休息時間,員工需自行搵地方休息(但邊度仲有位可以坐低抖?)。

今日我就親自挑戰,由叮熱飯盒放上枱起計時~結果急住咳住咁食,都要廿分鐘至可以食完飯盒兼支350ml黑烏龍茶......舊時代話"搵食艱難",而家係"食都艱難"........

PS:食個飯都要好似槍王打IPSC咁,一計時就掹槍追target,以最快既速度去完成~

一人聖誕時光

騎愛駒入元朗YOHO買嘢,一心去glasshouse食晏,無為意門口無午餐牌,原來今日只得二人聖誕節餐或散嗌..........又係喎,限食令下無晚市堂食,聖誕餐順利成章變咗午市。既然係咁,唯有食豪啲,美國頂級西冷配秘制京醬。配菜+牛扒+醬汁,味道出奇地有新意!

反正散叫,唔爭在叫埋杯凍Cappuccino,結果埋單三百幾蚊,獨享一人之奢華漫活。 

行去一田望吓,見到日本露之水滴,心大心細,買住SUNTORY啤酒黎等台灣女生既回覆。

其實今日既主要目的,係黎VENCHI買聖誕節朱古力番公司。呢款夠晒貼題,而且份量都夠工作坊同事共享~順便買多2小份聖誕禮包送俾世姪,再自己散夾一小包俾人家(因為人家之前食過話好食)。買得太多,結果做埋會員,令埋單時間耐咗........

買埋士多啤梨,就一袋二袋咁行去泊車位置,愛駒變成貨羊歸家。

蛇羮情義結

今年年頭因為疫情,唔太放心食蛇羮,所以未能"一年食十碗"。對武漢肺炎或新型冠狀病毒多一點認知,所以安心進補~之前都唔見蛇王輝本人,仲以為退休交棒俾接任人,點知今晚有幸見到本尊。

細個住置樂時,老豆不時買蛇羮外賣番黎食。小朋友見同碗仔翅差唔多樣,但又濃味啲,一食就食到自己出黎番工再做埋老豆。每當冬天當夜班時,都會諗起蛇羮配糯米飯既組合。同事們問我點解要咁補?我答"男人唔補好易無"(女人唔補好易老既改版)~
 

放假天,抗疫天

校啱時間騎愛駒出市中心買外賣,因為幸男趕位要下午用電腦上網課。之前台灣女生係築地買過平3成既外賣拉麵,所以今日都

得我一個嗌外賣,好快就有得攞。安頓好行裝,開動引擎歸家。

為咗呈現堂食既賣相(自己果兜當然就無咁好心機),特意用碗黎載麵,再加湯同舖叉燒等配料。賣相雖好,但麵條都係黐埋一餅,唯有浸耐啲同用筷子撩散佢。

上完網課,做下功課,又到媽媽拎外賣晚餐番黎既時刻。外賣扒始終都係唔及堂食,希望早日晚市解禁,可以行吓街食飯。

晏晝買外賣拉麵前,去左轉惠康買嘢,咁啱見到有近半價既Boddingtons!咁平當然係有"輘輷",最徍食用日係聽日,所以今晚一定要飲~没有Tetley's的日子 ,唯有以Boddingtons代替creamy既感覺,只可惜味道始終都係有分別。

V.A. HI-SPEC AOI OGRE AN-21

11月頭已收到老闆娘既通知,並相約市中心吉之島交收完全變形凰呀。原定今年五月上市,但因疫情而順延至11月。拆盒放上玩具櫃供奉後,我都順延至尋晚,鼓起勇氣挑戰傳說中既猛獸~

貴為MEGAHOUSE最高系列HI SPEC,流體金屬變形由多重機關去重演。前擾流板既精妙設計,錯覺上真的以為伸長了~

造工一絶,只係搵到少少油漆不均既地方,以及左邊尾轆遮板接合不良。推進器都交足功課,可從隔網望到內部組件。

車尾4個推進器呈雙V型升高,定風翼亦由內摺變成外展~等我努力追番BLOG既進度,再挑戰終極SUPER AERO BOOST MODE!!

其實尋晚跟説明書攪咗好耐(被偷拍),都未能由CIRCUIT MODE變成AERO MODE,結果要上YouTube睇開箱文兼官方介紹短片至收到科。

PS:MEGAHOUSE已公佈下期HI SPEC產品為SUPER ASURADA AKF-11,未知V ASURADA AKF-0會否可以成為HI SPEC系列既終極作品呢?

2人電影,3人西甲

晏晝同台灣女生係屋企睇完<鎌倉物語>藍光碟,夜晚騎羊出市中心拎外賣。

即使早到,都要等到八點至有外賣拎,唯有係門外等。店內有不少於一半既食客,門外亦有準食客研究餐牌。

$270,三餸兩飲品,唔包白飯,都算價錢合理。安放好外賣於收納袋,出發去大興接幸男番屋企。

番屋企望下實物先,份量都好足喎~

幸男明明食咗婆婆既御膳,但幸男都忍唔到口要黐雞煲食。接幸男番屋企,為既係睇實時睇巴塞羅拿對奧沙辛拿。幸男呢個樣,十足茶餐廳睇世界盃既大叔。美斯於73分鐘射入奧沙辛拿龍門後,除咗球隊衫,展示打馬勒當拿效力紐維爾舊生隊之球衣,兼模仿馬勒當拿之入球動作,以向同胞前輩致敬!幸男見偶像為巴塞取得入球,當然開心過之前果三球。

PS: <鎌倉物語>比想像中好睇,一反日本電影電腦特效成本有限既前設。男女主角係世世代代既情侶,即使今次轉世相隔十多廿年,二人亦結緣成婚。大奸角匿藏於靈界,派手下設計偷取女主角之肉身,令女角提早離開人界,方便他於靈界迫女角簽下婚書。男主角於人間尋回愛妻之肉身,並設法闖進靈界,找回女角之靈魂,再續人間情緣.............

一大早就跌眼鏡

朝早騎愛駒番工前,依舊係兆康麥當勞買早餐。點知買完攞車時,眼鏡被口罩勾落,隨即落地......幸好鏡片只係裂咗一忽,唔係斷開,仲可以戴番頭盔上路。

裂位唔係鏡片中央,所以唔太影響力視力,還可以應付工作。番屋企立即摷番副士啤眼鏡CYMA出黎戴,搵日去眼鏡88配番對鏡片。

電影啟示錄

多年前(1997)既占士邦電影Tomorrow Never Dies,故事係傳媒大亨操控新聞以挑撥戰爭,影響國際局勢及安穩。無諗過電影橋段係現實生活,變得真實及普及,連美國大選亦然。以往大報及傳媒都會以客觀,真實,公正為原則,只有小報及二三線傳媒才會以嘩眾取寵既方法去吸引讀者。娛樂或體育新聞尚可,但涉及大是大非既社會新聞,未免有點可悲。

以往只會係專欄才會見到較主觀既意見評論,但現今不論頭版或小新聞,都充斥著前設立場。不時聽到大眾及傳媒亙評對方偏頗,但時下又有幾多傳媒係夠公信力,無潛在立場呢?或許各種既偏頗,加埋除個平均值,才會出現持平答案,但確實係考驗讀者既辨識及運算能力。

PS:公信力有如商譽,要靠過往良好既紀錄及透明度作支持。

考完試,食好啲

放假天,騎愛駒接幸男放學,先去市中吉之島心睇玩具。

考完試,幸男睇中2架TOMICA車仔,但竟然係同款HONDA CIVIC TYPE R唔同拉花。經幾討論後,決定買兩架唔同款車,NSX R(我極力游說呢款經典跑車)同SUBARU BRZ。

已同幸男講咗今晚食西餐,但幸男都堅持要去OUTBACK鋸扒。幸男聲稱食得晒塊扒,見無兒童餐,唯有相信。結果,幸男真係食得晒,只係塊扒太多根位。

校啱時間番屋企,因為有師傅黎整側門既簷篷。師傅完工,我就負責善後,拖番好條公家路,畢竟多鋁碎屑同螺絲釘(小朋友跌倒或寵物被界傷都唔唔好嘛)。

五點半左右出門,搭輕鐵去建生攞定位等人家黎食晚飯,幸男呢身裝扮似落街食茶餐廳~

Training時代經常去建生食飯及買嘢,舊食店及商號亦換上新裝或撤走,以住既爛地停車場已變成新樓盤珀御~

被人家老點早到攞位,搞到要係門口等咗一陣,入座後再等人家收工到來。

人家一個月前已book呢間餐廳,今晚卒之可以一嚐其味。

全散嗌,頭盤炸金文不芝士兼每人一個昆布蜆湯。

個湯又真係幾好味,不枉每碗$68,如果唔能夠獨享就真係有點可惜。

重口味既我,揀咗西西里紅蝦千造意大利幼麵,夠晒濃味,只可惜是日無酒精飲品供應。

松葉蟹甲羅燒蟹膏意大利飯,係夠鮮味,但稍為少咁啲蛋白質填肚。

幸男望MENU相就揀傳統卡邦尼手造意大利麵,我就怕佢唔夠飽。

意猶未盡,臨尾叫埋份佛羅倫斯T骨扒至可以大滿足。每次上菜時,職員都會介紹做法,切合店號以質為先既取態。食店只收現金,幸好我早有準備～

Debut:5天工作時間表

議論紛紛兼前仆後繼之下,服務單位今日正式轉5天工作週。平時六點起起身,今日特意校鬧鐘早15分鐘,因為要先去兆康麥當勞買早餐。

除咗training yr 2時試過短時間既38制外,廿二年來一直都係6天制。以往早餐50分鐘,14:20放工後才自行食飯。新制式下,早餐時間大減,但13:30有45分鐘午餐時間,15:48才放工。早餐時間堅趕,偶有噎膈之苦。除咗每天工時長咗個半鐘,為咗每星期放足2日假,每更既人手亦會削減一位。

事前已講笑話,希望可以捱足5天,去迎接兩天假日。如果第五天臨放工至暈倒兼入院的話,2天假變病假療傷。