幸男的紙箱戰士

幸男成功組裝Labo Robot kit ,化身機械人戰士,破壞入侵之UFO及盡情於市入搗蛋。手揸把手,腳穿踏環,繩索拉動背包之機關,並由背包内既joycon紅外線感應器作認知。幸男好滿意呢個遊戲(可能係簡單既破壞得分),$50既身價真係物超所值!

相比機動武鬪伝既駕駛模式,labo robot kit既體感控制顯得土炮,但都有異曲同工之妙～

晏晝時段,幸男仲係埋首於背包内既機關。由於怕switch電力不繼,所以駁住個尿袋(因為望電視模式無咁方便,要昂高望低)。段片領導之下,無咩睇圖天份既幸男大部份時間都可以理解兼執行。

PS:幸男努力其間,我就出咗去買下午茶,貪方便無特意兜去藍地買咖啡,因為幸男話要食凱斯既芒果布甸(改咗名,差啲唔敢入)~

爸爸的慢板天

是日放假,在家看管幸男。午餐過後,叫幸男著手組裝SWITCH既LABO Robot kit。上次只係整好個眼罩,以及小量配件,今次進度好似極好喎~

 其實只係得個孭帶同背包外殼,裏面係中空.................

尋日忍唔住手,whatsapp委託大腳八老闆娘訂千值練既FINAL DANCOUGA(斷空我+黑鷹),所以舊機可以用黎粗玩~

新版既塗裝走金屬風,各駕駛艙都改為透明部件,肩膊關節亦會加入金屬零件作強化(希望唔好再爆)。另外,電版既背翼及透明斷空光牙剣亦係版既賣點~其實我好期待EAGLE FIGHTER會有RENEWAL VERSION~~

等幸男做完功課,就出去球場活動吓。疫情下,足球訓練都受到影響,唯有溫故知新。踢踢吓,放工既台灣女生經過球場,今晚安在家中食住家飯。

貝爾特人心聲

趁今日番晏,騎愛駒去西鐵站既CHATERAISE買散水餅,因為聽日番埋個早更就離開臨時工作坊。呢段時間,有唔少感觸：相比政制之下,人力顯得太渺小；隔著玻璃既離别；各人對未知的恐懼；人性光輝與暗黑.......

預算啱啱好,飲埋第二Round就清空雪櫃内既酒品。收工番黎就忙於作最後收拾,好讓明早番工前順利check out。回顧同倆母子分居既日子,反而覺得時間好用咗,因為唔駛standby住黎配合佢哋既活動時間。放工可以邊上網邊睇VIU TV既“2月29”,“埋黎睇埋黎玩”以及“金剛女遊團”,或係床上用電話睇YouTube短片至訓著,感覺蠻寫意。只係早更過後,騎羊番屋企洗衫兼補給日用品。

不過食完飯,與倆母子分道揚鑣時,有點“夫妻緣不再，親子情永在”既感覺～

鑒於個案193,星期三我要調去另一樓層。來回走幾轉,搬到身水身汗,點知隔離房傳來大媽聲“我跟你説…”,“不要跟我廢話～”,結果沖完個涼又再調去另一間房(當係係打去櫃台反映)…

其實再早一晚,已經因為隔離房傳來“呯呯”聲而臨時轉同層另一間房。起初職員收到我電話後,只係派人巡走廊了事。之後我要求職員入我房實時聽聲( 似咒怨撞牆聲…)。著住睡衣,穿住拖鞋,拎住個電話同罐啤酒,袋住張匙咭,就跟職員行去投宿一宵。

PS:近兩個月,電單車全靠陳舊既布冚保護,以及無差別既駐泊模式(偶爾停泊公司或屋企避雨),免受損失。

打波先黎落雨

是日天陰,騎愛駒送幸男去踼波。見八點至解散,走去附近食店搵嘢食兼歇腳,突如其來既雨勢,令閑坐半户外座位既我要急急鯨呑小食及飲品。趕到現場,練習無被打斷,繼續打水戰…

停咗陣雨,突然又落大啲,搞到我要匿係樹底下暫避。其實之前有位家長借把遮俾我,但基於疫情避諱(共用物品),所以婉拒咗~臨完場至停雨,總叫做可以放心送幸男番屋企(怕幸男再淋雨)。

番到屋企,即刻用烘乾機黎處理幸男對濕波鞋,無意間墮入黑執事角色.......另一邊廂,台灣女生已忙於準備晩餐。

 PS:第一次幫襯聚褔樓,原來店內貼滿黃店文宣~之前已睇中GOOSE ISLAND既IPA生啤,今日卒之可以一嚐!

見餐餐個日本甜薯條成$88,問職員係咪好大份,得知份量後要求細份少少就可"我陣間仲要食晚飯"。

Netflix with beer

是日放假,晏晝趁屋企無人(又等緊洗衣機),一於嘆住啤酒黎睇NETFLIX既動作片SHAFT,沉醉於模擬5.1聲效及硬橋硬馬式劇情~

睇咗陣至發覺,原來都好耐無入戲院,對上一齣係陪幸男睇新幹線戰士電影版。幸男因停課而多咗係屋企,好多時都就唔啱時間好好享受家庭影院時光。動作犯罪夾習著喜劇元素,啱晒用黎紓解三個月既疫情困悶........

没有LaLiga的星期六

騎愛駒同台灣女生去買餸,先係相熟泊位等人家,因為怕抄牌。看咗兩三個字左右,點知真係又有抄牌隊,結果兜去近吉之島既街口截接人家,再去置樂街市買海鮮~

忙碌過後,一家三口可以享用5餸住家晚餐。

没有LaLiga,唯有一齊睇Viu TV既足球小將黎解悶。其實幸男係晏晝時份都有回看未睇過既英超比賽,希望LaLiga早日回歸,大家都可以重拾熟識既生活,共聚以及娛樂~

PS:仲有一星期就服役完畢,到時可以多啲陪幸男。

疫境波

停課日子,足球興趣班亦受到牽連,最近疫情稍緩,幸男係家長同意下,再一次去參加足球班。家長於球場範圍內,要戴上罩觀賽,小球員就可戴可唔戴。臨尾分隊比賽,幸男一記窩利處理混戰中的半空球,彈楣入網,守門既黃sir都不禁讚好~

為逃避炒牌(月頭先食咗張),先行騎愛駒去貝爾特攞位食晚飯。今次揀咗黑松露煎三文魚濶條麵~幸男當然依舊揀肉醬意粉配雜果賓治,兼係BAR枱流溜。

PS:幸男踢波有點進步,但都係未能戒去耷住個頭黎跑..........

玻璃心文化

今日上網睇城市論壇,熱話莫過於免費電視台免播港台,主持與嘉賓有毛孟靜(立法會資訊科技及廣播事務委員會委員),李立峯(中文大學新聞與傳播學院院長),葉家寶(亞洲電視前執行董事)以及陳恒鑌(立法會資訊科技及廣播事務委員會委員),從多方面探討。

其實本人好多時都係網上重溫節目,並非經免費電視台睇LIVE。不過,政府迎合警方高調投訴後既做法,未太過小家兼此地無銀三百両之嫌。港台有獨立頻道,唔應該強佔經營困難既免費電視台,但一星期內短短播放3.5小時(TVB)及2.5小時(Viu TV),真的係營運艱難既主因?大台之創意乏味,拍攝水平滯後及節目選擇狹隘導至低收視點,才是令廣告商卻步之誘因。加上新聞報道偏頗,失去公信力,亦係大台自招CCTVB之名。

另外,陳恒鑌提及港台被投訴既節目煽動了仇恨,但觀眾自有判斷能力,香港人既知識水平未至於無獨立思想吧!真相愈辯愈明,這正係多元意見兼言論自由之可貴。如果面對被誤解,最開明既做法係打開溝通之門作辯解,讓大眾作判斷,而非純敵向或有例用到盡既短視處理手法。

其實回歸前有不少節目,以諷刺或嬉笑方式制作,點解當時無人會話抺黑或矮化大國既文化,傷害國民感情?

時下不少劇集故事,都有德國納粹既主題,點解唔會有人出黎話影射或"別有用心"既指責?

港台既突發聞直播,没有旁述,只有無删剪既現場拍攝及收音,讓觀眾可以最直接方式去見證及分析真相。李立峯態度中肯,最啟發既論點係"正正因為佢願意touch on爭議去深入探討,所以俾人投訴,但呢個俾人投訴其實係證明佢做緊佢要做既嘢"。

Sennheiser AMBEO Soundbar好嘛?

一直都等緊YAMAHA YSP5600既後繼型號,上網見到有Sennheiser Ambeo Soundbar既介紹,會唔係係另一個選擇呢?44 VS 13個推動單元,7.1.2 VS 5.1.4, Sennheiser Ambeo Soundbar帳面上只能以500W max output去挑戰前輩YAMAHA YSP5600(同樣以收音咪去描繪房間作音場校準).........

外型沉實簡約,What's HIFI 2020最佳soundbar之榮譽,真係好想搵日去門市試吓有幾好聲兼值唔值得由philips b8升級上去雙倍價錢既Sennheiser Ambeo Soundbar~

PS:上網爬文後,與YSP 5600一樣,都係要另配sub woofer至係完美(成本又增加了).......

買定唔買,免運費先敢買!

人

不知不覺間,現役銀包已用咗4年多,一心買番Bellroy品牌Sleeve Note系列,但見顏色唔太啱心水,結果揀咗Designers Edition既Burnt Sienna~

皮色係好,但內籠就有點單調兼無咗舊型號既一個內格(因為新增既RFID功能?),唯有到時再睇吓塞唔塞得落固有鎖項。

其實最想買既係呢個Tech Kit,可以安放藍牙耳機,流動電源,線材兼潔面套裝~同銀包一齊網購,卒之夠額可以免運費!