零氣氛的聖誕節

朝早趁幸男未訓醒，將作客版本既熱刺波衫放係幸男枕邊作聖誕禮物。其實份禮物係訂購謝禮時，順便買埋，希望幸男知情後唔會介意~

今年既聖誕無咩氣氛，屋企連聖誕樹都無搬出黎，因為大家都要圍繞幸男足球班及補習班既時間表運行，無暇兼顧其他事項。

PS:無諗過小朋友要係動盪既政治下生活(疫情清零政策，言論自由流失，前景不明，唔知有無令童心泯滅呢?至少我細個時，最多見新聞報導美蘇或中東國家局勢緊張，但自身既香港係安全及自由，以及有將來。

唔齊腳既冬至飯

今年老家既冬至飯局無大合照，因為大佬今日係屋企跌親，因腳骨受傷而要入院。冬至飯就照食，只係由我帶屋企啲餸同湯去俾大佬，畢竟醫院餐唔好食兼做冬嘛~

晏晝同幸男出咗去V CITY既eaaat食晏，人仔細細已可以自己KO一份牛扒薯條，唔知係咪足球班既消秏增加食量呢?

胃口一般，所以食茶漬飯。隔離枱有一對母子，幼稚園小朋友與媽媽既儍話，令我想念幸男幼稚園時期既開心時光(無功課及測驗考試既純玩樂)。

由於落雨，出入都係搭輕鐵。見幸男自理能力不佳(尋晚雨天踢波事件)，常常要提點及代處理。回程時抽問日常生活問題(水循環)，都係答唔到重點........非常擔心幸男既成長，畢竟時下及將來，唔會再係放心小朋友係社會邊撞板邊學習。學校更加唔再係安全學習既地方，教材既狹窄兼恐怖(圓玄小學事件)，家長既教育變得愈來愈重要........

聖誕二人餐燒雞變避寒中心餐

幸男上足球班，我覆完診就同台灣女生係市中食晚飯。今次人家訂定RUBY TUESDAY枱，唔洗頹食和民。咁啱有聖誕主題套餐包PROSECCO，感覺無之前既餐牌咁沉悶。

色水似龍蝦湯，其實係南瓜湯。

前菜係忌廉青口，啱晒人家口味。

主食拼盤有豬手，龍蝦及燒雞，人家一心留番隻燒雞打包俾幸男落堂番屋企食。

約幸男係市中心集合一齊搭的士番屋企, 見仲有時間，去DONKI買嘢，見到多款拉打口罩。

幸男既自理能力真係令人擔心，除咗落雨天無帶定衫去換，竟然係濕波衫上著外褸(持續令身體失溫)!!正常點都除咗件濕波衫，齋著乾身外褸保暖嘛~市中心見到幸男時，手掌已凍過地板。的士站排長龍，人家即CALL uber taxi番屋企。幸男沖完熱水涼兼吹乾個頭(老豆代勞)，至出廳食翻熱既燒雞加媽媽即煮既通粉。

PS:幸男話係輕鐵去市中心期間，好想見到爸爸媽媽..........

做冬@yoho mall

今日午飯時間臨時臨急搵地方食冬至晚飯，幸好相熟酒家話19:45有4人枱。

雖然有冬至4人餐，但我都係主張散嗌，至少可以食自己想食既嘢嘛。

我呢碗魚翅蛇羮，望落似碗仔翅，味道同質感當然唔同喇~由於唔係個個都好蛇，三婆孫就一人一個西湖牛肉羮。另外，無諗過外母啱食蜜煎金

蒸魚又點少得呢?大時大節都仲有條紅瓜子斑，一於試下。平時多幼骨既腩位，係呢條魚度一啲都唔覺有~

雖然無大隻龍蝦，但呢個上湯龍蝦(開邊)伊麵都唔失禮～今晚既甜點唔再係芝麻糕，大家安心食綠豆沙底既湯丸。

四圍度水

日早前有新聞報導東江流域正遭遇自1963年以來最嚴重旱情，其實水資源不足以滿足全球發展之下，各國都諗盡可行方案去增加水源，例如以色列既Water-Gen用空氣濕度搾取可飲用水。

有別過往貴價煲水式，滲透式海水化淡技術日趨成熟，以色列已經可以由海水化淡提供全國8成既食水，兼以再生水提供非飲用水源。2019年12月30日香港開始以將軍澳興建海水化淡廠作試點(預計2023年完工)，希望可以盡快去完成大規模供水。政府常講既大灣區發展，如果香港既海水化淡成功，絶對可以讓國內參照，解決水資源問題，亦可以製造就業(長期)。水資源充裕下，唔單至人民生活及商業活動得到改善，連環境沙漠化問題都可以調節。

假日之日常

因為幸男係新屯中踢波，故係一條天橋之隔既高爾夫球場餐廳食飯。我同台灣女生先去攞位，但一入閘口就俾職員喝停，話要探熱同嘟安心出行!頭盔同手套包到冚，點俾你探熱？單腳撐車，雙手控把手，點潛個電話出嚟嘟？

“咁都要0格！”

“我泊好架車至出黎補番得唔得呀？”

“咁又唔同～”

未食飯，先食外判官僚風，補登記後至行去餐廳。

人家點過餐後就去球場接幸男，話怕天黑得佢一個人行過黎。

嘢食好快就到，幸男又遲放，結果我一個人食住等......

嘩，人家個豬鞍主食都上枱喇喎，唯有影住相先~~

幸男到埗至嗌起菜，可以熱辣辣咁食。店員見人家個餐放得耐，主動提出換過個熱湯~之前人家盛讚呢間隱世餐廳啲嘢食好味，個人覺得都係ok以上，至少對得住個價錢(人均消費約200)，希望個餐牌會有多啲選擇~

臨攞車回家前，順手向高爾夫球場影張相，高光暗反差下，未見一吋感光元既優勢......

餐廳無酒精飲品，反正楂車，一片心番屋企飲HOUSE BEER~

PS:晏晝同德輝係YOHO既MY CINEMA睇捉鬼敢死隊:魅來世界，以前放工一齊睇好多動作猛片，所以想係佢出發前再一次重拾青春回憶。

今集取景於落後小鎮，雖然合適舊裝備既復出及舊故事彩蛋，卻欠了一點新元素，畢竟終極頭目仍是第一集既蜥蝪女。如果唔係40歲以上既人士，應該唔會因集體回憶既情義結而買飛~

陪豪爵出車-叛忍潛入失敗

已3年無兜去呢個舖位，今日載住康楠出黎攞新坐騎(記得當年我出車時係德輝,表叔及豆姐陪我)，有friend陪住點都有個關照嘛~

店內偷拍咗張快照(可惜手唔夠定)，舊時排到宅密質質既陣列室，而家顯得疏落。失去SUZUKI既代理,店內得番未交收既存貨,主打變咗係鈴木與國內作技術合作既大江豪爵。交收其間被負責出單及維修既店員認出,無法子,TMAX車牌掛住12年來出入呢度既號碼,兼且車店為我完成唔少別人眼中不值既維修保養。

第一站係入油，熟識地段既我好快就帶康楠到SHELL。康楠無帶耳機，唯有借MAVIN AIR X其中一粒俾佢，而我就用另一粒,以便一齊跟住高德行同一條路綫入屯門。由於兩個耳機太近，我果粒變咗連咗去康楠既電話，攪到我要離開油站範圍轉角至成功獨立連線......

入油後行觀塘道，龍翔道，屯門公路，我就負責單擋護航。原定係藍地食下午茶，但放工時段太塞車,於是係ESSO附近停低稍作休息。小休後就分道揚鑣，康楠番屋企，我就去洪水橋Caltex入油。

PS:近期既新車好似康楠既豪爵一樣，捨棄了傳統針示轉速錶，令我更加珍惜2018既TMAX。

網購騎士用品"到着"

之前係Web!ke訂既貨2日前已經到埗，可惜屋企無人收貨，故今日憑掛號卡去郵局領取。

Size款式都啱，今個冬天無後顧之憂～

實物同官網既色調相若，check過無爆線，安心。

牌子同系列都係一樣，所以買番加XL碼都fit size！當初無為意手掌底既抗磨甲位，希望揸把手時唔會頂手。

舊手套正式引退，其實我好鍾意白紅黑既配色。

撤資係不能否認既事實，其實內地製造成本優勢已不再，加上國際形勢，世界工廠將重新定義。

夜晚食過台灣女生放工買既外賣，就騎愛駒去接幸男放U13足球班。一心諗住截獲，點知幸男行叧一邊搭車，好在人家見到幸男電話既定位。接過電話，幸男行番轉頭會合我，著埋爸爸件雨褸擋風，就坐住後座回家(再食三文魚子壽司填肚）。

SHARP AQUOS R6用後感

用咗SHARP AQUOS R6兩日喇，相比NOKIA 9有咩唔同呢?

芒大咗0.6吋,但由2K變咗WUXG，Dobly Vision要source匹配至可以發揮....雙曲面芒兼包埋個打窿自拍鏡頭,好在衛訊有得配即介既芒貼。

Lag機不再,12GB RAM配驍龍888,的確比NOKIA既6GB配驍龍845順得多。

Speaker由單變雙，睇片時會覺得左右聲量聲效不一(但點都好過單speaker)，因為只有聽筒喇叭向前，而米高風既喇叭向側傍。

屏下指紋解鎖速度快及準繩度高，不再需要為解鎖而忟憎~

叉電一定要有私伙高W數叉機兼配type c輸出，否則叉到你忟....

原廠送既type C to type A轉頭，原來係用黎過ANDROID機資料用，但係好食電吓(建議叉滿電先過機)。

影相方面，一吋感光元既優勢，令相片更細膩。五鏡變單鏡，省却了不少合成時間......即使網上用家話影相唔太快爽，但用開NOKIA 9既我，已經心滿意足!!

室內照片亦算有交侍,不負徠卡之名。半年前新機出道要成萬蚊炒價,而家6折就可以享有日本當地定價!

第20代手提電話 X 徠卡

今晚遲開飯，所以先騎愛駒兜出去洪水橋會合店員交收Sharp Aquos R6。老麥門外坐住等,好快就見到店員拎住"放工啤"前來。店員用密碼激活機體(唔通日本當地出機都係咁?),俾我試過影相及通話功能。閒談幾句後，就完成是次交收。

話就話係5G，但香港只係用到4G，唔兼用唔到"3"台。水貨機要自己設定Assess Point Name，好在店員已幫我set好。原盒無叉機，USB線都無條，得個TYPE C轉A頭既adaptor,夠晒簡約。唔知點解叉電比NOKIA 9慢,因為電池由3320mAh變咗5000mAh?

手機Profile更新:
1st   Ericsson PF768                >黃色 sunday
2nd  Boch 909 Dual                 >灰色 people
3rd  Siemens A40                     >藍色 orange
4th   Ericsson T29                    >銀灰色外殼,紫色panel one 2 free
5th   Ericsson T39                    >灰藍色 one 2 free
6th   Sonyericsson T300          >紅色(紅豆) smartone 
7th   Sonyericsson T630          >黑色 smartone
8th   Nokia 6260                       >銀色 smartone
9th   Nokia 6270                       >黑色(深啡色,鋁金屬外殼) smartone
10th Nokia 6500 Slide             >銀色(鋁金屬外殼) smartone
11th Nokia N86 MP                 >白色 smartone
12th Nokia N8                          >橙色(鋁金屬外殼) smartone
13th Sony Xperia P                  >紅色 nwmobile
14th Sharp SH930                   >白色 nwmobile
15th Alcatel One Touch Idol X >黃色 nwmobile
16th Alcatel One Touch Idol 3 >灰色 Sun Mobile
17th BlackBerry DTEK 60       >鈦灰色(玻璃背面) Sun Mobile
18th Nokia 7 Plus                    >黑色(玫瑰金色金屬邊框) Sun Mobile
19th Nokia 9 PureView           >藍色 (反光夜幕藍)Sun Mobile

20th Sharp Aquos R6              >黑色 Sun Mobile

PS:今晚開咗罐特別版ASAHI，但無網上介紹咁多生啤泡既?望番個罐身，原來要4至12度至會愈黎愈多泡!!!靈機一觸，用熱水坐暖罐身，先至見番綿密細泡~

電影滿載而歸;新機空手而回

朝早同台灣女生去StagE睇梅艷芳，好佩服製作人可以CG及舊物重現老香港既模樣(唔睇都唔記得香港曾經有由木條砌成既垃圾桶)。當年真實低清傳媒短片紀錄穿插高清電影主線，見證住巨星既成長及經歷，只係中段泰國暫避既節奏有點慢板。

本人覺得最感人既場景，莫過於梅艷芳於Leslie既殯禮上講既單方對白-從來合作登台都無rehearsal，點解今次要為佢自己rehearsal?可惜我記唔住每一個字眼，所以我會等出藍光碟作收藏。電影中，感受到女主角對愛既渴望，對歌既熱情，對義既執著~

散場食過壽司郎，就騎愛駒送人家番屋企，自己搭巴士出深水埗。由於Nokia無如傳聞中係11月發表新旗艦機，服役兩年半既NOKIA電池已老化到要一日三餐(叉)，於是早前係PRICE. COM搵到深水埗既WONDER DIGITAL，預留定心儀既後繼機體SHARP AQUOS R6番貨。

由於今日至番貨兼臨時轉黑色(當初留白色)，店員要即場為新機叉電，我唯有於店內苦等。期間見唔少客人查詢安心出手機，當中不乏志在最平價既陳列機。等咗成個鐘都唔見部機叉夠電啟動，熱心店員建議明晚於洪水橋交收。

PS:苦等期間，店員叫我不如坐下，但我怕一坐底就會被客人當成店員，所以婉拒......