邊睇英超，邊打Switch

放工番到屋企,見幸男係客廳睇緊曼城對鍚菲聯,唯有沖完涼用流動模式玩Switch Asphalt 9。邊睇波,邊追趕每日賽事儲新車設計圖,因為新賽需要較高能力値既賽車…

之前有諗過買個GENKI CONVERT DOCK,咁就可以係爭電視時用書房既芒黎打機。不過一心等SWITCH新一代機種,令我一直却步(怕唔兼容)~

PS:幸男第一次見到我用GENKI既藍牙耳機transmitter套裝既畫架式支架黎玩(流動模式),感到好驚訝～

假日的流程

是日放假,騎愛駒將台灣女生整頓衣櫃後既不常用手袋及背包,拎去救世軍家品店作回收,順便去市中心名店屋買三口子份量既點心外賣番屋企。

因為疫情,巴士班次變成半個鐘一班,好在而家有個APP,校啱時間就出去搭巴士出油麻地。原本只係出去ACTION ROBO拎訂購既第三廠BLITZWING,結果心癢癢去埋現時點搵出咗一排既HOT ROD。由於新系列既火棒變形系統比得上MP,所以一棒難求,結果係格仔店食炒價$380!

早一兩日佐敦封區,網絡不少"咪Go佐敦"Michael Jordon之貼圖,但搭車仍舊多人~

屯赤隧道帶來既交通倒灌,未到五點已經出現,結果塞咗兩三個字至落到車....會合台灣女生去揀雪櫃俾外母,因為舊機經歷十年多已跪低。同幸男提起雪櫃係結婚前買俾婆婆的,孤寒既幸男認真地答"咁你幾濶佬~",我唯有答"咁證明我當時幾認定媽媽"。

由於第三廠既BLITZWING變形需時兼要要跟住YouTube,所以先拆火棒黎玩住先~

今次86-06 STUDIO SERIES既火棒有埋MATRIX,可以重現電影經典一幕(包裝內仲有Unicron內部背景紙板)~

與前作TITANS RETURN相比,今作跑車型態更貼近原作!

車尾就相對多點穿崩位~

將排氣管配件“完美氮氣”套落槍口,帶埋副超扮MATRIX凌空搏火～

billow-小白鷺

對上一次黎白鷺已經係2017年一家三口中秋追月BBQ,放假兼撞正台灣女生放大假,騎愛駒重遊拍拖故地。

裝修時期一度乾涸既湖池,已重新注水。今日未有見到飛鳥到來,東鐵就依舊間歇穿梭。

人家揀咗corridor座位,有瓦遮頭,但又不失戶外自然光與風。如果係室內位的話,就與普通餐廳無異......

限食令下,大家都趕係六點前堂食,我哋今次揀下午茶時段。

其實個柚子芝士蛋糕係我既,雖然最終都係交換黎食。

舊幾水個下午茶餐,只係包杯茶,特飲要計錢(我哋加咗榛子咖啡同番石榴汁)。

我就嫌個炸魚唔夠乾身,好似有啲湯汁咁,但人家就唔太抗拒。

偷閒放空,其實人家都要遙距對功課,兼代上傳google classroom。

無得外出旅遊,唔少港人變陣去行山或搵特色餐廳打卡,我哋今次就多一份懷愐。

XPERIA ii 既自拍當然比唔上A7 iii,但都要作留念嘛~

好耐無同人家一齊騎羊兜風,畢竟照顧幸男係首選。TMAX亦可以舒展吓根骨,擺脫惱人既燈位,與我倆一齊享受迎風而來既速度及藍天。

天国と地獄

今晚同台灣女生一齊睇綾瀨遙既<天国と地獄>第二集,男主角高橋一生既演技好明顯比女主角好。第一集既殺氣,陰沉以及奸險,變成儍氣,正直以及睿智。相反,一個被公認為美人既女主角,要一瞬間掛上邪臉,的確有點難度。相由心生,睇黎女主角既內心歷煉,還未夠豐厚~

碌一碌落樓梯,咁就交換了靈魂,感覺有點兒戲。究意男主角是否順利成章由主嫌疑犯變成真兇?定係真凶另有其人?女主角可否重奪熟識多年既肉身及人生?刑警與嫌疑犯既思考對調,不時係查案及犯案時出現,但<天国と地獄>將呢一個層面推到極緻-親身體驗。

PS:劇中配角-八卷英雄(女角之副手)不時鬧出笑料,溝端淳平演活了這一位論盡,膽少但又忠誠既小伙子。

黑白的感召

今日番工泊車落布冚時,見到一架有頂蓬既綿羊到來泊位,以為係平日果架ADIVA。收工攞車時至發現原來係BMW既C1,一心用NOKIA 9黎影相,但唔小心用咗黑白模式。

原本想删除,但望落又幾切合20年前BMW C1舊型號既主題。每當望見彩色照片,原本毫無頭緒既記憶往往一湧而上。如果回憶係由黑白模糊既印象開始,漸漸變成結實既線條及彩色填補的話,難怪大家對黑白相片仍有斷不了既情義結~

誇區塞車FOOD PAPA

是日休息,當然要負責幸男網課後既午餐。為咗唔想幸男又食相熟茶餐廳既常餐,於是騎愛駒入元朗。今次上open rice睇過無休店至出車(上次撞正逢期二休息),不過餐牌好似無咩大變化。

入元朗時,見入屯門方向塞車,所以回程時特意行青山公路。機關算盡,但過洪水橋就開始慢塞,攝車罅都要成半個鐘至番到屋企(要幸男久等了)。

今次既鰻魚飯,無咗木魚碎佐料,少了一份香氣,但總叫為刻板既午餐帶來一點新意~

家居清算日

放假又係家居清算日,騎愛駒將屋企用唔著既舊物交俾救世軍家品店。自2018年屋企裝修時,就開始將舊物拎去救世軍,環保得黎又可以幫到人嘛。其中一樣係幸男幼稚園時期既汽水機玩具,當時幸男不時儍痴痴的投入假錢幣,以傾出汽水罐.........

受兩母子所託,一個要雞蛋仔,一個要夾餅。好在紋身大叔有開檔,望住黎等至知夾餅內有牛油同花生醬。

再行去白羊咖啡買外賣,嗌咗香草咖啡同榛子咖啡至見到有單品啡豆,唔知有幾大杯同幾錢呢?

帶咗個唔夠大既保溫袋,封唔到頂部魔術貼...........

雖然門面唔係太吸引,舖位亦唔太起眼及光鮮,但有誠意既小店足以令你願意再度光顧~

見保温櫃内有提子吉士酥,啱晒未有茶點小食既我。雖然酥皮面,但入口唔覺油膩,下次都會再追買。

PS:係置樂見到外賣羊既土炮保暖手套,好似俾人斬甩隻手咁,有點驚嚇~

ROOMMATE下午茶小聚

特意補鐘趕去市中心,因為約咗阿Bill食下午茶。大家都諗住去牧羊少年小聚,但可惜勁多人等位,要等17張枱.................

唯有轉去URBAN,順利入座小聚~網上通訊如何發達,都不及面對面既相見,因為聲音係同步及零失真的。共同既經歷,更係無法取代的。

祝 事事順景,生活愉快,身心安康~

PS:第時一家飛去睇英超就靠晒你喇~

2代拉打之日劇

今晚同台灣女生一齊睇魯邦的女兒第一季既大結局,其實中段主角一家身份敗露變得沉悶,幸好捱過一集後就回覆節奏。俠盜元素故然吸引,但女主角亦相當要緊~節奏輕鬆,夾集低成本制作既高科技機關工具,當成消閒笑片黎睇都得。起初以為好似CAT'S EYE,但今次係神盜世家女巧遇警察世家男。除咗男主角瀨戶康史係RIDER KIVA之外,男主角既爺爺演員藤岡弘更加係元祖RIDER 1,結尾仲騎電單車去會合大隊助戰~年屆70,仲可以活躍台前,真係不得了!配埋件雙間條袖外套,充份向RIDER 1致敬!

PS:無諗過女主角之嫲嫲與男主角之爺爺當年係未能修成正果既戀人.............

2021新開始

原本元旦好應係夜晚食餐好既,但限食令下,只可以出街食午餐。近近地又唔想等位,所以一家三口去咗貝爾特分枱坐。

一如平日住家西餐,幸男可以食得晒一整塊牛扒~

2020年,香港人除咗紙巾之外,多咗一樣衞生必需用品-口罩。過去一年,生存感比生活感強得多。除咗番工放工,補給日用品,買外賣之外,大多時間都係留係屋企。即使想做吓運動,都因要帶口罩兼封運動場及球場而却步。

食飽飯,台灣女生送幸男上婆婆屋企,我就騎愛駒去V CITY CD WAREHOUSE睇吓有咩碟買。特價組合只係睇啱呢隻,遲啲再黎搵埋另一隻先。

見到有法拉利車仔,send張相俾人家,讓幸男確認款式至課金~

心血來潮,上網搵下PI MAGNUM既座駕款式,原來488 SPIDER係70週年版本!