苦盡“今”來

試後慶功飯已漸變成傳統,今晚我哋出咗去尖沙咀食日式燒肉。台灣女生話係呢間 “燒肉而今”係米芝連食府,但原來係副線……

學生,補習老師,辛苦晒兩位～我只能係外賣及雜務上支援大家。

我同人家都揀咗套餐,他他牛壽司令我諗起久違的日本旅行。兩個餐點夠兩大一小食呢? 我哋叫多咗份牛肉拼盆,份量應該夠幸男果份~

除咗SUNTORY生啤,臨尾我叫多杯燒酌MOJITO,味道還好(心底裡還起歡COCKTAIL)!

套餐既甜品,呈上俾幸男享用,完美為慶功宴作結~

小插曲:口罩下點餐,職員搞錯咗我哋只係叫一份套餐,直至我哋追問另一份前菜下落。職員補上既煙燻前菜時,特意舀多少少魚子俾我哋,可惜未食晒就被職員收走(趕進度上主菜??).........

PS:食飯前係附近既攤檔見到有本地手工啤賣,由於花多眼亂,揀咗六款試住先~

月來月美

雲隙間見圓月,唔理係咪初十五,入屋拎出相機配新鏡,再砌上腳架。試咗幾張,成功影到月面～雖然都係要crop相,但比上次用240焦距既效果好。

久唔久有雲遮月,所以無試細光圈配長曝光。第一次用腳架扣鏡身而唔係主機,好在無出意外。買SEL100400GM既原意,係影幸男踢波及自私影月光。如果計$400租鏡一日,咁我要影夠38次至回到本~

PS:月照令我諗起《天國與地獄～瘋狂的2人～》,月圓之夜正係連環殺人案出現之日子。

非親非故faithfully

尋晚番夜班,用電郵將個文書Template發俾同事。下款我用了Faithfully, 頓時被Apple同Paul提醒, “非親非故Faithfully”呢個口訣,以配合未知對方姓或名既書信。

平日常以Best Regards作下款,但好多時想用得唔好咁是但,無諗過唔熟書就出事(始終後生既係無放低書包咁耐)。好驚訝原來有口訣記,上網望吓,似係補習社既普世教材。一人計短,二人計長,與新世代打成一片,方可有新方向及動力~

拉筋抗勞損

今日收到台灣女生代購既瑜珈墊,幸男見張TATAMI墊就忍唔住要踩上去扮下嘢。

年紀大加上Tmax既座高及車重,支撐腳吃了不少苦頭(停車及倒車)。上網睇拉筋既短片,揀咗個"7 Stretches to Do Everyday"黎試,原地動作都酸痛兼滴汗。之前睇跌打時,師傅已經告誡我日常要拉筋,以免再次觸發舊患。

PS:以前多游水跑步,但幸男成為新成員後,運動鍛鍊時間確實少咗好多。

 

星際遊

晏晝一個人出旺角購物,回程去巴士站時,經過呢間咖啡冬甩店。

好耐無食過冬甩,玻璃櫃內既款式同menu差唔多,但合心意既只有Glazzy,Tiramisu及Heaven Berry。G x1, T x1, H x 2,拎住一袋兩盒既外冬甩等巴士歸家。

行星際既收獲之一,相機防潮膠箱～之前買既紅A防潮箱太大(7L ),呢個5.5L就啱啱好,唔會太高身。

今日特意孭相機連鏡出黎,除咗試防潮箱,另一個項目就係鏡袋。SONY原裝送既鏡袋未能包袱主機,但又唔想吓吓孭相機背囊出街,因為愛駒seat位下之行李艙未能收納相機背囊。行咗幾間都無啱用既産品,最後係一間較大既店舖搵到DSLR機既holster。

經店主同意,試過機連鏡塞入去,完美收納~往後騎羊送幸男去踢波,就可以安心用holster保護機連鏡,並收納係油缸袋內或seat位之下。至於Manfrotto既Chicago背囊,都係等有得再去旅行先算,用住LOWEPRO既FreeLine BP-350AW先,反正都只係換咗一年。

日光下的SEL100400GM

今日幸男10：30上足球班,卒之有機會係日光下試新鏡既最大成像。221mm焦距下,用ISO 400,1/640, f5.4既組合,效果都唔錯。今日除咗有小朋友練波之外,場內都有一班銀髮族踼友誼波。臨尾有分組比賽,台灣女生話可能係呪詛,爸爸一黎觀賽就無波入........自覺係運動主題上,唔夠預視能力兼操控速度,令唔少作品對焦失誤或構圖不如意,仍需多加嘗試。呢幾位小球員咁好傾,唔知係咪識得呢？Manfrotto既holster袋幾好用,方便放入出街背囊。黎緊睇下有無機會可以影月光,以用盡新鏡,盡快回本嘛~

藍天vsSPHERE

傍晚幸男要去天水圍踼波,由於唔太熟路,所以午餐後騎羊跟住高德地圖去搵泊車位。車程15分鐘就到,搭輕鐵的話應該要半個幾鐘......

閘隙之間影入去球場,唔知真正既入口係邊呢?

重覆路線,不過由單騎變雙騎,仲要係一袋二袋添~

順利六點半前就成功登記兼入球場,放低行裝兼拎出相機,但被對隊既女職員誤會為攝影人員:"你係咪Gary呀?"..............

太陽落山,400m焦距下,ISO都要用上5000。

入黑之後,球場燈光明顯不足,幸男亦不時活躍於遠處暗位。運動主下,1/250秒令ISO拉到10000至望到無咁暗,唔通要A7SIII至可以影到??

友隊既表現好過藍天,而且有個初中生咁高大既球員助陣,苦戰之下4：4和波收場。

八點多啲完場,我單人騎愛駒趕八點半去貝爾特落last order。兩母子坐隊友家長既順風車,都只係遲我十分鐘左右到達。瑤柱海皇龍蝦湯泡飯,夠晒fusion新穎!大家都讚賣相好,其實味道都值得下次再嚐~

PS:晏晝探完路,番藍地九記買啤酒去老家,點知櫃枱無人又唔見有客,要等一陣至有收銀出番黎鋪面。如果入黑的話,就更似BIOHAZARD情節。

接送兼記錄

 一袋二袋砌哂上愛駒,成功送幸男去湖山踢波。政府場所,入場先要以填表方式呈交資料,職員再即時以來電作核實。於場邊放低行裝,舉起搶眼既白色鏡身,開始新鏡實戰。ISO5000配1/400,雖然開始粗粒,但總叫可以接受,畢竟係夜間兼動態主題。相比之前租過支FE 70-300mm F4.5-5.6 G OSS,構圖已經容易得多。可惜今晚唔係置樂青華球場,無得係同一光源及環境距離下比較,不過77mm(新)鏡面理應比72mm吸光更佳。幸男好似同我包拗勁咁,不時係遠離我既邊線走動,好難得影到著近光源既相片。愛駒經歷個半鐘頭既裸泊,幸好安然無恙,兩父子騎愛駒番屋企。

PS:台灣女生做完facial買outback外賣番黎一齊食,外賣既水準真係有啲唔掂,仲衰過住家爐火煎.....

一幻

之前見新開既壽司郎成日都排長龍,今晚台灣女生話一放工就去排隊,誓要搶先過其他收工去幫襯既食客。放工5分鐘路程就到,但都係失敗,結果轉陣去另一間屯市新食店-一幻。我同幸男較啱時間至出去巴士站,結果人家係店內等咗8個字。

人家講起至醒起,有一次係尖沙咀經過一幻,幸男週望過餐牌,嫌少選擇,故行番去食一風堂。選擇係唔多,我揀咗$99套餐,辛辣味噌蝦湯拉麵,再加多$25轉Highball。味道係比築地拉麵濃厚,叉燒亦唔會太多肥膏,不過我都係加咗一份3塊既叉燒在先。大家都一致認為一幻係值得再次幫襯,好食過一風堂,不過最好唔洗排長龍喇~

PS:杯Highball好似好正,但其實係杯"真多冰",個罐得個200ml左右,係吉之島買suntoru罐裝higball都有330ml丫......

好耐無出街打邊爐

好耐無搭地鐵去荃灣(初中時搭城巴出荃灣轉地鐵出旺角多),六點幾係旺角上車,中途可以有位坐。到總站落車時,有別以住塞滿人既情景,畢竟西鐵令乘客分流,亦有不少市民work from home。地磚顏色既親切感,填補著脫節的心境。

約咗20:00食鍋,已係旺角行到腳軟,所以係綠楊新邨既PACIFIC COFFEE坐住等時間。

今日上咗去偉哥介紹既舖頭買鏡,希望可以為幸男上足球班影相。疫情下無得去遊行,難得球場解封,一於試吓運動向既主題(不過唔知A7III能否應付 )。

以往最怕出街赴約認錯路(記得同契細佬去過荃灣既酒吧),而家跟住部smartphone就無走雞。

同其他食客一樣,先探熱,嘟code既嘟code,填表既填表,耐心等入座。安排上既落差,我哋四個大男人要坐係較細既枱。雖然話食店晚市放寛,但放得工黎集合,食得果個半鐘就last order,十點準時要清場。將合照send俾Oscar,順道問吓近況。

PS:食物OK,啤酒要另計(有HOEGAARDEN)。怕時間太趕,所以齋飲汽水同茶。