假日陪診

燊光因疫情而停業兩週，唯有係附近搵間茶記食晏。呢個黑椒汁腸仔雞扒飯，真係多汁到得我驚........店內唔算坐滿人，我鍾意堂食望吓周遭既人，發掘一點新意，感受到人與人之既連繫 與想法。

搵到有常餐，於是砌番幸男食開既組合外賣，等幸男上完網課就可以開餐。

幸男食完外賣就坐我車尾出去眼科覆診，疫情回彈，帶埋個空氣離子機黎求個安心。幸男坐坐下話凍，著埋我件恤衫當外套，變成藍格仔撞紅格仔既突兀。等嗌名，上樓又落樓，入房出房，托賴近視無再加深，順利約埋個覆診就騎羊歸家~

滴完放大瞳孔藥水，幸男變咗老花遠視，晚餐夾餸近望時要揚走眼鏡至望得到隻碟。

PS: 放碗碟入洗碗碟機時，望住呢隻會考班買既杯，心諗佢點會諗到廿多年後會被放入機洗呢?

被害妄想的車主

我一直都以為係車房或汽車用品店先至有得買偈油，原來油站既便利店都有，真係長智識~

事源係康楠話佢一撻車就見偈油燈著咗，斷定為被放走偈油(其中一種常見既惡行)，故我提意由我買支偈油去佢泊車位置作支援。

去到現場添補偈油，竟然好快就沒頂!其實之前我都問過機油出口粒螺絲仲有無係度，車主答我仲係度既時候已覺得怪怪哋(咁有手尾既惡攪?)......泊車位下又唔見油漬，突然醒起車主曾話過差唔多夠期番原廠CHECK車，一望里數錶(剛過一千)，謎底解開~

被害妄想的車主第一次出新車，故唔知出廠設定首一千公里會著偈油燈作提示RUN IN之保養。變相今次見面係派利是同收禮物，都好丫，疫情下無新年聯歡都可以見個面嘛~

PS:車主被取車既女騎士上前搭訕，後生之間既牽引力，令在旁既大叔羡慕~

一個足球,各自表述

之前苦戰法國隊，總決賽對德國隊，第二次挑戰就成功逼和兼十二碼僥倖勝出(因為有兩次係揀錯而意外成功撲救)，總算爆機~

仿實時既足球既玩法係較貼近真正足球，配上絶技與cut in畫面及對白去重塑動漫氣氛，但背景音樂不太出眾(動畫歌亦只係爆機至呈上)。反觀以前任天堂既指令式玩法，加上有變化既背景音效，更能完汁完味重現動畫既親切與融入。另外，舊作會有唔少驚喜，如個波爆咗當入球無效，因被侵犯而獲得自由球或十二碼(新作只有越位及出界)。

幸男打機時段係FIFA，絶對貼近真實，少咗對的遮擋上方邊線畫面及視點較高(看台只佔小部畫面)，可以更容易掌握敵我位置，提升迴避或傳送及射門之連貫。

PS:幸男話足球小將難玩過FIFA，而我就每場都玩得既緊張又忟憎(loading時間耐,畫面流暢度不堪及煩瑣既自定角色培養)~

太子陪太后睇愛情小品

 今晚一家三口睇"我的少女時代"既藍光碟，故事既設定有點似"今日我至叻"日劇既不良學生感覺。其實之前台灣女生已係戲院過，只係一直話想買隻碟黎翻睇。比<那些年，我們一起追的女孩>，<我的少女時代>比較真實一點，至少無咗無謂兼誇張既打鬥及打槍情節。

歡喜冤家組成既拆散鴛盟自肥小隊，變成暗生情愫。女主角林真心既悉心打扮，有點似雞珍.........90年代香港四大天王既時光,我亦都係中學生，call機，錄音帶及連鎖不幸信....每樣都令我回心微笑。節奏明快，笑料夾雜著感情線，不知不覺就過咗兩個鐘。主題曲<小幸福>臨近結尾至出現，配合男主角錄主帶既告白，成為全片最催淚(對女觀眾)既時刻。

PS:男女主角投身社會職場既樣真係變化好大，尤其係飾演徐大宇既王大陸變成言承旭.............

向世青賽進發

趁大假玩番SWITCH既足球小將，重新試一次新手練習兼自製筆記，成功完成南葛三連霸篇，並向世青賽作新挑戰 。玩家要自訂一個角色並揀一個中學球隊，我同幸男一齊硏究身形，髮式，五官，膚色及臉形後，揀咗東邦既前鋒位置。
原本係設定時揀帶黑超，但幸男話唔制～由於GAME既畫質不堪，所以轉用手提模式玩。

好耐無追本地劇

自從睇過第一集，週一至五既21:30既梳化，成為一家三口晚飯後既聚點。點解會追呢齣劇?係窒悶既生活空氣中，難得有笑料為主題既劇集，而且橋段，設定，節奏及細節都比"大台"<<大台理論>>來得貼地，實景亦比較多，唔係一個個既廠景。
最後一集既笑料唔多(集中主角團隊既反擊計劃)，最好笑既莫過於富三代既開開，充份發揮外賣仔既霸氣"信唔信我加你料丫嗱"。

劇中最惹笑既角色莫過於星之子Tony同Kennth Sir呢對搭檔，男B女B既鬥氣亦被比下去。蒙玲對阿信既感情線收藏得好有心思，到中後期至知大學時期已萌生好感。

20集既橋段中，最令我雀躍既莫過於英雄本色之神還原!共鳴之餘又好笑，"你寫俾我既信，都係唔係咁講0格"變咗"你send俾我既message，都係唔係咁講0格"。無諗過當年既停車場竟然無被拆或翻新，可以原地原味重現~

PS:以前一定要追住個節目表黎睇電視或用錄影帶機(後期就用rewritable DVD機)黎預校錄影，但而家就可以係網上既APP重溫~

VOLTEKKA~

今晚飯將SKY X STUDIO既宇宙騎士拎出黎入電芯，由於太細粒兼每邊要3粒，結果攪咗好耐(用埋牙籤黎撩)。效果係唔錯，佢係第一個TEKKAMAN BLADE商品做到著光既VOLTEKKA絶招~

其實我尋日至收到老闆娘通知有貨，騎愛駒入元朗交收。好在之前無衝動買千值練果款，今次SKY X STUDIO有埋戰損甲件俾你換，只可惜接合位比較鬆，尤其係頭部兩邊既鰓角。

最近既交收都係老闆娘屋企近，所以搵咗一輪都唔見"新"舖位，直至撞見老闆娘至跟住行去舖位。

PS:中學時代買過一副TEKKAMAN BLADE既模型