出關

今日卒之都可以出關，電單車成個星期無郁動，一於同TMAX一齊出去行下。

手錶因無被佩帶而失去動力，停擺時間亦剛好係當日既早上。

台灣女生帶幸男要去石門踼波，我就無力揸長途車兼影相，唯有兜去燊光自取外賣番屋企食，一嚐久違了既港式奶茶。

晏晝就去綠在屯門做回收，畢竟已有一星期既膠品，紙包飲品及玻璃樽。

夜晚去市中心Ruby Tuesday會合兩母子，一齊食餐好既，以慰勞人家既照顧以及幸男短暫喬遷。台灣女生用會員積分換咗2杯大特飲，幸男絶對喜出望外，Cheers~

今日揭起車冚時，不禁想重演影月攞車(ROAD SECTOR)一幕。大部份閉關期間都係養病休息，打機都無精神，只有休息之間睇吓劇。胃口不佳，褲頭都鬆咗。

PS:好耐都無大傷風感冒過，又咳(咳到多胃氣)又多痰又喉嚨痛(吞刀片咁)兼鼻塞又攰…

BLACK SUN

今晚五點半左右登記好PRIME VIDEO戶口就開始馬拉松式睇Reboot既Black，睇到12點半多啲就衝線完成十集。當初公佈角色時，西島秀俊既穩重正氣與中村倫也既不覊邪蕩，確實令我寄予厚望。

感覺上係以昭和時代Black既大網作深化，哥爾戈姆組織亦由干預政界變成投入政界。雖然故事橫跨50年，但十集既編幅有點過長，令節奏不夠明快。人設既反駁位比昭和既架構更嚴重，硬照既美學未能掩蓋故事流程既不足。如果變成電影版，或濃縮一半集數的話，相信觀眾會更有追看既好奇。

怪人既造型簡陋，好似只係帶住halloween面具咁，配件上亦唔少穿崩位，例如軟趴趴既利爪，有膠品裂痕既蟲腳.....係UHD畫質之下，呢啲瑕疵比以前4:3電視年代既480像素更礙眼。

唔明創世主點解由當初人形比例會變成老年既巨大肚漲老而不，模型亦欠缺真實感，好膠!雖然係由人類改造而成，但設定上要係不飲不食地俾人類搾奶(藍色既精髓液)，又唔會反抗?

唔識發光，帝王石變咗紅綠結石各一，霸氣盡失。以往帝王石寄存在腰帶內，付予世紀王強大力量，但今作二人年輕時將帝王石掏出，咁點解佢地比一般怪人好打呢?童年至初出茅廬時已吸收夠帝王石之力?

臨尾一集至出腰帶儲勁出RIDER KICK，及RIDER PUNCH ，已係十集內最感動既一刻。

其實結局集一開頭就有新BLACK SUN模仿昭和既OP黎播經典曲"仮面ラーダBLACK"，除咗分鏡一致，連字幕格式都與昭和時代一樣。唔知劇組係咪無人識電單車，拍出黎既車速效果仲慢過昭和版本(劇中光太郎同信彥騎座駕時亦然)。

ZO係以電影作呈現，一個鐘唔夠既篇幅，節奏明快，文戲唔會太拖泥帶水。當時怪人外型設定比較立體細緻，係480像素下睇唔出太多穿崩位，反而BLACK SUN係UHD格式下有不少洋相。咁係今次既制作比1993年既差，定係有進步，但跟唔上UHD既試煉?BLACK SUN定為18禁影像作品，除咗拉腸一幕之外，其實ZO既怪人設定仲更加恐佈。

貴為成人向，觀眾當然希望制作較高規格，而唔係停留係小童或青少年向既程度。有政治成份，人性陰暗面，社會撕裂就列入18+??

PS:昭和時代既BLACK有唔少好聽既歌穿插故事，但令和版就只得一首，仲要唔太搶耳或耐聽。

08小隊

今日卒之都睇晒11集既高達08小隊，好耐無睇過sad ending，時下既動畫主角大多可以全身以退嘛!男主角(天田士郎)與女主角(愛娜)成功以EZ8阻止阿普薩拉，以為同歸於盡，字幕彩蛋係執番條命，但男主角少咗隻左下腳，由女主角參扶既剪影作交代。

隔離期間，多時間卧床休息，訓醒又唔夠精神補打BLOG或打機，靈機一觸以電話飛YouTube去投影機黎睇。適逢GUNDAM INFO有08小隊既FULL HD版全集，就飲恨投影機得1080對應之下，開始追看我TRAINING時既高達作品。

08小隊係我打機戰時第一次接觸，<嵐の中で輝いて>主題曲係搶耳既作品。因為前作0083太過耀眼而忽略08小隊，如果0083係大作，咁08小隊就係小品。將RX78既不合規格部件拼砌而成既陸戰高達RX 79G，以應對潛入地球既自護軍力，仲要用實彈作主力武器，20年後睇呢份low-end，倍添懷舊兼真實感，至少唔再係主角爆seed或機體爆seed既屈機向刺激感。

經典相愛很難，聯邦男主角與自護女主角由第一集既對峙演化為同渡難關。於寂靜既太空倒數住有限既氧氣量，等待任何一方既救援而埋下愛意。從來無高達系列用高達黎公器私用，天田士郎竟然用陸高達既激光劍熱力，於雪地創造人工溫泉黎保溫兼談情，佩服。

由上網維基得知有特別篇，於GUNDAM INFO以外既頻道搵到，故事無咩大場面，只係講一年戰爭後，男主角既前部下米奇與游擊隊頭領琪琪一齊搵男女主角下落，最終於北地深山重遇傷殘既男主角與懷有身孕既女主角。

PS:無諗過動畫背後一樣淒楚，神田武幸監督由於身體狀況，只能完成至第6話(原定12話)，其後由繼任監督飯田馬之介接手。即使神田武幸離世，但制作團隊以神田武幸監留下既手記去完成至11話作結。

延續復古風

新既客廳自動翻頁鐘送到，外觀同壞咗既一模一樣，日子同星期天卒之可以正常運作。第一個鐘係2006年係旺角買（？日本品牌），2007年結婚就掛起新居(租)客廳。2016年換第二個，雖然外觀一樣，但品牌已唔同，因為搵唔番。

今次呢個掛鐘就同上一個同品牌，寄望可以一直延續落去，讓時光親切地流動。

36吋影院

今晚一家三口係房訓住睇英超-利勿蒲對曼城，因為今日出咗荃灣買投影機作為台灣女生既生日禮物(後補)。事源早排人家同中學書友STAYCATION，有同學拎出便攜式投影機黎播演唱會助興，結果人家就盟生睡房捱夜波既想法。雖然話支援FULL HD， 但原生只有854x480解象度，近鏡大特寫無乜問題，但遠景之下球場界線會起鋸齒，細字亦唔太清晰。

上網再搵咗好耐，原本定位係BENQ既GV1，貪入門價三千頭，Price.com app問過好幾間都話停產無現貨。唯有再做功課，搵到三千幾既viewSonic M1+，於是係荃灣既訊達科技留貨。店員好好人，俾我即場試兼借WiFi試無線投射功能。

由於即場試過NOW E唔俾smartphone經WiFi傳俾投影機(YouTube就得)，於是買埋條Type C-HDMI線(店員大方地話試咗work至買)，方便連接電話或NOTEBOOK去投影機。

PS:睇到下半場尾段，NOTEBOOK開始無電(因為個芒都要著住)，要緊急接駁火牛插濕電，原來輸出信號比齋播更食電。

幸男12歲生日

朝早起身，簡單梳洗完就落樓下食早餐，自助早餐無咩驚喜，但即叫即沖既泡沫咖啡就真係難得~最鍾意Staycation既幸男，沉醉於耍廢同FIFA 22。話雖如此，笑點低既幸男聽到我浸住浴缸睇<行運超人>既低能對白時，都會笑埋一份。

人家既暗中安排，令我同幸男變咗父子裝(紫衫+黑褲+白鞋)，仲要我哋合照。當年幸男出世時，我著住件Champiom既紫色POLO恤，所以特意揀番紫色衫。原本果件Champiom太殘，已放係衣櫃作文人歷史遺產。Staycation包Tea Set，人家派我同幸男去cafe攞，唔少退房住客都係度等Tea Set出貨。唔知呢度既牛角包係咪出名呢?星加玻辣蟹好似幾吸引~

行番去碼頭，搭船去尖沙咀食晏。
平時黎滬江食晩飯，今日就食午餐，不過都係食大閘蟹餐(幸男已加入大閘蟹隊友)。

壽星仔連續2日食大閘蟹，開心~

滬江既大閘蟹比尋晚既多膏，有滿瀉既視覺衝擊。

回程時，幸男都攰到係巴士洽咗陣覺，話晒尋日放學直接出去staycation。

婆婆傍晚入咗黎探幸男，人家將tea set放係碟架，加埋係市中心買既生日蛋糕，影三婆孫合照。由於晏晝食得太豐富，所以夜晚只係輕食，幸男亦沉醉係PS4既FIFA23時空。

Staycation時，幸男已收到巴塞波衫作生日禮物。12歲了，遺憾無得帶小五小六既幸男去旅行，缺少了童真既回憶及全方位身教既機會。

PS:祝幸褔男孩:"生日快樂，身體健康。"

唔太在狀態既生日

星期五晚大傷元氣，今日自己牛一都無咩精神，午餐係台灣女生係點餐落既老鳯茶居外賣(有我鍾意食既潮州粉果)。

日日都忙住番工同家務，唔記得咗幫幸男買FIFA23!騎愛駒去置樂利寶睇，間間都售罄，得一間話有($529)。明明應該3舊尾，心有不甘要食炒價，託係市中心附近既嘉耀望吓吉之島同華都有無貨，結果都係行番上去食炒價。

夜餐安在家中享用人家既輕食西餐，由於胃口不佳，無解凍生食日本生蠔。

唔太好甜品，人家整咗個雜果啫喱扮蛋糕俾我打咭用，朱古力牌就係尋日中大書友送既生日蛋糕留起既。

PS:人大咗，願望變得簡單，只係想身邊既人同自己都身體健康!