與脚車同行

騎愛駒去葵青工廠區，去交收預訂既抽濕機水箱，無諗過目標工廈附近有骨位，仲要係有吉位-lucky~

舊式工廈，往往令我諗起以前港産片既味道。

上到二樓，跟隨水牌既指引，好容易就去到目標地點。記得以前philips既配件店係旺角，唔知搬到工廠區是否為減省運作成本。

信用咭付款後，將水箱放入行李袋，並掛上後座之椅背。

其實我係出發前，用舊水箱做個演習，試過隱陣至出黎照板煮碗(帶萬用刀既較剪嚟剪尼龍繩)。

成功番入屯門，係華都停一停，上相熟電子店買埋光管番去換。呢排少出車兜風，有籍口可以上高速，都係一件樂事。

PS:舊水箱既裂痕唔顯，但經過一晚就會漏到落內部機底，甚至溢出地板。

成熟男仕的休息日

是日放假，著手玩吓隻THREE ZERO既七海健人(人生第一次買1/6著衫Figure)，話晒著住西裝褸成2個禮拜，一於重演吓上星期集既劇照~

呢集七海既逼力十足，好似北斗之拳咁，諗起對白"係咪對北斗有咩不滿?"。

喜歡七海健人，因為佢完美成熟男仕既設定，道出中年社畜男仕既心聲之餘，照顧後輩既心亦令我共鳴。"這些小小的絶望堆砌起來，才會讓人長大"。

平日早更過後，都真係要訓貓仔覺至回到神，難得今日放假至有力氣赴同中學書友聚餐之約。

PS:師傅安裝好新既洗碗碟機（尋日送貨），舊機暫放花園。雖然係同一model，但模式已有改動。洗杯既45度同40度，分別轉為杯45度洗及65度快洗。

8號風球去聽Jazz

是日八號波，午餐後原本諗住訓晏覺，點知收到康楠短訊，約即興去元朗睇BLUE GIANT，講到音樂班底好勁咁。

輕鐵上無咩人，我可以安心自拍作紀錄。

總站落車上YOHO，商場內都有唔少人，不過大多數店舖都係落閘。

會合大隊，買埋嘢飲就入場(白：我，橙：嘉耀，藍：康楠)，話就話係細院，但入座率都有大半。第一次聽Saxophone可能係動畫橙路裡既阿圓吹奏既一段，之後較有印像既都係Kenny G。以前經過尖沙咀既酒吧，知道有現場表演既JAZZ PUB，但都一直無緣入座欣賞，無諗過會係戲院呢個夢劇院作另類初嚐。

回程係兆康轉輕鐵，當時仲係8號波，但落車無耐就掛9號，場次晏啲都無車番屋企。

PS:每次天橋上望出去車站，都百般滋味在心頭。中四暑假起(除咗住市中心果一年時間)，就一直係呢個車站上落，出入一個又一個階段。

被迫做電工

今日扚起心肝幫廁所既LED燈做維修，因為今次係兩盞一齊閃吓閃吓。

頂硬上拆開黎睇，好在接位有專用配件，唔洗簪餐死，由於屋企無電線膠布，所以用番舊果條綑番佢。

2分之一機率，估中係雨淋上既LED燈死火牛，並成功以之前既壞燈之舊手作替換，無謂嘥咗新既一set嘛。

PS:本人一向好怕自己DIY，一黎無耐性，二黎讀書時代起已經係手工差........

Happy Birthday To NAM

大閘蟹季節，亦即係我哋既生日月份，今晩一家三口去滬江食大閘蟹餐。

每年都係食同一個餐，每次都要(真)相機合照。

蟹粉翅真係得呢度先至有咁出色~

雖然個餐包一個蟹粉小籠包，但都另加一客五隻。

列隊出場，幸男己由唔鍾意食蟹，變到成為蟹饕。

“假笑”提示之下，幸男瞬間重拾童真。

每次都好奇佢哋貨源係咪靚過自己買既貨？真係要試吓唔同既零售商號先。

食得開心滿足，埋單就直接行番去巴士站。

番到屋企就由人家向幸男呈上禮物盒，幸男認得相中人，正係Switch版Captain Tsubasa裡面既自己初稿（原創角色-東邦隊）。

明明已收PS5同FC24，仲有乜禮物收？當然係繼巴塞同聖日耳門之後，國際邁亞密既美斯波衫。唔知會否有一日，幸男會因覺得老土，而廻避家庭合照呢?

"Happy birthday to you~"，幸男吹蠟燭吹得太快，呢張實係NG相。生日蛋糕有小插曲，話說送貨已晏過預定時間（搞到我要先出門），仲要13變咗係12……結果人家要好似賭神劇情咁，變隻3出嚟（將條2搓成3）。

幸男忙打機，我就拆變形金剛嚟玩。變形金剛兼係翼龍，呢隻Swoop我細個時已好想擁有，今次第三廠NEWAGE既出品絕對係好過晒之前既正副廠作品。

最欣賞佢個身可以係人形狀態下擴濶，仲可以巧妙地將翼龍腹部既前甲變成胸腰兩側既遮醜板。

原本只係去Action Robo交收預訂既老變，但由於係Carousell見到有七海建人既three zero現貨，所以忍唔住過埋去信和8樓望吓。

真係有現貨喎!雖然努力俾自己冷靜吓，先放低，再行出去升降機位置諗吓先，但結果都係行番入店內乖乖課金。

Happy Birthday To LIM

今年台灣女生日，我親自揀咗對面海既ALUX西餐廳慶祝。以往都係人家揀餐廳，我純做金主，當一次過食我同佢既生日飯。由於尋日人家安排咗一家三口出街食，所以無得唔親自嚴選……

雖然只係網上搜尋，但內飾及服務都唔差。望過餐牌同聽過侍應既介紹，安心邊食麵包邊等上菜。

人家揀4 course dinner menu，我就揀5 course dinner menu。

高級食材向，blue lobster carpaccio-藍龍蝦刺身，清新得黎又鮮味。

大家都揀咗龍蝦湯，記起以前A完去市中心食意粉屋一定會轉酥皮龍蝦湯。

碳水化合物選項，我揀咗油封鴨意大利飯。

人家繼續偏好海鮮意粉。

主食大家都係揀咗M8和牛，補錢都係值得既～

預約時表明係生日飯，所以人家享有甜點拼盤作生日祝賀。“生日快樂”，每年既重覆，亦係來年既期盼。

行出去時至發現係煤油氣燈果條舊街樓梯，但話因2018颱風山竹冧樹而砸爛，而家見至既都係復修版本。

幫台灣女生影幾張人像照，漸進鏡下望電子觀景器無以前咁得心應手，勉強有張恰心意既檔案。

自拍交俾Flip 5，用落咗真係好滿意其攜便性，至少比其他智能電話既自拍來得高像數。

番到屋企，幸男既PS5啱啱成功完2個鐘既FC下載，可以試玩高質足球game。

PS:幸男可以預支生日禮物，其實係雙親於家中等收LOG ON既網上訂購，兼插定晒線，方便準壽星仔可以自行下載數位版FC。