台灣女生愛看愛情小品

愛情+絶症=感人,呢條formula沿用多年,但女仕們往往就係鍾意,包括台灣女生.喜愛彈結他同唱歌既女主角(歌手YUI)患有XP頑疾,不能接觸太陽紫外光,否則會破壞神經元.女主角要係入黑後至可以出外,坐係小廣場自彈自唱,與正常學校社交生活緣絕.

每朝從房間窗口望見熱愛滑浪既男主角,意外地係入黑後既街上碰上,二話不說就介紹自己並暗示對男主角有意思.

二人迅速相戀,即使知道女主角病情惡化,男主角仍努力工作,籌錢幫女主角係studio灌錄個人cd.病情晚期,主角著住保護衣去沙灘睇男角玩滑浪,依然努力去生活,結局當然係令人傷感(本人例外)~

熱血回歸,暴力升級-日本制品,畫像升級

今日番完個幾攰既夜班,番到屋企訓到近一點鐘至醒.食過台灣女生煮既外母牌餃子,就出去巴倫紐同德輝一齊睇史泰龍既RAMBO熱血回歸.

由於龍伯一把年紀,電影既拍攝手法偏向暴力,以搏取觀眾既入場意欲.龍伯帶領住一班僱傭兵深入緬甸內亂之地,營救被俘擄既人道救濟隊.除咗反派既殘暴惡行及血肉鏡頭外,主角經典射箭殺敵,污糟貓潛入,刀仔劏死牛,炮台機槍掃場都同場上演~~

雖然擺明係添食作,但劇情都總算無咩冷場.個人英雄主義,回歸原點,簡單裝備,隨機應變,睇睇吓發覺唔知METAL GEAR SOLID既snake係咪都係原自rambo呢?

睇完戲就同德輝分道揚鏕,自己去咗買條HDMI線.Blue Ray碟又貴又未有得租,唯有提升HDMI線既規格.原身部DVD機可以將DVD推到1080i,加埋呢條線,畫面層次感果然好咗,我仲特意用秒速五厘米黎比較效果添~~

訓覺前同台灣女生一齊睇租番黎既花鼠明星俱樂部,造型得意,輕鬆搞鬼.

ps:好記得其中一隻花鼠邊俾男主角既玩具機械人追,邊大叫"crazy robot".

不是一切的終結,只不過是變化的一種

被譽為最接近神既處女座沙加,六歲就參透到死不是一切的終結,只不過是變化的一種.

親身體會過好友既離去,最後既一程,兄弟們都以心出席.係呢一兩日,心真係好攰....儘管可以做既唔多,但相信在彼端既好友,會感受到厚厚既情義.

摺元寶,望遺容時,眼淚從心湧出來.一眾親友邊叫住名字,邊目睹紙品逐一被抛入火爐,我的雙眼真的有點紅腫,視野有點變矇.幸好身邊既太少一個搭膊,讓我回復過來,活著還有很多要做的事情.

今日番早又番夜,雖然心情不大在狀態,但畢竟工作還工作.重拾心情,努力面對人生往後一個又一個既階段,以及每一個變化.

ps:永遠都係好兄弟!

三號風球過後的星期日

三號風球後天色開始好轉,今朝放工係的士站見到區旗飄揚,仲搭正以前住過既quarter,於是就影低咗落黎.

近一點至訓醒,食過簡單既晏晝,係無線見到"師兄撞鬼"呢齣舊戲.雖然睇過,但都係邊睇邊笑,可能重拾細個時既感覺卦~~細個好多時都係睇姑媽翻dup既港產片錄影帶,所以睇咗好多戲,同愛上睇戲呢個娛樂.

  夜晚同台灣女生去置樂望吓Wii軚既價錢,點知賣到$168,比定     價$120貴.之前買咗個$150已經係貴咗啲,一心去賣$130嗰間,     點知又無貨.....

最終係市中心間鋪頭見賣$170,唔想行番轉頭,唯有就範.....睇黎真係俾奸商炒起咗個價...........不過算啦,總算可以同人家盡情雙打~係市中心行多陣,去delifrance食埋個晚飯,就番屋企"鏈"車~

完成50cc賽事

經過三日既努力,凌空咁拎住個Wii Handle係咁左轉右轉,以及台灣女生既打氣同客串落場,卒之都奪得50cc賽程8個冠軍金盃!

感覺上Wii版既MARIO KART係較NDS難玩,電腦既能力都係強勁咗,而且唔可以個個彎都可以跣軚捽火.

相信完成往後既100cc,150cc同mirror賽事後,一定會更多角色同我一齊影大合照~~

Wii 軚

今日騎住愛羊做咗好多嘢,剪髮,買糧水,送台灣女生番工,去卓爾居kfc買外賣午餐,入元朗攞game兼set機,番屋企試機,去泳池游水,最後就係去置樂相熟商場買人家手中拎住既Wii原裝軚盤~~

之前人家係網上見到Wii既瑪莉奧賽車既CM時已經好有興趣,一黎係nds玩過好好玩,二黎可以凌空拎住個軚盤玩,好搞鬼.

騎羊接人家放工,番到屋企見到茶几上既Wii remote已篏入原裝軚盤,人家受唔住誘惑,涼都唔沖住就開機玩~~

人家玩到又叫又笑,我當然有落場雙打啦!用軚盤真係易操控同好玩啲,睇黎我都要買多個原裝軚盤........

下雨天

踏入雨季,好多時都會唔方便開車.放工好攰咁去市中心食晏同行陣買啲嘢,跟住就番屋企落貨同訓陣.

點知六點訓醒時見天黑黑,仲倒水咁落雨,唯有取消騎羊入元朗睇Wii既game碟...安在家中炒個菜,煎包雞肉串燒,煲碗飯,一個人電視兼nds七巧板game餸飯.

食飯時見停咗雨,諗住食飽就騎羊番工司接人家放工,點知臨出發又再落雨,唯有send個短訊俾人家,就番時間係輕鐵站等.

ps:今日條頸己經好咗好多,進展比預期好~~

第一次用膏貼

係頸患既困擾下,尋晚係張床度訓都要平訓,郁動都係好痛.今日負傷番工,無力行出去搭輕鐵,更加無力騎羊(回唔到頭望後),唯有搭的士番工....上到工作間,俾傑傑大力捽咗幾嘢,好似鬆咗啲,繼續開工.

夜晚人家幫我捽患處,平時唔受力既我,出奇地唔覺

痛,可想而知我條頸有幾痛....之後貼埋人家為我準備既日本品牌膏貼,咁大個仔都係第一次用.

我仲記得細個時,老豆訓"黎"頸,係藥房買咗啲"麝香"膏藥貼黎用.點知貼咗之後條頸痛多咗,仲硬晒添,最後要出番去油麻地睇家庭醫生,番黎時帶埋個頸箍...所以咁多年黎我都無用膏貼.

好在貼咗之後都無出事,感覺係舒服啲既,希望可以快啲好番啦.

ps:唔通新頭盔個拉花太惡,自己受唔起??

PIERSIDE

雖然晏晝準備戴新盔出羊去接台灣女生放工時扭親條頸(新既頭盔比較貼面),但係人家既力邀之下,我都出咗去人家book咗枱既pierside食晚飯.

今晚我地以某信用咭享用半價set dinner,見個menu有個蠔表內既價錢都同係city super既價錢一樣,於是一人兩隻(不過最初想試既法蘭西生蠔,俾人叫晒...).

由小食到主菜都幾好食,尤其係主菜既牛扒,order五成熟,出黎真交足功課,啱啱好,好食又嫰滑,再一次證明自己係屋企煎得一般......

原本我地諗住係上層食完飯至落下層搵emma,點知坐低無耐就俾emma認出並同我地打招呼,於是提早移師到下層,邊飲酒邊食飯,仲有英超睇添(有人家前愛將owen落場踼).當年既求婚組合,再次呈現,當然要影番張相啦~

多謝emma既照顧,long island仍舊令我再三回味~多謝人家特意揀呢度俾我可以放鬆吓近日既心情.

ps:臨上巴士人家都係有啲"不適",再一次不勝酒力.

彼端之好友

事情已過一星期時間,搭正十二點鐘.就走去雪櫃攞罐TETLEY'S出黎.

以往既老地方酒局,第一round總係叫TETLEY'S.雖然往後既酒局飯局人數少了一位,但兄弟們永遠都會記起你.

你還記得碰杯的說話嗎?

everything will flow

Watch the early morning sun
Drip like blood from day
See the crazy people run
So many games to play
See the blue suburban dream
Under the jet plane sky
Sleep away and dream a dream
Life is just a lulla ba bye

Ah ha hahaha
And everything will flow
Ah ha ha ha
You know everything will flow
Ah ha ha

Watch the day begin again
Whispering into the night
See the crazy people play
Hurrying under the light
A million cars, a million trains
Under the jet plane sky
Nothing lost and nothing gained
Life is just a lulla be bye

Ah ha hahaha
And everything will flow
Ah ha hahaha
I said everything will flow
Ah ha hahaha
You know everything will flow
Ah ha ha

Ah ha hahaha
And everything will flow
Ah ha ha ha ah
You know everything will flow

The neon lights in the night tonight will say
"Everything will flow"
The stars that shine in the open sky will say
"Everything will flow"
The lovers kissed with an openniness will say
"Everything will flow"
The cars parked in the hypermarket know
Everything will flow


PS: http://www.youtube.com/watch?v=kAwcu8-af5I

永遠都係好兄弟

19歲認識你,宿友,同學,兄弟,仲係我既大日子擔當兄弟.咁多年黎,除咗飲飲食食,大家有無數既回憶,分享過好多個晚上既酒杯話.

一向都知你孭得太多包袱,一向都知你唔太喜歡向唔熟既同事或朋友講得太多自己既事,兄弟們往住都為你擔心,總係想為你分擔多一點,開解多一點.儘管別人唔了解你,唔明白你背後既擔子,但一班兄弟都係亙相扶持著.

今朝收到Sylvia電話後,真係有啲驚,唔會卦?尋晚收工時仲見到佢趕去補簽名攞PC,仲走上去攬攬黎,夜啲講電話仲好地地...會唔會又係唔知醒番工或都係記錯番工時間咋?手提打唔通,陸續既電話同消息都係話俾我知,應該係我既兄弟出咗事.

交完更俾小星星,就趕住去更衣室換衫,搭輕鐵去華B屋企,買個吉野家外賣上樓食,味道係點都已經不再在意,只係想快快填包個肚,一齊上去搵世伯伯母屋企安慰同了解吓.早餐鐵膽係輕鐵站等我地三個人,離遠見到佢摘下眼鏡,倚傍路邊欄杆,用手擦著雙眼.

整日都強忍住眼淚,番到屋企個人好攰好頭痛.係相簿睇番舊照,真係無諗過會咁樣分別.如果無事發生,今年十月我地就相識十個年頭.最終係沖涼時忍唔住,喊咗出黎,任由花晒沖走眼淚同鼻水,如果我無記錯的話,今次係我第三次為男仔落淚.

願你可以得到息懷,我們永遠都係好兄弟.