腸抽筋

今日卒之都頂唔順要食台灣女生煲既瑤柱粥黎養病,星期六夜更突如其來既腸抽筋(好在好同事們幫忙同照顧),確實令我既胃口很差,只係以保礦力黎續命.............

朝早book咗staff clinic十一點九個字,但要等到十二點九個字至有得睇,要sick leave一日,真係好耐都無試過痛得咁緊要.

痛,食藥,訓覺,痛,食藥,訓覺....................

ps:對上一次痛到要打針都好似係剛畢業既時候

望穿秋水,油價回落

油價升咗咁耐,卒之都等到油公司話減價呢一日.趁佢未話加番價,今朝游完水就去相熟油站為愛羊加油.

入完油,check呔氣時,有兩架警車入站加油.其中一個軍裝落車行過時,話我架羊仔保養得好~

可以錄高清電視節目啦!!

番完早更,騎羊去市中心,去乾衣店放低西裝,係茶餐廳食過下午茶後,就去買個外置harddisk黎錄電視節目,不過就波折啲.

原本諗住買buffalo牌子,但電腦店職叫我打去問吓機頂盒既代理商,睇吓可以兼容邊隻品牌既硬碟,仲要問埋最大"極"數同需唔需要外置電源.因為之前有啲客買咗之後至發覺唔能夠被機頂盒確認.

啱啱至順便將機頂盒既保用證寄出,無得睇番個客戶熱線,台灣女生又唔係屋企,無得check番張單,唔通要番屋企再出過黎買?突然諗起樓下就係相熟電子產品公司,於是搏吓佢有無賣我用緊個款機頂盒,結果bingo!仲攞埋個客戶熱線黎問嘢.

原來好多機都唔夾buffalo既hard disk,代理商公司客戶熱線既哥仔建議maxtor basic2.5吋,因為好多客都無話有問題報告.

最後我就揀咗最低容量既160G,但番到屋企都係確認唔到,於是打去客戶熱線詢問.動用USB手指黎下載網上既最新軟件,再插入機頂盒進行軟件升級,臨尾再用機頂盒format埋個hard disk,咁就正式可以錄高清電視節目啦~

夜更後的感歎

番完夜班,幾唔開心吓,因為就算做好自己既工作崗位,都唔會得到應有既尊重同認同,話到尾,工作性質都係中介兼輔助性質,只係某一個專業既副手罷了......

訓醒咗出咗去省城,台灣女生放工後係旺角集合.相熟既玩具商場變咗唔少,有啲店鋪都執咗笠.

係一間鋪頭見有一個lego巴黎鐵塔,要成$2680..........係另一間問到有gunbuster既超合金,要$1980..........當然係無買啦,不過城省啲款真係新啲同多啲既.睇完一輪玩具,心情都未能平復.

由於用開既lafuma背囊開以有破口,於是行咗運動用品店.新既lafuma款式唔太啱心水,結果買咗個較重身同沉色既proaston背囊.係風月堂食過晚飯,就同人家番屋企.

ps:又一次諗起預科時代既pyhsic老師講既一番話"就算你而家點都好,出到黎做嘢,你一定會馴晒"

有心思的Batman電影

番完早更,騎羊去凱都買蝙蝠俠戲飛.兩點半多啲到,但七點八個字個場已經係半滿,正中央好位置全被吞併,得番超前同超後位,兩傍就仲有少量中後位,位置應該都ok.

食埋個吉野家,番屋企幫羊仔打腊,已經夠鐘趕番戲院.大堂人山人海,有之前睇蜘蛛俠第三集時既場面,可能都係大熱之作,兼且係第一日上嘛~(連小食部條隊都長啲)

雖然今次既故事奸角小丑同雙面人係之前既batman電影出現過,但感覺以及背景係完全唔同,編劇同導演真係好厲害!!

小丑除咗作風大膽外,仲充份利用人內心黑暗既一面,例如一開始就利用同黨既貪婪令其自相殘殺;利用市民既驚恐去迫蝠蝙俠自首......戲內除咗精彩既特技,仲描述咗好多人性既一面,令每一個角色都係有血有肉,絕非一般既大英雄主義電影.

免首期供電單車?

樓盤為咗促銷,往往會有免首期計劃黎吸引買家上車,但無諗過電單車都會布免首期供車~

心水清既朋友會知道,免首期計劃其實無之前既特定信用咭分期免息計劃咁爽.以表中最底既DL1000黎計,$80800車價,分12期$7171 X 12 ($86052),即係分期要俾$5252利息(6.5%),但都係要供足十二期供款.不過,落單至到攞車呢段期間,原來都要俾按金,要閣下攞車當日至全數退回,出車既朋友真係要搞清楚數目先.
車款眾多,有興趣的話就上http://www.sbs-technology.com/index01.htm睇吓啦~

你高清咗未?

今日傍晚搭輕鐵入元朗搵德輝介紹既店舖買部高清機頂盒.事源係最近翡翠台收得差咗好多,落雨天就更加嚴重,但唔知點解本港台,國際台,以及明珠台就無咩影響.反正就黎有奧運睇,於是把心一橫,買隻機頂盒.貌似任劍輝既老闆娘好有心機咁介紹,而且仲俾個好價錢過我添~

今晚外母大人上門一齊食飯,台灣女生親自下厨,四餸一湯.番到屋企,啱啱好有得食~~

食完飯,人家幫手拉起電視黎方便我駁HDMI線,咁就睇到高清畫面,又真係靚好多喎~雖然好似好多台,但其實唔係每一個時段都有高清節目睇,而且有啲台一日只係有幾個鐘係有節目.就算高清翡翠台,九五時間都只係不斷以交易現場及創富坊交替黎填時間.

如果閣下想買機頂盒時,最好先上網check吓高清頻道既節目表係咪啱心水先~~

ps:人家發覺自從居住地區開始有高清頻道覆蓋起,翡翠台就收得差咗好多,唔知大家有無呢種情況呢???

DN-01-觸不到的戀車

之前係日本既honda網站一見到呢部DN-01就好鍾意,簡直係我既dream bike.除了擁有首度投放在電單車上使用的HFT轉子波箱之外，還有齊PGM-FI電噴系統、HISS晶片防盜系統、ABS防抱死煞車系統和CBS聯動迫力系統,600cc包圍大車外型又靚仔到爆!!

HFT技術令DN-01可以使用自動變速及加減波。HFT共提供三種運作模式，分別是D Mode標準自動變速模式、Sport mode運動模式及加減手動轉波模式,真係好鬼正!!

之前計過YEN價,都要成近十萬港紙,但最近見香港HONDA代理燦記放係網上既預訂價係13萬8千銀.........DN-01係05年第39屆東京車展以「Discovery of a New Concept」概念車展出,估唔到真係可以研發成功!

係日本既本田網站除咗CATALOG有詳細既介紹外,仲有漫畫形式介紹呢台劃時代既重型電單車~~~

DN-01對我黎講係"觸不到的戀車",車價太貴了,如果我中咗六合彩的話,我一定會將佢收入門下,好好咁照顧佢(希望現任拍檔SKYWAVE唔會呷醋啦~)

http:/ / www.honda.co.jp/DN-01/ movie/ index.html  

ps:睇黎SUZUKI係大車系列真係要急起直追,現役既B-KING都唔夠DN-01殺食!

天氣反覆

朝早番工時見天色都唔錯,仲有太陽添.呢排成日都落雨,搞到要預早啲時間出門搭輕鐵番工,唔通聽日就可以騎番羊仔代步?

放工同台灣女生搭960出上環global wedding搞相簿事宜.正當行去巴士站番入屯門時,突然橫風橫雨,要同人家衝入前幾步既ok避一避雨,兼攞番把遮出黎.好在因番完早更太攰,打消咗去行去買嘢既念頭,如果唔係就會又多一對鞋被浸濕............

教練結婚,七子結集

今日係教練結婚註冊既大日子,我地圍內幾個當然請晒假黎觀禮兼食飯啦~一對新人係紅棉路既婚姻註冊處行禮,仲係香港公園影相,攝影師由教練個阿頭henry擔當,而楝哥就客串做副手,志偉就肩負video man一職.天晴既日子,啱晒影相兼大好日子,不過真係幾熱吓.......

七子好耐都無咁齊人,當然要同阿嫂影番張相啦~唔好見我地咁抵得熱,其實一唔洗影相我地就除外套兼走番入註冊處過冷氣河黎降溫.

好友大日子,特意買番套新既直間西裝,配埋條呔添,幾醒神o架~五年幾前既西裝已經係有啲唔啱身,可能自己肥咗同乾洗得多......一對新人影多陣相,就打的去萬麗海景酒店同有份觀禮既親友食自助午餐.之後我地去咗IFC睇街頭超人,除咗wing fung要車世伯同伯母番入天水圍,志偉要番公司外,大家都一齊去,台灣女生同david嫂當然都去埋啦~不過一對新人可以係中間時間睇戲,真係幾盞鬼~~~~大家都覺得麻麻地,我就覺得殺神特工好睇好多.

夜晚個餐係富臨門酒家同一對新人及同事食飯,我地圍內人士早少少去幫手做簡單佈置同夾下進場花炮及祝酒.人家對oscar同thomas呢對孖仔好好奇,我特意影番張相,等過幾年考吓佢分唔分得出邊個打邊個.

大家都祝福一對新人,唔知下次係邊個結婚呢,而家已經有3/7係有家室lu~~

係敬酒環節,小弟連同oscar,wing fung,外援jimmy都為擋酒系統出力,但無諗過志偉都出擊,仲要係連續飲三杯紅酒都無事,底力驚人!!(好似機戰大佬啲HP係????????咁)

大家都盡興而歸,我同台灣女生跟一對新人,以及JIMMY坐的士番入屯門.番到屋企就攤係梳化,好在有人家既照顧~~~年紀大,不勝酒力,而且跟足全日,體力消耗太大.......

子彈"曉"掟彎

今晚同台灣女生係凱都睇"殺神特工",動作,特技加靚女永遠係咁吸引,之前係電視睇既trailer已經好想入戲院睇.

呢齣戲既賣點係子彈曲線行走(如果打war game時都可以令粒彈行曲線就好了),以及超乎常人既眼界,觸覺,同体力.

故事整體流暢同刺激,只係最後結局有啲草草收場,多一點鋪排心思就更加好了.

ps:外界將呢齣戲同matrix相提並論,其實都有唔少相同之處,例如:預言,違反常理既特技動作,以及男主角由初哥變成皇者.

家居維修

藍天白雲,放工無得去游水,一黎要番夜班,二黎要等鑜匠上門幫忙.話說今朝早番工出門上鎖時,發覺既唔可以將匙膽扭去上鎖,又唔好以扭去開門.好在我同台灣生都無漏等銀包電話之類,於是照騎羊番工.

臨收工時約咗業主介紹既鎖匠上門,於是放工食都唔食住就騎羊趕番屋企,係門外等師傅駕到.點解次次好天游水時我都係有嘢忙,或者有突發事情呢??

等咗十分鐘左右,收到鎖匠既電話,開閘俾佢入黎,又真係估佢唔到會坐cb250黎開工.鎖匠話門鎖內既彈弓壞咗,所以又開唔到又鎖唔到.開鎖收兩舊,裝鎖收五舊,只係用咗個幾鐘時間,真係幾好搵吓..........

收拾地上既木碎,再吸塵,成四點至食外賣雞脾薯條,再吸埋屋企其他地方,至沖涼訓覺,真係好攰,不過好在有人家打點夜晚個餐啫~

ps:連鎖都壞,唔通要用碌柚葉水黎拖地兼抺屋?