戲院睇好戲,家中打邊爐

一時之間，幾乎形成一種空氣，甚至是一種壓力，一種誘惑如果誰沒有到圓通山(大戲院)看花(阿凡達)，就好像是一大憾事，不得不擠時間，去湊個熱鬧....

同事們朋友們,一見面都係問"睇咗阿凡達未?好正呀!睇多次都值得!"今日番完早更,趕搭輕鐵去新墟吉野家同台灣女生食飯,跟住就乖乖等入場.以往戲院咁墟冚都係蜘蛛俠3同蝙蝠俠-黑夜之神,上映既時候.

故事大家都知,因一次意外半身不遂而被迫退出軍隊既男主角Jake Sully（森禾霍頓飾）承接去世雙胞胎哥哥舊業-實驗計畫去到遙遠的星球Pandora。後來為咗治療傷患既脊骨,回復下半身活動能力幫助一間企業開採價值連城的礦產。要應付 Pandora 危機四伏的環境，Jake 必須讓意識進入一具由 DNA 培植的驅體「阿凡達」之內，化身成身高 9 呎的土著外星人Na'vi。

Jake透過「阿凡達」重生後再次健步如飛，但他進入Pandora異境不久旋遭巨型外星生物襲擊，幸得Na'vi公主Neytiri救回一命。Jake與Neytiri漸漸互生情愫，更意識到人類對Pandora環境造成禍害，此時Na'vi族人與人類的世紀衝突一觸即發，末日浩劫即將淹至，處於兩難的Jake要在情義間作出決擇。

我諗薛歌妮韋花(Sigourney Weaver)自己都無諗過繼異形之後,事隔30年,又再可以與占士金馬倫合作兼係大銀幕再與觀眾結緣~

當播到男主角決定帶領Na'vi族人對抗採礦公司之軍隊大叫"this is our land"時,即刻想起早幾日係報紙見到既相~~~

今晚我地邀請外母大人黎打邊爐,令次卒之都人齊開開心心咁食,當然要影番張相啦~~(上次做冬個次打邊爐我腸胃炎,無咩點食到,好快就番入房抖)

ps:有勞人家尋晚行完街,買定飛,兼且今日準備定火煱材料~

シド(SID)

留意到呢隊日本組合,因為最近睇既兩套動畫,<黑執事>OP同<鋼之鍊金術師FA>ED,都係佢哋既歌~

唔知點解好多時動畫選用既歌都係較好聽同搶耳,好似之前GUNDAM 00既PROTOTYPE(石川智晶)

上網聽過SID既歌,除咗モノクロのキス黑執事(註1),嘘<鋼之鍊金術師FA>(註2),本人覺得夏恋(註3)都唔錯!

註1:http://www.youtube.com/watch?v=6F7sw-AyoZ8

註2:http://www.youtube.com/watch?v=GRCp8n-n2lk&feature=related

註3:http://www.youtube.com/watch?v=megi-V_Rvtc&feature=fvw

逼逼地企住先...

今日係屋企悶悶地,於是拆開之前買落既VF100"S黎擺post同安放係display箱裡.
由於玻璃display櫃,早就滿座,所以一直都放係盒內.其實仲有架隊長機未擺出黎,當初諗住只要等埋架綠色偵察機,就可以儲齊skull小隊,點知到而家都無聲氣會出....
最近仲話開另一條1:100HiMetal系列添,睇黎SKULL小隊重現無望了.......

早更後的平安夜

平安夜無咩特別節目,我要番早更,台灣女生放假,於是係屋企開香檳食飯慶祝~

材料係人家朝早睇完中醫去吉之島買既,我放工只係番屋企兜人家出卓爾居太興食晏.

其實枝香檳係夏天巳經趁特價買定,因為人家鐘意香檳,但飲落又真係有啲甜到"膩",加上酒味較強,所以大家都唔係好飲得多.....呢一兩個星期同人家既更期唔夾,所以唔可以提早出街食,希望一月會多啲時間出去行吓,唔洗咁悶.

今日租咗兩齣戲,第一齣港產片-竊聽風雲,故事麻麻地,好一貫既穚段,好人執勸期間,因一時貪心而一身蟻......

第二齣係西片-吸血新世紀,迷倒萬千少女既男主角,對於我黎講當然係唔過電...故事一般,唔吸人血既疆屍,咪同港產片"千機變"差唔多,只係愛情為主線,而唔係疆屍獵人為民除害.女主角樣子唔吸引,特技"雞雞地",睇到中途訓著咗,臨尾醒得切睇ending15分鐘.

ps:今年無為人家準備啲咩禮物,希望人家唔好見怪~~

拳四郎

好耐都無買玩具俾自己,苦等多時,拳四郎figure卒之都到手嘞,當然要擺番個型post~兩舊水有找,手工ok 既,美中不足係心口同衫領接口附近既色怪怪地同有白色點.其實大家有無發覺到,自從啲玩figure係晒大陸造,係選購時都見唔少"次"貨,真係眼力少啲都出事(我上之買vf100'架藍色機都係).要望穿反光又有少少花既膠片黎搵出端倪,運氣真係必須.......

之前revoltech都有出過拳四郎既fugure,但係上身赤裸既造型暴露晒啲關節位出黎.

今次呢款修羅之國,就無咁礙眼,而且有風鏡兼手套.好期待可以買埋架啱size既電單車俾佢,擺番個鐵騎造型~

諾仔百日宴

計係上黎,上一次抱bb已經係十年前(yr1),今次抱既係阿潘同yoki既小朋友-諾仔~~一向我都好怕小朋友喊,我邊抱邊對住諾仔講"唔好喊呀,我地係世交黎0架",好在小寶寶都無喊到~~(不過我真係抱得好唔自然,人家笑我個身僵硬晒)

一眾宿舍兄弟,當然要影番張相啦~雖然唔似得宿舍時代,朝見口夜見面,大家各有各忙,但每次既聚會,大家都係咁珍惜.黎緊下一個抱BB既爸爸,就係percy,唔知會唔會都搞百日宴呢??

諾仔成晚係咁望天花板既燈,連影蛋糕相都係望向上面.希望諾仔快高長大,健健康康,大個咗都會記得我地一眾"叔父".

西洋住家飯

雖然太太唔係洋妞,但我地久唔久都會係屋企食西餐~

澳洲和牛牛扒加凱撒沙津,配以法蘭西紅酒,準備功夫少,人家最喜愛~同樣既嘢食,出街食的話,就會貴好多,所以我地揀係屋企享用,特別日子就例外啦.

今次支紅酒幾特別,唔會覺得酸,以及太烈既酒味,葡萄香同酒味一入口,好快就淡化,係口中停留(唔通真係一分錢一分貨?)通常一支紅酒都要分兩日飲,因為人家唔太飲得多(半杯左右),剩低既我會倒入一個細支裝既吉樽裡(減少樽入空氣對紅酒既影響),再加上保鮮塞,留番第二日再飲~

ps:宜家我只係會追有攞奬既品牌黎買,因為之前撞唔少板.......

無公德心

今晚番夜班,一入更衣室就見到好糟糕的情況.......雖然係公用地方,但基本公德心點都要有.你話扔垃圾唔中個桶,係桶邊地下都話丫,而家簡直係亂咁隨地扔.

孖O第二天

原本呢個後座,應該係載住台灣女生番屋企,點知..........朝早起身臨出門口時send短訊俾人家,係公司等咗四個字都未見人,於是再send短訊,點知人家打俾我話已搭的士番屋企.....(見到愛羊唔係屋外,於是打俾我問係咪出咗去).原來人家放工無睇真電話短訊,一離開更衣室就走去搭的士,而當時我係外面食住風黎等人,真係向左走,向右走............

晏晝人家訓醒,就一齊換衫出沙田,第一站係triple o食晏,咁大個仔都係第一次食成$60既快餐.

個包好大隻,高到好似老麥既巨無霸咁,食完個包都好頂住,所以啲薯條都係唔晒,結果打包拎走~

跟住我地就行商場睇衫,結果又係uni qulo買嘢,係一田撞到mathew,係超市排咗好隊買特價零食,晚飯就係幫襯博多(行得太攰,無影低食啲mug)~

ps:今日係city super買咗hoegaarden禮盒裝,因為有隻330cc既杯送~雖然無平時酒吧既500cc咁大隻,但係屋企飲細支裝就啱啱好~

RS TAICHI@阿林

今日番完早更騎羊番屋企,食咗個飽就同台灣女生搭車出土瓜灣阿林睇電單車褸.舖面寬敞,職員哥仔好有耐性咁介紹同幫我試著,最後揀咗呢件RSJ226,原價$2020,特價$1730,約85折.

呢毎件褸既賣點係all season jacket,本身已經包埋內裡既保暖層,確保冬天行車都可以挺起胸膛.不過袖口位係以魔術貼黎調校寛緊,無R&R既魔術貼配半橡筋袖口咁方便,需要時間去適應(真係好唔慣要捲起手掌慢慢除隻袖........)

其實幾年前買落既ROUGH & ROAD電單車褸都係all season jacket,不過當初係安定買既時候,保溫內層並唔係包埋,要另行購入.當想買埋內層時至得知該店並無存貨,需要向日本訂貨,計埋運費都要近一千蚊,所以一直都唔捨得訂購.直到舊年金融海潇,日元持續高企,安定就再無入新貨兼幫客人代訂.

係阿林見到有XENA既碟鎖,但無用開既10mm,只得14mm.好在場內有架03年 skywave 400,哥仔試過可以扣落隻前碟,雖然我個架係250,但頭輪一樣大,兼一樣係單碟,理應一樣可以,於是買埋.

服務真係好緊要,店員能夠俾到貨品正確資料同客觀意見,真係可以令客人買得放心同再次惠顧.前幾日問安定舊電單車褸型號配內層要幾錢,點知店員點都係話我個件唔係all season系列,無得配.明明舊年都同我講有得配(件褸釘住大大個all season牌),只係yen價高,唔幫客代訂.....睇黎往後我都係會換陣係阿林入貨,話晒定時轉款兼齊全嘛~

TETLEY'S杯

今日行過百佳,見到有tetley's既禮品裝賣,送既竟然係啤酒杯,當然要入番盒貨啦.

之前買落既啤酒杯只可以容納普通細罐裝同細支裝,但遇著440ml既tetley's就要飲咁啲再翻斟.最衰佢唔係好似包裝盒show既隻杯咁係金色字,如果唔係就更靚(我記得係黃金星群地中海用既杯係金色字)~

ps:係元朗經過呢間酒吧,令我諗起中一時既花名"酋長"(因為中史堂講部落),當時並唔太鍾意呢個名,更向同學嘈咗一陣,之後就接受咗呢個名~

擺酒兩週年

今日番完早更,坐percy順風車到新墟,目的係幫抱病既台灣女生買粥同去攞訂好既花球.人家一開口就見到花球,當然開心啦,可惜人家作感冒,要食粥同係屋企抖吓.

輕鐵轉西鐵,一個鐘就到磡,今晚係海灣軒海景酒店地下既灣畔餐廳打邊爐.

人家揀咗姬松茸黨參湯底,而我就揀咗四川麻辣湯底(因為我問侍仔可唔可以少辣,而佢話其實唔係太過辣),除咗一般配料外,呢次既主題係星級火煱,包括安格斯肥牛,膏蟹,海斑,帶子,花蚌,桶蠔~

每位客人均有一隻四両重既大閘蟹,見遲遲未上,追問下至發覺漏咗我地個order,好在最後都有得食.....其實未上蟹時我已經熱得滯,入咗洗手間除咗件厚衫,得番件打底既薄身長袖衫.

食完我地都幾滿意,六百幾蚊埋單,係稻香同小肥牛打邊爐都要近五百蚊嘛.希望人家快啲好番,寄望有更多既週年飯局.

ps:唯一要彈既係啲啤酒唔夠凍又無泡,因為佢係被斟定係橙汁jar,方便為客添飲,咁咪影響質素囉.....

TRIANGLE

今晚卒之都睇埋高清翡翠台既"三角追踨"大結局,真係唔睇到最後一集都唔知兇手係邊個.

主要人物唔算好多(同金田一差唔多),但個個都刻意隱瞞自己既背景同口供,要解開廿五年前兼近期兩宗既兇案,真係唔容易.

全套十一集,每集都有一個提名,真係好似小說咁分開一個個CHAPTER,唔錯,而且每集都係以新線索或支線黎吊觀眾胃口.男主角鄉田亮一(江口洋介)十歲時發現同班女同學葛城佐智繪伏屍河邊空地,更被兇從後恐嚇立即離開並不可告知別人,否則會殺死主角.只係聽到兇手聲音既主角為保性命,一直過住提心吊膽既生活,直至事隔25年,案件時限(15年)已過,才返回日本查出真相.

堺雅人飾演既迷之男-志摩野鷹也令我印象深刻,佢既冷笑,苦笑,皮笑肉不笑,非常出色,帶出一股神秘及陰鬱既味道.

ps:原來堺雅人曾為雪風戰闘妖精裡面既主角-深井零配音~

咁都得?

今日行出村口食下午茶時,見到路牌被撞到訓平係地面,唔知撞佢個架車傷唔傷呢?

夢之組合

係屋企度養病,唯有睇埋套幪面超人decade,主角decade造型好差,成身幪面超人咭牌,好似列祖列宗大頭相咁.頭頂又一張,而家玩非洲話事啤咩.唯一令我安慰既,係尾段有black原本既男主角倉田てつを客串,仲要有一幕係balck既南光太郎被denied召喚到rx既世界.兩個南光太郎,一齊耍出變身動作.感動~~

Black同RX兩個我最喜歡既RIDER,同場演出,臨尾仲一齊出rider kick,劃上完美句號.

唔怕貨比貨,最怕唔識貨,你睇吓decade個樣,點頂呀?故仔又唔掂,穿梭多個時空,同其他rider打,但啲rider又唔係由原本既角色扮演....最衰係last一集都好似係無結局咁,都唔知佢想點!